لغز ..شايب له قصة فيها مثل.......؟؟؟؟؟؟

[الاعصار]

السلام عليكم ورحمة الله وبركاته

شايب له قصة فيها مثل=يوم يقدم لملحٍ يعطي حصيل
والهوى ساقه على غير المحل=يم وضحى يافطن اخطى الدليل



تحيتي وتقديري للكل

[راعي البيرق]

صح لسانك يالإعصار ..
أنشهد أنه لغز وارد وسمين .. بس من وروده واضح جداً يالإعصار ..
سأعطي الإخوة فرصة ولا أحطه بين عيونه .. :d:
والله أني أتهدد .. يمكن أرجع واحط رمعتي :d:
فرصة لأم يوسف ..:thumb:

[راعي البيرق]

هاه أحط رمعتي ..:) <-- يمكن رمعته سماويه وهو مزعجنا

[الاعصار]

اخوي راعي البيرق
انا متاكد انك الله لايضرك فاضخ عينه ولكن ان حبيت اللغز يبقى وتريد التاكد من الرمعه ارسلي رساله
تحيتي لك وتقديري

[((عبدالله بن غيث))]

ماني معكم اليوم راسي به الفين شغله أعذروني ..
مع ان راعي البيرق ماخلا شيء......

مشالله عليه انا متأكد انه معه الحل.....
عطنا اياه بس ريحنا ...

:)

[الاعصار]

كحل المحاجر
مرحبا فيك والالغاز صراحة تبي فضوه ولعلك تكون بالغد متفرغ لنا اكثر وترى هالمره نبي منك الغاز لاهنت
تحيتي لك

[الاعصار]

الاخوة الزملاء
اخوي راعي البيرق حل اللغز عن طريق رساله وحب ان اللغز يبقى على الاقل لغاية الغد
صح لسانك ياراعي البيرق والف شكر لما ابديته نحوي وماتعز الا اللي يعزك يالغلا
وانا استاذنكم ولنا لقاء يوم غد باذن الله تعالى

[((عبدالله بن غيث))]

أبشر ياغلاهم بس اليوم جالسن انظم لي قصيده وفكري مب خلي.

[الاعصار]

أبشر ياغلاهم بس اليوم جالسن انظم لي قصيده وفكري مب خلي.
الله يعينك عليها ومعذور يالغلا . ونلتقي بالغد

[العَـــروب]

الاعصار صح لسانك rooose2




فرصة لأم يوسف ..:thumb:



يعني متوقع ام يوسف تجيبه؟ :wallah_hoo:
انا غاسلة ايدي بكلوركس :7ayyoh:

[الاعصار]

الاعصار صح لسانك rooose2






يعني متوقع ام يوسف تجيبه؟ :wallah_hoo:
انا غاسلة ايدي بكلوركس :7ayyoh:
صح بدنك
وانت قدها ياام يوسف وان شاء الله تجيبين الحل

[راعي البيرق]

رمــــعه ..
ولا أنتظر ..:) <-- زلقة مثل حبة الشمري اللي تذكر

[الاعصار]

اخوي راعي البيرق
صح لسانك والمثل (زلقة حبة الشمري)

حبة الشمري كلها جت من “بصري الوضيحي” الشمري والقصة تقول:

ان بصري الوضيحي راح يحج ويتوب الى الله ..وان يتوب عن التغزل والغزل ..كونه مشهور بالغزل ..

وبعد كبر سنه نوى ان يتوب ..

طلب من ابنه لكي يحججه ... وبعد ما سعى وطاف طلب من ابنه ان يحب الحجر الاسود ..

ولكن الحجر الاسود كان مزدحم من الناس ...رجال ونساء ... والرؤوس متقاربه بعضها لبعض ..

فتزاحم معهم بصري وابنه .. وعندما وصل الى الحجر ويريد حبة الحجر ...

اعترض بينه وبين الحجر ...خد بنت جميله كانت تريد حبة الحجر ..

. وفي هذه اللحظه السريعه انبهر بصري الوضيحي من لمعان خد البنت وبدل مايحب الحجر

حب وجنة البنت ....فقالت له البنت حج حج ياشايب ...

. وحاول ولده أنه يرقع الموضوع قال هذا شايب تايه(مهذري) ..

.فخجل الوضيحي وقال يابعد حيي زلقت الحبة ابيها بالحجر وصارت فيك .


..وصار هذا مثل (ازلقت حبة الشمري)







وقال القصيدة :



التايه الي جاب بصري يقنه ... هيض جروح العود والعود قاضي



جينا نحب ونطلب الله جنه ... جنة نعيم يوم يابس الحاضي



ياليت كانت حبتي في معنه ... يوم العيون عن الخوامل غواضي



يامن يعاوني على وصف كنه ... اشقح شقاح ولاهق بالبياضي



الريح لازفرة ولاهي مصنه ... ريح النفل بمطمطمات الفياضي



نهدين للثوب الحمر شولعنه... حمر ثمرهن واقفات غضاضي



والخد ذابوح القلوب المرنه .... براق مزنٍ لاعق اللون ياضي



ياليت لو سني على وقم سنه ... بايام مابيني وبينه بغاضي



أيام جلد الذيب عندي محنه... نصبح وزرق الريش لهن إنتفاضي



ياجرح قلبي جرح وادي وطنه .... غر المزون اللي وطنه وفاضي



البيض قبلي محسنٍ عذبنه... ونمر على وضحى جرا له عراضي



والبيض كم ٍ واحد ٍ يبسنه .... يبسة شماشيل العذوق النفاضي



عزي لمن غر الثنايا كونه .... واركن على كبده كوايلٍ عراضي



الا ارتوى بستان قلبي سقنه... واخضر جنابه عقب يبست الحاضي



القلب غضات الصبايا شعنه .... بنت الشيوخ مخدمين الحياضي



شوفي بعيني والخدم يركبنه .... على زعاع يوم قوطر وناضي



فوق اشقح من زمل ابوها مضنه ... ركبة عليه اتشنطح ٍ باعتراضي



وامشجر من سوق هجر مغنه ... على خياطة نابي الارداف راضي



وين انت يامشفي على طردهنه ... انا طويت ارشاي وقفيت قاضي



انا صدرت ووردهن عقبنه .... على العدو مشرعات الحياضي



احد بوسط النار واحد بجنه .... وترى البخيت اللي له الرب راضي




ويقال ان بصري بعدمارجع قال هالبيتين
ياليتنا من حجنا سالمينا.....كان الذنوب اللي علينا خفيفات
رحنا نبي نخفف ذنوب علينا....وجينا وعليها كثرها عشر مرات


غفر الله لنا وله

[ريال الفسحه]

راعي البيرق


الله لايضرك... :)



الاعصار


ماشاء الله عليك يالغالي

[راعي البيرق]

صح لسانك أخي الحبيب الاعصار ..
ونحن بإنتظار لغز نجلس نحفر وندفن لين نقول تقفى عطنا الحل :d:
ـــــــــــــــــــــــــ
هلا بأبو فسحه .. لا تنظلني :d:<--- راح بالعجه ..