ياللي صعيـب اللغز لاجاك حـــلال........؟؟؟؟

[الاعصار]

السلام عليكم ورحمة الله وبركاته
........................

ياللي صعيـب اللغز لاجاك حـــلال..........خـذ غـطوةٍ فيها المعـــــالم خوافـي
بنت طلــع مـن شانها جملة اعيـال..........مهـمةٍ لتمامــهـا اثنيـــــــــن كافــي
الاول اللـي جـاء مسيره علـى جال..........والثـانـي اللـي وسط هالبنت لافـي

.......................

تحيتي وتقديري لكافة الزملاء

[العَـــروب]

هلا بالاعصار
صح لسانك


طبعا انا الاولى دايما واكثر من يرمع بهالقسم وعلى ماش :)

بس ما يمنع نحاول يمكن تصيب معاي


عندي رمعة الله يكافينا واياك شرها

يمكن يكون الكفن او غطا الميت

الدفن والصلاة يحضرهم عدد كبير
مع ان وجود الميت (لافي وسط البنت) ووجود شخص آخر يدفنه ويصلي عليه بيكون كافي


والله اعلم




دمت بخير

[الاعصار]

بريئه ولكن كثرة مراميعك دليل متابعتك وهذا تشكرين عليه وصاحب اللغز مايرتاح لغاية مايرى الحضور على لغزه
بالنسبه للرمعه مالك لوى
والمهمة يرقى لها عدة عيال والفعل فقط لأثنين
تحيتي لك وانتظر مرماعك القادم

[زاهي]

هلا بالاعصار

صح لسانك


عندي لي رمعه منطبق به كل شي

فهي غطوة عديمة الملامح

والمهمة يقوم به 2 فقط واحد على الجال والثاني على وسطه

بس باقي العيال جاري البحث عنهم
‏ ‏

[ريم الصمان]

لاحول طلعت في راسي ثلاث نخلات ولاحولي حل

بس ابرجع

[أبوطروق]

ودي اقول صلاة الجماعة يالاعصار بس اخاف تطلع سماوي


شكرا

:

[عبدالله الجعيثن]

^
^
وودي اقول ضربة الجزاء بالمباريات

[الاعصار]

زاهي النماصي
مر حبا فيك
انتظر رمعتك يالغلا

[الاعصار]

ريم الصحراء
هلا بك وانتظر رجوعك بالرمعه
تحيت لك

[الاعصار]

ابو طروق
مرورك تشريف لي
وصلاة الجماعه مالك لوى
تحيتي لك

[الاعصار]

اخوي عبدالله الجعيثن
مرحبا بك يالغلا
وضربات الجزاء مالك لوى
تحيتي لك وتقديري

[راعي البيرق]

هلا .. بالإعصار وألغازه الإعصاريه .. :d:
والله يالإعصار عندي رميعه ماهي رمعه بس ابي أقوله ..:d:

وشرايك بالكتابه ..
هي مهمه .. ويطلعله اصابع الكف .. واللي يقومبه اصبعين بس ..
وشرايك .. اذا هي سماوي قل سماوي :d:

[الاعصار]

اخوي راعي البيرق
هلا بك اكثر والرمعه مالك لوى ولكن ماشاء الله تفكيرك حلو الله يزيدك
بنت طلــع مـن شانها جملة اعيـال..........مهـمةٍ لتمامــهـا اثنيـــــــــن كافــي
طلع عندنا تأتي بمعنى رقى
الاول اللـي جـاء مسيره علـى جال..........والثـانـي اللـي وسط هالبنت لافـي
لاتنسى وظيفة الاثنين في وسطها والثاني يمشي على جالها
انتظر محاولتك القادمه

[زاهي]

الإعصار

ماهو مقراض الصلصل


الله يستر

[الاعصار]

اخوي زاهي
مقراض الصلصه
مالك لوى يالغالي
تحيتي لك

[راعي البيرق]

شكر على التنبيه سأخذها بالإعتبار لكن ...


خـذ غـطوةٍ فيها المعـــــالم خوافـي


والله المعالم خافيه جداً
مع ذلك جاري التفكير ..

[الاعصار]

اخوي راعي البيرق
مقدمات الالغاز لاتعوّل عليها كثيراً يالغلا
تحيتي لك وتقديري

[صلفيق]

الأعصار ... الله يصبحك بالخير

صار لي يومين مانمت ،، قاعد أفكر بحل هاللغز


الحقيقة .. لغز أعجبني واااااجد ، ولغز مليان يستاهل من يفكر فيه ..!


من شوي رحت أتوضأ ، وأثناء الوضؤ (وعند مسح الرأس والأذنين) خطر في بالي حل اللغز ..!

السبابة داخل الأذن ، والأبهام على طرفها ..... وشرايك :

جملة عيال = الأصابع .... والبنت = الأذن .... السبابه داخل الأذن ، والأبهام على طرفها

؟؟؟؟


لك أجمل تحياتي ... وعز الله مقدر أفكر أكثر من كذا .

وهالحين ،، ابنتظر للصلاة ، وبعدها بناااااااااام . ويمكن مقدر أصحى الا على الظهر ، وعساي أشوف ردك !


..

[راعي البيرق]

اخوي الإعصار ..
أنا جلبت شطر البيت للإستشهاد بأنك أجدت في إخفاء معالم الغطاوه (اللغز )
وأرى الأن أن أخوي صلفيق قد أجاد في إزاحة خوافي المعالم ..
صح والله لسانك ولسان أخوي صلفيق ..

[أبوطروق]

ماشالله عليك ياصلفيق الظاهر انك جبته

ننتظر رد الاعصار

:

[الاعصار]

اخوي صلفيق

كفو كفو وصح لسانك مليون

تعجبني برمعتك لانك الو حيد اللي حل اللغز بدون اضافة هالبيتين


ياللي صعـيب اللغز لاجاك حـــلال..........خذ غـطوةٍ فيها المعــــالم خوافـي
بنت طـلع من شانها جملة اعيال..........مهمةٍ لتـــــــــمامهـا اثنـيـن كافـي
الاول اللي جـاء مسيره على جال..........والثانـي اللـي وسـط هـالبنت لافي
ماقيل عنها لختها الــــتوم ينقـال..........ومنزالهن طِــــــراف رجلٍ يشافـي
مهـمة ماتنشرى بغالــــــي المـال..........واللي جــفاها مسلك الحـق جـافي


ولم اضف البيتين لاني توقعت راعي البيرق يحله خاصة بعد رمعته الاولى

بيض الله وجهك يالغالي

[الاعصار]

اخوي الإعصار ..
أنا جلبت شطر البيت للإستشهاد بأنك أجدت في إخفاء معالم الغطاوه (اللغز )
وأرى الأن أن أخوي صلفيق قد أجاد في إزاحة خوافي المعالم ..
صح والله لسانك ولسان أخوي صلفيق ..

بارك الله فيك يالغلا وصح لسانك على تأكيد الحل ورمعتك الاولى جعلتني اتاخر بالايضاح .
واخوي صلفيق الله يزيده ماقصر
تحيتي وتقديري

[الاعصار]

ماشالله عليك ياصلفيق الظاهر انك جبته

ننتظر رد الاعصار

:
تأييدك بمحله صح لسانك
تحيتي لك

[صلفيق]

أخواني ..
الأعصار / راعي البيرق / ابو طروق

الله يمسيكم جميعا بالخير

وصح الله السنكم ..

الحقيقة ياراعي البيرق إنك أنت من هداني للتفكير حول اليد واستخداماتها ، وعند وضوؤي .. جائني إلهام الحل !

ولكنه والحقيقة تقال ، بفضل الله ثم بفضل تفكيرك ورمعاتك التي تقربنا أو تدلنا على الصواب .

ياراعي البيرق .. أنا أعتبر انك انت من حل اللغز .

لكم جميعا وكل من شارك كل الشكر والتحيات .

[راعي البيرق]

صح الله لسانك ياصلفيق ويا الإعصار
وحلات الالغاز مثل كذا ...


مزارق ذيابه .. :)


الإعصار لو جبت الكماله ما إنتظر صلفيق وقت الوضوء
كان حله من قبل ..


يعطيكم العافيه ..

[سلمان النبهان]

تسلم يالاعصار واسجل اعجابي بذكاء صلفيق وحله ..
وننتظر الجديد الرائع منك يالاعصار ..