ياصالحة يم دوارة ..............

[المطني]

غزى صياح المرتعد ومعه اربع مية ذلول وتصادف هو وعوده ابو تايه ومعه حول الأربع مية ذلول بعد

وهم يغزون جميع يوم خذوا لهم مرواس وهم يغدون وهو يرقب عوده ياولله هذي البل ولا معه الا له

ثنين يسوقونه ولا معهم احد قال ياصياح ابشر بالفود وهم يركبون ركابهم وهم يغيرون عليهم يقول

صياح المرتعد التفت حديهم وشافنا وهو يطرق على ذلول ابو تايه وهو يضربه يامار من صيد امس

وهو يضرب ذلولي يا مثله يقول والحويطات يركبون ابو تايه وانا يركبونن اليمنة وحنا نغير عليهم يقول

وهو يعمل بنا مثل المرة الأوله وحنا نركب ونغير عليهم ثالث مرة يقول وهو يعمل بنا مثل المرة اللي

قبله كلهن يذبح ركابنا ولو يبي يذبحنا كان ذبحنا يقول وهو يدربل عليه عوده قال ( اخسيه اهب ما

اقشر وجهك ) يقول وهو يركب عوده الرابعة وهو يغير عليهم يقول وهو يصوت علينا قال ياعوده ترن

ما ابي اذبحك مار فكن من شرّك ترن ابي احطه بغزال الشداد يقول وهو يطرق على غزال الشداد

( الغرابة ) وهو يضربه يامار يطير من عند خشم عوده يقول وهو ينكس عوده وهو يصوت عليه قال

اسألك بالله انت من انت قال انا علوم الدريبسي قال وخويك قال سند بن عبيان ( علوم من الثنيان

من الزميل وسند من الشلقان من الزميل ) طبعا الشمامرة غزو وكاسبين لهم كسيبة وخوياهم

بعيد عنهم شوين والكسب ما معه الا هالثنين لكن يسدون . قال عوده لخوياه انكسوا وغدوا على

كرمة هالشمري .ياولله علوم الدريبسي له عشقة اسمه صالحه وسامعن به ابو تايه وهو يقصد

يقول

يا صالحه يم دواره = عين الغزيل ليا سجي

مانتي من البيض قماره= اصدق من اللي نوى الحجي

يابطن حمراء مع الغارة = حــوايـــة الطرش لاهـــجـــي

لك صاحبن يجدع الشاره = والدم من مضربه مجي

والبيت الاخير شاهد القصه

[الكاسح999]

لاهنت يالمطني

سالفه طيبه من وجهٍ طيب

[ابو رفحاء]

[SIZE="4"][COLOR="Wheat"]المطني سالفتك حلوة مثلك
وتسلم على نقله خاصة بالشواهد اللي هي ملح السالفة

علوم راعي الكحله
قد قيل

علوم ياحامي الهجني
ياحولوا بالبواريدي

[راعي الوقيد]

تسلم كاتبنا العزيز المطني

سالفة طيبة من طيب

والف نعم بالزميل

لك التحية

[مشــــعل]

تسلم يالمطني

وسبعة انعام بالجميع

الله لايهينك rooose2

[ماجد علوان]

المطني

تسلم يالغالي
سالفة طيبه والاطيب ناقلها

الله لايهينك

[السفاري]

لاهنت يالمطني

هذي السالفه جاله ذكر بديوان السديري عاد الديوان عامر من
كل القبايل وسئل السديري ابن خمسان من اقوى شمر ولا عنزه
قال ابن خمسان انا جيعان وعقب الاكل اعلمك وعقب الغدا قال
ماعلمتنا منو قال ابن خمسان انا مكوبر يالسديري قال من منو
صياح المرتعد وذكره صياح السالفه اما صالحه مره من الزميل عاشقه
علوم يوم شاف ابو تايه فعل علوم ذكره
_________________________________________________

سولف لي شايب سالفه ان الامير سلطان وئورنس الشعلان
يقنصون بالشمال وشاف سلطان اهل اباعر وسءل قال من اقوى
شمر ولاعنزه يمر ئورنس بجنبه صاد عنا تقل ماوده يسال الامير سلطان
قال الشايب من الرخيص واللي معه ابو الشايب اللي سولف السالفه
والله يعنزه ماتعدا الحد راصينه فوق

لاهنت يالغالي

[المطني]

الأخوان الإعزاء

الكاسح999

ابو رفحاء

راعي الوقيد

مشعل الغفيلي

ماجد علوان

السفاري

مشكورين على المرور ولاهنتوا ياهالوجيه

من طيب معدنكم واصلكم قلتوا هالكلام الطيب

بس ماهي غريبه على بني عمي شمر انتم هل الكرم والطيب والحمية

[زاهي]

تسلم اخوي المطني على هالموضوع الحلو


بس انا كأني قريته هناا بس موضوعك اكثر تفصيل ومع الشوااهد


والسابق به شي بعد ماهو هنا

عافاك الله يالغالي




اخوي السفااري

شكرا لك

بس اكثر كلامك مافهمته -عذرا- ياليت لو توضح اكثر.

[المطني]

هلا بك يازاهي

مشكور على المرور يالغالي

بالنسبة لكلام السفاري وخاصة الأخير لعلي اوضحه لك

السالفة صارت مع حسن بن رخيص من جهة والملك خالد والأمير سلطان والشيخ ورنس بن شعلان من جهه رحم الله المتوفين واطال عمر الحي. سأل الملك خالد حسن بن رخيص اي شمر وعنزه اطيب قال حسن

كان ال سعود والصباح والخليفة مع عنزة فعنزة اطيب وكان ماهم معهم فشمر اطيب قال الملك خالد لا ماهم معهم قال حسن زاد شمر اطيب قال وش دليلك قال حسن نوبتين اللي نسوقهم ياما نجيبهم للبلقاء الأولة

بالجميما والثانية بكون الجوف يقولون وهو يلتفت الملك خالد الله يرحمه للشيخ ورنس بن شعلان الله يرحمه قال تشوف ما قلتلك ياورنس ( طبعا حسن اثناء نشدة الملك خالد له مايعرف ورنس ولا يدري انه هو اللي

عنده ولا كان ما حكى ) قال ورنس الله يرحمه خالي صادق بكل اللي هو قال بس لو هو مكمله وقايلن حتى انتم سقناكم ياما وصلتوا الكويت كان كمل هرجه يقولون وهو يزعل الملك خالد الله يرحمه وهو يقوم وهو ينفض

المجلس وحسن يروح لهله . هالسالفه وهم قنوص باللبه هاللي شمال من عذفاء

[صلفيق]

أخوي المطني .. لاهنت على هالسالفة ، بس الصحيح اني مع رأي أخوي زاهي النماصي ،،، فلقد قرأت السالفة هذي في هذا المضيف منذ فترة طويلة ، ولكن اللي قرأته أن السالفة بين صالحة (عنزية) وبين دبي النجباني (من التومان) ، عندما قصدت صالحة:
ياشـــين ماتويق يــــادبي ..... على المحينات لك نوبه
ماتشوف انا الزمل عذب بي ..... هـــياج والقــيد عيوبــه

ويمكن الرجوع إلي الموضوع والبحث عنه في أوائل الصفحات ،، والرد على كاتب الموضوع ، فالموضوع ليس كما قال أخي زاهي النماصي (أكثر تفصيل) ،، بل هو إيضاح للحقائق وحفظ للسوالف .

أعتب حقيقة على أخواني راعي الوقيد ومشعل الغفيلي ( كونهم من قدماء الأعضاء ) ولابد أنهم قرؤا الموضوع الذي أعني ، ولكنهم لم يتطرقوا للنقاش ..!

شكرا لك أخوي المطني على سعة صدرك ، ولي عودة بعدما أجد الموضوع لنقله هنا ومناقشة أي الموضوعين أصح ، أعذرني .. فأنا لاأجامل .

تحياتي لك يالغالي .............

[اسير الشمال]

اخوي المطني لا هنت على ادراج هذه القصة التي يفتخر بها كل عربي اصيل

وانا مع الاخوة اللذين ذكروا بانها مساجلة بين الفارس دبي من شمر وبين صالحة من المحينات دهمشية عمارية .. ويومن ضر بها الزمل قالت :

ما تويج يا شين يا دبي = على المحينات لك نوبة
الزمل هياج وعذب بي = والعقل بالبيت عيوبه


ودبي هو رئيس احد المجموعات ( كما يسمونهم الزقرت ) وليس شيخا بعرب

وجاها ويقول لها اعقلي بعيرك واخذ الباقي وقالها :

يا صالح يا ام دوار = عين الغزيل ليا سجي
منتي من البيض مكارة = اصدق من اللي نهج حجي .. الخ

والقصة كبيرة ولا تذكرني اخرها

ولكن الصقور ردوا الحلال من دبي وجماعته وقصدت حدا الصقريات على نفس طاروق دبي وصالحة

اشكرك

[المطني]

الأخ صلفيق

حياك الله يالغالي بالعكس النقاش هو اللي يثري الموضوع وحنا كلنا نبحث عن الحقيقة

لكن قصة دبي تختلف اختلاف كلي عن قصة عوده ابو تايه وعلوم الدريبسي وعشقته صالحه

دبي نخته المحينيه ولا ادري هل اسمه صالحه او لا وغزى على العنوز وخذا زملهم وبعدين ما لحق

دبي عشقة البنت المحينية وذبح من قوم دبي رجال او ركاب حتى يشوف دبي فعله ويمدحه لصالحة

لكن سالفة علوم الدريبسي معروفة وثابته ومنقولة عن صياح المرتعد يوم هو يجي عند ماجد بن

عبيان ولد سند خوي علوم بالسالفه وكان عندهم الحميدي بن فياض الشلاقي وهو اللي نقل لنا

السالفه لأن صياح سولف السالفة على ماجد والحميدي موجود عندهم وسولف السالفه على عمي

وانا نقلت السالفه عن عمي فالسند متصل بيني وبين صياح المرتعد واللي نقلت السالفه عنهم

كلهم ثقات وهذه شهاده من صياح على السالفه وهو خصم ( والحق ما شهدت به الأعداء )

وتقبل تحيات اخوك المطني

[راعي الوقيد]

أعتب حقيقة على أخواني راعي الوقيد ومشعل الغفيلي ( كونهم من قدماء الأعضاء ) ولابد أنهم قرؤا الموضوع الذي أعني ، ولكنهم لم يتطرقوا للنقاش ..!

اشره على الطيب ويشره عليّه ** بيت يمثل قالة الشيخ راكان

والله يالعزوة انا عن نفسي ماوالله ادري وش عشاي البارح

لكن اللوم على:wallah_hoo:مشعل الغفيليshlwee7

الموضوع اللي انت ذكرت هذه هو على هالرابط

ومن حمد ربك هو كاتبه << حطه بحلقه:qannaj:

http://www.shmmr.net/vb/showpost.php?p=318992&postcount=1

اتمنى انه يثري الموضوع

ولكم التحية

[مشــــعل]

حياكم الله

السالفه اللي ذكرتو يااخوان فاطنن له
خصوصا انه منزله باسمي

لكن قصة دبي النجباني مثبتاه به الابيات
اللي يقلن : ياشين ماتويق يادبي

بس الابيات الثانيات اللي يقلن ياصالحه يام دواره

انا سمعت انه قاله دبي بالعنزيه وذكرتهن بموضوعي
لكن ماني متاكد

لاني سمعت من شخص ان القايل قنياوي وليس دبي
واخونا المطني ذكر الابيات السابقات انهن بعلوم الدريبسي

لذلك ماحبيت اني اناقش اخونا المطني بهن
لان ماعندي اكيد

لعل وعسى يمر علينا الراوي

[صلفيق]

والله ياعزوتي .. أنا مجرد قاريء

ولكن لنقتفي الحقيقة !

ومالنا الا مسيار على أبو فهد لعله يفيدنا .

[خالد الشمري]

تسلم كاتبنا العزيز المطني

سالفة طيبة من طيب

والف نعم بالزميل

لك التحية

[المطني]

هلا بمشرفنا العزيز

الأطيب هو مرورك

تقبل تحيتي