المساعد الشخصي الرقمي

مشاهدة النسخة كاملة : سؤال اذا تكرم بن غسلان


سعد الشمرى
13-01-2008, 03:49
السلام عليكم ورحمة الله وبركاته


الاخ فواز بن غسلان ولايهون الجميع سمعت بان جدك له مساجله مع احد شعراء شمر هاك اليوم ويشهدالله انى ما حفظه امنه ولا شطر بيت

فهل من الممكن تجزينا منهم ولا قصيده يالعزوه وعلى فكره سمعتها من شايبن حسينى وهو كبير بسن ومالى مونتن عليه

وشكرا وزنت ولاهنت يالعزوه
الرطاب
فواز الغسلان
13-01-2008, 07:40
السلام عليكم ورحمة الله وبركاته


الاخ فواز بن غسلان ولايهون الجميع سمعت بان جدك له مساجله مع احد شعراء شمر هاك اليوم ويشهدالله انى ما حفظه امنه ولا شطر بيت

فهل من الممكن تجزينا منهم ولا قصيده يالعزوه وعلى فكره سمعتها من شايبن حسينى وهو كبير بسن ومالى مونتن عليه

وشكرا وزنت ولاهنت يالعزوه
الرطاب





هلا وغلا اخوي الرطاب وحياك الله00

نعم له مساجلات عديده مع صديقه العزيز الشيخ راشد بن مشعان بن فزير من الجعفر

من شمر وهو امير الجماعه في بقعاء الشرقيه رحمهم الله جميعا 00

وابشر باللي تبي لكن ابي اطلع للدوام الان والظهر ارجع واكتبهن بهذا لفائدة الجميع00

ومن هنا للظهر ابي احط قصيده لي توي كاتبها تونسك لين الظهر يالعزوه000



كان حـبـك فـاق لـيـلـى الـعـامـريه=صـبـرنـا غـطـى عـلى صبر المـهـادي
وكان حــددتـي لـنـا عـيـد الضحـيه=هـجـرنـا يـاتـيــك فـي ثـانـي جـمـادي
وكان شـديـتـي على كـور المـطـيـه=وعــن لـقـانـا رحـت لـدروبـن بـعـادي
رحـلتي عـبـر الخـطـوط الهاشـمـيه=والــتـــذاكـر دون عــوده لـلــبــلادي
وكان جـبـتـي لي جـيـوشن فارسـيه=سربـتـن تـنـقـل شـطـيـرات الـهـنـادي
جـبت لك عـشرة جـمـوعـن وايـلـيه=يـودعـون جـمــوعـكـم مـثـل الرمـادي
وكان جـبـتـي لي عـن الفرقى هـديه=قـبـلـهـا هــاتـي وصـولـك بالـسـدادي
الـوفـاء ماهـو ريـاحـن مـوسـمـيـه=لاجـل تاعـدنـي عـلـى وقـت الحـصادي
ان تحـمـبـلـنـا رجـعـتي شـافـعـيـه=وان تـحـضـرنـا نـزلــتـي بـطـن وادي
والله ان الـهـجـر يالـغـالي خـطـيـه=والـمحـبـه عـيــبـهـا كـثـر الـعـنـادي
لـيـن صـابـتـنـي هجـوسـن باطـنـيه=تـنـهـش الخـافـق مثل سـرب الجرادي
وصار مـيـعـادك وعـود الـكـاولـيه=بـيـن وقـت الصيـف ووقـوت الـبرادي
الاشـعـه صـورتـه تـطـلـع خـفـيـه=نـقـطــتـيـن وبـاقـي الـصوره سـوادي
قـلـت له هـذي خـطـوطن هـاتـفـيـه=والـطـبـيـب يـقـول هــذا شـي عـادي
ثـم قـاس الـضـغط في راحة يـديــه=وعقب تخـطـيـطـه كفخ ضغطي وزادي
تـقـل يـطـرد مـن جـنـود الـداخـلـيه=والـمـواتـر تحـتــهـم شـهـبـن جـدادي
قـلت جـرب لـي اشـاعـه مـقـطـعـيـه=واظـهـرت وسط الحـشى كله سـمـادي
قـلـت نـار الـزيـن وضـاح الـثـنـيـه=قـال لـي هـذا سـبـب هـرج الـسـرادي
قـلـت تـصلـح لـك عـيـاده بـيـطـريه=تحـفـظ الـمـعـزى عـن دروب النفادي
قـال والـلـه جـبــت فـكـره عـالـمـيـه=لازم افـتـحـهـا عـلـى سـوق المعادي
اشـهــد ان حـظـوظــنــا دايـم رديـه=دايـمـن يمـشـي على شـوك الـكـتـادي
لو بـغـيـت ارفـع عـلـى حـظي قـضيه=قـال مـالـي ذنـب بـطـبوع الـعـبـادي
الـصـداقـه صـار فـيـهـا قـلـب نـيـه=اكـثـر الـرفـقـه غـدى مـاهـو جـوادي
دام بـعـض الـناس يـطـعـن فـي خـويه=وهـم رجال وبـيـنـهـم مـلحـن وزادي
الحـسـد والحـقــد عـنــد الـغـالـبـيـه=يحـتـرق قـلـبـه وهـو بـالـشـكل هادي
يـتـصـل يـنـخـاك لا شـاف الـبـلـيـه=مـن سـنـيـن الجوع لا صارت شـدادي
وان خـدمـتـه جـاك مـن كـفـه عـطيه=بـنــدقـن تـقـدح مـثــل قـدح الـزنـادي
ان تركـت الـمـرجـلـه شـرهـوا عليه=وان خـدمـتــه قـام شـيـطـانـه يـنـادي
لاتـلـوم الـخـشـف زيـن الـقـابـلـيـه=لـو رحـل عـن داركـم ظـبـي الحـمـادي
الـعــذارى كـالـورود الـطــايـفـيـه=عـقـب سـاعـة طـيـب تـرجـع للكسـادي
شــم ريـح عـطــورهـا دامـه نـديـه=وان جـفـاك اكـفـخ مـثـل طـير الهدادي
كـان هـو خــلاك فـي جـال الركـيه=لـيـن طـاح الـجـسـم مـن شـوقـه وبـادي
ارتـحـل حـروة شـطـوط الـلاذقـيـه=وشـف عـلـى شـطـه جـمـيلات المـقادي
عقب ركضك في سـهـالـن جـرهـديه=ولا تـفـك الـروح مـن لـســع الـقـرادي
او يـجـيـك الـداب طـيـه فوق طـيـه=مـا تـفــك الـروح فـي جــدع الـهـوادي
خـذ نـصـيـحـتـنـا تـراهـا واقـعـيـه=وافهم انك في رجى الخـفرات غااااادي
حمتو
13-01-2008, 09:04
السلام عليكم ورحمة الله وبركاته
بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين


وأنا أطلبك إن كان تعرف لابراهيم الشويعر

د.حمتو
سلمان النبهان
13-01-2008, 10:09
تسلم ابو فهد وصح لسانك قصيدة جميلة رائعة
ونشدد على طلب الرطاب وننتظر ادراجه يالغالي
اكرر الشكر للاخ الرطاب وحضورك يابن غسلان ...
شموخ
13-01-2008, 11:42
وكان جبتي لي جيوشـن فارسيـه ......سربتن تنقـل شطيـرات الهنـادي
جبت لك عشـرة جموعـن وايليـه .........يودعون جموعكـم مثـل الرمـادي



مثل الرمادي :thumb:

قصيده رائعه يابو فهد ..


تحياتي
خلف الرويتع
13-01-2008, 15:03
ابو فهد ممكن اسئلك لماذا لم تشارك في شاعر المليون
سلمان النبهان
13-01-2008, 15:49
نيابة عن ابو فهد
مساءك الله بالخير يابو عتيق ومبروك الخير اليوم عليكم
وعدم مشاركة ابو فهد بشاعر المليون عامل السن يالغالي
سعد الشمرى
14-01-2008, 00:44
صح السانك يا بوفهد وانا اشهد
او يجيك الداب طيه فوق طيه = ماتفك الروح فى جدع الهوادى

صح السانك يا ابن غسلان وانت من حموله اجواد وربكم الله


وننتظر قصايد الاجواد يا الاجودى يا بن غسلان زنت ولاهنت
خلف الرويتع
14-01-2008, 01:09
هلا وغلا:7ayyoh: يالعزوه والحمدالله على هذا الخير وعسى ان يكون سقيى خير على جميع مناطق المملكه حرم عليك ياسلمان ابو فهد توه صغير سنه المليدا وهو يسرح بالغنم بس العشق مكبره شوي والرطاب رثعبه قام ينشدوه يحسبه شايب
فواز الغسلان
14-01-2008, 04:17
السلام عليكم ورحمة الله وبركاته


الاخ فواز بن غسلان ولايهون الجميع سمعت بان جدك له مساجله مع احد شعراء شمر هاك اليوم ويشهدالله انى ما حفظه امنه ولا شطر بيت

فهل من الممكن تجزينا منهم ولا قصيده يالعزوه وعلى فكره سمعتها من شايبن حسينى وهو كبير بسن ومالى مونتن عليه

وشكرا وزنت ولاهنت يالعزوه
الرطاب






تفضل اخوي الرطاب هذا اللي قدرت اكتب الليله يالغالي000





راشد بن مشعان وفهد الغسلان والصداقه الحق000

راشد بن محمد بن مشعان بن فزير من الجعفر من شمر كانت تجمعه صداقه حميمه مع فهد

بن حمد الغسلان البقعاوي وقد جمعهما الشعر والكرم وتقدير الناس واحترامهم لهذين الشخصين

وذات يوم وفي عام 1350 للهجرهقرر راشد السفر متغربا للعراق بسبب الفقر وكثرة الدين عليه لكرمه رحمه الله00

بقي راشد بالعراق عشر سنوات لم تكن موفقه وقد انقطعت اخباره عن اهله وظنوا انه مات وكانت

والدته تبكي دائما على ذكراه00

وكان فهد الغسلان يواصل اهل راشد ويزورهم لعله يجد خبرا عن راشد وذات يوم كان فهد عندهم في

المجلس واخوان راشد يصنعون القهوه وعندما صبوا الفنجال الاول لفهد سمع صوت بكاء ام راشد في

الداخل فنزل الفنجال وقالوا يافهد تقهو قهوتك فقال:



قالوا تقهوى قلت ماني ولا اياه=البيت ماله قبلتن عقب راعيه
لاماتـدالـيـت الفـنـاجـيـل وياه=مادلهن عن شوف وجهه عزاويه
لو هم كرام وياصلون البعيداه=القلب مايغصب على غير طاريه
وش هقوتك يامدله القلب ياناه=بمـوجـلـن لـقـى المرابي علابيه
هو يطري الجيه حري نتحراه=او موقعه ماجاء المـنجـم حواليه
ياما قـعـدنـا يوم الايـام عـدلاه=يوم الخزز يرعى الخزاما بأذانيه
ونركض واذا صدنا الجراده شويناه=ومن كايد الدنيا على الطول تفنيه
واليوم مدري وين الايام تقداه=لا عاد هو وده بشوفي وانا ابيه
يالله لاتقـطـع شـفــي بلامــاه=انت الذي تقدر ترده وتـثـنـيــه
ريف الضيوف اذا تناخوا حلولاه=وين الكريم اللي بعادن مناويه
يحط ماجوب النشاما مع الشاه=وله عادتن بمعطل الجوع يغديه
وحياة من كل الخلايق ترجاه=يعطي ولا يبخل على اللي يراجيه
لو اني اقدر لاودع الجدي لي جاه=من فوق مايدني بعيد المهاميه
ازرق وقضاب الدركسون يقداه=تسمع مع الشكمان صوتن وتدويه
وابي آصله لو هو ورى اقصاه وادناه=واخبره علم الحنين وعناويه
عن فاطرن له تزعج الصوت بعواه=تقنب قنيب وباقي الصوت تخفيه
اما يجــي والا على ماهـقـيــنـاه=الروض ريف والخلا من تواليه


كان راشد في العراق لم يجمع شيئا من المال ولكنه بلغ منتهاه وقرر العوده لبقعاء لو مامعه

شي من المال فقرر زيارة بيت عيال سعود ابن رشيد بالعراق لعله يحصل فقط زهاب العوده

منهم لكنه لم يجدهم وكان خادمهم يقال له (ابن عيـيـد) وعندما تقهوى راشد قال له الخادم ليش

جالس فقال راشد انا ضيف حسب السلوم الطيبه فقال الخادم السلوم الطيبه راحت مع اهله فقام

بدفعه للخارج وعندها اكتملت مراحل الغبن عند راشد فالاهل بعيدون والغربه لم يكسب منها مالا

وليس معه حق العوده وزادها الخادم بتعامله المهين فقال وهو عند باب عيال الرشيد:



حبر الشفى من عض الانجاد يامعين=من شان دكاتن عسى الله يهينه
الله من قلبن غـدى ألفـيـن وألـفـيـن=غــدى شـتـات وبـيـح الله كنينه
قـلـب العـناء زادت عليه الشواطين=مـامــرتـن يطرب تجيه السكينه
ان جـاه لـيـل صرف الليل لـيـلـيـن=وان جاء نهارن زاد همه غبينه
من الهجس والهاجوس وامراض توذين=يبرم كما تبرم سلوك المكينه
ومن ضيقتن بالصدر جيت الدياوين=ابي الوناسه والوناسه ضنـيـنـه
اجلس مع المجلس ولا احدن يحاكين=وابدي كلام وكلمـتـي كارهـيـنـه
لاديـنـهـم ديـنـي ولا الـديـن من دين=دورت من جنسي ولاشوف عينه
وابـن عـيـيـد مـع سواده سواديـن=له شاربن يـسـتـاهـل ألفين فـيـنـه
الخـايـب الخـنـزيـر سـيـد الحياوين=لقيت مخراج الردى هـو مـعـيـنـه
لومـي عـلـى هـكـالـصـواريم الاثنين=مايفـهـقـون الـعـبـد يــم العجينه
الـمـلك ماياتي بعـبــدن وعـبــديــن=الا بجـمــعــاتــن يـعــزل كـمــيـنه
حكم العـبـيـد اذهـب ربوعـن قــديـمـيـن=وحكم سعيد وفاطـمـه خابرينه
لولا العنى ماكان جـيـنـاك عـانـيــن=قـلـنـا زمانـن مـاضـي مع سنـيـنه
ويـن الصـديـق اللي يودن يـشـاكـيـن=يكشف على ما بالظـلـوع الدفـيـنه
مـثـل فـهـد يـنـظـر بحـالـي ويـبـريـن=يـبـري هـواجـيـسن بقـلـبي كمـيـنه
يابوحـمــد عــزاه ويـنـك وانـا ويــن=بـيـنــي وبـيـنــك مايـبـيــد السمينه
عـزاه يارجـلـن ربـوعـه بعـيــديــن=يصبر عـلـى الكايد ونـفـسه مهـيـنـه
عـفـت الـبـلاد وعـفــت ناسـن عزيزين=خـلـيـت جـرد الـدو بيني وبـيـنـه
ماهـو طـلـب فـرقـى الاهـل والـمـحـبين=لاشك تدبـيـر الـولـي قـابلـيـنــه
حـدن عـلـى فـرقـى الاهـل دفـتـر الـديـن=عـزي لـمـن مـثـلي حلاله رهينه
وجـدي عـلـى هـكـالـبـلاديــن وجـديـن=وجـد الخلوج اللي يهجرس حـنـينه
يالله طلبتك خـيـر دنـيـاك والـديــن=ياعـالـمـن بـاسـرار زيـنـه وشـيـنـه
ادعـوك بأسـمـاك الحـسـيـنـه وياسين=وايات لو تاتي الـرواسـي تـلـيـنـه
اللي رزق داب عـمـى مايخـلـيــن=ادعــوه يلـطــف بـي ويـنـظـر بعـيـنـه


وعندما عاد راشد لاهله بعد عام من القصيده ذهب مسرعا ليرى صديقه فهد لكنه تفاجأ ان

البيت خالي واخبروه ان فهد رحل للسكن بحائل فجلس على عتبة الباب مصدوما لذلك وقال:



ابدي بذكر الله على كل ماابديت=الواحد الفرد الصمد ماله اشراك
عالم دبيب النمل تحت الصواميت=ياعالمن غيبك ولاشي بيخـفـاك
يالله تغفر لي ذنوبي اذا اخطيت=ياواحدن ماخـاب عـبــدن ترجـاك
الصدر ضاق وضيقته يوم سجيت=ياشينها من ساعـتـن مالقـيـنـاك
جيت المكان ولا لقيتك تـنـبـيــت=لاشك هـذا مـن تصـاريف مولاك
يابوحـمـد لو كان عنا تـنـحـيــت=لو شـمـت عـنـا مالك الله ننساك
عساك مصحوب السلامه الياالفيت=ارجي من الله يحفظك ثم يرعاك


وعندما علم فهد الغسلان بعودته هرب من اخوانه الكبار الى بقعاء ليكملوا صداقتهم الطاهره

رحمهم الله تعالى000 الراوي ابن غسلان 5-1-1429للهجره
ابو عمار000
14-01-2008, 13:40
قصة وقصائد اكثر من رائعة وان دلت فهي تدل على طيبهم و وفائهم لبعضهم رحمة الله عليهم اشكرك اخي فهد جزيل الشكر على ماتطرحة واقول لك ( واصل بدون اي فاصل )...........
سعد الشمرى
14-01-2008, 16:03
ان بعض القصائد به عبره ولو نفكر اشلون كان يزور الخوى خويه لو هو غايبن اعنه يا كود يكون اهل البيت بحاجه ويا كود ان يسمع من ورا الباب حال اهل خويه بعد غياب عمود البيت


وهذا خير دليل على ان جدك يا ابن غسلان وده يعرف حزنهم يوم يقول
عن فاطرن له تزعج الصوت بعواه = تقنب تقنيب وباجى الصوت تخفيه


ولا عن التعلله ما وده به بعد افراق خويه والله يا بن غسلان الاولين هرجهم حكم وقصيده حكم

رحمه الله على الشاعر الوالد فهد الغسلان وعلى المسلمين

وزنت ولاهنت يا بن غسلان

وحنا كما يقول الرسول صلى الله عليه وسلم نحن قومن اذا اكلنا لانشبع وطامعين من قصايد الغسالين ليتك ياقى

زنت ولاهنت وشكرا
خلف الرويتع
15-01-2008, 00:41
الرطاب مشكور والله سويج ابو فهد عندك خليته يطلع الذهب من التجوري مشكورين الرطاب والراوي ابو فهد على هذا الموضوع الرائع ونستنا والله يالغسلان بسيره جدك
فواز الغسلان
15-01-2008, 08:42
الرطاب مشكور والله سويج ابو فهد عندك خليته يطلع الذهب من التجوري مشكورين الرطاب والراوي ابو فهد على هذا الموضوع الرائع ونستنا والله يالغسلان بسيره جدك





وانت وش هالسوالف اللي فوق توي شفتها يابوعتيق

منهو اللي سنة المليدا ؟ او بس تبي تخرب سوقي عند البنات الله يهديك يابوعتيق؟؟

يااخي بدل ماتحسدوني على زيني وشبابي اطلبوا الله يرزقكم مثل اللي رزقني افضل بزعمي0

كلام اخوي النبهان صحيح لكن مااصلح لبرنامج المليون لانه للاعمار من 25-35 سنه وانا الان

اربع وعشرين وخمس شهور يعني باقي ست شهور واكمل السن النظاميه عندهم00

ههههههه ابوعتيق انا عمري 42 سنه بالضبط يعني ماني شايب

مثل ماتقول يالبطول لكن البرنامج نفسه قوانينه مااوافقها لكون الحكم للتصويت

وليس لكفاءة الشاعر واشعاره وهذا هو السبب لكن لو كان الحكم للجنه

كله دون مراعاة التصويت كان اشتركت فيه000تسلم والله










وسـط روض الـقـلــب وفـلـوقه=ارتـفــع مـبـنــاك وابـراجه
واخـتــلــط ورده وزمــلـوقـه=فـي رفـوف الـقـلـب وادراجه
تـنـكـشــف بالـمـزن وبـروقـه=لا شـعـق بـالـلــيــل لــعــاجـه
مع شـعـاع الـشـمـس وشـروقه=وريحـة الـنـسـمـات لا هـاجـه
تـطـرب الـلـي شـال طـاروقـه=وسـط روضـن مـثــل ديـبـاجـه
والـمـحـبــه فـيـه مـطــبـوقه=بـحـرهـا مـاتـركــد امـواجـه
الـمــداخـل فـيــه مـغــلــوقـه=ومـخــفــي دربــه ومـخـراجـه
وكـامـل الـبـيــبــان مـوثـوقـه=ومـع قــفــول الـقلـب مـزلاجـه
لو حـكـى بالـنـاس مـطـفـوقه=وزاد غـيــظ الـنـاس واحـراجه
مـاوطـتــهـا رجل مـخـلـوقـه=وغـيـر عـيـنـك فـيـه مـاداجـه
يـاهـنـوفـن زان مـنـطـوقـه=وفـي هـروج الـعـشـق مـغـنـاجـه
والـمــلابـس ظــاهــرن ذوقـه=مـثــل زول اريـام قـرطــاجــه
ارحــم الـلــي ذاق خــازوقـه=يـاعـشــيــرن طــاع هــراجــه
لـيـن ذاب الجـوف مـن شـوقـه=وانـت مـوت الـقـلـب وعـلاجـه
فـرحـة الـخـفــاق مـسـروقـه=وللـهــمـوم الـعــوج مـدهــاجـه
ودمـعـتــه بـالـلـيـل مـدفـوقـه=يـنـتــظــر مـولاه وافـراجـه
مـاتـشـوف الـقـلـب وفـتـوقـه=وضايـعــن يـمـشــي بـلا حـاجه
ذاق مـن جـور الـهـوى عـوقـه=يقـصـف الخـافـق بـمـيــراجه
وكـان قـلــبــك نـاوي بـوقـه=ذقـت نـقــص الـعـقـل وسـهـاجه
وان وصل جـمـرك لـمـعـلـوقه=وانـطـفــت دنـيــاه وســراجـه
احـفـروا قـبـري بـشـاهـوقـه=واكـتـبـوا بالـقــبـر مــن زاجـه
مـكـسـبـه لـبـنـه وطــابـوقـه=وهـو جـزاء اللي ضـاع مـنـهاجه
خلف الرويتع
15-01-2008, 12:50
تسلم والله يا بو فهد والله يعطيك طوله العمر بس تخبر حسادك كثار المزيون ديم يجد المضايقات :solh: :):315r:

ابو فهد انت راوي المليون وتملك ملايين القلوب


ياهنـوفـن زان منطـوقـه

وفي هروج العشق مغناجـه
سعد الشمرى
16-01-2008, 02:46
صح السانك يا بوفهد وقصيدك يبهج وليت جرزه تعدت 15 كان عطيته لك تستاهل يا بن غسلان

ومشكور ومهرها هالقصيد الى يشوش الراس له

زنت ولاهنت يا بن غسلان
فواز الغسلان
16-01-2008, 05:46
صح السانك يا بوفهد وقصيدك يبهج وليت جرزه تعدت 15 كان عطيته لك تستاهل يا بن غسلان

ومشكور ومهرها هالقصيد الى يشوش الراس له

زنت ولاهنت يا بن غسلان





حياك الله اخوي الرطاب لاهنت والله00


وقال محمد الخميس موجها القصيده لفهد الغسلان:



ياراكبن حـــر يبوج الــوطــى بــوج=يقـطــع رهــاريه الدجى بأدلاجي
حر صخيف الفخذ والصدر مفجوج=والبطن من ضمره به الحبل ساجي
حــر عــريــب ويقــطـع الدو بالروج=ماكــنــه الا طـيـرتــن مــع زراجــي
يشدى لفرخن من ورى الصيد مزعوج=فرخن صغير ومقتفيه العجاجي
ياراكبه لاتمضي الـوقــت بالدوج=اودع مغيب الشمس فوق الحجاجي
سقه لما تلـفــي مـقــاصير وبروج=ونخـيـلـهـم مثل الطهى بالهباجي
انشد عن اللي بابه الصبح مهجوج=وبالليل لاهجه يشب السراجي
ابوحـمــد تلـقـى سواليف وهروج=وصيـنـيـتـن به من عصيب النعاجي
ودلال بغــدادن عـلـى جال صهروج=تلقى هـشـيـم النار مثل الكراجي
ابي اتمنى والتمني من العوج=مثل الضعيف بوسط سوق الحراجي



وقلت انا ردا على شخص حاول مس العود بكلمه فقلت:



الـجــاش هــاض وضـامـري جــاب مــالاق=صـب الـقـوافـي مـثــل حــامــي فــشــقــهـا
لاشـفـت صـدري مـع ربـوع الـرخـى ضاق=وشـفـت الـضـمـايـر تـشــتـكـي مـن غرقــهـا
تـشـكـي عـذابـه مـن عـواصـيـف الاشـواق=وبـيــبــان جـوفـي قــام يـصـفــق حـلــقــهـا
نـثــرت صـنـــدوق الـقــوافـــي بـالاوراق=والـجـاش مــثــمــون الـقـوافــي صـلــقــهـا
مـاجــاب قــيـفــانـن نـشــوفــه بـالاســواق=ولاهــي دواويـــنـــن بـلــيــلــه ســرقــهـا
مــن ضـامــرن لـخـزون الاشـعــار شــلاق=وتـشــرب دمــوعـن جـفـن عـيـنـي دفــقــهـا
مـيــراث عــودن مـنــزلـه فــوق شــوهــاق=وزيــن الـقـهــاوي لـلـنـــشـــامـا حـرقــهـا
بـارض الـجـبـل طـيـبـه تـقـل ضـوح بـراق=كـم حــايـلــن لـلــضـيـف كـفــه صـفــقــهـا
ابـوحـــمــد فــي لاســـع الـبــرد مــشــراق=وظــل الـشـجــر بـالـقـيـظ يـومـي ورقــهـا
مـاهـــي هــروجــن دمــشــقــه كـل هــلاق=الـلــي تـسـلـســل مــن ســلايـل سـلــقــهــا
يـوم الــزمـن صـعـبـن مـن الجـوع يـنـطــاق=وبـابـه مـسـكــر قـبــل غـيـبــة شـفــقــهـا
تـلــقــــاه لــبــيـــوت الاجــــاويـــد بــواق=وبـيــتــه هـجـيـرن مـثـل مـظـلـم نـفــقــهـا
وبـيـبــان ابــن غــســلان مــن دون طـقــاق=ولاضــاق مـن نـارن كـثــيـــرن عــرقــهـا
مـاصـار عــن شــوف الـطـــواريــق دراق=او لاذ بـالـــبــيــــبــــان والا غـــلـــقـــهــا
رجـلــن عـطــى لـلـطــيـب مـوعـد ومـيـثـاق=ودروب زيـنــات الــمــراجـــل طــرقـــهـا
مـثـل الـرجـال الـلــي علـى الطـيـب تـنـسـاق=نـاســن تـخـالــط سـمــنـهــا مــع مــرقــهـا
والــيــوم بـانــت لـلـعـرب بـعــض الاعـنـاق=وكـلــن ذبــح فــرســان نـجــد وشـنــقــهـا
ســيــفــه شــطـيــرن لـلـمـجــاويـخ حــلاق=بـه نـهــقــتــن لـولا الــرخــى مـانـهــقــهـا
وقــت الـرخـى طـيـرن عـلـى راس مـطـبـاق=وخـيــاش هـلـقــه بـالــمـجـالـس فــتــقــهـا
والـلـــه يـلــولا الحـكــم مــن راع الاوفــاق=كــان يـتـمــنـــى خــالـــقــه مــاخــلــقــهـا
وتـلــقـاه عــن بـعـض الـسـوالـيـف يـنــعـاق=ويـنـحــاش عـن درب الـزمـول وتـفــقـــهـا
ويـصـبــح مـثــل جــده عــن الـكـود نـســاق=واكــثـر عـلـومــه بـالــرخــى مـانـطــقــهـا
ويـصــيــر خـرط الـيـوم رعــدات وشــهـاق=ويـنـداس لـيــن الــحـشــو تـتـرك فـسـقــهـا
مــرحــوم يالـلــي لاطـيــب الـســمــن دفــاق=خـمــســيــن عــام ودلـــتــه مـافـــهــقـــهـا
كــنــــه بـمــــيــــدان الاجــاويـــد ســـواق=ســابــق رجــالـن فـــي صـخــاه وسـبــقــهـا
والـفــرق فــي قــولــن شـهــوده بـالاعـمـاق=والــنـــاس ربــي بـالـشــــدايـــد فـــرقـــهـا
سعد الشمرى
17-01-2008, 01:37
زنت ولاهنت يا بن غسلان قصيده اطيب من قصيده صندوق قلبك وين مفتاحه


زنت ولاهنت وصح السانك
خلف الرويتع
17-01-2008, 02:17
وبيبان ابن غسلان من دون طقـاق

ولاضاق من نـارن كثيـرن عرقهـا

ماصار عن شوف الطواريـق دراق

او لاذ بالبـيـبـان والا غلـقـهـا

رجلن عطى للطيب موعـد وميثـاق

ودروب زينـات المراجـل طرقهـا





ونعم في ابن غســـــلان
سعد الشمرى
02-03-2008, 01:00
والف نعم امنك وامنوه قلوبكم خضر يا بعدى حى زنتم ولاهنت