أنــــــــــا وأخـــــتي....

[الدم الأزرق]

أخيرا بعد انتظااار وتعب تجي عطلة نهااية الأسبوووع
واللي كنت انتظرها بفاارغ الصبر
أول شي بسويه بطقها نوووومه وبعدين اتجهز واقااابل الشبااب بالاستراحه
نويصر وسويلم وباقي لشله
بالله في أحلى من هيك ربوع!!!سهـــر ضحك ولعب...
المهــــم...
وأنا اتجهز...وخلاص بطلع..ويجي الوالد:puzzled:

الوالد:على وين...؟؟؟

أنا:طالع اقابل الشبااب

الوالد:اليوم ماله داعي تروح عندهم..
خذ اختك ريم معك وطلعها..تبي تروح لمطعم معك

يوم ألتفت على الوالد مااشوف الا ريموووه ورى الوالد ترفع حجانها تقهرني
جعل حجانك تتنتف زود على ماهي متنتفه ياريموووهn)
هين ياريموه سويتيها ومشيتي كلامك
وانا اللي انقهر...

واقول :خير انشالله تبي تروح مطعم وتوسع صدرها على حسااابي انا!!!:148r:

والوالد قام وعطاني محاضره طويله عريضه واستدل برفقاً بالقوارير

قلت: يبه هذي لوهي من حسبة القوارير كان صار عندها ذرة كرامه و فهمت يوم قلت مانيب موديك
وانت الصادق هذي قوطي مصدي ماتفهم:192r:
مايكفي اني جايبها من الجامعه هي وسوير بنت جيراننا صاير انا سواق الحاره

الوالد:اسمع يا زريقانوووه <<<< الوالد يدلعني يمديكم:d:
اترك عنك طولة اللسان أختك بتطلعها بالطيب بالقوه طالعه معك طالعه
طلعها ولا يكثر الهرج أنت فاااهم؟؟؟

آآآآآآآآآآخ يالقهر ليتنا لحقنا على وأد البنات كان افتكينا من خشة ريم واشكالها:2gunsfiri

وأنا التفت عليها واصاارخ بوجهها:اسمعي.... ريموووه
مالك إالا ثلاث دقايق وتجهزين وبس فاهمه...وشوله ثلاث دقايق دقيقه وحده وبس يالله
وانا بروح الحين واركب السياااره...وتناظرني بعيووون كلها رجااء:surprised
قالت :حرااام عليك يالدم الأزرق وش ثلاث دقاايق
أنا:خلاص ثلاث اجل ...هاذا اللي عندي يالله الحين راحت دقيقه مابقالك إالا دقيقتين
انا بطلع هالحين للسياره وان مرت الثلاث دقايق ولله بروح وأخليك
وتركض ريم وما شوف إالا غبرة رجولها
وعناااد لها امسك طرف ثوبي واركض وبسرعه للسياره واشوف الساعه اللي قدااامي
يالله بسرعه راااحت اول دقيقه...ياسلااام الحين الدقيقه الثانيه
وصلنا للدقيقه الثالثه ياله بسرعه حنا في الثواااني الأخيره
على فكره انا معها اتعااامل بتوقيت جرنتش:315r:
وأحرك السياااره

الا وبسم لله علينا أفتحت البااب واركبت آآآآآآآآآآخ يالقهر:a:
يالله بسرعه أخلصي قولي وين تبين تروحين بهالليل<<<يلعن ابو الأخلاااق
أبي المطعم الأيطااالي...سارة قالتلي عنه اليوم تقول بنت عمها راحت له وتمدحه بالمره
وشو الأيطاالي !!!اسمعي ياحبيبتي أقرب مطعم لنا الصيني فااضي اطق مشاااوير وانتي معي

.......................
ونروووح المطعم الصيني
ماااش ,انا ادخل مارتحت من وحده عجوووز صينيه طاولتها قريبه من طاااولتنا

قلت :يالله بسرعه وش تبين تااكلين؟؟؟

ريم: ابي....ط

وانا اقطع كلامها...

ولا ليش تطلبين مالوه داعي انا بطلب وكلي الي اطلبه انا عشااان تحرمين تجين معي<<<يالعن ابو الذل
وطلبت وأول ماجابوا الأكل....وأنا آكل بسرعه وأقوله يالله كلي بسرعه
وترد علي بكل انكساار:كيف آكل بسرعه تبيني أموووت؟؟

واقول بنفسي ياليت وارتاااح منك....ياربيه متى هالشينه تخلص واقطها بالبيت واروح للاستراحه تأخرت على الشباب
قلتلها شوفي بروح التواليت وبرجع وان رجعت يعني فزي و يالله البيت ..... مايحتاج انفخ عليك بالمطعم قدام العالم
وانا رايح مانتبهت الا لذيك العوينات اللي تقل انهن خفوس العجييز الصينيه ..تناظر فيني
وش بلا هالعجوووز الصينيه تناااظر فيني...مااااش ماتريح:puzzled:

.......
ويوم رديت وف طريقي للطاولة تخيلوا وش صار

سمعت المدموزيل ريم تكلم ساره بالجوال وهي تضحك وتقولها
تصدقين مشت عليه وجابني للمطعم الصيني مثل ماابي انا
ولله اخوي ذا مثل ماقلتي يحب يتهاوش حتى مع نفسه اذا قلت يمين بيقول يسار
ههههههههه يعني يوم قلتله ابي المطعم الايطالي قال ابي الصيني:a:

لحظتها حسيت اني غبي وحسيت الدنيا لفت فيني السبع لفات
اجل انا حققت لريم رغبتها ووديتها للمطعم الصيني اللي هي تبيه
حسيت بدفعات كبيره من الدم داخل جسمي تتجمع وتندفع للقلب
وتطلع لاطرافي
وتمدني بطاقة كبيره بيديني وحسيت بإشارت المخ
وهي تأمرني بتكفيخ ريم :590r:

وقربت من ريم وسحبت جوالها من يدها
وكنت كافخها كافخها الله لايعوقني بشر
ومسكت صحن وكنت بكسره على راسها :bluboomte
ومادريت الاعجوز قريح بينا بالنص
العجوز الصينيه التي ورد ذكرها آنفاً <<<<
وسحبت الصحن من يدي وقعدتني
وقالت مايسير تسوي كدا مع حبيبك في مطعم
قلت : هذي اختي اللي لعبت علي:150r:
قالت ودموعها تقوطر :شسوي لك مو انت اللي حديتني لهالطريقه مو انت الولد القوي وانا البنت الضعيفه
وقعدت العجييييز الصينيه تهدي بريم وتناظر فيني نظرات ماارتحت لها
قامت وابتسمت ابتسامه صفراء وجابت لنا الكعك الصيني وطلبت مني انا وريم قبل لا نطلع نذوق منه
وقااالت لاختي أتمني وش تبين.وردت عليها ...ودي أصير ولد

والتفتت علي العجوز وقالتلي :وأنت
وأنا قلت بكل استخفاف ودي أصير بنت عشان اتدلع مثل ريم هههههههههه<<<دمي خفيف:d:
المهم طلعنا وقطيتها بالبيت وطبعاً قبل لاتنزل هددتها اذا علمت ابوي باللي صار بيصير لها شغل ثاني...
وبسرعه احرك السياره واروح لحبايب قلبي واصدقائي وتوائم روحي نويصر وسويلم
ومارجعت الا على الفجر وانا منهوووك القوى ونمت
.............
:
:
ريـــــــــــــــــم
ياريـــــــــــم
ريم

لاحووول هذا صوت امي وش تبي وكأني بعالم ثاني
ياناس وش هالازعاج انا جاي متأخر امس امي وش تبي ماابي ارد عليها اخاف اصحصح ويطير النوم

ريم ....ريم
ريم حبيبتي يالله قومي !!!

وشوي واحس بأمي تهزني وتسحب البطانيه وصوتها قرب مني وهي تقول يالله ياريم
قومي حبيبتي من يوم مارجعتي امس وانتي متضايقه ونمتي بدري...خلاص كافي نوم
عاد اخوك ذا وش نسوي فيه ..انشالله ربي يهديه وينصلح حاله معنا
انتِ بس لو تخليني اعلم ابوك عليه عشان يعقل بس انتي رافضه

امي قاعده تحش فيني عندي لاااااااااااه السالفه فيها شي
لازم اصحصح وش اعلم ابوك وريم وش هالخرابيط
ويوم قامت الحواس الخمس تشتغل عندي الا احس بشي ناعم زي الفرو على وجهي
وفتحت عيوني. الا وانا ضام كومة الفرو هذي بين احضاني
وابعد وجهي شوي وأتامل من بعيد الا هو دبدوب وردي
ياربييييه هالدبدوب مو غريب علي اقعد اتذكر واتذكر
ايييييييييييييييييه هذا دب ريم الخبله كل مازعلت راحت وضمته هي وخشتها
لحظه ......طيب وليش انا ضامه هاللحين
وقمت انتبه للاشيا اللي حولي شوي هذي ميب غرفتي
وتجي عيني بعين امي..وهي تناظر فيني وتقول اخيراً قمتي ياريم

تكلمت وقلت :وش ريم وش تقولين انتي
وصعقت وذهلت وانفجعت وحطيت يدي على فمي وش هالصوت الناعم ..معقوله انا اللي تكلمت اللحين

يمه...مامي ..ماما <<<< قاعد اجرب صوتي مو مصدق
لاااا ....طلع هالصوت الناعم صوتي:a:

قلت لا مابدهاش انا بنقز واشوف نفسي بالمرايه مو معقوله اللي يصير
تخيلوا.............. وش شفت بالمرايه
الوجه مو بجهي والخشه مي بخشتي وين السكسوكه وين الشوااااارب وين راحت ياقدعان
شفت وجه ريم وحاطه عينها بعيني
طلعت انا ريم
وقعدت اصارخ بعالي الصوت:

لااااااااااااااااااااااااااااااا
:
:
طراااااااااااااااااااااااااااااااااااااا ااخ وطررررررررررررررررررررررررررربع <<<<هذا صوت طيحتي يوم اغمي علي

........................................ ............
وبعد فتره من الاغماءه انتبهت ولقيت امي عن يميني وابوي عن يساري
وانا في النص وضام الدب <<<<<
يوم شفت الدب تذكرت اللي صار
وقعدت اعييييييييييييييييييييييييييط
الوالده :بسم لله عليك ياريم
شوف يابوالدم الازرق وشفي بنتي من امس وهي تعبانه وتو مامداني اصحيها الا ويغمى عليها
لازم نوديها المستشفى اول مره اشوف ريم على هالحاله...البنت تعبانه
الوالد : لايكون الاكل اللي اكلوه امس فيه شي حتى الدم الازرق يوم صحيته من النوم سوى حركات غريبه
بالبدايه قلت الولد مريض بس بعدين قالي ان مافيه شي..بس ولو حاس انه موطبيعي
شوي..شوي..واتذكر
يوم سمعت بطاري الأكل تذكرت عجوز قريح الصينيه وابتسامتها الصفرا ياعلها تبتسم بليا سنون
الامنيه يعني اللحين انا صرت ريم او بجسم ريم يعني اكيد ريم صارت انا
هنا نطق لساني وقلت ابي ريم<<<<ياشين صوتي
قصدي ابي اشوف اخوي الدم الازرق
مامداني انطق اسمي الا واشوف وجهي قدامي دخل الدم الازرق واسمع صوتي اقصد صوتي القديم
وهو يقول :اخيراً صحيتي ياريم امي وابوي انشغلوا عليك وانا قاعده ...احم اقصد قاعد اطمنهم واقول مافيها شي
ههههههه ياحلوك وانتي ماسكه الدب
ومسكت الدب ورميته على جنب وقربت منه /ــا تخيلوا وش صار
يالله ريم اطول مني اذكر اول لامن عصبت وقربت منها كنت انزل رقبتي عشان اناظر فيها واخوفها بعيوني
يوم شفتها اطول رجعت خطوتين ورا <<<< من خاف سلم:315r:
قلت :كله منك ياريم يالشينه لوما صحتي علي بالمطعم امس ماكان صار اللي صار

امي وابوي صارت على وجيهم علامات استفهام
وتغير وجه الدم الازرق واقنع امي وابوي انهم يطلعون لانه بيقول لريم شي
واول ماطلعوا
التفت علي وقال:شوف ترا حتى انا مااستوعبت اللي صار فالبدايه قمت والا انا بجسمك
لكني قررت بهالشخصيه اوريك شغل الله فيني يوم كنت تقهرني وانا بنت...يالدم الازرق اوه اقصد ريم
سحر العجوز عمل عمايله ههههههههههه
وانت بعد حاول تتأقلم على شخصيتك الجديده ..... ولله وجا اليوم اللي اذلك فيه ههههههه
ونسيت اقولك قررت اني اونس نفسي خصوصاً بعد مادق علي نويصر وقال ان اليوم الخميس فيه استراحه
والحبايب متجمعه
انا: لااااااااااااااااااااااااااااااااااااااا مابخليك تروحين للاستراحه ذا اللي ناقص يابنت
ريم: بنت بعينك شكلك نسيت انت اللحين منو وانا منو يالله امنعني اشوف ههههههه
وطلعت او وطلع وسكر الباب وراه
:
ورحت ورميت نفسي ع السرير وقعدت اعيييييييييييييييييييييط
وضميت الدب
ياربيه صعب ريم تشوف الوجه الاخر لي بطيح من عينها لازم امنعها تروح للاستراحه
ونويصر وسويلم اصدقاء سوء ماينفع تتعرف عليهم <<< اللحين دريت انهم اصدقاء سوء
ياربيه شسوي..شسوي
المشكله انا اللحين بنت مااقدر امنعها بالقوه...لازم اكتشف نقاط القوه بريم وشلون كانت تمنعني عن الروحه يوم كنت ولد
ايييييييييييييييه لقيتها ابوي...هع هع بوريك يالشينه ريم
قمت ورحت مثل هبة الريح لها بالغرفه آآآآآآخ غرفتي
وقلت : اسمعي ياريم والله أني لوريك انتي جربي وروحي أن ماعلمت ابوي
عن أشيـــأء انتي ماتعرفينها يالدبه بس تصير مع الشباب
وأخلي ابوي يروووح معك عــاد شوووفي وش الأحراااج اللي بيصير معــــــأك
بيمنعك ومابيخليك تروحين وبتموتين قهر
:
لكن كلامي ماهز فيها شعره ..اخ يالقهر.بالعكس قعدت تضحك
وتقول: احسن هذا اللي ابيه خل ابوي يشوف فضايحك انت ..واذا هي علي وحرمني ابوي من الطلعه
عادي انا متعوده على قعدت البيت والبركه فيك انت.ماعمرك حسيت فيني..
وبعدين انت ليه شكلك خايف قووول اعترف وش تسوون هناك؟؟!!!!

:
ماحسيت الا والدموع تتجمع بعيوني خبركم صايره عواطفي جياشه اليوم
قلت : ريم الله يخليك لاتورحين طلبتك طلبه
قالت :انقلع بطلع ولله لايعوقني بشر
قلت: ريم انتي تغيرتي صرتي قاسيه وانا خبرتك كذا
قالت البركه فيك من بعد ماسكنت بجسمك وانا احس ان مافيني ذرة احساس
وماقطع كلامنا الا دقة جوال بجيب بجامتي الوردية المنئطه بقلوب حمرا
وتغير وجه ريم قالت هذا جوالي وهذي نغمه ساره صديقتي
وحسيت ان طلعلي قرون شيطون:
قلت: انقلعي ئال ايه ئال صديقتي هذي صديقتي اللحين وهذا جوالي وش تبين
وانا ادخل يدي بجيب البيجامه واطلع الجوال هع هع:008b:
قلت خلاص ياريم روحي للاستراحه وانا خليني بتصرف مع ساره
قالت ووجها متغير ذكرتني بوجهي يوم دريت انها بتروح الاستراحه
تكفى لاترد عليها لاتفشلني عطني الجوال
اها بس انقلعي للاستراحه اقول وانا بقعد مع صديقيني اوه اقصد سديكاتي:008b:
قالت خلاص بعرض عليك صفقه عادله مابروح للاستراحه وانت لاترد على صديقاتي
قلت: اوكي اجل عطيني مفتاح السياره والجوال عشان اتأكد
قالت: وانت عطني جوالي عشان اتأكد منك يالنذل
وعطيتها جوالها واهي عطتني اغراضي
ويوم بطلع من الغرفه
التفت عليها وقلت: ريم وش رايك نطلع اليوم اقصد تطلعيني
قالت : انقلع بس ولله ان شفتك طالع من البيت لا احش رجولك حش
جرحتني ريم بهالكلام ورحت لغرفتي اركض ورميت نفسي عالسرير وضميت الدب وقعدت اعييييييييييييييييييط:
ومر الوقت وانا بالغرفه وطفشت مره جالس عالسرير ومره منبطح ومره متعلق بالمروحه
من الطفش جالس اوجد الاختلافات بين بصمات اصابعي ..لما خلصت من اصابعي قمت اسولف مع نفسي
وخلصت السوالف وحتى الكذب والخيال خلص مي حاله هذي بصراحه طفشت وقمت اراجع نفسي واقول
البنات يطفشن ومحد يحس فيهن.والفراغ شين ياجماعه لازم نلقالنا حل الشباب اضطهدونا
واذا استمر الحال كذا محد يحس فينا ولاحتويناولايقدر احتياجنا للحنان بالبيت يلومونا اذا انحرفنا وبحثنا عن الحنان براالبيت
<< شف من يتكلم:)
وقلت لازم اشغل نفسي قبل لا اودي سمعة العيله في ستين داهيه مو خبركم انا بنت
وقمت اتشقلب فوق السرير.واشوي وادخلت امي علي وقالت:
ريم وش فيك وش هالحركات البسي وانزلي لساره تراها جت وتنتظرك بالمجلس يوم درت انك تعبانه جت تشوفك
ماحسيت بنفسي وانا اتشقلب الا وراسي صاك بالارض

قلت :هااااااااااااااااااااااااااه.... ساره وش تبي

امي: تبي تشوفك بسرعه ياريم البنت تنتظر .......وطلعت امي وسكرت الباب
وانا حاس اني متدوده وشلون اقابل السوسه ساره مواقفنا مع بعض ماتشرف
دايم انفخ عليها هي واختي اذا جبتهن من الجامعه
ومن النكاده مااوقفها عند باب بيتها اوقف عند باب بيتنا واخليها تمشي لباب بيتهم
وهي طالعه من سيارتي اقولها شوي شوي على باب سيارتي
واذا دقت ع الثابت تبي ريم اقولها مشغوله واسكر السماعه بوجهها...
لاحووول مالي خلق على هالغثيثه ولا لي وجه اقابلها
لحظه ..وجه؟!!!..الا لي وجه اقابلها ..مو انا بقابلها بوجه ريم
ورحت وفتحت دولاب ريم الله ياكثر خلاقينك ياريم ..وياكثر الوانك
تعبت وانا اختار لي لبس..وبعدين نزلت ورحت للمجلس بقابل ساره
يوم وقفت عند الباب قمت ارتجف وجتني ام الركب تخيلوا بشوف بنت..وف بيتنا
وشلون ادخل وانا بهالحاله المحيوسه..الا واسمع امي وهي جالسه مع ساره تسولف
اشوى امي طلعت فيه يعني مابستفرد بالبنت لوحدي.وجود الوالده خلاني اتجرا واتجسر.. اني ادخل
ويوم امي نادتني وقالت ريم وينك <<< تعودت على اسمي
وانا احسم الموضوع وادخل..المجلس
تخيلوااا يوم دخلت ماذا رأيت:a:
ويا لهووووووووووووول ما رأيت ..رأيت الجمال بكبره يدبي على الارض
هذا الجمال الذي لطالما اضطهدته واهنته وسكرت السماعه بوجهه.
معقوله هذي هي ساره اللي تركب معاي بالسياره وانافخ عليها
.هذي البنت ابطي عظم وانا اقلب بالقنوات اشوف مثل جمالها ماألقى
<<<< مايشوف البنات الا بالقنوات بس:)
انا تسمرت بمكاني وفقيت خشتي وفتحت فمي عند هذا الجمال الرباني
ساره ناظرت فيني نظرات الاستغراب من فهاوتي و قالت ريم وش فيك تعالي سلمي
وقربت منها واستلمتني وضمتني بقوووه قالت : ريمو خوفتيني عليك وش فيكِ:luvlove:
وانا خدودي مورده تخيلوا اسلم على بنت قدام امي حاس اني مسوي شي غلط
وذي النشبه مافكتني انا اخاف اتفاعل معها واجيب العيد قلت ياولد ناظر بالارض ولا تتفاعل مع ساره
وقاعد اصرف انتباهي واتذكر المواقف المحزنه بحياتي عشان اصرف انتباه احاسيسي ومشاعري عن ساره
اخاف تتفجر والبنت بين يديني.:406r:
وبعد ماتركتني رحت بجنب امي ومازال الذهول فيني معقوله هذي المزيونه هي ساره
ومادريت الا وامي تقوم وتقول يالله اتركم لحالكم.
وماحسيت بنفسي الا وانا اتمسك بأمي واقول :يمه وين بتروحين امي ناظرت فيني نظرات استغراب وقالت بخليك مع صديقتك
ويوم طلعت امي رحت لاخر زاويه بالمجلس وقعدت فيها بصراحه ياشين الواحد اذا ماضمن نفسه.
مادريت الا وساره يوم شافت امي طلعت قامت وجت عندي قالت : وش فيك يالشينه ماتردين ع الجوال
وبعدين ماكملتي وش صار بالمطعم ؟؟ واخوك الخايس وش سوى؟ اخوك هذا ياصبر الارض عليه ؟
وانتِ بعد ياصبرك عليه؟ لو عندي اخو مثله كان انتحرت
يوم سمعت هالكلام كان نفسي اروح جري على غرفتي واخذ دبدوبي وانبطح عالسرير واقعد ابكي
بس تمالكت نفسي
<<<<ساره قاعده تسبني طيب يالشينه ريم اثاريك مشوهه سمعتي عند هالمزيونه
فلا نامت اعين الجبناء.:590r:
قلت: لا لا لا حرام عليك ياساره اثاريكم ظالميني احم اقصد ظالمينه المسكين:a:
تصدقين يوم جلست معاه بالمطعم اكتشفت الوجه الاخر لاخوي اثاريه رقيق المشاعر ويحس فيني وكل شي زين وكل شي حلو فيه
وساره تعفط وجهها بس ااااااااااااااه هالتعفيطه زادتها جمال على جمال واخذت يدها وحطتها على راسي بتشوف انا مسخن
وماحسيت بنفسي الا وانا اخذ يدها واحطها على قلبي قلت ساره : وش تحسين فيه:luvlove:
قالت: قلبك!!!
قلت : ايه قلبي يحبك..وانتبهت لنفسي وقلت انتِ صديقتي و اقصد دقاته سريعه عشاني تعبان تعبانه
ونرجع لمحور حديثنا <<< كان بيجيب العيد:315r:
قلت: ايه اكتشفت انه مظلوم تراي اكلمك بكل قواي العقليه لا تحسبيني مسخنه والا شي
الغلط مني انا <<<< ولله لا اشوه سمعتك ياريم عندها اوريك يالقرده
ايه..... انا ......لاتناظرين فيني باستغراب تعرفين انا كيف حركاتي الشرانيه
كل مااشوفه يبي يطلع المسكين احرش ابوي عليه عشان يخرب الطلعه
ودايم انفخ عليه واقعد اسبه عشان انرفزه..ويطلع من شخصيته الهاديه ويضطر انه يتعامل معاي بخشونه
عشان يوقفني عند حدي..صدقيني ياساره تراه طيوب ..وحبوب..بس يبي من يفهمه
واللحين انا فهمته ..واتفاهمنا على كل شي
هااااااه صدقتي انه حبوب ؟ الله يخليك صدقي
قالت: كلامك غريب ياريم؟ وتصرفاته معي انا وش افسرها مثلاً يوم اكلمك ع الثابت ويسكر بوجهي
انا: لانه انسان محترم ومو متعود يكلم بنات:008b:
قالت: ونكادته معنا اذا ركبنا معاه ويوم مايوقفني عند باب البيت
<<<< ولله لا اخليها براس ريم
انا: هذا مني انا ا...انا اقوله وقفنا عند باب بيتنا
ساره:!!!!!!!!!!!
انا: ...اااااا اممممممممم عشان مانثقل عليه والا هو يبي يوصلك عند الباب بس انا احلف عليه انه مايوقف الا عند بابنا
ساره خلاص ياعمري لا تشيلين همه تراه طلع عسل..ويحبك ...اقصد ويحبنا ...اقصد يحبني:d:
ساره: الله يخليكم لبعض ...بس غريبه طلعنا غلطانين وهو المظلوم
ع العموم ابوي مسافر هالاسبوع والله يعين شكلي بركب معكم يوم السبت
انا: هااااه يالله ان تحييها هذي الساعه المباركه
ساره: ههههههههههههههه الله يقطع سوالفك ياريم يالله انا برجع للبيت بس حبيت اطمن عليك
ماتشوفين شر ياعمري
انا: الشر مايجيك يا حياتي انتٍ وعمري وكل شي حلو وزين بهالدنيا
:
:
وبعد ما طلعت ساره رحت للدم الازرق بغرفته اقصد ريم وقلتلها ريم انا خلاص مااقدر استحمل
ابي ارجع لجسمي
قالت هي :وحتى انا ..انا ابي ارجع ريم.عادي حتى لو رجعت لحركاتك معاي . فقدت غرفتي ودبدوبي وصديقاتي
قلت :بصراحه الدبدوب احس اني تعودت عليه مدري اتنازل عنه والا لا
ومن ناحية معاملتي معاك بصراحه الواحد مايحس بالثاني الا اذا صار مكانه
المهم خلينا نروح للعجوز الصينيه يمكن نلقاها بالمطعم ونخليها ترجعنا لطبيعتنا
يالله مشينا
ونرووح للمطعم الصيني على أمل اني أحصل العجوز الصينيه هالنكبه

وسألنا عنها..

أمس كان عندكم عجوز صينيه هي تقول انها كل يوووم تأأأكل عندكم
ويرد على وأحد منهم...
مسكينه هالعجوز..
ليه وش صـــار فيها..؟؟؟
أمس وهي طالعه أصدمتها سياره وماتتت
ماتت أنت نتأكد وأنا اصيح بأعلى صوتي لااااااااااااااااااااااااااااااااااااااا اااااااااااااااا

لا لا لا لا
مستقبلي ضاااااااااااااع

ومــــااأحس بنفس إلا وأنا طايح من فوووق السرير
الحمدلله اثاري الدعوه حلم بحلم

وأبي أتأكد زياده وأقوم وأشوووف نفسي بالمرايه ابيه والله الخشه خشتي

الحمدلله يارب الحمدلله الحمدلله يــــارب

وأنا ادور على دب بس مــالقيت وآخذ مخدتي ,اطب فووووق السرير وأعييييييييييييييط من الفرحه:3abrah:
واروح لريم بغرفتها وانفضها وهي بسريرها عشان تقوم
قلت ريم وش رايك نطلع انا وانتي
ناظرت فيني وناظرت بالساعه
قالت صاحي انت ترا الساعه اربع الفجر
قلت اهين الشرهه مو عليك على اللي يبي يطلعك
وان قلتيلي بكره طلعني بحش رجولك حش <<< ابو طبيع ماييوز عن طبعه:315r:

[ريال الفسحه]

لعنبو حي ابو العدو وش هالطوول :315r:


\


برب :solh:

[الدم الأزرق]

لعنبو حي ابو العدو وش هالطوول :315r:


\


برب :solh:


لعنبو حي ابو العدو وش هالطوول :315r:

وش وراااك يالزووول ؟؟؟ أقعد أقرى :148r:

[زعيم الحفـــر]

انا ما كملت الموضوووع بس يا ولد والله لو انك صهيوووني ياشيخ
هذي وهي اختك تسوي فيهااا كذاااا





مشكوووور عالموووضوووع

[منصور الغايب]

بالله عندك قلاص ماي <<<< نشف ريقي ..



أخي ريم ..... قصدي ...... الدم الازرق :7ayyoh: ... تاليفك رائع ..... والسيناريو محبوك حبك ....


خف على البنات شوي ...

ورفقا بالقوارير مثل ما قالك الوالد ....

















صديقي الدم الازرق .... رائع .... وبعد هذا الموضوع ... اكنشفت انك طيب جدا جدا جدا ....

لاتقولي شلووووووون ؟؟ :3ajebni:

[ابو عارف]

الدم الأزرق نشفت دمنا في هالحلم الفلم.

لقد أبدعت يالازرق وحبكت هذه الحكاية وأجدت القيام بجميع أدوار أفراد العائله.

إنك رائع بحق يالدم الأزرق وشكراً لك على إمتاعنا بهذه الحكاية المعبرة عن الصراعات مع النفس من الجميع.

الحمد لله إنك رجعت إلى سابق عهدك الدم الأزرق ولم تبقى ريموووووووووه.

[ابو ضاري]

يقطع بليسك نمت على الكيبورد وماكملت القصه

اثريك منت بسهل :3ajeeb:

الله يعين البنيوات عليك
الدم الازرق لاهنت يالعزوه .......................................

[Bin Munif]

كه كه كه كه كه كه

أوه لحظة, صدري فيه غبار... الصدر يبيله تصفيه


خخخخخخخخخخخخخخخخخخخخخخخخخخخخخخخخخخ

كفوووووووووو , البنات ما يمشي معهم الا كذا. لازم تنفضهم بكم صرخة عشان يعقلون >>>> يعني انه يسوبها

والله اني ما أقدر عليهم, مشكلتي اني احب أطلع معهم >>>> إذا طلعنا صرنا المهابيل الثلاثة

ما يبقى واحد ما يسلم من حشنا. :315r:

[أبوطروق]

رفقا بالغراش(القوارير)

رائعة من روائع الأدب الأزرق استمتعت بقراءتها

تنفع تكون مسرحية هادفة


كل الشكر للكاتب والمخرج والسينارست الدم الأزرق


أشوا انه طلع حلم

:

[leonel messi]

ههههههههههههههههههههههههه

ـآحلى شيء يوم تضبط عمركـ مع سآرة :goooood:


مشكور عآلقصة

[بسمة العز]

يااااااااااااااااااااااااااااااااااااااا اااه

طلع حلم:a:

خساره هههههههههههههههههه ودي تبقى ريموووه هههههههههه

على العموم سلم على ريوووم وساروونا :3ajebni:

اختك/ بسمة العز

احتراامي لك

[P E A C E]

هههههههههههههههههههههههههههههههههههههههه هههههههههههههههههههههههههههههههه
هههههههههههههههههههههههههههههههههههههههه هههههههههههههههههههههههههههههههه
حـلـمـكـ خـااطـيـر قـسـمـن :) ..
خـصـوصـا يـوم تـقـعـد مـع سـااره :thumb: ..

والله يـاا انـي عـشـت جـو مـع سـاالـفـتـكـ بـعـد :) ..
ههههههههههههههههههههههههههههههههههه

يـاا مـلاا الـعـافـيـه ..
ابـدعـت يـاا عـردزي ..

:goooood:

[بالمختصر..]

يــاااااقلبي يالدم الأزرق :luvlove: اووه قصدي ريموو <- تأثرت بتبادل الأدوار :qannaj:

الحمدلله الحمدلله اني بنت مو ولد .. وطبعاً لاننسى التحريش :puzzled:

حتى اخواني إذا كنت جالسه عند أبوي لو ساكته يشكون بي اني حرشت :)

عآد انا ماأحب التحريش .. بس هو سلاحنا وش نسوي :wallah_hoo:


وش صار عالدبدوب ؟؟




.
.

[المطنوخ]

نزلت حدر للردود لقيتهم كلهم قارين الموضوع :puzzled:

يااااربي الله يكون بعوني

يالله ابي اخذ نفس واجيك ليا قريت


هووووووووووووووووووووووووووووب<--يعني غمت النفس:)

[الدم الأزرق]

لعنبو حي ابو العدو وش هالطوول

أول رد ...الصــــاعقه من ريـــال الفسحه...:a:


قلت ايه يمكن حبيبي ريال مايحب المواضيع الطويله<<<يصبر نفسه:puzzled:



انا ما كملت الموضوووع


ويجي الرد الثـــاني من زعيم الحفر ... فقلت في نفسي عيب ياولد هذا ضيف جديد أمسك نفسك:za3lan:


بالله عندك قلاص ماي <<<< نشف ريقي ..

وأشوووف الرد الثالث ...الطـــامه الكبرى منصورروه..ياجعلك تنشف من راسك لساسك:148r:

قال نشفت ريقنـــا كذا تفضحني وتحطمني بين الشباب...


الدم الأزرق نشفت دمنا في هالحلم الفلم.


وجا هالرد...وكان بمثابة الضربة القاضيه نشفت دمك يـــابو عـــارف :g:

ياليتك قلت ريقي كـــان أهون شوي

يقطع بليسك نمت على الكيبورد وماكملت القصه

ينااااس ياهوه في أكثر من كذا تحطيم...شوفوه نـــام على الكيبورد لا لا لا هـــاذي الحاله ماينسكت

عليهـــا ... وينك يـــاأبو سلطـــان الردود دمرتني:150r:
نزلت حدر للردود لقيتهم كلهم قارين الموضوع

يااااربي الله يكون بعوني

يالله ابي اخذ نفس واجيك ليا قريت


هووووووووووووووووووووووووووووب<--يعني غمت النفس

لا عـــاد كله كوووم ورد المشرف كوووم ثــــاني...

لحظتها اخذت الكيببورد وضميته على صدري وبكيت:d:<<<متأثر بالقصه

مـــاقول إالا الشرهه مو بعليكم الشرهه على اللي يكتبلكم قصص

انتم حدكم نكته من ربع سطر وكثيره بعد :590r:


أنتظرو الموضوع الجديد واللي بسميه النتفه<<<دليل على قصر الموضوع :188r:

[الشاهري العبيدي]

صراحة طاحت عيوني من طوووووول الموضوووووووع

المهم وصلت يوم العجوز تصحيك وقلت بلاش فضايح

فأخذتها من قاصرها وتراجعت لمواقعنا بالعام

وكلي اسف للحال الذي وصلت اليه الفلة :)




موضوع فلة لكن يبيله صبر وعيون توها تفتح الكبوووتر

[منصور الغايب]

^
^
^

الشاهري ...

اصبر على مر الليالي والايام = منت الوحيد اللي شكا هم طنخان :3ajeeb:

[الشاهري العبيدي]

منصور

شرايك


نرسم خطة انقلابية ونستولي على الفلة (طبعا على شان ننتصر للمظلومين هنا )



:wallah_hoo:

[الدم الأزرق]

طنخــــان ... عجـــايب...ريـــال

شوفو منصوروه والشاهري يشتشتووون في موضوعي

لا وبعد ويرسمووون على خطه انقلابيه وين ...؟؟؟ بعد في موضوعي

لهاالدرجه صـــاير موضوعي سبيل !!!

يكفي يكفي راعو حالتي النفسيه والسبب الردود اللي جتني من هالموضوع:106r:

أنني ومن مكاااني هذا أطالب المشرفين برد أعتباااري

وإلا بقلب الموضوع شااااة من جد ...

وهاذي البدايه

إلا وينك يابو طروووق عطني آخر نكته عندك...:)