قصيدة اتمنى اني اجدها كامله

[الفلوجي]

بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين

انا عندي طلب واتمنى اني اجده
طلبي يالنشاما قصيدة هي للا مير عبيد الرشيد او اخوه الامير عبدالله الرشيد وعلى حد علمي انها عرضه معروفه ماتخفى الكثير واتمنى اني القاها كامله والي يقول فيها

انتقضى بالزمن وانتمضى *** والزمن قاضي على كل قاضي
ماخلقنا للمخاليق انترضى *** نلطم الزعلان ويعود راضي


وانا يمكني حايسه لان ما اعرف منها الا هالبيتين وياليت تفيدونا يالاخوان العارفين شروا راعي الوقيد وابوفهد فواز الغسلان لانهم حفيض ولايهونون باقي الربع.


وتقبلو تحياتي

اخوكم/خالد الزوبعي

[خلف الرويتع]

انا ماني متئكد بس اعتقد ان القصيده حديثه يمكن راوي الجبل الاستاذ فواز عنده العلم
ماشاءالله عليه حافظ القديم والحديث بس مشكلته العشق نبي فزعتك يالفلوجي معنا نبي نزوجه قديه يرتاح ويجيبلك سامري اهل الجبل وعرضاتهم بصراحه دائم ابو فهد يجيب قصيد نادر لاتجده عند كثير من الباحثين والمورخين تقبل تحياتي يابن العم

[راكان الحمود]

القصيدة للشاعر المعاصر المعروف ذيب العمودي الشمري

[الفلوجي]

مشكور يبن رويتع على المرور الكريم وعزالله انا ابن غسلان ماشالله علي تاريخ بحاله واتمنى اني اجد القصيده عنده
وعزالله ابشرو بالفزعه بموضوع زواجه وانا ودي اوديه للجزيره وللشمال يم ديار شمر هناك بالربيع الزين وغدنوه يعشق ويقصد لنا من هالنوادر الي محتفضبها
واذكر لوه قصيده عن الشيب وطرد الرعابيب ويسنده للشاعر جهز الشمري
يليتوه يطربنا بها

ومشكور مره ثانيه يبن رويتع

[الفلوجي]

مشكور يبن حمود على المرور الطيب والمعلومه الاطيب انا ماعندي فكره القصيده ماني متأكد من صاحبها بس يمكن تكون لذيب او غيره وانشالله ان الاخوان مايقصرون وراح يثرونا بالمعلومات



ومشكور مره ثانيه

[خالد الشمري]

للشاعر الكبير ذيب العمودي الشمري وهو شاعر معاصر ويقيم في الكويت :


انتقاضـا بالزمـن وانتقـضـا=والزمن قضاي على كل قاضـي
مانـزور العايلييـن إنتـرضـا=نرج الغلطـان ويعـود راضـي
لابتـي بالضيـق نـارٍ تلضـا=قول شمر بالسيـوف اللواضـي
كم صويبٍ طاح عظمـه يشضـا=كن ترميه السماء في شواضـي
مانغـض الطـرف لا مانفضـا=غير عن خرس العيون الغواضي
ماخلقنـا بالوجـود انتمـضـا=لجا ماتهتـز سبـع الاراضـي
انشد اللي فيـه ذمـه وحضـا=يخبرك بالفعل والفعـل ماضـي

[فواز الغسلان]

اشكركم جزيل الشكر اخوي ابوعتيق والاخ الفلوجي على هذا الاطراء

والفزعه وانتم اهلها ولاهي غريبه عليكم00 ونشكر الاخ مشرفنا القدير خالد الشمري اللي جاب الوكاد00

والحقيقه ان حرف الضاد من الحروف الغثيثه بالشعر لكن الشاعر ذيب العمودي يصخر المعاني ماشالله عليه

واذكر ان لي قصيده على حرف الضاد وهي:






هـجـر عـيـنـك يالـغـلا مـااقـوى احـتـمـالـه=لاهــبـه بـالــصـدر تـوجـس لـه جـضـيـضـي
لابـغـيـت انـسـى الـهـوى واقـطــع حـبـالـه=طـيـفـهـا يـنـجـض مــعـالـيـقــي نـجــيـضـي
خـافـقـي مــع صـاحــبـي شــدت رحــالــه=لـه مـكـانـن فـي خـفــى روحــي عــريــضــي
الرحــايــل تـتــبـعــه لــو هــي لــحــالــه=وان مــنــعــت رحــالـنــا جــاهــا فـضـيـضي
فـي خـطــاهـا دايــمــن نـدمــح خــمــالـــه=وان غـلـطــنـا يـاصـلـن مـاهـا خــضـيــضـي
هـاجــسـي لازارنـي يـجـــمـــع عــيــالــه=مــن يـجــون لـخـافــقـه مـاهــو حــضـيـضـي
مـاخـبــرت الــنـاس تـلــعــب فـي حــلالـه=وهــي رمـتــنـي ذابـلـن جـســمـي مــريــضـي
كـنـت اريــد الـــنــوم فــي بـارد ظــلالـــه=وصارت الـنـومـه تـحـت شـمـس الـمـقـيـضـي
خـافـقــي يـرجــي مـن الـغـالـي نــوالــه=هـجـرهــا يـقـرض خـــفــى روحــي قـريــضــي
وان شـكـيـنـا حـالــتـي والـلـــي جــرى لـه=يـاصـلــــن رد الــغـــلا ردن يـــغــيـــضـــي
حـال مـحـجـــوبــن ونـاب الـغــلــث نـالــه=طـايـحـن بــيـن الـعـرب سـاقـه عــضـيــضـي
دمـعـتـه مـن خـوف قـصـف الـعـمـر سـالـه=وقـبـل تـكـمـل حـجــبـتـه جــاهــا نـقــيــضـي
او عــنــودن يــســحـــر الـخــافــق دلالــه=مـات ابـوهــا طـفـلـــتـن عــوده غــضـيـضـي
مــارحــمــــهــا لاعــــمــام ولاخـــوالــــه=لــيـن بـاعــوهــا عــلــى رجــلــن بــغـيــضـي
لاطــرى لـه قــعــدتــه مــقــعــي قـبــالــه=الــمــحــاجــر كــضــت اعــبــاره كــضيـضي
او مـثـل مـن ضـاع وســط الـســوق مــالــه=وخــاسـرن فـي تـجــرتــه مـالــن بـهــيــضـي
عـقـب طـيـبــه طـايـحـن يـبــي الـجــمــالـه=ولا ذكـر مـالـه غـــدى دمـــعــه يــفــيـــضــي
او كـسـيــرن طــاح مــن يـمــنــى رجــالــه=مــن بــواريـــد الـــعــداء ســاقــه رضـيـضي
مــن جـــنــوب عــداه وســبــاعــه شـمــالـه=وعـن شـمـوس الـقـيـظ مـايـقـوى الـنـهـيــضي
مـثـل حــالـي مــع غــضـيـض الـعـود حـالـه=قــض سـاس الـقـلـب بـرمـوشــه قـضـيــضـي
الـــــعـــــواذل نـارهــــا زاد اشــتـــعــالــه=لا لــمــح زولــي غـــدى يـلــمــض لـمـيــضي
لــه هــروجــن كـــذبـهــا تـجــدع جــبــالــه=بـــس اخــبــر الــزيــن لـعــهــوده حــفـيـضي
مــن عـشـق ســاق الـمــحـبـه فــي كــمــالــه=الــهــوى بـالــقــلــب مــايـبـعــض بــعـيــضي
الــمـفــارق والــجــفــاء لاجــاء مــجــــالــه=تـقـل يـلــســع خــافــقــي ســوطـن غـلــيـضي
ادري ان الــهــجــر لـلــخــافــــق هــبـــالــه=ولايــعــيــض بـحــبــهـا او يـســتــعــيــضـي
حــمــلــنـا مــن دونــهــا صــعــبــن مـشـالـه=ضايـمـن فــي طــلــعــتـي والا مــفـــيــضـــي
خــايــفــن روحــي تــجــي نـقـــطــة زوالـه=لاشــربــنــــا لاحــلــيـــب ولامـــخــيـــضــي
مـايـريــد الــقــلــــب يــاعــالــــم بــــدالــــه=بـس اشـــوف مـزونــهــا مـاتـســتــهــيــضـي
وان جــفــى ســقــتــه عـلـى درب الــعــدالـه=كـان حــول ربـوعــهـــا شـيــخـــن فـريــضـي

[الفلوجي]

تسلم ياخوي خالد وماقصرت (ومنكم نستفيد) والله يعطيك العافيه بس يخوي القصيده الي قلتها مابها البيت الي انا اعتبره بيت القصيد وهو من اقوى الابيات الحماسيه الي اعتبره والي هو
ماخلقنا للمخاليق نترضى *** نلطم الزعلان ويعود راضي

واضنك ماتختلف معي بان البيت على القافيه لاكن هل هو لذيب او انه مجاريه

ومشكووووووووووور مره ثانيه وثالثه وماقصرت

[الفلوجي]

هلا بهالطله يبو فهد وصح الله لسانك وماقصرت على القصيده الطيبه
والمرور الاطيب


ومشكووووووور مره ثانيه على المرور الطيب

[خلف الرويتع]

هلا اخوي الفلوجي ونعمك فيك قول وفعل

ماقصرو الشباب وخصوصاً خالد وابوفهد الي اتحفونا بمالديهم

اخوي الفلوجي اعتقد البيتين الي تستفسر عنهم موجودات بالقصيده بس مهم مع بعض وتعرف عندم تنقل القصيده وتشتهر تدخل عليها بعض التعديلات يمكن تاصلك معدل فيها حيث انك سمعتها

ماخلقنا للمخاليق نترضى *** نلطم الزعلان ويعود راضي

والاخ خالد سمعها

نـرج الغلـطـان ويـعـود راضــي
وانت تقول نلطم الزعلان ويعود راضي وانا مثلك اسمعها بهذا الفظ


وكذلك انت تقول ماخلقنا للمخاليق نترضى
وخالد يقول ماخـلـقـنـا بـالـوجــود انـتـمـضــا

وانا اسمعها ماخلقنا بالوجود انتمضا

على كل حال هذه القصيده كامله ماقصر خالد جابلك القصيده كامله اخوي الفلوجي والله انك طمعتني شوين ويش ريك نبي نجيك انا وابو فهد وخالد وراعي الوقيدوتزوجنا من عيال عمنا بالجزيره انا وابو فهد نبي خوات ابيه يصير عديلي وخالد وراعي الوقيد هم الخطبا وهم شعار العرضه والسامري

[راعي الوقيد]

الله يعطيكم العافية

والظاهر ان اللي كتبها الاخ خالد هي برواية وليد العمودي وهو ولد ذيب الشمري:)

لكم التحية

[مشــــعل]

وش نوح شيباننا من تالي منهردين:)
مايحتسون الا بالعشدز والعرس:)


الف شكر يالفلوجي
والشكر موصول لابوفراج

[خلف الرويتع]

هلا البناخي مشعل هذي الفراغ ومايسوي ابو فهد الله يعينه مايحك راسه اما انا فاضي ماغير اتنقل من مضيف الى مضيف ادور السوالف حتى مضيف الفله دخلته مع اني اخر علم فيه يوم الشيخ محارش ابو الوناه به وسوالف العرس تونس بس حجس بالصدر لو يجي الصحيح عضيت ثوبي :)

http://www.z4ar.com/vb/images/smilies/gr4uu.gif

[فواز الغسلان]

هلا بالجماعه خوش سهره الليله00

اما انا الا اجزم على العرس ان جاب الله رزق والدليل اني يوم قصدت ابيات الجميلي ومنها:





ومن هذه القصيده ابيات بتوصيف النساء منها:




اوصيك شورك لاتطاوع به النساء=عشيرات من يضحك لهن قريب
وفيهن من هي جوزتن ماتسرك=لاجيت عنده بالفراش حريب
وفيهن من هي قربتن تطرب الحشاء=لاشوتلت عقب الدباغ سريب
وفيهن من هي علة(ن)باطنيه=وفيهن من هي سكر وحليب
وفيهن من هي تفضحك لو طميتها=دايم على بيت القريب تليب
خيار المعاني بتة(ن)من حبالها=اركب شعيبن وارمها بشعيب




طبعا كلامه واقعي انه فيهن العاليه وعكس ذلك0 لكن سمع بالابيات فاتن الرشيدي فقال كلامك صحيح

ماعدا قولك (فيهن سكر وحليب)لاني خذيت ثلاث حريم كلهن غثيثات فقال:





يقول الرشيدي والرشيدي فاتـن=الطيـب كانـه بالنسـاء يضيـع
ان اكرمتها قالت انا اكرمت قبلك=وان اهنتها تسوي عليـك شنيـع
تاكل حلالك ثم تجحـد جميلـك=حسيبـه اللـي منزلـه رفيـع
والياجيت بالمرقد عطتك النقـره=ماكنك الا فـوق شـوك نقيـع
واليا اصبحت يابليس في قصتها=تلسـن تشابـه حيـة البـديـع




وانا ضد كلام فاتن هذا بالرغم من ان ام فهد ضربتن بالصاج ضربة موت ماحسبت اني اعيش يوم تأخرت

ماسويت لها الشاهي وهي ماتضرب الا مع العلابي لما شفت الدنيا تدور بي الله يسلم يمناه فقلت:




بعـض الـمضارب تقل سمنن عرابي=لاجاك غـفـله مـثـل لـون الـعـجاجه
جاني من الحرمه شنـيـع الصوابي=اللي مع الهوشات يضحك حجاجه
نجمن ضربـنـي مع عريـض العـلابي=واثر الـغـلا شاحت من البعد صاجه
ضيـعـت مـن زود المـواجع جـوابي=وقلت ابشري لو تطلبـيـن اي حاجه
الله يثيبك في عظيم الثـوابي=كم من شجاعن تودعـنــه دجاجه




طبعا انا معروف بالشجاعه الرهيبه وارثها ورث والرجاجيل لو هم عشره فدعت بهم كلهم لكن لاشفت

ام فهد زعلانه يجيني بلاء من تحت الركب يسمونه(القعيطل)ومااقدر اتحرك لين تحوس مريري ثم

تروح وترجع لي شجاعة الرجاجيل0 ذيب والله اني ذيب يالربع00

[الفلوجي]

هلابك يبن رويتع:7ayyoh:
والله انك صادق اخونا خالد ماقصر ابد مير حنا يالبدو خبرك نحب المغالط دوم البدوي بوه هالطبع مناشب:110r:
ومن ناحية الزواج ابشر يبعدي والله قدام والي مثلكم يفخر بمناسبهم واهل الجزيره بني عم ومايقصرون لاكن يخوي الضاهر انكم يالشيبان قلوبكم رهيفه ماتقدرون تخلون امهات عيالكم (مقضوبين)
وتسلم مره ثانيه على التوضيح
والشكر موصول لخونا ابو وليد الله يجزاه خير على جهوده

[الفلوجي]

هلا بك :7ayyoh: راعي الوقيد :7ayyoh:
وتسلم على المرور الطيب



تقبل تحياتي يبعدي

[الفلوجي]

:7ayyoh:هلابك يالغفيلي :7ayyoh:

وعزالله الشيبان مدري علامهم قلوبهم غاديه خضر الضاهر يخوك من ضرب
هالقنوات الي طلع مزين وحتى الجزيره والعربيه منسردين مدري منين يجيبون المزين غربلو شيباننا كل يوم مذيعه شكل وهالشيبان تخرخر سعابيلهم عليهن مهم شايفين خير
والله اننا ثقلناه عليهم لاكن هم طيبين مايقولون شي


وتسلم على المرور الطيب

وتقبل تحيات محبك

[الفلوجي]

:7ayyoh: هلابك يبو فهد :7ayyoh:

هلا بهالطله لاخلى ولاعدم

والله العزوبي الي يسمع سوالفكم يكش من الزواج
والله لايجيب لنا (القعيطل) الي تذكروه هذا باين عليه اقشر

وبعدين بيني وبينك يبو فهد الشجاعه والذيابه حلاتها برا البيت وبالبيت يتريخم الرجل شوي محد درا عنوه بس هالله هالله بحريمكم يالشيبان بروهن لايجيكم (القعيطل)


وتسلم يبو فهد على الروح المرحه اطربتنا والله

وتقبل تحياتي