سؤال للاخ فواز الغسلان

[ر11عي اللقيه]

السلاام عليكم ورحمة الله وبركاته

اخوي فواز الغسلان اريد ان اعرف التفاصيل عن معركة الانصر بين شمر وعتيبه ؟؟ من هو قايد شمر وقايد عتيبه ومن انتصر ؟؟ لاني سمعت ان قايد شمر هو برغش بن طواله ؟؟ فياليت لو تعطينا التفاصيل

تحياتي لك

[فواز الغسلان]

هلا والله اخوي راع اللقيه الله لايهينك000



وانا ادري ان القصه ماتخفاك لكن تبي تتأكد من مصدر ثاني للتاكيد يالغالي00


وانا المعلومات اللي عندي سمعتها من الاخ مطلق بن سعيد العلياني الشمري وخواله عتيبه كماهو علمي


وبخيص بالاحداث اللي جرت عليهم وسمعتها من العديد من كبار السن بروايات مختلفه بالجمله ولكنها


متفقه بالزبده واساس الموضوع وهي كالتالي:



عتيبه كما هو معلوم من اقوى القبائل في نجد واعدادهم هائله اضافة ان معارك شمر معهم كلها كانت


في اراضيهم كما تعلمون وصاحب الارض تكون له ميزه لصالحه بالحرب لكونه اعرف الناس بمخابيئ الارض


ووجود مياهها ومواعرها ومساهلها 0 وعندما خاض ابن رشيد العديد من المعارك مع عتيبه فهذا دليل


انها تنتصر احيانا وتحمي روحها وحلالها احيانا وهو الذي يدفع ابن رشيد لتكرار الحرب معهم ولو كانت


عتيبه ضعيفه ولم تنتصر ابد لاكتفى ابن رشيد بمعركه واحده وكسر شوكتها وانتهى ولكن هيهات فمثل


عتيبه تحتاج للعديد من اللقاءات لذلك لاسيما انها منهكه اصلا بحروبها المزمنه مع قحطان خصمها اللدود


وشيخهم محمد بن هادي بن قرمله اللي تمنى الشيخ تركي ابن حميد لو تربع الشمال عسى ابن قرمله


يفارق عنهم بعد ماذبح نوادر فرسانهم فقال ابن حميد :



الله على نــــــــــو (ن) يثـــور غمامـــــــــه=يسقي من العارض اليا نقرة الشام

نبعـــد عن اللي ماتحلل عظامــــــــــــــــه=عيـــت تبيده الليالي والايام

زريبـــتـــن والضيــط تالي طعامــــــه=وحنا يقــــــزينا المنازل من العام

الياشـــب ناره في خطاة العــــدامه=قمنا نحزم غالي القــــــش بحزام


ومعركة الانصر من ضمن المعارك التي حدثت بين عتيبه وشمر وكانت شمر بقيادة محمد العبدالله الرشيد


وعتيبه بقيادة محمد ابن هندي 0 وللمعلومية فأن محمد العبدالله الرشيد ماانهزم ولا بمعركه واحده طيلة


فترة امارته وهذه حقيقه تاريخيه وانما كانت بعض المعارك التي يثبت فيها الخصم ويكثر القتل بجيش محمد


ابن رشيد نعم يحدث لكن لم تحدث الهزيمه ( الكسيره) اللي يهرب جيشه مهزوم والعدوان تطارده ابدا00


وانا عندما اقول انهزمت شمر على وقت محمد الرشيد بالذات فلا اقصد الكسيره وانما ثبوت الخصم وكثرة


القتل بجيشه 0 وعتيبه ماكسرت جيش محمد العبدالله الرشيد كسيره وطرد ابد بكل الوقعات اللي ثبتت


بها عتيبه 0 وكادت ان تحدث الكسيره في هذه الموقعه لولا ان ابن مهنا امير بريده اشار على محمد ان


ينوخ للفلول المتناثره وقال ان مانوخت لهم وحميت تاليهم والله ماتخلي منهم عتيبه رطب الحلق وفعلا نوخ


لهم فاجتمعوا وثبتوا وتراجعت عتيبه 000




لولا حسن نوخ بذربين الايمان=راحت عليكم يا بو ماجد كسيرة
اولاد علي مطوعه كل فسقـان=عاداتهم بالكون كف المغيـرة


علما ان المعركه هذي هي اللي انكسرت بها ساق ابن هندي وكانت قبل عروى بقليل وهي سبب عروى


القوي والذي دفعت الامير ابن رشيد لكسر شوكة عتيبه نهائيا عام 1301هجره0


واللي قال فيه حمود العبيد الرشيد :




وشلون رجلك يا زبون المخـلاه=رصاصتك ماهي رصاصة فتيله
عيا يطيع عقاب وعقاب ينهـاه=لاجاء القدر مافي يد العبد حيلـه


والزبده ان عتيبه كانت تناصر ابن سعود ويقف معها ويساعدها بالمال والرجال والسلاح وغزالان كان يقاتل


مع عتيبه يوم عروى وعقرت جواده تحته ثلاث مرات وكانت عتيبه مستمره بصمودها امام شمر الى ان قتل


غزالان عام 1309 واستولى ابن رشيد على الرياض لتنتهي مقاومة عتيبه وصمودها نهائيا وتستمر بدفع


الزكاة لابن رشيد مثل غيرها0 ومن قال ان عتيبه لم تدفع ابدا فهو واهم 0 قبل عروى نعم وكانت اخذ وعطى


اما بعد عروى انكسر ظهرها وانتهت المقاومه نهائيا وساقت الزكاة لمحمد ابن رشيد الى توفي عام1315


((( معركة الانصر)))


هذه المعركه كانت بحدود 1297 الى1298 وكان الموقع الانصر وهناك من يسميه الابجل شمال النير قليلا


وكان ابن هندي قد استنجد بالضيط والمحيا وقبل المعركه قامت عتيبه بنشر الحلال بعيدا عن المنطقه


وقالوا اذا هزمنا يسلم الحلال ومع بداية المعركه انهزمت عتيبه وتفرقت فلولها قبل وصول الفزعه اللي طلب


ويم انكسرت رجل ابن هندي بكى بناخيه وقال حلولات ياخالي واعتقد انه راح يقتل وقال:



ناديت خالـي يومهـن اقبلنـي=والدمع من عيني على حجرها سال


وعقرت فرس ابن هندي وطاح وثنى دونه الفارس (قراش بن جعيري المقاطي)وشاله رديف واثناء ذلك



ذهب الكثير من شمر لاخذ الحلال اللي ابعدوه ومنهم ( نمر بن برغش الطواله ) وهذا سبب سؤال الاخ


راع اللقيه0 وعند ذلك وصلت الفزعه وجموع المحيا والضيطه فتشجعت عتيبه ورجعت وقتلت من تفرق في


طلب الحلال واغارت على جيش محمد بن رشيد المتناثر والغير منظم بعد انتهاء الموقعه كماظنوا فحصل


الارتباك والهروب لولا مشورة ابن مهنا التي ذكرت بالتنويخه والصياح لهم بالاجتماع لان هروبهم سيجعل


عتيبه تصطادهم واحدا واحدا وتبيدهم وفعلا حدث ذلك 0 وفي هذه الوقعه شهد ابن هندي بالشجاعه


المفرطه لعبدالعزيز الجنازه فقد حدثني راضي الغريب الشلاقي عن ابن هندي اللي روى عن ابوه انه وهو


بمجلس ابن رشيد للتفاوض رأى شابا جالسا وأطال النظر اليه فقال ابن رشيد ليش تراعي لهالرجل كذا


يابن هندي؟؟؟ قال كل فرسانكم مابهم واحد الا نظر وراه من حر ضربنا ياعتيبه الا هذا000


وابن هندي جاء لابن رشيد للتفاوض على الصلح لولا ابن سبهان وذلك ان ابن هندي اجبر مقعد ابن هندي


(قاتل نمر البرغش الطواله) انه يلبس جوخة نمر كنوع من اضهار القوه والكبرياء ولم ينتبه لها ابن رشيد ولكن


انتبه لها ابن سبهان الذي قال جوخة نمر ماهي لايقه عليك فقال مقعد ليش فقال ابن سبهان بها طول


عليك(يقصد ماتستاهل تصير مثله) فقال مقعد الطويل اقطعه بسيفي فانتبه ابن رشيد لهذه الحركه فقال


عياده بن منيس لكي لايصلح معهم ابن رشيد:




قـــلـــت آه بـــســـم الله وابـــديــــت وارده=مــن صـخـر قيـفـان وانــا قـبــل هـايـبـه
الأمـثــال الــــى مــنــي تـعـاوجــت ركــنــه=اعـــدِّل عِـصـيـان الـمـثــل عــــن عـتـايـبـه
كــمــى ذود مــصــلاح مـاشــيــف رتــعـــه=تـعـقّـب لــــه الـقِـعــده تَـنـسّــف جـنـايـبـه
قـلـتـه بعـقـبـان عــلــى الــصــوب والــقــدا=عـقــبــان هــيـــف مـاتــدانــى جـوانــبــه
عـقـبـان عـقّـبـن العـتـيـبـي عــلــى الـقـفــا=عـقّـبـن عـقـبـان الـحـســا عــــن مـراقـبــه
فـــروخ حـــرار ضـربـهـن يــرعــب الــعــدا=فـــري البـواتـيـع ضـربـهـا مــــن مـجـاذبــه
طــلــع مـحـمــد مـاحـكــم نــجــد مـثــلــه=لا بـــــاول الـدنــيــا ولا كـــــان غـايــبــه
يــقــود الــمــلا قــــود الـسـبـايـا وجــــره=عـلـى دار مــن قـالــه عـلــى الـربــع خـايـبـه
قـــــوم يـفـهِّـقـهـم وقــــــوم يـلـحّــقــه=وقـــوم يـقـلِّــط وسـطـهــا عــــن ذوايــبــه
تبـيـد الـحـذاء ياحـمـود مـــن قـاســي الـحـصـى=وتـمــل مــــن ســــود الـفـيـافـي نـجـايـبـه
مــــن كــثــر مــادلّــن وكــلّــن ومــلّـــن=وبـيّـحـن مـشـكـاة الــدّبــر مــــن غــواربــه
يـتـلـون رقـبــة الـمـارعــي مـيـتــم الـضـنــا=طـلــق اليـمـيـن الــلــي وســــاع مـضـاربــه
حــــرٍ يـخـلــط الــريــش لــلــدم لـلــحــم=هـــــذي مـعـثـبـرهـا وهـــــذي قـاضــبــه
يـمـنــاك يـمـنــى هـيـلــعٍ مـطـلــقٍ لـــــه=عـلــى فـــرز قـفــرٍ لـبّــدت مـــن رعـايـبـه
دار الـــفــــتــــى روا الــــــعــــــذارى=مـتـلـقِّــي الـبــلــوى مــهـــدِّي صـعـايـبــه
كـــــم قــريـــة هـــــازه ورازه وفـكـفـكــه=شــاعــت وشـبّـيـنــاه والـنــفــس طـايــبــه
شبِّـيـنـاه مـــن حــصــن الـشـيــوخ عــلــوّه=عـلــوّة مـــن لا لـــه مـــع الـخـيـل هـازبــه
إهــتــزّت الــجــدران والـــــدور والـنــخــل=وتـقـول تـلـفـي مـــن عـقــب مـافــات تـايـبـه
عــوق الـفـرج تــف كـفـي وانــا اخــو نـــوره=الـــى مـــا وقـــع مـنـهـا ولـدهــا وشـايـبـه
اشـبــهــك يـامــيــر وانـــــا اذكـــــر الله=داب عدى واشرف بعالي رقايبه
بــيــدي عــــدوك قــاســي هــــم قــاســي=وبـيــدي ربـعــك كالـنـاديـه مــــن رطـايـبــه
يـامــا هـشـنــا دونــــك بـالـبـيـان والـخـفــا=نـهـوش لـــو عـيـنـي طـخــا الـنــوم غـالـبـه
يـامـيـر الأجـنــاب لا يـغـديـك كـثــر جـمـعـهـم=يـامـيــر لا تـغــديــك سـكــبــة شــواربـــه
يـامـيـر لـــولا الـسـيــف والـحـكــم كـضّـهــم=وذلّـــوا عـلــى عــــالات تـقـفّــى مـحـالـبـه
يـشــوونــك بـجــمــرٍ مـــــن الــغــضــى=شــويّـــة عــجـــلٍ وبـالــنــار يـقـالــبــه
شـمّــر جـنــاحٍ لـــك الـــى هـبّــه الــهــوا=الــــى ذعــذعــت لـلـشـيــخ ذري هـبـايـبــه
وشــمّــر كــمــى ذيــابــة فــــوق ضــمّــر=الــى جِـلْــت جَـلَــت مـــع مـجـالـك عـرايـبـه


فقال ابن رشيد لابن هندي هاللي سمعت كلام عقالنا0 لكن رح لديرتك واذا وصلت تحرن هناك0


عندها رفض محمد ابن رشيد ابرام الصلح فرجع ابن هندي وامر ابن رشيد بجمع العتاد والعده بالمغزى


لتحدث معركة عروى الكبرى اللي كسرت شوكة عتيبه في وقت محمد ابن رشيد لتأتي بعدها ذبحة


محمد العبدالله الفيصل التركي ابن سعود ( غزالان) واللي ذبحه كليب ابن شريم في بنبان وفتح الرياض


لتنتهي القوه التي كانت تساعد عتيبه وتشجعهم على رفض الانقياد لامارة ابن رشيد عام 1309 وقد قال


محمد الهويدي بعد معركة عروى:




هاذي عقايب فعلكم يا ابـن سلطـان = يبـا الثـواري قطعكـم بالجريـدي
ضعتوا وسعتوا فالبلاديـن سيـدان = لعلـكـم ماتـدركـون الشـديـدي
راحـت وقاريكـم لبيشـه ومـران = لعـل ميتكـم شـرابـه صـديـدي
أختف عقله يـوم طالـع بالاعيـان = ما اسمت حصانه يوم شاف الرشيدي
ثـلاث مـرات يشيلـون كـوبـان =والي ظهر من كون عروى وليـدي
عقب الطمع عود على العمر بلشـان =يبـي يتـوب وغيرهـا مايعـيـدي
هو يحسب ان الحكم رقص وبيشـان = غره ولـد ضمـن بكثـر النشيـدي
او التفدوي مع عقاب بـن شبنـان = مثـل (...) ميـر ماهـو يصيـدي
ماطاع شور حزام مع شور راكـان = عطوه رأي النصـح لـو يستفيـدي
ان كان ابن هندي من العام طنيـان =يرضيه سـردال السرايـا العقيـدي
فان كان ابن هندي بغا الحرب فسقان =فالمارتين ادعـت عظامـه هميـدي
خلي بقصر من ورى العرض ذهلان = متنـدم مـن مقعـد لـه وحـيـدي
ابـن محيـا تايـه الـراي بوقـان = ان سلم اخو نوره يعـض البديـدي

وقال بشير بن نصار التميمي بعد عروى:



الحمـد للـي يعلـم الخافيـاتـي = الواحـد المعبـود وال المقاديـر
وأشوف عيرات النضا شايشاتـي = والصانع أجهد بالحذا والمساميـر
والشيخ نادى بالرمـك والولاتـي =وقسم على فتخان الأيدي مخاسير
ومن كل يم جـن لهـم وارداتـي = فحول يونسن البكـار المياسيـر
واستنجبن مثل المهـا وارداتـي =قحصن يشلعن الحصى بالمسامير
وخمن بنا ظلـم وهـن مقفياتـي =وسبورنـا جتنـا بعلـم وتدبيـر
طار العقـاب تشقلبـن بالتفاتـي = وطالع وراء هكران طرش ومغاتير
وصحنا على إبن حميد هرج ثباتي =ترجيعـة وحلـو خـز المعاشيـر
وهذا جزى اللي ما صخى بالزكاتي = تل المهار معسكـرات المساميـر
وجنـا وربعنـا بزيـن الفلاتـي = ليا ما قدنا حشو البرود الأباهيـر
وتشاملن لديار أهلهن متكاتفاتـي = وجينا فراقين تحـدر مـن النيـر
صفقٍ برفقٍ جيب طرش الحفاتـي = ورجنا على عيلاتهم والمظاهيـر


وسبق ان اوردنا قصائد حمود العبيد الرشيد وكذلك قصيدة خضير الصعيليك واللي منها:




مزنن نشا من ريبته وارتهابه =من ريبته كل الخلايق مريبين
مخايل شرب الخبر من سحابه =كم عمن الصافي على مشرعن زين
شري شرى شري الحريشا شرابه=اسقى العدو من ماه نتلة عزارين
البرق يبرق والرعد له ضبابه =هلت على ابن حميد هو والشيابين
حقت ولا بقت جداها انصبابه =على مغاتير الشيوخ القديمين


وعلى العموم فالروات ذكروا ان مقتل نمر بن برغش في كون الانصر بل ان لبست جوخته هي سبب عروى


ولولا قيمته ماتحركت حميا ابن سبهان ومشى ابن رشيد لعروى وهناك ابيات تروى ابرغش ابن طواله فيها


خلاف لان البعض ينكرون ان يكون برغش شاعر لذلك مااوردتها انا هنا واكتفي لعدم الاطاله ومنتظر تعليقاتكم


لتكتمل الفائده للجميع تحياتي ابن غسلان00

[ر11عي اللقيه]

مشكورررررر اخوي الغالي فواز الغسلان على الرد الرائع والايضاحاااااات .. ولكني سمعت ايضا ان معركة الانصر يقيادة برغش بن طواله وان نمر بن برغش مات بمرض وليس قتللللل


تحياتي لك

[فواز الغسلان]

هلا اخوي راع اللقيه000


انا والله سمعت مثل كلامك في ردود لبعض الاخوه على مثل هذا الموضوع في احد المنتديات00


اما من طريق الرواة فلم اسمع الا الذي دونته هنا يالغالي00


الا اذا كان فيه مغزى للاسلم مثلا حول تلك الارض مثلا فجائز لكثرة مغازي الاسلم الخاصه


وقد تكون تحمل هذا الاسم او قريبا منه مثلا لكن ليس لي علم بذلك يالغالي0


تحياتي العطره الراوي00

[مانع السرحاني]

فواز الغسلان مشكور على المجهود الرااائع


ورااعيه اللقيه مشكور على أثارت الموضوع للراوي

لاهنتو جمعياً

[ghosty]

الله يعافيكم جميع

علوم تطرب القاري

والله لا يخلينا منكم جميع

ولا نعدم هالوجيه الطيبة

[هايس الشمري]

تسلمون والله كلكم..


و الله روايه تاريخيه تطرب..



لا هنت..



بس ابسال عن قصيده القثامي اللي يقول به

حنا عتيبه كم حريب ٍ لطمناه

..................... دقلاتنا مثل الخيال الرزيني

اعلونا في الحجز واعلى قراياه

........................وشيوخنا يم الحسا مردفيني

حنا ترا نجد المسمى ملكناه

.................... وخابت حظوظ أهلها الاوليني


والله لولا شيخ ٍ وطتنا زكاياه

..................ابن رشيد مروع الغافليني



وش سالفته و هل هي قبل عروى ؟؟

[فواز الغسلان]

هلا اخوي هايس ولاهنت يالعزوه



وطلبك راح تشوفه بموضوع مستقل انشالله هاليومين بس ذكرني له ترى انسى



الراوي00