إبتسم مع الشعراء ...

[أم نــــــــــواف]

ليس كل الشعر
مدحاً وهجاء
غزلاً ورثـــاء
ردّ وإستجداء
\
/
\
بل فيه من الأبيات الطريفة مايرسم الإبتسامة على وجه القارئ ..

هلاّ هممتم معي إخوتي الأكارم في تجميع الأبيات الطريفة في الشعر النبطي .. مشكورين .

سأبدأ من عندي وأنتظر منكم المشاركة إن جِدتم بها ... rooose3


قال أحد الشعراء ...


فكرت مرّه اسرق البنك وأعتاش = وصممت من قلبي أنفذ قراري

وجهزت نفسي في مسدس ورشاش = ثم إستعديت لجميع الطواري

لكن قبل لا أسرق البنك وانحاش = احترت بين المركزي والتجاري


ننتظر مشاركاتكم إن شاء الله

-
-

[ريال الفسحه]

لكن قبل لا أسرق البنك وانحـاش
احترت بين المركـزي والتجـاري

هههههههههههههههههههههههههههه

حلوه هاللحين بلشان بين المركزي والتجاري.......:)

ابجيب ابياااات وانكس لتس......



لاهنتي

[شموخ]

اهلين ام نواف


على الطاير من الارشيف :)

فيه بيت دايم يردده خالي بس ماهو من نظمه ماندرى من شاعره :)


بعض العرب ودك تحطه بمخباك ............. تظهر خشيمه كل ساعه وتحبه

وفيه بيت حافظته بس مدري لمن .

لي صاحب ٍ لامن تبسم مثل قبل امس ........ يالله يجمع كشرته عقب باكر

وفيه ابيات يقول فيها

لي صاحب لاشفت وجهه توحشت ............. وجه كريه وحاوي كل شيني
له برطم لامن ضحك كنه الطشت ............. والخد من شينه كما جدار طيني


ايضا فيه ابيات

انا حسين وعزوتى أهل بنجلاديش ............. الرجال اللي تحتميهم حسينه *
ليا تجمعنا تجمعنا على لقمة العيش ........... وان جاء نهار الكون رحنا عجينه

* يقصد بها رئيسه بنجلاديش السابقه ( والله مدري لو كان للحين حاكمتهم ) :)

يامرحبا ترحيبة تسبق الفار ........... لصار في دربه ثلاثين بسه

*****

حنا بنى هنود لاصار جنجال ........... نارد حياض الموت مافيه مشكل
واحد نفر يكفي عن الفين رجال ...........متسلح عجرا وراسين فلفل

وفيه ابيات سمعتها بقناة الواحه قبل يومين بشاعر المليون بس للاسف الله يخلي لنا جدتى نادتنى وماسمعت بقيه القصيده :(

اللي قالها واحد شايب شكله بدوي يقول

صديق سلم على رفيق ......... قله ترى حالتي تيقا

وفيه ابيات جتنى مسج من وحده من زميلاتي

عزى لمن حده زمانه على زيود ............. جريمة كبرى وعظمى وشنعا
عبده شراحيلي وشوعي ومحمود ............ وكبودنا من ذيك الاشكال وجعا


وفيه مسج ثاني برضه جانى من وحده من صديقاتي العزيزات دائم تقول عني قاطعه واعترف بالتقصير تجاه صديقتي :tongue: .


ياصاحبي جعل العقارب تعشاك ............ في ديرتن ماطاح فيها الربيعي
سته وعشرين الف عقرب توطاك ........... حتى تسوي فيك فعلن شنيعي
حيثك نسيت اللي من الناس خاواك ............. وهذا لمن خان الرفاقه طبيعي






وسلامتكم هذا ماطرى على بالي اللحين لو اتذكر شي يحمل الرجعه برجع :)

على فكره الابيات اللي استشهدتى بها للشاعر حمود البغيلي :thumb: .


شكرا لك يام نواف

[أجا]

ام نواف

فكره حلوه



هلا رأيت الخيل يأبن مالك ( ن ) ..... تاطا شخانيب الرضم ماتشوفي


...................


رمتني بسهمن فكان السهم رنانا .... فوطيت راسي فمر السهم من هانا .


.

[ريال الفسحه]

شموخ

الله لايضرتس......

[فلاح العماش]

أم نواف



ألف شكر لك على الموضوع الجميل والممتع



والتفاعل واضح من الأعضاء

والشكر موصول


للأخت شموخ على كميّة الضحك التي أهدتها للقلب





الموضوع ثبّت


لأضفاء نوع من الأبتسامه والمرح هنا




دمتي أم نواف

[أم نــــــــــواف]

الأكارم

ريال الفسحه

شموخ

أجا

فلاح العماش


شكرا لكم جميعاً على المرور والمشاركة بما جدتم به

وشكرا أخي فلاح للتثبيت ..

ـــــــــــ


وهذه مشاركة للشاعرة عابرة سبيل رحمها الله ..



لي صاحب منه تبي تطلع الروح = خبل ومن هي مولعه فيه.. خبله

عامين المح له مع الجد و مزوح = واقول يا عنتر تناديك عبله

طال المدى ثم قلت انا اغليك يا لوح = مجروحه جرح مخاطره عجله

دنق و قال أنا من العام مجروح = و أشر لجرح مبطي وسط رجله

:)

-

[الصيرمي]

ام نواف

فكرررررره حلووووووه:)

احب اضيف البيتين :)


عطني زقاره من الباكيت = باكيتي اللي معي خالي

حسبي على راعي الوانيت = اللي خذا صاحبي الغالي

تحياتي:)

[ابو عارف]

فكرة رائعه يا أم نواف

وخوذي مني هالرائعه


ريق الحبيٌب حليب أرنب *** هجلن ولاعمره إكمشبه
وقرونها ياذنب عقرب *** اللي ليانيش تلغش به
وريح الحبيب ياريح أجرب *** اللي أليفه يطنش به

[عبدالله المهيني]

فكرة جميلة أم نواف



وفيه أبيات ماني عارف شاعرها
تقول




يامحلا النوم على فراش ممدود=في ليلة مايقال بكره دراسة

يصبح عليك الصبح ماجاك منكود=ولا جاك من ثقل الليالي تعاسة




شكراً أم نواف

[شريف روما]

حنا بنى هنود لاصار جنجال ........... نارد حياض الموت مافيه مشكل
واحد نفر يكفي عن الفين رجال ...........متسلح عجرا وراسين فلفل



هههههههههههههههههههههه

تسلمين والله ام نواف على الفكرة الطيبة

[شريف روما]

عــــــــــدنا






قصائد تموت من الضحك...لاتفوتكم

--------------------------------------------------------------------------------


دخل الشاعر صقر النصافي في اخريات احد الاعراس فألتقى بفتاه كانت تتطلع
لرؤيته ولكنها عندما شاهدته فوجئت بكبر سنه فقالت"يترب شبابه"
فرد عليها حالا:

يابنت لايترب شبابي ولاابيــك=يترب شباب اللي يحطك حبيبه
عيّا زرار الثوب ياصل علابيك=منتفخةٍ كنك صميل الرويبــــــه


تعرض الشاعر راعي الملحا لاصابات قاتله بسبب ترديده لاسم محبوبته وهو
نائم في فراش الزوجيه وهو هنا يشرح ماحدث قائلا:

ناديت باسمك وانا مع زوجتي راقـــــــد=حتى رفستني على بطني برجليــــها
وسويت نفسي مثقف واعي وناقـــــــــد=واقول عادي مصير الوقت يرضيها
ويوم اكفختني طراق وصحت وانا حاقد=الله يلعن غلاك ويكسر ايديـــــــــــها
واحترت انا وين بالقى لي بدل فاقـــــــد=ولقيت وحده تهزز لي علابيهــــــــا

طراق مرة وحده هههههههههه
شهالحرمة القشرة :)




هذا الشاعر رشيد الكثيري يقارن بينه وبين الاغنياء

احد عشاه القرص ومفطح الحـيل=واحدٍ عصيدٍ يلعط القلب حـــــــره
واحدٍ يلاعب لابسات الخلاخيـــــل=واحدٍ عجوزٍ شاف منها المضــره
واحدٍ يصجه حس صوت المحاليل=واحد يتشفق في الشهر صب كرّه
يارب عدلها عن الحيف والميـــــل=والا انت ميلها على الناس مــــره




هذه بيتان لشاعره قديمه رأت من زوجها ماتكره فأخذت تطالبه بالطلاق وتدعو
عليه بالموت ان لم يحقق رغبتها:

ياشوق طلقني وانا منك ملــــيت=كما يمل الغزو ركب الشـدادي
وان كان ماطلقتني حين مااقفيت=عسى تطلق بك رماح المعادي






تقول عابرة سبيل عن خبال حبيبها:

ياخبلي الغايب متى ترد للعين=متى اشوفك او تجيني رساله
صحيح بالدنيا خبولٍ كثيريـــن=لكن خبالك ياحياتي لحالــــــه




وهذه شاعره تشتكي من عدم رومانسيه حبيبها:

لي قصةٍ مع صاحبي فيلم هندي=دايم وانا وياه فهواش ودمـــوع
وده يسامرني على تيس مـــندي=وانا رقيقه ودي بازهار وشموع

:)







دخل احد الشعراء مطعم الفوال "بقارش" في مكة المكرمه فطلب منه
صاحب المطعم ان يمدحه فقال الشاعر مادحا وموريا بالهجاء:

الله يبيض وجه عمي بقــارش=هو مطعم الضيفان لاجوه بقــروش
ايضا ولايفرش لضيفه مفارش=الا الفراش اللي من الرب مفروش




وهذا شاعر يتوجد على حذاءه عندما فقدها:

ياوجودي وجد من ضيع نعوله=لاقيٍ وحده والاخرى مالقاهــــــا
عايشٍ معها من ايام الطفولــــه=شاب راس العود ونعله مانساها

ماعندوه سالفة :)







عرف الشاعر حنيف بن سعيدان بنهمه الشديد بالقهوه حيث لم يكفه 15 فنجان
ذلك اليوم حتى تأفف منه مستضيفه قائلا:

خمسة عشر فنجال لحنيف صبيت=لو كان بطنه قربةٍ قد ملاهـا

فرد عليه حنيف قائلا:

لاتحسبني من دلالك تقهويـــــــــت=ماتنقه الشراب من كثر ماها
ياموصّي الحرمه على صكة البيت= تقول ماانته فيه وانته وراها




وهذا شاعر يعترف بدمامة وجهه الذي ينفر منه الفتيات فيقول:

الله حسيبي على لونـــي=لاشفت انا البنت يدبلها
بالزايد ان شافت عيوني=كني من العام مزعلهـــا

يعين الله :)






وهذا فهد عافت يقول:

نادت مشاري صاحوا الخلق لبيه= من زينها كل الخلايق مشاري



وهذا الشاعر عارف سرور يقول:

كان الوعد مابيننا حذفة احجار=ومن كثر شوقي له حذفت وفلقته



وهذا راعي ونيت كداد يمتدح ونيته الذي ينقل عليه الوافدين من الهنود:

ياماحلا الوانيت في قلة المال=في شارعٍ فيه المواتر قليله
هذا ولد بوتو وهذا ولـــــد لال=وهذا رفيق تو جاب كفيلــــه

كل ٍ يغني على ليلاه :)





وهذا شاعر يقول:

"بليز قف مي" يااريش العين حبه=بيكوز حبه منك تشفي جروحي

شاعر مثقف :)







ويقول الاخر:

"اي سو" برقٍ على الطايف=ميبي" على دارهم "ميبي"
وجدي على شوفة "الوايف"=سمول" ماجابـــت "البيبي"



وهذا شاعر يقول:

البارحه ونيت واليـــوم حا..ونّ=وانتّر الونات في كل حتــــــه
حتيش لو راحن وحتيش لو جن= اثنين زايد اربعه يساوي سته



وهذا شاعر يتحدث حول الصراع الدائر في افلام كرتون بين القط توم
والفاره جيري فيقول:

يلعنك" توم" مدوخٍ دوم" جيري"=تلاحقه في كل حاره وداعوس



وهذا الشاعر سعود الجمعان يقول في البنوك:

البنك لولا لوحته ماعرفناه=من قل ماندخل على موظف البنك
ماغير نقرا لوحته ونتعداه=وان قيل هذا البنك قلنا اتركه عنك



وهذا شاعر يقول:

يابنت انا ماني براغب علامــــه=او راشد الماجد جميل المـحيّا
الله حرمني من الحلا والوسامه=لكن بخفة دم مرهـــــــــي عليّا
وابوك مزعجني بكثرة كلامــــــه=ومطّلعٍ عيب المخاليـــــــق فيّا
من يسمعه يحسبك فاتن حمامـــه=مايدري انك غصب صرتي بنيّا



اعجبتن هالقصايد والابيات الفكاهية قلت خل انقلهن لكم :goooood:

[ابو عارف]

ماهي سالفت إبتسام *** للضحك إفتح لك قســام
أإضحك في كل الأوقات *** أ ضحك حتـى بالمنــام
أضحك مع الإخت شموخ*** والــزقـروطي يــاســلام
وضحك للدنيا تضحك لك *** وننتظـر مسك الختــام

[أم نــــــــــواف]

-

الأكارم

الصيرمي

أبو عارف

عبدالله المهيني

الزقروطي

أبو عارف


الله لايهينكم ويعطيكم العافيه

مشاركات ولا أحلا ..

مشكور اخوي الزقروطي على كل هالأبيات الباسمه


مشكورة شمووووووووووووووخ على توضيح قائل الأبيات ( حمود البغيلي) وعلى مشاركاتك الحلوة

مشكور ابو عارف على إجادة النظم


الله يحفظكم ..


وهذه مشاركة جديده :


ياناس وين إسبنش بوباي = باعطيه خل نقل همي

حتى يصارع جميع أعداي = وأول ما يذبح ولد عمي


ياحراااااااااام ياولد عمهااا ... :)

-

[( النجــــــلا )]

يحووووول ياولد عمها:)



لي صاحب ٍ لامن تبسم مثل قبل امس ........ يالله يجمع كشرته عقب باكر


ياماحلا الوانيت في قلة المال في شارعٍ فيه المواتر قليله
هذا ولد بوتو وهذا ولـد لال وهذا رفيق تو جاب كفيلـه



أم نواف الله يسعد قلبك والجميع واذا لقيت ابيات برجع roooose

[المهرة]

الغالية 00

ام نوافــ rooose2

تسلمين يالغلا

على الموضوع اللي يوسع الصدر :)

الله يوسع صدرك يارب

من جد ضحكت من قلب

كل الشكر للاضافات الجميلة

وشُكر خاص لشموخه :)

ولي عودهـ ان شاء الله


دمتِ بخير

اختك / المهرة

[الراميه]

شاعرتنا

أم نواف

رغم أني مقله في تواجدي في مضايف الشعر النبطي

إلا اني لا ابتعد عنه ...


فكرة جميله

الله يسعد قلبكِ

كما جعلتِ قلوبنا تبتسم

كل الود لك

دمتِ بخير وسلامة

[هايس الشمري]

ام نواف



فكرة جميله

[أم نــــــــــواف]

الأخ هايس الشمري

النجلا

المهرة

والرامية


أسعد الله أوقاتكم وشرح صدوركم

شكرا للمرور الطيّب .. بس وين المشاركات ؟؟ :) << ماتستحي شحّاذه :)


وهذه مشاركة مني :


راس الغضي يمشطه بعطور = وانا كلت راسي الحكة


بلاك إنت اللي جايبه لنفسك

:)

[أجا]

طير يالي فوق بقعاء تنوحي..

................ نوحك طرب والى صيدك تبي التمر الي بالنخل .

[عبدالعزيز]

الله يوسع صدور الجميع بالعافية وخصوصا اختنا ام نواف على هالابتسامات وخوذو هالمشاركة اللي ماادري منهي لوه ولااذكر منين سمعته او وين قريته والعلم اني حافظه من لي سنين ..... ولاتدققون:)



آشوف عبدالله تقل وجه فاطس=ماهي غريبه لو جفا وقال لي طس
عزّي لعينه راس ماله بطاطس=ويزرع معه كرّاث واطرافهن خس
لياما غدى بالحيل .. بالدين غاطس=مثلي تحرى قرطةٍ داخل الحَبس
اليا سمع بالشيك دلا يعاطس=وان حلت الاقساط يلبد تقل بس

[أم نــــــــــواف]

اخواني

عبدالله

عبدالعزيز

مشكورين والله للمشاركة والتأييد

وهذه مشاركة حوارية منّي لاأعرف المتحاورين فيها : :)


الشايب

قلبي شباب ولازم إني أعرس = مابي العجوز اللي توسد على الباب

الخير واجد وماني مفلس = عندي فلوس تدعم البنك بحساااب

العجوز

ما باقي منك غير خشمك وهالضرس = تبى تعرس وانت كنك غراب

قابل صلاتك الله يشفيك من المس = وإلا ترى باطب وجهك بالترااااب



:) مدري ليه !! ... أحس إن هالشويّب والعجوز إنقردوا ثنينتهم .. :)-

[ريال الفسحه]

هههههههههههههههههههههههههههههههه



لله دركم عدت كما وعدت .................


يقول الشاعر الملخبط:


هات القلم واكتب قصيد مشخبط=خطه على قرطاس مخطوط بخطوط
عبر عن اوضاع وحال ملخبط=فيه الغلط متبوع والصح مغلوط



هذي للاسف وحدتن دبه ((سمينه)) وزوجه انواع الكلااااااااااام وقالت هالابيااات



دوم يعيرني يقول جسمك متين=حلقك المفتوح لازم تغلقه
هيه يادبه لازم تخفين=والا اثور فيك عشرين فشقه
واستمريت في رجيمي سنتين=جدي اللي مات بغيت الحقه
وش رايك؟؟قلتها بصوت حزين= قال دبه وانقلبتي لي سلقه



فكرتن رائعه وانشاء الله اني اليا لقيت شي جيتكم طبلووووووووني:)

[هايس الشمري]

قال دبه وانقلبتي لـسلقه

هههههههههههههههههههههههههههههههههههههههه هه



و الله اللي مابوه طب :)

[عاشق M]

مشكوره ام نوف








والله يعطيك الف الف الف لف لف




عـــــــــــــــــــــــــــــــــــــــ ــــــــــــــــــــــــــــــــــــــــ ــافــــــــــــــــــــــــــــــــــــ ــــــــــــيـــــــــــــــــــــــــــ ـــــــــــــــــــــــة





انبي اكثر


اخوك@عاشقM@

[أم نــــــــــواف]

هلا بك اخوي ريال من جديد


أبياتك الأخيرة ( الدبة ) هذي للشاعرة عابرة سبيل رحمها الله


مشاركة حلوة منك اخوي ..




شكرا اخوي هايس




شكرا اخوي عاشق


الف شكر للجميع ،

-

[أعماق الشمري]

لـ لـ شاعر / سامي الشمري

شفـت الحيـاة الـي لهمـا فلـم كرتـون ؟
مثل الحيـاة الـي مثـل ( تـوم . جيـري )

،

يقضـي حياتـه تـوم .. و يفكـر شلـون !
مسكـيـن مايـقـدر يـطـول المصـيـري

،

و كل ما مسك جيري .. غدأ الحـظ ملعـون
جتـه العجـوز الــي تصـيـد القمـيـري

،

بالمكنسـة / ترسـم عـلامـات و فـنـون
ضــرب العـلابـي عنـدهـا مستعـيـري

،

مفـلّـص بنفـسـه مصايـبـه مجـنـون
دلـخ ً جنـا ( جيـري ) بعمـر السمـيـري

،

يبكـي حـيـاة ً كلـهـا هّــم و طـعـون
ملعـون ( جـيـري ) دارس المستثـيـري

،

الله لا يـجـزي الـمـؤلـف ولا يـكــون
دمّـر حيـاة و كـافـي الـشّـر خـيـري

،

راحـت حيـاة بسبـت الجـوع ( بــزون )
و مات المؤلف .. ولا مسك ( توم <> جيري )