اليوم ابي اسألكم عن بيت الشعرهذا وابي كمالة القصيديه

[مطشحر]

السلام عليكم :7ayyoh:
اليوم ابي اسألكم عن بيت الشعرهذا وابي كمالة القصيديه
عندي لي شايب الله يطول بعمره دايم يطريه ولا يكملوه اعرف قصته بس القصيدة!
البيت هو
تقول صاحبة القصيدة

نفسي تمنيني رجال الشجاعة ****** ودي بهم بس المناعير صلفين
ودي بواحد منخش وسط الجماعة***** ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟.؟****** لاهو بشاكيني ولا الناس دارين
ادري اني ثقلته بكثر النشده بس الطمع بالاجواد

[ريال الفسحه]

نفسي تمنيني رجال الشجاعة = ودي بهم مار المناعير صلفين
أحب مندس بوسط الجماعــــة= يرعى غنمهم والبهم والبعارين
وإذا نــزرته راح قلبه رعاعــــــــه = يقول ياهافي الحشا ويش تبغـين
ون قلت سو العشا قال طـاعه= دنى الهوادي والقدر والمواعين
لو أضربه مشتدة في ذراعــــه= مهوب شانيني ولا الناس دارين

هذا االلي لقيتوه ومادري عن صحته ميه بالميه والسموحه على القصور يامطشحر.......

[ريال الفسحه]

و اذا تبي السالفه قل ولاتستحي<<<اخس يالراوي


مااوعدك لكن اببحث لك

[مطشحر]

مشكور يالريال والله انك ميه ماقصرت مير اعرف القصة وجزاك الله خير
بس عاد تعرف اسم المرأة اللي قصدت

[ريال الفسحه]

عطن دقيقه الله لايهينك

[ريال الفسحه]

يقولك العم الراوي الانترنت........

كان حجول من شجعان الرجال ومن أعرف الناس بالطرق حتى أصبح يضرب به المثل فقيل فلان حجول أي دليلة.
وقد قال حجول عن نفسه :


دليلتهم وانا حجول=لا غطا المرقاب نوَّى
أصدرهم واورّدهم دحول=بلا علامة أو رجم مسوّا

وكا ن دائما يُستعان به في السفر والبحث عن الماء وأصبح مقصرا بحقوق زوجته موضي البرازية وقد كانت جميلة وصاحبة لسان وكان يرفض تطليقها ويحتج بكونه قد وفر لها ما تحتاج من اللبن والتمر والسمن والبُرّ.
فردت عليه:


حتيش لو حطيت فتخه وباكور=مع جوخةٍ تكسي قطات العبيه
إقطك وسمنك كنه الشري ممرور=لا طاب مقلوعك فعود عليه

ثم طلقها بعد ذلك عندما تأكد من عدم رغبتها فيه, فتزوجت بعده ابن عمها واسمه خروف فاستقرت معه وأحبته وقالوا كان مغفلا فتذكرت حجول وقالت:


نفسي تمنيني رجال الشجاعة=ودي بهم مير المناعير صلفين
أحب مندسٍّ بوسط الجماعة=يرعى غنمهم والبهم والبعارين
وإذا نزرته راح قلبه رعاعـه=يقول ياهافي الحشا ويش تبغين
وان قلت له سوّ العشا قال طاعة=دنى الهوادي والقدر والمواعين
لو اضربه مشتدة في ذراعه=مهوب شانيني ولا الناس دارين




الغالي مطشحر هذي معلومات من النت ......يعني مانا مسعول عن
صحته........

الا رد علي اذا السالفه صح او خطا.......لاهنت واعذرنا على القصور.......

[مطشحر]

:7ayyoh: والله يا أخ ريال القصة اللي سمعته من هالشايب انه كان رجل شجاع وذيب لكن مابه خير للحريم ولاجل هذا طلبت الطلاق منه وتزوجت خروف اللي انت تقول رجل على قد حاله فسوى له هالشجاع عشا وقاله تبي تاخذلاهلك عشاء قال ايه قال افتح بشتك وكب العشاء بوه وهو يدري انه معرس عليها ويوم انه راح لها قالت سواه فلان عاد اللي ماعرف اسمه ثم قالت هالقصيدة لانه تحبوه بس انه مابه خير
وذا على ذمة اللي رواه لي والله اعلم

[ريال الفسحه]

الله لايهينك على القصه والتوضيح ولاهنت الغالي
واتمنى اني اكون افدك واستفدت انا........

[شموخ]

انا قد قريت قصته اذا لم تخنى الذاكره بجريدة الجزيره قبل سنه تقريبا او اقل بشوي :)


هي القصيده لمويضي البرازيه بس قصتها تقول انها تزوجت واحد من اقاربها وكان زوجها دائم ينهاها عن مخاطبة الرجال وفي يوم من الايام خاطبت واحد من الرجال بخصوص سؤال عن احدى قصائدها فعصب ابو العيال عليها وعاب عليها طولها الظاهر من القهر مايدري وش يعيرها فيه مالقى غير الطول :) ردت عليه بقصيده


طول الحجب ماعذربه كل قبا ....... ويوم اللقا مايركبه كل منزوع
بيتك جذبني جعل بيتك يهبا ............ عساه مايبنى على العز مرفوع
وجعل الصغير بيننا مايربا ................. وايضا ولا يلعب على فرخ جربوع


يقولون انه طلقها بعد سماعه لها الابيات فلو لاحظنا البيت الثاني تقول بيتك جذبني هذا دلاله على شجاعة زوجها ومايجذب غير الشي الزين :) وحسب ماقريت ان رغبتها بزوج خبيل عشان الظاهر مايهاوشها لانها قالت

ماهو بغاويني رجال الشجاعه ....... ودى بهم بس المناعير صلفين
اريد مندس بوسط الجماعه .........يرعى غنمهم والبهم والبعارين
وليا نزرته راح قلبه رعاعه ............ يقول ياهاف الحشا ويش تبغين
وان قلت له هات الحطب قال طاعه .......... وعجل يجيب القدر هووالمواعين
ولو اضربه مشتدة في كراعه .......... ماهو بشاكينى ولا الناس دارين



والله اعلم عن الراوايه الصحيحه :)

تحياتي
شموخ

[سيف الدولة]

يا مطشحر

السلام عليكم ورحمة الله وبركاته

كل اللي تابعوك مع هذه ألأبيات ما قصروا

واللي انا أعرفه عن هذه ألأبيات:

قرأت مرة وقديما في كتابٍ وقع بيت يدي عند مَنْ زرته

ذات مرّه.. إسمه( شاعرات من العرب)للمؤلف محمد بن ردّاس

قأل أن إبنتين من بنا ت العرب أحدهما مويضي وتدعى ألأخرى بنّــا

وكانت ترعيان أغنام أهلما فقالت إحداهما للأخرى دعينا نقطع الوقت بالحديث

أو الشعر ولتذكر كل ّواحدة أو لتقول ابياتاً من الشعر تمدح بها زوجها وبدأت بنـاّ قالت:

لإختها مويضي:

شوقي غلب شوقك على هبة الريح......ومحصل (ن)فخر الكرم والشجاعة

إركاب شوقي كل يوم(ن) مشاويح.........ولا لفــــا صــــكّوا عليه الجــماعة

يابنت شومي للـــرجال المــفاليح............لا تقربي راعي الــردى والــدناعة

فأجابتها أختها مويضي

بألأبيات التي ذكر ألأخ ريااااال الفسحة
نفسي تمنيني رجال الشجاعـة ..........ودي بهم مار المناعير صلفين

أحـــــب مـــندس بوسـط الجماعـة..........يرعى غنمهم والبهم والبعارين

وإذا نــــــــــــزرته راح قلبه رعاعـه ........ يقول ياهافي الحشا ويش تبغين

ون قلـــــت سو العشا قال طاعـه ........دنى الهوادي والقدر والمواعين

لو أضـــــــــربه مشتدة فـي ذراعـه........مهوب شانيني ولا الناس دارين

[مطشحر]

صح لسانك ياسيف الدوله ومشكور على هالتوضيح وعلى العموم افدتنا بمرورك جزاك الله خير والروايات مختلفة والله اعلم بالصق بينهن
اقول اما تعطينا خلعة من بيت المال ههههههههههههه

[سيف الدولة]

اقول اما تعطينا خلعة من بيت المال ههههههههههههه


والله أعجبتني كلمة خلعة عربية أصيلة على أيام سيف الدولة


ومني أنا أبشر بعزك هات رقم الحساب ونحوّل لك اللي نقدر عليه

[ريال الفسحه]

ومني أنا أبشر بعزك هات رقم الحساب ونحوّل لك اللي نقدر عليه

تسانك توزع شرهات الله لايهينك علمنا:) <<<نااااااااويه

[عبدالله الأسلمي]

مثل ماقالت شموخ الاغلب لاني سامعها وقاريه

تقبل مروري