عبدالعزيز المتعب وسعدون الأشقر

[فيصل حمود]

السلام وعليكم ورحمة الله وبركاته

ذهب ناس من اهل نجد سفر للتزود بالطعام والمؤن من العراق وفيه تاجر مشهور بالعراق اسمه "شاهين" ويلقب الطعام "بحب شاهين" اي التمن العراقي.

وعندما وصلوا السفر الي العراق منعهم الشيخ سعدون ابن سعدون "الأشقر" حاكم منطقة ذي قار في جنوب العراق من التزود بالطعام وأبلغ بالسالفه الأمير عبدالعزيز بن متعب الرشيد حيث أن السفر رجعوا بدون الحصول علي طعام بسبب ابن سعدون. ولذلك غز الأمير عبدالعزيز الرشيد البيرق وامر بتجهيز الجيش لمحاربة ابن سعدون وعندما أقترب جيش شمر من نهر الفرات ونزل بالخميسيه وتل جباره. تناطح الجيشين ابن سعدون من جهه وشمر من جهه وصارت الواقعه ثم أنتصروا شمر بقيادة الأمير عبدالعزيز المتعب علي ابن سعدون وكانت هذه المعركه ردع له لكي لايمنع هو أو غيره المؤونات والأرزاق عن أهل نجد من العراق.

أثناء المعركه أنطلق الأمير عبدالعزيز الرشيد علي الشيخ سعدون الأشقر ولا هو ردى فيه وأسره. ومن ثم أقتاده الأمير عبدالعزيز الي مضيفه بأحترام وتقدير وسئل أبن رشيد الجالسين من شمر وين الشاعر التبيناوي وأرسل مرسال ليأتي بالتبيناوي وعندما ذهب مرسال ابن رشيد لأحضاره لم يجد من التبانا الا صبي عمره 16 سنه وذهب به المرسال الي مجلس الأمير وعندما وصلوا، قال الأمير لحسن التبيناوي (الصبي) هل تعرف هذا الشيخ ويشير الي ابن سعدون وقال التبيناوي أحضارا علي الفور:


سعدون جاك الضاري اللي حكابك = ياويل ياسعدون من نطلبه دين
اما بنو الخير ما ينحكابك = انتم معيشة اليتامي القديمين
من العام والله طاحنينن زهابك = انتم شيوخن مار حنا ضريرين
اسكت وحط حصوتن حدر نابك = ياللي تقول محرمن حب شاهين
علي الخميسيه نوسم ركابك = وعب الشبيبيه نحط المحاقين
يااشقرن جاك اشقرن مايهابك = لاتنهظم هذا صعوط المجانين
أشقر ليا ضف الجناحين جابك = علي دماغك موقعك بالصعانين

تحياتي

[عبدالواحد]

شكراا لك اخوي فيصل

واذا عندك معلومات اكثر عن السعدون وعلاقتهم بالقبائل تزودنا فيه


تحياتي لك

[راعي الوقيد]

ابو حمود !!

ياعلك تسلم يالعزوة على هذا الحضور الرائع

:goooood:

والحمدلله اللي جاز لك مضيفنا:)

اللي اعرفه من القصة والقصيدة:)

ان ابن رشيد ارسل حدرة للعراق وهو يعانقهم سعدون الاشقر

وهو يردهم قال : والله يا شمر فلا تمالحون حب شاهين ؟؟

واليا جيتوا عبدالعزيز بلغوهـ اني لى اغزي عليه !!

رجعت الحدرة وقال عبدالعزيز : هاهـ وشبكم مامعكم شين !؟

قالوا : والله عانقنا سعدون الاشقر وردنا وقال لى جيتوا عبدالعزيز

بلغوهـ والله اني لى اغزي عليه بحايل ؟

قال ابومتعب : لى صار ناوينا لا والله الا نبي نقصر عنوته ؟

وهذهـ الميزة " قصرة عنوة الغازي " ما يميز فرسان شيوخ شمر:thumb:

حيث يقول منصور الرمالي " رحمه الله " : وقصرنا عنوة الشيخ وعنينا "

وحلف وقال: ( والله يا خصاي تيسه اني لا اعقبه الشط) !!

وفعلا غزاه وقومه يما عقبه الشط ..؟

المهم وهو يغزي ـ الجنازة ـ بشمر على سعدون الاشقر ليامار هو مجمع السعفة

سعفة العراق كله يبي يغزي على شمر !!

ويوم تكاملت عندهـ ـ السعفة ـ وهو يصبحهم ابومتعب << الصباح اللي يحبه قلبك:)

وكل هكاليوم وشمر تعثى بهالقبايل ؟

ويوم جاء هودٍ من الليل ليا هذا عبدالعزيز السيف بيدهـ جامدن عليه بالدم ؟

قالوا ابشر هذا سعدون الاشقر صادوهـ فريس شمر وهو هذا محدد بالصيوان ؟

يوم جاء لياهذا سعدون !؟

وطلب عبدالعزيز حضور احد كبار السن من شعراء فخـذ التبيناوي ؟

قال : ادعوا لنا حدى الشعار من شيبان التبانا " شعار الحرب " ..؟

ولان الوقت كان متاخر قالوا : والله مالقينا الا هالجذع وقيل ان اسمه عساف وقيل

انه حسين وقيل انه وطبان وقيل انه سعد بن نهار التبيناوي !؟

قال التبيناوي وهو يشر على سعدون بيده : سعدوووووون !!

وكان سعدون مدنق ومستخزي .. جريح وقومه ماخوذهـ .!!

رفع سعدون راسه !!



سعدون جاك الضاري اللي حكى بك=واف الوعيد اليا هرج قايل ٍ شيـن
من يوم سرتوا طاحنيـن زهابـك=ياويل ياسعدون مـن نطلبـه ديـن
يا اشقر ٍ جـاك اشقـر ٍ مايهابـك=لا تنهتم هـذا صعـوط المجانيـن
ياتايـه الأشـوار هـذا عقـابـك=مدمي المخالب مودع الخرب قبعين
اصد براسـك لايصدنـك كلابـك=يلومكـم مـا تردفـون المزاييـن
يامحد وش لـك بالمياديـن كابـك=قبل تناحـون الضياغـم سلاطيـن
دليت تمحرش يوم قـرب خرابـك=لياما زعلنا واول الحيـن منحيـن
علـى الخميسيـة نوسـم ركابـك=وعلى الشبيبيـة نحـط المحاجيـن
قضا للمسـة خبزنـا سـد بابـك=ولا فعل الا فعل عـدل الموازيـن
الحمد لله يوم قرب خرابك = من فعل شيخٍ بالسعد لـه نياشيـن
ناتي بزيـزوم الطنايـا رعابـك=ليا شفت ابو متعب تخلي السواديـن
صفى خياله يوم ضبضب سحابـك=وسميـة منهـا تـلـم الشعابـيـن
اشقر ليا ضـف الجناحيـن جابـك=وعلى دماغك ماقعـك بالصعانيـن
ودهم تطير ماسكـن مـن ترابـك=ونركي على كبد الحريب المصاخين
مار انت خبـل ينـزع الله شبابـك=قبلـك لعييـن المخاليـق مطنيـن
ودونك حصاة بس عضـه بنابـك=ياللي تقول محيـرٍ حـب شاهيـن
إمـا بنـو الخيـر ماينحكـى بـك=انتـم مربيـة اليتامـا القديمـيـن
ندخل على الله مـا دفنـا حسابـك=انتم ضواري مار حنـا ضريريـن

وهذا اللي عرفنا منه .. والمعذرة:)

لك التحيـــــــــــة ،،،

والسلاااااااام ...

[مشــــعل]

تسلم يابو حمود

على هالرائعه

ويسلم ابو فيصل على الاضافه

دمتم بخير

[فيصل حمود]

الأخ العزيز ابو فيصل

شكرا لك علي أضافتك يالغالي وأسمح لي بالتحفضات التاليه:

أولا: الحدره من أهل نجد عموما ومن اهل حايل أيضا ولكن لم تكون فقط من شمر او فقط من اهل حايل وذلك لأن الأمير عبدالعزيز المتعب كان يحكم جميع أجزاء نجد وليس حايل فقط فجميع أهل نجد كانوا تحت حكم ابن رشيد ومن رعاياه ولذلك غزا الأمير عبدالعزيز سعدون الأشقر حتي لايمنع الأرزاق عن اي أحد من أهل نجد ويقوم بردعه وردع غيره.

ثانيا: لقد عرف عن الأمير عبدالعزيز المتعب الصرامه والشجاعه والشراسه ولكن عرف عنه ايضا أحترام خصمه عند النصر خصوصا عندما يكون هؤولاء الخصوم من الشيوخ والحكام أمثال ابن سعدون وهذه من عادات الأبطال المقتدرين ولذلك عندي تحفظ علي قولك أنه اتي به محددا الي الصيوان.

ثالثا: قولك أن ابن سعدون قال للحدره قولوا لأبن رشيد انه يبي يغزيه بحايل ولا أعتقد أن ايا كان ليجرؤ علي قول ذلك ومهو قصورن به بس لأن الجميع يعرف قوة شمر في ذلك الوقت.

تحياتي لك يا ابو فيصل وأشكرك لأكمال ما كان ناقص من القصيده وأشكرك كذلك علي أضافتك القيمه وأختلاف الروايات وارد وقد أوردت الروايه اللي أنا سمعتها شخصيا من الرواة الثقات من كبار السن وممكن تكون الروايه التي أوردتها أنت أصح من روايتي ولكن أقتناعي الشخصي ان روايتي أقرب الي الحقيقه.

[فيصل حمود]

الله يسلمك يابو ياسر ومشكور علي مرورك الكريم يالغالي

[فيصل حمود]

الأخ العزيز / عبدالواحد

والله أني لم أنتبه لردك ولذلك رديت علي الأخوان قبلك. فأستميحك العذر أخي العزيز ومشكور علي مرورك الكريم.

ابن سعدون هو شيخ مشايخ قبائل المنتفق في العراق وهو مشهور جدا وقيل أنه ينتسب للأشراف والله أعلم.

تحياتي لك

[أبوفهد]

اخوي فيصل الحمود

تسلم يمناك على القصه والقصيده

وحسب معلوماتي ان صاحب القصيده اسمه ( حواس بن نهار التبيناوي )

لك الشكر . اطيب تحيه

[فيصل حمود]

الأخ / ابوفهد

مشكور علي المرور الكريم.

بالنسبه لصاحب القصيده فأنا متأكد الآن بعد أن سألت وتقصيت انه مهو حسن التبيناوي والله اعلم ان اسمه "عساف" مثل ما قال أخوي ابو فيصل "راعي الوقيد".

تحياتي

[أجا]

الله يرحم الامير الفارس الجنازه



فيصل حمود

مشكور على الايراد الطيب ..