هجينيات نسائيه:)

[الصيرمي]

السلام عليكم:)

من قصايد شاعرات الجزيره العربيه

هاذي قصيدتين متشابهتين لشاعرتين من نوع الهجيني


الاولى لوضحا العبدالله من بادية السر تقول:


البارحة عديت بالمستقله=في راس مزمومٍ طويل البياحي
يايوه* عزيني بدا فيّ خله=سدي على بعض المخاليق باحي
من يم قصر دويرجٍ مدهل له=غليمٍ ينقل جديد السلاحي
اهلي مع اهله كلهم فدوةٍ له=يفدونه الفرسان واهل المناحي
والله يا لولا الخوف وادرى المذله=لا حط له بين النواهد مراحي

* يايوه : معناها يايمه وحنا نقول ياه يعني يمه:)

الثانية لهيا الطلال تقول:


السد باح وبان ما اخفيت كله=ما ينجحد شيٍ على الناس باحي
على الذي ياخذ على الخيل عله=تكسرت عنده طويل الرماحي
والله يا لولا اللوم وادرى المذله=لاحط لي بين النصايب مراحي
وابني عليه البيت كله رضاً له=واذبح على قبره ردوم اللقاحي
الفٍ صباح الخير والفٍ مساً له=والفين ما بين المسا والصباحي
لعل من هو لامني فدوةٍ له=ولعلهم ذلفة هبوب الرياحي

تمنياتي انهن اعجبنكم:)

وكل عام وانتم بخير

وعساكم من عواده

تحياتي:)

[ريم شمر]

تسلم الصيرمي ,,

دايم مواضيعك مميزه ,,,

[الصيرمي]

ومن قال يسلم اختي ريم شمرررررر

ومشكورررررره على المرور

تحياتي:)

[اصـــااايـــل]

والله يا لولا اللوم وادرى المذله *** لاحط لي بين النصايب مراحي
وابني عليه البيت كله رضاً له *** واذبح على قبره ردوم اللقاحي
الفٍ صباح الخير والفٍ مساً له *** والفين ما بين المسا والصباحي
لعل من هو لامني فـدوةٍ لـه *** ولعلهم ذلفة هبـوب الرياحـي

يازين قصايد هم من اول وزين منطوقهم
الصيرمي لاهنت ع النقل المميز ياخوي

[عبدالله الأسلمي]

الصيرمي الله لايهينك