% اول سنه دراسه %

[الشبث]

يالربع والله اذكره عده هالحين

اول سنه رحت به للمدرسه

كنت طفل موذي بكل ماتعنيه هالكلمه

وبأول يوم من المدرسه خذاني الوالد العزيز انا واخوي اللي اكبر مني

وهو ينزلنا عند باب المدرسه ( طبعا هو نزل معنا )

ولحد الحين الوضع ماعندك احلى منوه

والابتسامه من الشق لشق

ويوم خذالوه شوين قال يالله ياعيالي روحوا لفصلكم

قلت وانت يبه وين تبي

قال انا ابروح لدوامي ياوليدي

قلت لاوالله تضحك علينا انت

ياتروح معي ولا اروح معك

وهو يصوت لحدا المدرسين وهو يحتسي هو وياه ( والله العالم انوه قالوه ابيك تلهي هالسلطه ليما

امشي )

المهم جاني المدرس وقام يحتسي علي شوين

ويم التفتت ابي ابوي ليمار بس غبرة السياره

وانا اقوم الطم لي جعير الله يجيركم وحسي يسمعوه اللي بالمتوسطه ( بعيده عنا )

وانا اقوم اضرب بروحي بالقاع ويجروني ويعملون يافلان يالغالي ( مهي على الكيف )


الوكاد عقب نص ساعه من الجعين والعويل جاء واحدن من الربع جايبن ولدوه للمدرسه

ويوم شافن وهو يخلي وليدوه وهو يزمن

( وشعقبوه وجهي من البتسا غادين تقل طفاية دشير )

ويالله يسكتوني .



المهم اندمجت بعالم الدراسه عقب اسبوعين ( طبعاً كل يوم على هالحاله )

كان عندنا مدرس فلسطيني ( الله لا يحييه ) وكان يدرسنا رياضيات

جانا وقال اللي ماحل الواجب يطلع عند السبوره

وانا ماحليت الواجب ( تخبرون ابن ادم يغيب عنوه بعض الامور )

والله وحنا نصف قطعة ربع ( تقل نبي نعرض )



الله يجيركم وهو يطلع سكين ( موس او نايف بالانقليزي )

قال انا هالحين ابذبحكم لانكم ماحليتو الواجبات

هو قال هالكلمه وحنا نقوم نجعر واللي ينصفر من الصدمه والله قام يضرب براسوه السبوره

وانا غلت نفسي غديني اموت قبل يذبحن

وبينما هالمشهد داير وهو يدخل علينا ابو واحد من اللي معنا

ليمار تقل ابونا كلنا

وحنا نهجم عليه اللي خموه واللي تجود بيدينوه واللي تغيب وراوه

وانا انجحرت حدروه ودخلت معوه بالثوب


الله يجيركم وهو يمسكلك الفلسطيني ويضربوه القاع

ويالله يتدخلون المدرسين ويخلصونوه منوه


والله بهكا اللحظه صار اغلى من ابوي





وسوالف السنه الاولى كثيره


بس ماودي ابسط بهن مره وحده علشان مايطول الموضوع ولحد يقراوه





واسف على الاطاله





وتقلد تحيتي

[شام]

ذكريات المدرسة وسنة اولى

ياسلام اذكر أول يوم مدرسة رجعت الى البيت من نصف الطريق وكان معانا الوالد

ولما سألني عن السبب قلت له ( لا اعرف القراءة و لا الكتابة )

ضحك يومها الوالد وقال ( الطالب يروح المدرسة يتعلم مو حتى يعلم اللي فيها )

وذكريات ..

ويسلموا اخي الشبث ع الموضوع الخفيف بهذا الجو المشبع بالحرارة بسبب شهر آب ..

[الشبث]

تسلمين اختي ايمان على هالرد الجميل


والله يخلي لتس الوالد





وتقلدي تحيتي

[براء]

:p: اما هالفلسطيني :p: يتوب :p:
مجتهد الأجودي :p:
الصراحه ضحكت :p:
مشكور إخوي الشبت

[الشبث]

الصراحه ضحكت

الله يجعلك طول العمر تضحك يا اخوي براء


تسلم يالغالي على مرورك

وتسلم على ردك الجميل




وتقلد تحيتي

[عجايب بنت الشايب]

ليمار تقل ابونا كلنا

:p: :p: :p: :p: :p: :p: :p:


مدري وش اقوووول ولا وش اقتبس


بس الوكاااااااد اننا نفس الماركه يالربع ..... تقل محفظين هالحركات

قبل لاندخل ..... والمشكله رغم التطور ووصول عام الألفين

الا ان الحركات نفسها ......




الشبث .... ربنا ... يشرح صدرك ......

ومواضييييعك ماتنمل .....





و ...طحياتي ........

[شموخ]

ههههههههه

يالله يازين ايام الابتدائي كانت شقاوه بمعنى الكلمة اصلا ماهديت الا من مستوى ثالث جامعه :)

اذكر يوم كنت اولى ابتدائي كل ماجات تسمع لي القرآن استاذتي هيله الجاسر الله يذكرها بالخير كنت أرفض أقرأ ، تقول معي جني مايداني القرايه :) مع انى حافظه والله ،، وياصبرها علي هي و بواب المدرسه كان متوذي مني ودى ادري هم حين والا ميتين اللحين نفسي استسمح منهم تعبت هالأثنين معي واجد :)


تحياتي
شموخ

[سيدة القـــــلم]

乂
乂
乂

وخزيااااه اثاري ذي علومكم.. :p:

انا اشطر منكم .. مابكيت ولا نزلت دميعتي..

مع اني درست قبل السن القانوني .. دخلوني مستمعه وعمري خمس ونص

وكان كل همّي " متى تجي الفسحه " :tongue:

واذا قضت افسحه.. كل شوي اقول.. " ابلا.. متى تجي الطلعه "





شُكْرَاً الشْبَتْ <-- لاحظ ال التعريف




:p:

[الشبث]

الشبث .... ربنا ... يشرح صدرك ......

ومواضييييعك ماتنمل .....





و ...طحياتي ........

واياك اختي القديره

وانا اعتقد لو تسردين لنا من سوالفك بالمدرسه تسان علوم هههههه



تسلمين اختي على مرورتس الطيب




وتقلدي تحيتي

[الشبث]

ههههههههه

يالله يازين ايام الابتدائي كانت شقاوه بمعنى الكلمة اصلا ماهديت الا من مستوى ثالث جامعه

اذكر يوم كنت اولى ابتدائي كل ماجات تسمع لي القرآن استاذتي هيله الجاسر الله يذكرها بالخير كنت أرفض أقرأ ، تقول معي جني مايداني القرايه مع انى حافظه والله ،، وياصبرها علي هي و بواب المدرسه كان متوذي مني ودى ادري هم حين والا ميتين اللحين نفسي استسمح منهم تعبت هالأثنين معي واجد


تحياتي
شموخ


صدقتي اختي شموخ

المدارس والمدرسين يعانون بصراحه



والله يطول بعمرهم

وحتى حراس المدارس ياهم يعانون

هههههههه



وشاكر مرورتس الطيب



وتقلدي تحيتي

[الشبث]

مع اني درست قبل السن القانوني .. دخلوني مستمعه وعمري خمس ونص

ماشاء الله عليتس

انا هالسوالف كله وانا مدرسيني متأخر وعمري ثمان سنين ههههههههه



اجل من الصغر متسيدتن الاقلام




الحين بس عرفنا منوين يجي الابداع




تسلمين اختي على مرورتس



وتقلدي تحيتي

[نافع بن طواله]

يا وييييييييييييييييييييحيييييييييييييييييي ييييك



تسني أشوف نافع




بس خلاص بغيت أبكي

[شموخ]

يا وييييييييييييييييييييحيييييييييييييييييي ييييك

الأخ نافع أشك ان فيك عرق سبيعي :) رحت قبل فتره مع والدتي لسبعان أمى تعز سبيع :) كل ماتكلمو ياويحي ياويحي وخاصه الشي اذا استغربوه :) :)

[سنين]

هههه


الشبث الله يسعدك والله اني اشوف هالمشهد كل بدايه سنه دراسيه .. الله يسلم عيال اخوي :)






سنين

[قـــوت]

والابتسامه من الشق لشق

حلوكم وجيه:)

وانا ماحليت الواجب ( تخبرون ابن ادم يغيب عنوه بعض الامور )

ايه هين :good1:

والله وحنا نصف قطعة ربع ( تقل نبي نعرض )
هنا تشلّعت كبدي من الضحك واراعي للباب اخاف احد يشوفن دزانده وينقد علي



وحنا نقوم نجعر واللي ينصفر من الصدمه والله قام يضرب براسوه السبوره

وانا غلت نفسي غديني اموت قبل يذبحن

هنا الدموع قامن يصبن وضاعت الشاشه من الضخك تخيلووووه غايلن نفسه ويتطيول


وحنا نهجم عليه اللي خموه واللي تجود بيدينوه واللي تغيب وراوه

وانا انجحرت حدروه ودخلت معوه بالثوب


عدد لانهائي من هذه-->:p:


ابس ماودي ابسط بهن مره وحده علشان مايطول الموضوع ولحد يقراوه


اي والله نزلهن بالتقسيط ارفق علينا الله يخليك


أجل انا ودوني وهي تمسكن الابلى وتقعد تسألن لاني كنت صغيره على الدراسه
قالت تعالي وانا اجيها مدررررررررررررعمه
قالت تعرفين الحروف ؟؟
قلت ايه وانا اهذهن له
قالت تعرفين تعدين
قلت ايه واقعد اعدعد

قلت له انا هيه هيه انتي تعرفين جارتنا ام خلود وتهاني ؟؟
قالت لا ليش؟؟
قلت هي دبيه زيك:smileyb:

ضحكت وقالت لا والله ما اعرفها
وياعلهم مادرسوني وعلمي بهكاالابلى هكا اليووم

شبثان قلبت المواجع
شكرا للموضووووووووع

[الشبث]

بس خلاص بغيت أبكي

الله يرحم والديك وش اللي يبتسك


لا تشبهنا حنا جايين نبي نضحك




رح ياحلالي لاقرب مضيف غيرنا ماحنا ناقصين بتسا




وتسلم يالغالي على هالرد اللي زي وجهك




يعتي حلو ههههههههههه




وتقلد تحيتي

[الشبث]

الأخ نافع أشك ان فيك عرق سبيعي رحت قبل فتره مع والدتي لسبعان أمى تعز سبيع كل ماتكلمو ياويحي ياويحي وخاصه الشي اذا استغربوه

هيه انتي يا ام قرون يا شموخوووه

انا يالله ارد على اللي يردون علي

وانتي جايتن تسولفين عندي
















هههههه


تمونين




وتقلدي تحيتي

[الشبث]

الشبث الله يسعدك

واياتس اخي سنين



والله يخلي لتس عيال اخوانتس



وتقلدي تحيتي

[الشبث]

شبثان قلبت المواجع
شكرا للموضووووووووع

الاخت اخر العنقود الله يجعل ايامتس كلهن ضحتس


بس ارفقي على عمرتس ههههههههههه


والله اتخيلتس ميتتن من الضحتس




وتسلمين اختي على مرورتس الطيب





وتقلدي تحيتي

[مهاجرة باحساس]

اخوي الشبث انا ماودي اعيد حتسي فبه موضوع كتبته وهو واقعي عن صف اول ابتدائي الظاهر هذا متسانوه

بس تراني اخوف البنات يومن بالابتدائي ومصادقتلي بنت(((ليست بيضاء البشره))) قبل لااعرف ان فيه شي اسموه بودي غارد الظاهر انه شي بالفطره ان الواحد لازم يسوي لوه نفوذ

لا كن والله ماعمري سلطته على احد هن البنات خريش

[الظبي الدماني]

ههههه حلوة ذكريات أول سنة بالدراسة.. أنا كنت طفلة hyperactive شوية!! يوم ودوني أمي وأبوي الروضة قالوا للمس أهم شي مااكل حلاو!! لأنها بتزيد طاقتي (طبعا هذي فهمتها يوم كبرت) و بجنن أمي في البيت!! و مايعطوني كولا ولا كريسبس لأن فيهم الوان و مواد حافظة بتأثر على تفكيري!! (بعد هذي عرفتها يوم كبرت)حتى المس قالت لها لا إحنا مانعطيهم حلاو.. بس وجباتهم اللي انتو تعطونهم اياهم والمفروض ميكون فيها أي شي يضر بصحتهم!! يعني بنبقى على السندويش و الفواكه!! عيشة ملل!! المهم إن كان في ولد و بنت هم المهربين مال الروضة.. يجيبون حلاو مصاص و كرسبس و كولا و علوج.. كنا نحس إنهم احسن يهال بالروضة بس كانو يعطونا ساعات.. المهم إن كان عندنا استاذ شعره طويل!! هذاك اليوم صاد البنت تعطيني كولا طبعا أخذها من عندي ومنعها تطلع تلعب ويانا.. طبعا أنا للحين حاقده عليه ومع إني مااذكر شكله بالضبط بس كلما اشوف حد بالشارع نفس هيئته و شعره طويل مثله ودي اروح اقول له إني أحقد عليه!!! طبعالأن أول مااكل هالاشياء لآن امي و ابوي ميرضون!! ألحين مااكلهم لسببين الأول إني تعودت مااكلهم و الثاني لأنهم فعلا ضارين و يسمنون!!
هذي اللي اذكره من الروضة!! بس في المدرسة كنت طفلة حبوبة من أول يوم!! بس أخوي اللي فضحنا أول يوم في المدرسة!! خلا أمي و أبوي يقعدون وياه تقريبا ساعة و يوم راحو قعد يصيح يقول لهم ودوني صف أختي اليهال الشياطين بيطقوني!!!!!!!!! مسكين مدري من مسمم أفكاره!! (موب أنا وربي) :) شكرا الشبث على الموضوع الحلو!!