فرّتين ودوخة راس !!

[الجوهرة]

مرحبتين بعجز المضايف قبل صباياهن :) <<<< احترام وتوقير ذوات الشيبات أولاً :thumb:

بصراحة ماعندي موضوع مهم بس جيت أعطيكم انطباعي عن بعض المواضيع اللي طاحت عليها عيني وبغيت أطيح عقبها مصفرّة :smileyb:

فيه موقع نسائي كل العالم يدخلونه وأنا عجزت أهضمه لعدة أسباب منها :

1/ التصفح بطيء جداً جداً جداً نظراً لكثرة العضوات والزائرات على مايبدو أو يمكن البلا في اتصالي :)

2/ مواضيعهم أو بالأحرى ردودهم تجيب لي الاكتئاب الحاد لأني ما أحس فيها مصداقية وتفاعل صادق <<< وش الفرق تكفون بينهن :)

يعني العضوة تمحط بموضوعها اللي هو عبارة عن خلطة أو طبخة أو أي شيء يحتاج لتنفيذ وتلقين كل البنات يردون عليها بنفس الصيغة : باين عليه يجنن ... شكله رهيييييب ... لازم أجربه ... بجربه وأرد لك ... يعطيك ميتين وستين عافية على هالخلطة ................

وتلقين الموضوع وصل سبعمية صفحة وكلها من هالطقة !! ولا وحدة جربته وقالت تراني جربته وصار كذا وكذا !!

أقول لكم الصراحة واعتبروه اعتراف مني :smileyb:

مرة سجلت عندهم عن قولة إني مسجلة :7ayyoh: قلت يمكن يجي يوم وأحتاج لهم !!

يوم شفت أسلوبهم كذا قمت وحطيت طريقة حلا قهوة من راسي :smileyb: قعدت أألف المقادير ولا تهون الطريقة وقلت يابنات جربووووها وعلموني وش رايكم فيها !!؟.

وللأمانة الموضوعية مامدحتها ولا قلت إنها لذيذة لأنها من اختراعاتي الجديدة :) ولا أدري وش طعمها :a:

بس اشترطت عليهم مايردون إلا بعد مايجربونها !!

وفعلا ردت علي مجموعة من البنات وكلهم خالفوا الشرط وقعدوا يمدحون : وااااااو شكلها لذيييييذة ... تسلم يدينك على هالحلا المسكّت ووووووو

وهات يامدح لدرجة إني بغيت آكل المقلب وأسوي الحلا عقب مدحهم اللي أرقاني النخل :)

مع إنهم لاجربوها ولا ذاقوها ولا استفدت شيء !!

بعيداً عن السواليف :)

مدري وش خلاني اليوم أمخمخ على هالموقع وأدور فيه !!

دخلت موضوع وتسمرت بمكاني <<<< أصلاً متسمرة من زمان :tongue:

موضوع عن بخاخ مؤقت لتغطية فروة الرأس !! :a: للي يعانون من التصحر في الرأس !!

ضاق صدري بصراحة :( معقولة منتشر الصلع بين الحريم لهالدرجة !!؟ :(

طلعت منه ودخلت موضوع ثاني عن خلطة تطوّل الشعر :)

الخلطة عبارة عن :

بيضة وملعقة زبادي وفنجان " فنجال :hala1: " حنّا وحليب كامل الدسم وملعقة زبادي وملعقة عسل :)

تعجنين الحنا بالحليب مع باقي المقادير وتحطينها على راسك لمدة ثلاث ساعات مرة في الأسبوع لمدة شهر وشوفي شلون يطول شعرك !!

بصراحة يوم شفت مقادير الخلطة قررت أسويها وأحطها على راسي وأعزم أهلي على الفطور فوق راسي :)

أجل بيض وحليب وزبادي وعسل !!؟ وفنجال بس فيه حنا :)

خلطات ماهيب صاحية :thumb:

إلا على طاري الخلطات ترى المسابقة انتهت مدتها وحنا ماسويناها :)

<<<<<<<<<< ماعندتس ماعند جدتي :smileyb:

يالله فرصة سعيدة اللي شفتكم وسلمت عليكم ولا تنسون تجربون خلطة الفطور لأني ناوية أجربها وأعلمكم النتيجة

ودي والله أحط معها شوي زيتون لو ينفع :)

[شموخ]

بصراحة يوم شفت مقادير الخلطة قررت أسويها وأحطها على راسي وأعزم أهلي على الفطور فوق راسي

ههههههههههههههههههههههه
ههههههههههههههههههه

والله انك صادقه والظاهر انه نفس الموقع اللي دخلته الكل يحط خلطات ويمدح هو اللي بعد ال التعريف يبدا بحرف الفاء :)

صراحه من الغلط ان الوحده تجرب خلطاتهم وخاصة اللي على الشعر والوجه وخاصة الشعر مااستسيغ بيض وعسل ومثل هالخرابيط اللي يجيبونها :(

تحياتي

[( النجــــــلا )]

الجوهرة الله يسعد قلبك والله يعافيك

وبالنسبه للموقع اذا كان نفس اللي ببالي يمكن يكون فيه مثل ماتقولون

لكن في المقابل في مواضيع قمه مفيدة وواضحه

يعني تلقون فيه الغث والسمين وعليكم الانتقاء وحسن الاختيار

واعتقد ان هالشي موجود بكل مكان



دمتِ بكل الحب


مع التحيه

[الجوهرة]

والله انك صادقه والظاهر انه نفس الموقع اللي دخلته الكل يحط خلطات ويمدح هو اللي بعد ال التعريف يبدا بحرف الفاء

هلا والله بشموخة

ماشاء الله أجل ربع موقعي واجد :)

موقعي مافيه ال التعريف ويتكون من كلمتين مضاف ومضاف إليه :smileyb: <<<< مشروع كلمات متقاطعة :thumb:

وتجربة خلطاتهم على قولتك مغامرة خطيرة !!

لكن مع ذلك هالخلطة بالذات ناوية أجربها مدري ليه جايزتن لي :)

يا حي الله شوشو

أبرك الساعات مرورك ياعسل وسواليفك اللي ماتمل بس ليه هالمرة مافيه أبيات عسى المانع خير :thumb:

[الجوهرة]

هلا والله بالنجلا

وش مواصفات الموقع اللي ببالك !!؟ :)

أنا معك إن كل موقع فيه الغث والسمين لكن بعض المواقع النسائية يكون الوضع فيها مستفحل حبتين :smileyb: لأنها متخصصة في خلطات الشعر وخلطات البشرة

مرة في جلسة عائلية كنا نتكلم عن الخلطات الموجودة في الانترنت وإن بعضها فيه مبالغة ماصخة :)

قالت وحدة من الحاضرات : إن أخوها مسجل هو ووربعه في منتدى نسائي وماخذ الدعوى فلة وصاير يمشي ويحط خلطات من راسه عشان يوسعون صدورهم على الردود !!

لدرجة إنه مرة حط خلطة عبارة عن برصي ميبس ومطحون وتحطينه على بشرتك وشوفي البياض !!!

المصيبة ماهي في الخلطة !!

المصيبة إن وحدة من الحاضرات قالت : ايه معروفة خلطة البرصي تراها تبيض البشرة لأن البرصي بياضه زي البرص وأكيد في جسمه مواد تبيض البشرة !!!!!!!!!

<<<<<<<<<<< لاااااااااااااااااااااااااااااا بليز :puzzled:

بصراحة عذرت هالولد اللي ماخذ الدعوى لعب ووناسة مادام معنا وحدة مصدقة كلامهم :7ayyoh:

أنا معك يالنجلا المواقع هذي فيها فايدة كثيرة بس المبالغة أحيانا ضررها أكثر من نفعها !!

حياك الله يالغالية

أسعدني تواجدك

[شام]

موضوعك رائع اختي الجوهرة

وخصوصاً هناك اقبال شديد على ما يرد في تلك المواقع

بصراحة قرأت أكثر من وصفة و الحمد لله

لم اجرب ولا واحدة منهاااا

تعلمين لماذا ؟

لأن من شكل الخلطة واضحة ...!!

وبالتالي أي عرض صحي يصيب الشعر أو البشرة

أسارع فوراً للطبيب أو الطبيبة المختصة ..

هناك علاج منطقي .. ومدروس

بمعنى لكل داء دواء ..

فتساقط الشعر مثلاً .. كتيرات ممن جربن الخلطات التي تعتمد كما ذكرتي

ولكن لم يستفدن أي شي ..

هناك بعض الاعشاب التي قد تساعد أكثر كالبابونج هذه ينصح بها الاطباء

و هناك نصيحة لكل سيدة أو بنت ..

لمعالجة أي عارض خارجي .. لنبدأ بمعالجته من الداخل

مثل مراقبة نظامك الغذائي .. و جهازك الهضمي .. و اجراء فحوص دورية للدم

وعندما يعرف السبب يبطل العجب

ولا بدها بيض ولا لبن ولا هم يحزنون ..

ومشكورة اختاه

موضوع قيم

ومفيد

[الجوهرة]

هلا والله بالغالية إيمان

مثل ماتفضلتي

المفروض العلاج يبدأ من الداخل لأن نوعية الغذاء وحالة الجسم الصحية لها تأثير كبير على الشعر والبشرة

ومافيه مانع من بعض الخلطات المعروفة والمجربة واللي مالها تأثير عكسي

كل الشكر لحضورك ياعسل