على جال ضوه

[ابوحنفي]

جالس بهذا وجنبي المنقل ودلتي على جال الضو وأندح منه ولا عجزت قلت ليش ما أشغل روحي

عن القهوه واكتب لي موضيع مع جماعتي واتسلى انا وياهم ( قهوه ونار وسواليف ) ما ازين منه .

السالفة يا عزويتي هي الحسد وش قصة الحسد يا شمر

يجوز انه بكل مكان موجود لا كن اشوفه عندنا غير مدري يمكنه جديد علينا والا ماكنا نعرفه قبل والا وش قصته من هالسنين الاخيرة .

لا صار عندك شبه وتعلله كل ليله قالوا ولد فلان يبي يشيخ الماخوذ ..

ولا صار عندك قويعه وزرعته وتربحت قالوا رايح يم الامير وطمن راسه وخذاه ....

ولا صار عندك محيل ترزق الله منه قال يجمع من هالفلوس ولا شفناه يعزم .....

ولا صار عيالك عندك قالوا فلان يجمع معاشات عياله وصلن مليون والثاني يقول تعادهن ...

لا جاك لك مسير من المساعيل قالوا يغلغس عنده ... مدري شلون يجيبهم

ولا صرت جالس لحالك لا تجي ولا تروح قالوا فلان ما تعرفه الا مرته .

حتى بهذا اشوف الحسد واصلن للحجان .

مدري يا جماعة انا متوهم والا على حرف صواب

[سفن أب]

مابقيت شين يابو حنفي
عزالله انك جيت وجبت الصحيح ... ياشافن مسيرن على ابو حنفي . تلطم ولاسلم علي : اسأل
الربع وشنوح هالبلية فلان يالربع مايسلم توي تعاقبت انا وياه عند هالباب .. قالوا على شان انك تسير على ابو حنفي وهو مايحاتسيه ؟؟؟ ياوالله العجب

ماعليش يابو حنفي سامحن :p:

[شموخ]

على جال ضوه :)

أهلين بالاخ حنفي

ذكرتني بابيات عبدالله بن سبيل

ترى حلات الكيف يامشرب له ..........لا فارقوك أهل الحسد والنجاسه

الحسد مو بس عندكم :) في كل زمان ومكان حتى هناك فيه حديث عن الرسول رواه عبدالله بن عمر على مااظن بس الحديث كذا ( قيل يارسول الله أي الناس أفضل قال كل مخموم القلب صدوق اللسان قيل صدوق اللسان نعرفه فما مخموم القلب ؟ قال هو التقي النقي لا إثم فيه ولا بغي ولا غل ولا حسد )
فذكر الحسد هنا وهذا دلالة على وجود الحسد حتى في عهد النبي صلى الله عليه وسلم أيضا في القرآن الكريم على ماأظن في سورة الحشر ماني متأكده من إسم السوره :) قصه الانصار والمهاجرين الآيه الي فيها ( والذين تبوّء الدار والإيمان من قبلهم يحبون من هاجر إليهم ولايجدون في صدورهم حاجة مما أوتوا ويؤثرون على أنفسهم ولو كان بهم خصاصة ) .... ( في صدورهم حاجه ) يقصد به الحسد بانهم لايعانون منه ..
وبعدين ماادري ايش بيستفيدون هالحساد محد أخذ رزق أحد وعلى قولت الشاعر

العبد ماينطح مقاسيم ربه....... سبحان من بيديه تصريف للكون

تحياتي لك يااخ حنفي وخذ بنصائح الدفاع المدني لاتغلق الابواب وانت بقرب المنقل :)

اختك
شموخ

[الاصمعي]

جالس بهذا وجنبي المنقل ودلتي على جال الضو وأندح منه ولا عجزت قلت ليش ما أشغل روحي عن القهوه واكتب لي موضيع مع جماعتي واتسلى انا وياهم ( قهوه ونار وسواليف ) ما ازين منه .
كفو يبو حنفي الي مزين قهوته بنفسه ويتقهوى على جال ناره:thumb:

لله درك يا شيخ علم هل الترامس وتصليح القهوة بالمطابخ!


مدري يا جماعة انا متوهم والا على حرف صواب
الا على صواب

الناس ما خلوا يتيمٍ بالألحاد**حتى رهين القبر شدوا كراعه
هذا توقيع واحد من الشباب بهالفايت:)

ما سمعت بسالفة الشايب وولده و****هم "أعزكم الله" الي كل ما ركب حديهم ومشى الثاني على رجليه قالوا ليه هذا راكب وهذاك يمشي لين آخر شي شالوا ****هم اغديهم يسلمون وبعد ماسلموا اتهموهم بالجنون:)

فالناس تعرضوا لسيد البشر المعصوم عليه أفضل الصلاة والسلام فكيف بمن دونه

لذلك العاقل الي يسوي الصح ، وان قدر ان لايهتم بقول الناس فهذي الي ما مثله!


تحياتي

[عبدالعزيز]

أوي فنجالٍ يصبه مسويه .. وحنا سوالفنا على جال ضوه

انت ماسمعت عبدالمحسن الهزاني يوم يقول
عجزت عنكم ياهل البجخ والميخ=ياهل السوالف والعلوم البياده
ياللي سوالفكم بواهه وتبويخ= وكثير لجاتٍ على غير فاده
ترى كثير الحتسي مايودعك شيخ= افعل وتلقى عند ربعك شهاده

والقيل والقال هنا يابوحنفي متمثل بالبجخ والميخ اللي انت تنكره ولاتنتظر تقدير لك من راعي البجخ "الحاسد" لأن فاقد الطيب مايقدره وفعلك تلقاه صداه بنفوس الاجواد من ربعك:thumb:


خوش فنجال وكرمت يابوحنفي:thumb:

[ريم شمر]

ليست عنصريه

لكن اكاد اجزم ان شمر مايعرفون الحسد:smileyb:

قد يوجد شواذ

لكن الاغلبيه بعيده عنهم هذه الصفه بعد السما عى الارض

لايحمل الحسد كريم

وشمر اهل الكرم واصل الكرم


تسلم ابو حنفي

[سيدة القـــــلم]

اهـــلا بأبو حنفـــي ..

حيــاك الله.. ..

الحســد للأسف داء يصيب الأغلبيــه وموجود في كــل القبائــل.. ولايرتبط بمكــان او زمــان معين ولا بفئه دون

الأخـــرى,,

لا ازكـــي قبيله شمــر .. من المؤكــــد كثيراً منهم يعاني من هذا المــرض اشفــاه الله.. مثلما تعاني منه ابناء

القبائل الأخــرى..




اما قولـــك..


حتى بهذا اشوف الحسد واصلن للحجان .

اذا كـُنت تقصــد المضائــف فأقولــ صدقـــت .. ..

اعضاء المضايف بشر ..وليسوا ملائكـــه ومن الطبيعي ان يتواجد

بيننــا من هو مريــض بالحسد والحقــد الذي منبعــه الغيره..

وكــا باقــي المنتديات والمواقــع ما ان يلاحــظ الجميــع قلم مميــز يحاربــه البعــض ..

ويحاولون اطفاء توهجـــه.. ..


الحســـد هنــا لم يشــّد انتباهـــي .. .. لأن موجود في كـــل مكــان ولا يرتبط بموقع دون الأخــر..

ماشدني بقبيلـــه شمــر .. :surprised

هو دقـــه الملاحـــظه .. ماشاءلله لا آله إلا الله..

تتمتعون بدقـــه ملاحظـــه عجيبه ومبهــــره.. :tongue:

وهذه الصفـــه في الحقيقـــه لم الحظهـــا بقبيلـــه اخـــرى او موقـــع اخــر.. ..


شكراً لك يابو حنفي ..

ولاتحرمنـــا من مشاركـــاتك..


*عشق القصيــد





.

[السرعوفي]

المشكلة بعد اذا صار البعض من الجماعه (( بواردي )) يعني (( نضول)) !!! حسود ونحوت !!! واذا قابلته عند الجماعه اخذ يسألك عن عيالك وعن وظيفتك وعن راتبك وعن سيارتك وعن زوجتك هي حامل والا لا !!! وكل هالمعلومات لازم تعترف بها امام الجميع بالشبه !!! ويالله عاد تبداء تجيك النضايل من كل جهه !!! يمكن تخسر وظيفتك او تطلق زوجتك او تصدم بالسيارة او يجيك مرض !!! اعوذ بالله ,

[فيصل حمود]

الأخ / ابو حنفي

شكرا علي هالموضوع الرائع واللي يناقش مشكله اجتماعيه موجوده فعلا وهي الحسد ولكن مع التقدم وانشغال الناس بمافيه فائده فهذه المشكله بدأت في التلاشي تدريجيا وانشالله راح تختفي من المجتمع.

تحياتي

[شريف روما]

يجوز انه بكل مكان موجود لا كن اشوفه عندنا غير مدري يمكنه جديد علينا والا ماكنا نعرفه قبل والا وش قصته من هالسنين الاخيرة .

تقصد شمر ؟؟
ابوحنفي الحسد بكل دولة وبكل قبيلة وبكل زمان ومكان

بس كلامك سليم مية مية عزالله انك صادق
العالم ماقامت ترتاح الا اذا قرضوا لهم واحد
وطايحين لها شاي على طعمة هالسالفة (( حنا قاعد نتقهوى :) ))

موضوعك جميل جدا
والله يبعدنا عن الحسد
الله يلعنه من صفه عزالله اكرهه

يسلموووو عالموضوع الطيب
وشاكر ومقدر لك حسن الاستضافة
لكن المرة الجاية نبي القهوة سودة :)

تحياتي

[محمدالشمري]

يا محلى الفنجال مع سيحة البال .............. في مجلس ما فيه نفس ثقيله
هذا ولد عم وهذا ولد خال..................... وهذا رفيق ما لقينه مثيله

أخي حنفي الحسد قدر ومكتوب ومنتشر والعياذ بالله بسبب الأبتعاد عن الله وذكره ، ولو أن المرء منا يذكر الله عز وجل في كل ما يشاهده ويسمعه لسحق الحسد .

أما ما تطرقت له فأعتقد أنه الغيرة السلبية ، وأظن أن هناك بيت شعر لا أعرف مصدرة ولكن كثيراً ما يردد عن شمر بالذات وهو :
شمر خيار القوم لولا أفعاله ........ كل ما ظهر بهم فارس يقتلونه .
وهذا البيت لم يستطع أحداً تأكيد مصدره ولا مناسبة قوله ولكني كنت أتضايق كثيراً منه فكيف وشمر تحمل من التاريخ ما لا يحمله غيرها ، فسألت بعض الشيبان الله يحفظهم فقالوا نعم شمر بها الغيرة التي قد تقتل أعز أنسان لديهم ، فهذا البيت يعني أنه عندما يظهر فارس يشار له بالبنان والشجاعة الفائقة فأنهم يحمسونه
على المضي قدماً حتى يهلك ودون قصدٍ منهم بل لحبهم لفراسته وشجاعته .

هذا ما أعتقده فالغيرة السيئة قد تقتل أعز أنسان لديك أو حتى لدى الغير وتحبط من معنوياته ومواهبه .

شكراً أخي الغالي على هذه الشبه الرائعه .

وبأنتظار المزيد منك

[متعجب]

عشرة على عشرة يا بو حنفي

وقاك الله شر الحسّاد

[ابوحنفي]

يا الله حيهم كلهم وكلن راح ازين له قهوته لحاله

الله يجزاكم خير على هالمسيار الطيب

سفن اب ما قلت لك ردك معناته ان السالفه منتشره الله يحمينا

شموخ الله يهداك انا ما قلت بس عندنا ...... الظاهر منتي شمرية ..... وليه ما تعلمينا وش وقع الحسد عندكم

الاصمعي سم فنجان يسوى مليون صفر الغراشي

عبدالعزيز واحد ثاني

ريم شمر يالله دخيلك ..... الظاهر انت بعد منتي شمرية ولا منتي حولنا

سيدة قلم شكلك مركزة بهذا ........ سجليني أحد حسادك " الله يحميك "

السرعوفي دير بالك لا صار عندك وغيد مزيون تطلعه للمجلس ...

فيصل الله كريم

الزقروطي على طعمت هالسالفه دير بالك من العين

الشمري والله يمكن غيره معه شويت حسد على كيلو كره مع خيشة لسان اقشر واكملت

متعجب لا طاب لك عاود