(( الــدحــه )) لأي قبيلة هي ؟؟

[ولد الـطـنـايـا]

السلام عليكم ورحمة الله وبركاته ؛؛؛



أخـواني أبي اسئل عن الدحه هي لأي قبيلة بالشمال انا سمعت انها لقبيلة عنزه وناس تقول لا ماهيب لهم .



أبي اعرف لأي قبيلة :)

[محمدالشمري]

سأحولك ألى مضيف أخونا العزيز راعي الوقيد ليفدك ويفيدنا عن تساؤلك أخي العزيز .

وأرجو المعذرة مسبقاً .

[المتوقد]

اللي أعرفووه انه لعنزه



لكن بعض فخوذ شمر الشماليين يمارسونها ..لكن ليست لشمر أصلا


شمر لها العرضه المعروفه ...وهي رقصة الحرب المشهوره...حتى العرضه ..اللتي تسمى اليوم بالعرضه السعوديه...هي في الاساس

أداءا ولحنا هـــي لشمر ...كتأثير لنفوذها السابق والمؤثر ..>>طلعت عن الموضوع عذرا



لكن ماهي لشمر


وسلمت

[هايس الشمري]

ما ادري ليه تذكرت سكروب عكف :)


سلااااااااام

[شريف روما]

نقول الحق :)

اللي اسمعوه هي بالاساس لعنزة

وبعض شمر يدحوووون

وحنا عندنا دحه تسوى دحة عنزة :goooood:

ان شاء الله تشوفونه بعرسي بعد كم سنة ( مابين 3 الى 5 سنوات ههههه ) :7ayyoh:

[ولد الـطـنـايـا]

الشكر كل الشكر والتقدير على من شارك بموضوعي


لكن انا سمعت من ناس واجد تقووول انها ماهيب لعنزه هي لجيمع القبائل اللي بالشمال فقط ما أدري هل هذا صحيح او .............


نبي مشاركاتكم يالطنايا

[متعب الخريصي]

اخوي ولد الطنايا
الدحه او الدحيه هي لأغلب قبائل الشمال
مثل عنزه وبني عطيه والحويطات وبني صخر وغيرهم من القبائل
وليس كل عنزه ايضاً بل تقتصر على افخاذ عنزه اللي بالشمال مثل الروله وغيرهم

[المسعودي]

مثل ماقال اخوووي متعب الخريصي

ماتشمل عنزه كلهم بل تقتصر على فخوذهم اللي بالشمال

ولك مني احلى تحيه

[راعي الوقيد]

الدحه او الدحيه هي لأغلب قبائل الشمال
مثل عنزه وبني عطيه والحويطات وبني صخر وغيرهم من القبائل
متعب الخريصي
متعب !!

افهم من كلامك ان شمر ماهي من القبائل

اللي تمارس هذا اللون من الموروثات الشعبية !؟

وغيرهم من القبائل << يمكن تكون شمر معهن:)

الموضوع هذا يتطلب تواجد ومرور مستشارنا الكبير

خلف الرويتع ابو سنــد :)

لأن الربعــة يجيدون هذا اللون بحذافيرهـ واعتقد انهم

يسمونه الفريسي او مثل ما قالوا:)

وشبيثاااااااان من المبدعين واللي يندمجون فيه الى درجة انه

كل شوين يبي يعض اذنك هذا غير صبخو الروس ببعضه << وااراسي:)

ولــد الطنايا !!

بحايل يا بعدي ما مرت علينا ولا عمري شفت اللي يدح ويحوشي:)

ومثل ما قال العنقري .؟

كل ٍ عطاهـ الله من هبة الريـــــــــــــح .؟

لك التحيـــــــــــــــــة ...

[مشــــعل]

بالنسبه للدحه
يقوم به كل من قال انا شمالي ماعدا شمر
عنزه كل هم يدحون ماعدا اقسامهم المتواجده بحايل
مثل الجعافره والخماعله والغضاوره والبجايده وغيرهم هذولا مايدحون

بالنسبه لشمر ماسمعت ان شمر اللي بنجد يدحون
اما شمر الجزيره يدحون

حسب معرفتي القاصره

[راعي الوقيد]

بالنسبه للدحه
يقوم به كل من قال انا شمالي ماعدا شمر
افاااا يابو ياســر ماهي هي:)

ترن قبل مثلك احسب شمر ما يدحون :)

ولكن يوم مطلاعنا اللي بالخفجي العام شلنا سامريات وعرضنا << مافيه مشكل:)

لكن يوم خذينا الله يجيرك وهم يقومون عيال شمر يدحون وعلى راسهم الشبث:)

وفلاح السعـد يحوشي << او مادري وش اسمه:)

المهم مثل ماقلت بردي السابق الربعة يدحون دحّ اقشر الى درجة ان الأرض تهتز من تحت رجليك:)

ونبي ننشد الشبث:)

[راعي الوقيد]

معلومات عن الدحة ..؟

الدحيّة او الدّحة :-

هي نوع من أنواع الشعر السهل وهي تلتزم بقافية ذات قاعدة ثابته

يقول فيها الشاعر ما يشاء مرتكزا على قاعدة الشطر الأخيرمن الكوبليه

الأول من مجموعة البيت الأول، ويتحدث بيت القصيد في كلمات الشاعر

بمقطوعة سردية لموضوع قصصي هو جوهر ما تم الإجتماع عليه كموضع

قصصي سردي لمعركة ما أو وصف لديار أو هجاء أو مدح ....

وتقام الدحية وسط مهرجان كبير يقول الشاعر ( البداع) البيت ثم يرد

عليه الرداده - السامر بقولهم: هلا .. هلا .. به .. يا هلا..

لا يا حليفي..يا وله.. << يا ولد:)

وهكذا حتى أن ينتهي المقطع كاملا ثم تبدأ المجموعة المصطفة

بترديد الدحية وهكذا حتى يأتي شاعر آخر أو نفس الشاعر ( البداع)

بعد استراحه قصيره ثم يبدأ من جديد ..؟

وينك يالشبث تفتينا عن الفريسي << الدحة بلغة شمر:)

[الشبث]

بسم الله الرحمن الرحيم

اول شي مساكم الله بالخير جميع



ثاني شي

الله يطول بعمرك يابو فيصل

واعتقد ان فيه ناسن افهم مني كثير


لكن انا ابقول اللي عندي والعلم عند الله




اولا

لفت نظري رد اخوي المتوقد

ويمكن هو مفتاح الاجابه

اخوي المتوقد يقول ان العرضه هي رقصة الحرب عند شمر

وهالكلام صحيح وماعليه كلام

ولكن العرضه ايضا نواع يعني فيه عرضه شماليه وعرضه نجديه وعرضه جنوبيه وعرضه قطريه

يعني الحانه تختلف

وهذا يدل ان العرضه مهي لشمر بس




وهالكلام ينطبق على الدحه اللي فيها اكثر من لون


وان كانت قبيلة عنزه هي من اشتهر بهالرقصه الشعبيه وخصوصا الروله

وايضا بعض افخاذ قبيلة شمر يجيدون الدحه .

وعندكم مثلا اهلنا اللي بطلعة التمياط يطبقون الدحه احسن من غيره






والله تعلى اعلم






وتقلدوا تحيتي

[صدى الشمال]

يابعد حي
الدحه للروله من عنزه
مار شمر مادري وش تبيبه
ماهو من زينه
أقول شوقي لسامري حايل
وخلوكم من الدحه اللي والله مايلعبه إلا واحد به سكن



ههههههههههههههههههههههههه



تقبلوووووووووووو تحياتي أخوكم\\\\\\\\\\\كريم الشمال

[سلمان النبهان]

اهلا بولد الطنايا واجابة لسوالك عن الدحة ولمن من القبائل ؟؟؟
فانها لقبيلة عنزة عامة وللروله خاصه وهي الفن الشعبي الاول عندهم ..
وقد يلعبها بعض من فخوذ شمر وخصوصا بالحدود الشمالية من باب التقليد والوناسة .
ولاعلاقة لقبيلة شمر بالدحه لا من حيث اللون ولا المنشا ورغم ان سوالك لمن فقط ..

[هايس الشمري]

الا يالربع



هاللي ينفخون بصدورهم ولا يتكلمون الدحه مار اشوى به كلام


لكن هاللي ينفخون و يتلافتون بينهم و يجيهم بلا و يطوحون شمغهم


هذي وشي؟؟



شفته بالتلفزيون الظاهر انه فرقه الجوف مدري سكاكا

[حائل ديرتي]

الظاهر ياحيي وحسب مانسمع أن الدحّه إنه لعنزه جميعاً وليس لفخذ دون فخذ
والحين كل الناس يدحون ويدبكون ............

[القرياوي]

مع عاطر التحية وصادق المودة لكم ابناء العم
لي تعليق على موضوع الدحة فالدحة لون شعبي يمارس لدى كافة القبائل المتوطنة في شمال المملكة والاردن وحتى بادية سينا في مصر وسوريا ... هي فلكلور منقول لايقتصر على قبيلة واحدة تجد ان قبيلة الرولة وعنزة والعبادلة من عنزة والشرارات وبلي والحويطات والعطوات والعمران والسردية والسرحان وبني صخر واهل الجبل والتياها يؤدونها . وهناك للدحة انموذجين هما الثابت والحركي ويبرز في آدائها بشكل ملفت ومتقن فخذ الكواكبة من الرولة والشرارت وما يميز الدحة هو شاعر البدع والذي يثير في القائة الحماس والحماس المتقد الذي يبثة الحاشي (المرأة) والتي كانت تشارك في هذة اللوحة حين كان البدوي النقي السريرة والوفاء المورث اما اليوم فلا حاشي ولايحزنون انما الدحة باقية تمارس لدى هذة القبائل في الاعراس والمناسبات احببت فقط التوضيح رعاكم اللة

[ولد الـطـنـايـا]

يعطيكم ألف عافية على مشاركاتكم بالموضوع



يعني أنا اللي فهمتوه من بعض الأخوان أجمعوا ان الدحه لجميع القبايل الشمالية:) ماهي بس لعنزه فقط


واللـي عندوه معلومات اكثر لا يبخل علينا

[ابو مرشد]

الاخ العزيز ولد الطنايا تبي تدح دح محد راح يقولك شي

موضوعك جدا اعجبني و حلو معلومات جيده

انا كثير احضر عروس بحايل و الكويت و الرياض عمري ما شفت الدحه شفت العرض بسيوف و هي العرضه و الثانيه الى قاعدين جنهم دياجه يتناقزون على بعض الي يقولون فيها سنة الجنى حاث امي حام على ما اعتقد بعد مو متأكد من الكلمات

و شفت في عرس واحد من الربع مطيري الفرسني اعتقد يسمونها جذه بس الدحه ما عمري شفتها بس سمعت عنها اذكر مره محمد الزقروطي قالي انه شمر يدحون بكلمتين بس

و هذا علمي بالموضوع

و سامحونا على الاطاله اخوكم ابو مرشد

[سفيان الفاعوري]

الدحه او الدحيّه هي اسلوب للشعر والرقصة عند جميع عشائر اهل الشمال مثل الحويطات وبني صخر والبلقا عامه حيث تحتوي شعر الحروب وغيرها وقد اشتهر من شعراء الدحيّه الشرارات.
واليكم هذا الموضوع المنقول عن موقع قبيلة الشرارات
الرقصة عند قبيلة الشرارات هي الدَحة وهذه رقصة يستعملونها في أفراحهم وعند نهاية المعارك قديما يصفون بها المعركة وما دار بها من بطولات وأفعال أما في وقتنا الحاضر فهم يستعملون إلى جانب الدحة العرضة السعودية المشهورة في الأفراح والأعياد، وقد جاء في كتاب الدحه رقصة الحرب والسلم للباحث/ سليمان الأفنس الشراري - طبرجل مقتطفات منها مايأتي:0

"وتعتبر الدَحة إحدى الرقصات الشعبية لعدد كبير من قبائل الشمال مثل : الروله و عنزه و الشرارات و بني صخر و بني عطية والحويطات"0

والدحة نوع من أنواع الشعر السهل وهي تلتزم بقافية ذات قاعدة ثابته يقول فيها الشاعر ما يشاء مرتكزا على قاعدة الشطر الأخيرمن الكوبليه الأول من مجموعة البيت الأول، ويتحدث بيت القصيد في كلمات الشاعر بمقطوعة سردية لموضوع قصصي هو جوهر ما تم الإجتماع عليه كموضع قصصي سردي لمعركة ما أو وصف لديار أو هجاء أو مدح.

وتقام الدحة وسط مهرجان كبير يقول الشاعر البيت ثم يرد عليه الرداده - السامر بقوله: هلا .. هلا .. به .. يا هلا..لا يا حليفي..يا ولد.. وهكذا حتى أن ينتهي المقطع كاملا ثم تبدأ المجموعة المصطفة بترديد الدحية بقول: دح..دح..دح.. وهكذا حتى يأتي شاعر آخر أو نفس الشاعر بعد استراحه قصيره ثم يبدأ من جديد0

ومن شعراء الدحة المشهورين الشاعر حامد بن سعدنه و المتوفى في أواخر القرن الثالث عشر وله في وصف بعض المعارك مقتطفات من قصيدة طويلة قيل أنها أطول ما سمع من شعراء الدحة حيث إستمرت ليلة كاملة وصف فيها كل ما حدث في تلك المعركة و نورد بعض منها كما جاء في كتاب الدحه لسليمان الأفنس:0

يوم الله جابن بالسامر
بطموما واللعب عامر
بحسي والله ما غامر

ما غامر على الشرداني

ما شفتي يا ملا النجم
والبزر يهجمنا هجم
و حنا نتدرق بالرجم

صرنا للبزر نيشاني

يوم تسمع للصمع مرازم
من ممليات المحازم
وكل عن عمره عازم

يقول الموت إصطلاني

يوم زايد ولد مزيـدة
حدر ذلوله وحيده
يقول ما ربعي بريره

مزولي ولد عبداني

وهليـل على ذلولـه
حدرها محدار هوله
يقول العمر عدولـه

وأصمد كان الله وقاني

ونعما لك بابن عزنود
نوخ شعيله بالسنود
…

على الكسير الحرجاني

وبعضنا طوح البارود
يقول الفعل مايعود
شرد يشـادي للقعـود

مثل القعود الفسقاني

يوم مفلح حدرهم ليـه
وينادي وين الحميه
ياحامي تالي الرديـه

نعما بولد عبداني

يوم حول على فارسهم
عداهم عن متارسهم
تسمع بالقـاع مفارسهم

مثل صريك العقباني

يوم قودان أخو ثنيـه
حدرها على ألف و ميه
يقول إن كان لي منيه

ما ود الفضه تاقاني

يا زينه يوم أتطـرى
الفعل فعل أخو سرا
ما توه للهوش مضـرا

ينطحهم مثل الدواري

وانا ياضافي الجلعودي
انا ما صيدي شرودي
بس إنه عرد قعـودي

يوم ان البزر يغشاني

وفـعلي أنا أعــده
عن ربوعي ما اسده
مخمـاري بين الاشده

خربا حداه الجيعاني

ودي اعلمك باخبـاري
فعلي بذاك النهاري
أيست الرجعه لدياري

ووقاني رب الأدياني

يوم انـي طبيت الجمه
نطيحي ماعاد اذمه
عقبته راسه والرمه

شلته من بين الامتاني


اخوكم سفيان الفاعوري

[جاسم العلي]

أشكر الأخ ولد الطنايا على طرح هذا الموضوع وأنت سبقتني لطرحه على هذه الساحة الرحبة وكنت مع العمام هنا والخوال قبل كم يوم على ( الدحه ) واختلفت الآراء ألا أنه سمعت من والدي عن جده يقول لي أنها لعشائر الظفير والله أعلم ؟؟؟!!!

[درداح]

قومي العبيلي يالطرقا _ تقيصري لي وابي ارقا

وابا ارقا حد المخناقه :p:

؟؟؟؟؟؟


؟

دحو ياعيال على عرسي :(

[حمد العطوني]

الد حه ليس اصل وكل اهل الشمال
يلعبون الدحه من شمر وعنزة وعموم اهل الشمال
ومن الممكن ان من اسس الدحه هم عنزة وصف الدحه يكونون الر جا ل بجهة و انساء جهة

ويتقدمون شاعرين واحد يرد على الثاني وقول الاول/

حنا خطار ٍ لفلان وليله ما لنا نيه
وقول الثاني :
الينك صادق ياولد لاياحليفي ياريف
ويقل الاول :
يمن عين فلان هو حاضر ولاله نيه
يقول الثاني :
ثلاث انعم ٍ بفلان الطيب راع الحميه
يقول الاول:
عجل علينا بالحاشي حلات العب عشويه
ويقوم المعزب ويجيب اخته او بنت اعمه وتجلس بين صفوف الرجال واصفوف انساء
ويقول ويقوم الشاعر الاول :

يسوم ويوصف حتى يغري المعزب بالما ل والكلام كله تمثيل غير صحيح وحتى البنت تعجب ياصفها الشاعر/ بحسن الجمال ويمدح اهلها وبعد هذا تطب البنت الى الملعب ويكون بيده سيف او عصاء ومعه امر ان اقترب له



اللاعب اغرب من متر تضربه وان مات هفيان المعنى مايدفع له مدى مثل ما خطط الى قتل مشعان بن زبدان من الصقور من عنزة عند ماكان يسرح راعي عند الروله وهو شاعر دحه وكرهوه رعيان الروله بسبب حسن


جماله وتشجيع الكثير له
بشعر الدحه , وطلبو من ذبحت من بنات الشعلان ان تلاعب مشعان ابن زبدان وتذبحه وانذروه عن الخطة المدبرة ضده ولاشك هو لم يقاطع عادته وعند مابدا المصنع طبت ذبحت الى الملعب ومعه السيف وطب عليه مشعان ابن زبدان كالعاد ه وعند ماقامت تلعب
بالسيف قا ل
ان ذبحتيني ياذبحه غريب ولحدن ناعيني = وان خليتني ياذبحه وحيد ولالمي غيري
ورمت السيف وقامت تلاعبه بالعبات
ومشعان ابن زبدان شاعر دحه حتى عند الموت عند ماغزو الصقورعلى شمروخذوابل طليحان التبيناوي من عبدة من شمرولحقهم ومعه جماعته وفكو ابلهم وصوبومشعان ابن زبدان وقام يقصد قصيد الدحه وهويقول:

ان جتكم مشعة تصيحي عطوها علمن صحيحي == قولوله اخوه ذبيحي شغل الاماني كلنه
ان جتكم مشعة تصيحي عطـوها علمن صحيحي== قولوله اخوه ذييحي شغل لاماني كلنه
وقال ايضا
بـالله عــطــونــي مـن ماكم يـاويـلي علىلاماكم == تـــقــفـــون يــاعـيــال الــصـقــــريــــه

[ابو تغريد]

للتوضيح الدحه للروله وعنزه وهم اهله الاساسيين ولكن في الوقت الحالي اختلط معهم ناس من اهل الشمال . اما قليل من شمر اهل الحدود الشماليه كانو يمارسونها للتسليه فقط.....وشكرا للجميع...؟

[سفيان الفاعوري]

هذا رابط فيه مثال على وصف الحرب في شعر الدحيه(السامر) وهي قصيدة عن حرب الطور بين الحويطات والصخور
اضغط هنا (http://www.ansab-online.com/phpBB2/showthread.php?t=5295&highlight=%D3%DD%ED%C7%E4+%C7%E1%DD%C7%DA%E6%D1%ED)

[الشـ أبوضاري ـمّري]

هي لعنزة ولاجداااااااااااااااال في ذلك وشمّر الشماليين ماسمعت ولاشفت احد يدح بهم



يكفينا عرضة الحرب

[سفيان الفاعوري]

اخواني الاعزاء عندي CD واشرطة للدحية والسامر عندنا في الاردن ،ارشدوني كيف انزلها لكم على هذا الموقع ،وان شا الله ما بتكونوا غير راضيين.ورح تسمعوا اللي يسركم ويمتعكم.

اخوكم الفاعوري