بعض القصائد التي قيلت في معركة الصريف [الأرشيف]

محمد الزبيلي

19-11-2005, 17:38

بسم الله الرحمن الرحيم

اود ان أذكر نبذة عن معركة الصريف ،، اراد مبارك الصباح ان يحارب شمر وابن رشيد فأخذ يرسل الى امرا وشيوخ القبائل ويحرضهم على مساندته في القضاء على ابن رشيد ويمونهم بالأموال والعتاد حتى جمع اكثر من ثلاثة عشر الف فارس وكان في جيشه 27 بيرق وتوجه مبارك وجيشه الى نجد ونوخوا في منطقة الطرفيه وهي شمال شرق بريدة بالقصيم وكان مبارك الصباح جالس هو وشيوخ القبائل ويخططون للمعركة وقال مبارك لخوياوه حنا اكثر من بيرق وابن رشيد بيرقه واحد ليه مانرسله بيرقين او ثلاث وننهيه قال واحد منهم يابن صباح انت ماتعرف اخو رثعه هذا مايهاب الموت والله الى يصبحكم باكر الصبح قال مبارك الصباح يعقب قال باكر تشوف (( اخو رثعه هو الامير عبدالعزيز الرشيد قائد الجيش الشمري )) وكان عند مبارك الصباح سلطان الدويش وكان يحدا ويقصد قبل المعركه ويقول ::،،

لا والله الا تو زان الكيف === يوم ابو جابر ظهر
نبي نطارد مكرميين الضيف === شمر هل البوس العفر
اما خذيناهم بحد السيف === والا خذونا بالظفر
اما نجي بيت المضيف === والا فياخذنا قهر
=======================
ويعني ببيت المضيف الذي بقصر برزان الذي بناه عبدالله الرشيد
=======================
المهم بدات المعركة حوالي الظهر وبعد ان بدأت المعركة بقليل هربوا جميع القبائل المواليه لأبن صباح عندما رأوا الموت الحمر وانتصروا شمر انتصار ساحق ، رد الأمير ماجد الحمود الرشيد على سلطان الدويش بقوله:
اهلا هلابك يوم دار الكيف == قرت عيونك بالظفر
اعطيك ماجوبك بحكم الضيف== شلفن يفجن النحر
خلاك عمك يوم شاف السيف== عجلن جواده وانكسرد
ما خبربها الي جالسن بالسيف=== يمديه من جاب الخبر
سلطان هو عقلك خفيف === عرضت روحك للخطر
انشد عريجن بالصريف == اشرف على الموت الحمر
يوم المدافع له رزيف== والزلم جضعا بالمطر
وانا احمد الرب اللطيف == ماراح رداد الخبر
====================
وبعد المعركة قال عثمان الدواس قصيدته التي يقول بها:::

نون تظهر من شمال الجزيرة == ظفت مخاييله على يام ومطير
وأجنب وسيله شال علوى زفيرة == تناوش العجمان واقفوا مذاعير
هجوا وكلن ما يسنع منيرة == تزبنت يامن بلاد المناصير
فرقع ولد متعب مطيرن بغيرة == وصارت على الجبلان مع سردة اشقير
حرن شهر من قصر برزان طيرة == وقتن ينفّربه به الصيد تنفير
برك مبارك ثم كمل هديرة == ظاق البحر به ما لقابه معابير
وانحاش أخو مريم وخفق ظميرة == من عقب ما هو صاير للبدو ظير
قام يتعوذ من فلاحٍ وغيرة == يقول ما لي في سنعكم ولا صير
واقفا ولد راكان يشمت شويره == يقول وهقنا كبير البحاحير
==============================================
والعجيب في هذه القصة هو أنا الشاعر فالح السكيني من أهل ( شقرا ) تنبأ بما سيحدث في المعركة في قصيدته التي رد بها على شاعر (الكويت) حمود الناصر البدر عندما كان حمود يمتدح القبائل المواليه لهم .

يا علـي جفني عن كرى النــوم ذارا كنه يحط بناظر العين سنجــــــــــــار
سهران مالي يا نديمــــــــــي قرارا يا مسندي وشلون ضاعن الافكـــــار
ناظر ركاب حمود جتنا تبـــــــــــارا ومشيعن مدحة على السيف بالكـــار
يا علــــــي قرب كيتبلي خيـــــــــارا وسجلتن نكتبها عــدل الاسطــــــــار
ننسج جوابن من حشى الصدر ثارا مثايلن ما قالهن كـــــــل شعـــــــــار
وخلاف ذا دنيت ناب الفقـــــــــــارا راسه إلا شال الخبر تقـــــل بــه زار
انشر من الجمعة وتال النهــــــــارا نظوك ورى وبرك تطلع للنشــــــــار
ونشد عن المطران وعريــــف دارا وسنع مبارك منزلة وين هو صــــار
تلقاه بالصمان دون الزبـــــــــــــارا يرعى بريضانن زهت كل نـــــــــوار
تلقى حمود وقل شبورك قصـــــارا ربض لسانك فعلكم مابعد صـــــــــار
والقول قبل الفعل مابة ممـــــــــارا والذم ما يقمم طويلين الاشبــــــــــار
قولن بلا فعلن ولو قيل عـــــــــارا تراه مثل الي نفخله بمزمــــــــــــــار
والكذب محدن فيه بايع وشــــــارا يكمل ولو هو عادي كل الاقطـــــــار
والصدق يوضي بالدجى له نـــوارا والكذب ما يرفع عواميد سيـــــــــار
طير البحر ما ينوصف للحــــــرارا لو طار تلقونه على سيف الابحـــــار
والخيل غمقن طنيها والمهـــــــارا والنار يقبس من مقابيسها نــــــــــار
تمدح مطير ويام عنكم يســــــــارا في ضفكم يرعون من عشـب الاقفـار
لاشك لا من أشهب الملح ثـــــــارا هجوا وخلوكم على جانب الــــــــدار
لابد من يومن يجيله كـــــــــــرارا تشوف علوى بأول القوم نيـــــــــار
جاكم ولد متعب ذعار السكــــــارا ماض الفعايل للمعادين دمــــــــــــار
له لابتن ما يلبسون الـــــــــوزارا ولا جمعوهم من حساوي وبحـــــار
سلات أهل حايل عيالــــــن صغارا لطامت العايل قبل دور الأفكـــــــــار
ان سبلوا بالكون دولت نصـــــــارا قبيلهم لا شافهم يعطـــــــي ادبــــار
وبيمانهم صنع العجـــم والنصـــارا وموازرن تشبه هماليــل الأمطـــــار
=====================================================
وكانت القبائل الموالية لمبارك الصباح هي كما يحضرن كالآتي ::
الضفير: بقيادة الشيخ جعيلان بن سويط .
المنتفق: وهو عبارة عن عدة قبائل مجتمعة تحت حلف واحد، بزعامة الشيخ سعدون باشا السعدون .
مطـير: بقيادة سلطان الدويش.
العجمان: بقيادة أبو كلاب الشيخ محمد بن حثلين .
بني هاجر: بقيادة ابن شافي .
المرة: بقيادة ابن شريم.
سبيع : بقيادة ظرمان بن اثنين .
السهول: يقيادة ابن جلعود.
الرولة: بقيادة ابن شعلان .
قحطان: بقيادة حشر بن وريك .
العوازم: بقيادة مبارك بن دريع .
الرشايده: بقيادة محمد بن قرنيس .
وعدد كبير وجموع من البدو اللي اشتركوا طمعاً بالغنائم .
====================================================

ومن الشعار الذين ردو على قصيدة حمود البدر هو الشاعر سليمان ابن جمهور من هل الزبير ويقول بقصيدته،،،،،،،،،،

جنح الدجى جاشا به الفكـر حـارا
محتار مدري وين تنـدار الأفكـار
عفت الكـرى ومجاضعـي للعـذارا
ياكن يطعن قومة القلـب مسمـار
قبل البشير محيسـنٍ مـع نهـارا
الربع قسميـن بهـم بـارد وحـار
احـدٍ يقـول يانـاس الحـكـم دارا
لإبن صباح اللي ولى بـر وابحـار
واحدٍ نذر واحـدٍ حلـف بالجـوارا
ماصار مثله بالجزيـره والأقطـار
وحدٍ صعـد بالمـدح راس المنـارا
لمباركٍ لـولا الحيـا يامـلا صـار
إندر خماله وصار مدحـه خسـارا
اصبح وظنّه مابلغ عشـر معشـار
الحمد للـي بإيـده الأمـر صـارا
المطّلـع عالـم خفّيـات الأسـرار
بخـلاف ذا ياراكبـيـن البـكـارا
عيرات من ذروات حفّـات الاوبـار
خمس وخمس عيونهـن كالشـرارا
مافوقهن غير السفايـف والاكـوار
بسمحات الأيـدي نابيـات الفقـارا
عوص النضى من نسل ذروات عقار
خص الخواصر مانشـن بالحـوارا
محنونيات ابليـل لاقـوس لاطـار
من جـاء لـدار خيـار مابالديـارا
هلا الزبير أجواد و أكرام وأخيار
مـادوّر النّمـام فيـهـم نـعـارا
يخس الخسيس اللي بهم قال بزوار
اولاد نجـدٍ بالفـخـر والمـمـارا
بالطيب وإلا بالـردى مالهـم كـار
ياركـب سيـرو بالنهـار الجهـارا
على عيون الناس لـوذو بالأكـوار
بالحزم عقب العزم سيـرو يسـارا
خلو حسن بصري يمين عن الـدار
ياركـب هيلـو الحـذار الـحـذارا
عن نوم أو يـوم تقيمـون خطـار
ارخو لهـن الخطـم ليـل ونهـارا
حتى تجون حمـود بالـدار محتـار
اقـروه منـي بالتحـيـه وقــارا
ماجاء ليل وما سطع نور الانـوار
وخوذو له الخاطر وقولـو مجـارا
ماجور يامكسور من غيـر جبـار
من عقب ماقيلـك عليـك إستـدارا
كيف انت مع ربعك على ضفوة النار
ياحمود مـن قيلـك بقيلـه تجـارا
تقدح وتمدح والفعل مابعـد صـار
جورك ومكرك يابن ناصـر قـرارا
اخطيت ياعمس البصيره والافكـار
هل كيف تبني لك مـن الكـذب دارا
وتشيّد المبنى علـى درب الاخطـار
لاعاد مـال الملتجـي بـك قـرارا
لارحم ابو من دق بجـوارك جـوار
مبنى بنيته صـار ساسـه هيـارا
سوس على شافي شفا جرف وانهار
الكذب بـه شـؤمٍ ولـؤمٍ وعـارا
بقولة ترانا من صواريـم سنجـار
عيال الحراير مثـل اباهـا حـرارا
وجميع طيـرٍ لاليغـرك وان طـار
هل كيف لأسـرار المغيـب تجـارا
ياحمود ليه أنهاك ياعمس الابصـار
لاعـاد مالـك بالعلـوم انتـظـارا
ولا انت بشيخٍ ياخذ الغلـب والثـار
تخـوض ببحـورٍ تلاطـم بـغـارا
بأمر الولي تنـدار بإقبـال وإدبـار
يرفـع وياضـع ويسمـع ويـارا
ويحكـم دواليـب بالأقـدار تنـدار
وينصر ويدمر والكسـر والجبـارا
بإيد الولي قهـار دمـار الأعمـار
بالغيـب لـك رجـمٍ بليـا انتمـارا
حكمّت ربعك بالحكايـا والاشعـار
الحكـم ماهـو بالمنـى والنمـارا
إيضـا ولا بالطهبلـه توخـذ ديـار
والكذب مثل الجم وان نـزح غـارا
والفعل مثل اليـم سيـار الابحـار
ياليت لـو مالـك لسانـك هجـارا
ماكان جاك من الشعر كثر ماصـار
ياليت ابو جابر من سنامـن لـوارا
حكمه ولا سيّـر لنجـدٍ ولا سـار
وإيـزاه ربـع الفـا وعريـب دارا
واهل البحر والبدو يدون الاعشـار
ياحمود سرتو مـن بلدكـم بطـارا
وزمتكـم انفسكـم لحكـمٍ وتدبـار
وثـرتُ وصـرتُ بالتمانـي نمـارا
وطابت لكم قطع الفيافي والاقطـار
بقوم بها مغصـوب واحـدٍ بكـارا
مابين بحري والحضر واهل الاهوار
قوم به الهيـا بـن ناصـر كبـارا
قبل الملاقى تحسـب القـوم دقـار
غرتكـم المهلـه بليـل ونـهـارا
حتى انتهت مـده انفـاس واعمـار
يوم انت بالتنهات ترعى الخضـارا
ومربعٍ تقطـف زماليـق الازهـار
الحر خطو النوب يخطـي الحبـارا
والضان ترثع دام سرحـان ماثـار
ياحمود وين جنانـك اللـي تجـارا
ظنك بها تغذي شجرهـا والاثمـار
اصبـح ماهـا غايـرٍ ثـم غـارا
قبل المساء غارت وشبت بها النار
تقـول مايطـري علينـا انحـدارا
تبون حايـل مـع قفـار لكـم دار
خاب الرجاء فيكم وصـرتُ أسـارا
واحدٍ دفن واحـدٍ معشـى للأطيـار
خدراتهـا دار الفلـك واسـتـدارا
هـبـن ولام وداركــم دور زوار
جاكم بلاكم مـن هواكـم وصـارا
نهاركـم ليـلٍ وضاعـن الافكـار
بين الصريف وبين هـاك الزبـارا
حقّت ولا بقّـت لكـم عيـن ديـار
ان كنـت واعـي فانتبـه لاتـوارا
هيهات مالدرهـم يشاديـه دينـار
المـدح ماطـوّل شبـورٍ قصـارا
والـذم مايدقـم طويليـن الاشبـار
تمدح مبـارك ياعشيـر السكـارا
قبل الفعل لـه رمـع زودٍ وتدبـار
وحنـا لمدحـه مانقولـه جهـارا
إلا لفعـلٍ يابـن ناصـر وتـذكـار
ماصار مثـل الضيغمـي بالبكـارا
إليا أقفى على عين المعادي بالأدبار
لابـد لـه مـن دورةٍ وافـتـرارا
مراكـب تفتـر وعيـون واسفـار
إليا أرجفت معـه السبايـا وغـارا
يشبه لهاتيك الهواجـر وألأنصـار
حالـو ولا زالـو وجالـو حـذارا
وهدوّ ولا ردوّ لك الله عـن الحـار
هـذا فخـر سكـان حايـل قفـارا
ظنك بهم ماكمّلـو دشـن الاكـوار
مــن فعلـهـم يــدوّر قــوي
خلوّه يرغي عقـب ماكـان هـدار
من عقب مايدعـى اميـر الإمـارا
والناس بأمره بالبـراري والأبحـار
واليـوم دخّـل بالمنـاور نصـارا
اللي براسه طاح من زود واخطـار
هذا الفخر ياحمود هاللـي يتمـارا
فعل الرشيد اللي رأيتـه بالأبصـار
لا لاطلو وجهـك سـواد وسمـارا
حيثك خبيـث وداري مـار مكـار
وحاطت بكم خيـل عليهـا نمـارا
ضياغم جوكم علـى قـب وامهـار
سلّو وولّو فـي سيـوف النصـارا
مع صنع ابن باني للأرقـاب بتـار
قوم علـى قـوم عبيـد وحـرارا
بكبودهـم مـرٍ وبقلوبهـم نــار
قومٍ لأخـو نـوره بليـل ونهـارا
ياطون لو ياطا شخانيـب الأوعـار
قومٍ تفـت الكبـد هـي والمـرارا
حريبهم يشـرب قراطيـع الأمـرار
قومٍ لها بقلـوب الأعـداء ذعـارا
تشفي غليله من قبيلـه الـى ثـار
قومٍ تراهـا مـن طناهـا سهـارا
على الحكم عيّو بالأملح عن الـدار
قـومٍ لهـا عـزٍ ونصـرٍ تـبـارا
ياعل عـزه بالجزيـره والأقطـار
قـومٍ لهـا يـومٍ تبيـع العـمـارا
منول البضر بسيوفهم تشتعـل نـار
قومٍ ربـو بالحـرب ماهـم تجـارا
مالها خختشن المعـارك والاكـوار
قـومٍ بهـا زومٍ نهـار المـثـارا
إليا اذكر حربهم عند حلو الكرى طار
قـومٍ لهـم منـي سـلام ووقـارا
جميعهـم مابيـن جهـال وصغـار
وصلو على سيـد قريـش وقـارا
مالعلع القمري على روس الأشجار
===========================================
من الذين قصدوا بعد المعركة هو الامير حمود العبيد الرشيد يقول::::::::::::

عـزاه ياقلـب مـن العـام ملهـود===ولا جت علوم الغزو ينساح باله
وإلى أبطوا الطرشان تلقـاه منكـود===مثل الغليث اللي يحسب لياليـه
والله لـولا حبكـم يافتـى الـجـود===لا حج بيت الله واصلـى قبالـه
يالله يالـلـي للمخالـيـق معـبـود===يا الواحد اللي كل حـي يسألـه
تجعل سهمنـا يمـت الضـد مقيـود===بسلامة اللي وافيـاتٍ اخصالـه
عبدالعزيز اللي على الحرب والكـود===يصبر كما تصبر عرايب جماله
عطـاه ربـه خـلـةٍ مـثـل داوود===ولين اقلوب الترك له وإستمالـه
من العام غزاي على خيـر وسعـود===مـا ديـرة إلا بنايـة ظلالـه
الله يعيـن الخيـل ويقـوي الـقـود===عليـه لا سنـه تعلـى رحالـه
واللي فتق فتق وهـو كـان مسـدود===مثل الجمل يقطع بزوره شمالـه
وإن ما مضى شئ ترى الحكي مردود===انشد بريدة وإنشد اللي حوالـه
واللي تمنا الحرب ماهـوب مـردود===من حربنا ما حصل إلا الرزاله
تر حربنا مثل البحر مـا بهـا زود===الغبه اللي موجها فـوق جالـه
داخلـه مفقـود وطالعـه مـولـود===ما اهبلك ياللي خابـر وتعنالـه
وش عندنا الربـع لدعيـج وحمـود===وعريب دارٍ يوم تطرد اشغالـه
يقول مالي يوم اجـي نجـد مقصـود===إلا الأمير احولُـه مـن جبالـه
وابوه ما كبر فزتـه يافتـى الجـود===وابوه لو هو حالمه كيف قالـه
هو ما درى أن اجبالنا الحمر والسود===عين على الطلاب في كل حالـه
وابوه مانـا خابـر يطلـب العـود===ولا عندنا له قالـةٍ بـه مقالـه
غره سلاحـه خمسـة آلاف بـارود===ومطير وسبيـع ويـامٍ صيالـه
مثل الحبوش اللي يسوقـون محمـود===وأهلكهم الباري بعـزة جلالـه
نقلهم الله لين جو حـول أبـو الـدود===ومن دمهم هاك الطغاميس أساله
حامـو عليهـم بالبواريـد وفـرود===ومبارك نجــاه ربـه الحالـه
ماله شبيه كـود فرعوننـا العـود===اللي نجا والقـوم غـرقة اقبالـه
وفرعوننا المذكـور وإبليـس وقرود===أطيب منه وأذرب منه في فعاله
ما هاب من ربه ولا خـاف منقـود===أمه لقع قلبـه وشمـت بحالـه
شيبـان أخوانـه مصليـن ورقـود===في فرشهم ذبحوا بليلـةٍ غيالـه
وإن كان عند أمه جنيهـات وعقـود===لزماً يغوله مثل غولـة عيالـه
ونكس علـة قومـه بخسـرا مفقـود===ومن ذبح منهم وخِذ شطر مالـه
((خلوه بكويته )) وراحوا على القود===وكلٍ زبن له ديرةٍ فـي حلالـه
=========================================

تقبلوا تحياتي ///////////////الزبيلي،،،،،،،،،،،،،،،،،،،،،،،،،