نشده عن الخوال

[شموخ]

سلام عليكم

فيه مثل يقول (أخطب الخال )

وفيه شاعر يقول

الصبي لاطاب قالو من خواله.......... بالخوال يسال قبل الوالديني


فهذا البيت وهذا المثل يدل على أن للخوال دور كبير في طبيعة الأبناء وأخلاقهم وخلقهم ( طبعا بالنسبه لي أتوقع إن الخَلق له دور كبير فالأغلبيه يطلعون شبه خوالهم :) :) لكن الخُلق والصفات مثل الكرم والشجاعه وسرعة البديهه...الخ هل يطلع الولد على الخال حتى لو كان ساكن بعيد عن خاله ومايشوف خواله الا بالمناسبات الكبيره صراحه شي محيرني لو عايش قريب منهم بقول تطبع باطباعهم لكن بعيد ؟؟
وغير كذا مااذكر اني درست بأول ثانوي في مادة الأحياء إن الصفات الخُلقيه تنتقل بالوراثه :) وأكثر مازاد حيرتي أيام العيد يوم كنا بالرياض كنا مجتمعين عند وحده من الأقارب كبيرة سن وكانت تسولف لنا سوالف عابره فيها انتقادات :) وانتقدات بعض أبناء وبنات إخوانها اللي ماجوا للعيد بالرياض عند أعمامهم وفي ديرتهم طبعا هالعجيز حفظها الله ورعاها ماتعترف بظروف وماظروف وخاصة اللي عندهم إجازه :) وكانت تقول طالعين على خوالهم فيهم غفله " يعني قلة نباهه :) يوم ناقشناها في مسألة الخوال وتأثرهم بهم وخاصة انهم بعيد عن خوالهم ومايشوفون خوالهم الا بالسنه مره قالت الخال جذاب وضربت أمثلة عديده بأن كل واحد ماخذ من خواله صفاتهم اللي كريم قالت ماخذ من خواله الكرم واللي صدره شمالي قالت مثل خواله واللي ذكي وشجاع قالت طالع على خواله أهل ذكاااء من زمان أول وتالي :) وشجاعه وخاصة أيام المعارك والحروب معروفين عاد كل شي عند هالعجيز الا حروب الأولين ماتنساها وخاصة اللي كانت مضاده لهم :wink: :wink: واللي اجودي قالت مثل خواله ينتصلى على شليله :) واللي دلخ قالت فيه غفلة خواله وهلم جرا وكل وحده منا استمعت لصفات خوالها :)

فهل فعلا الأبناء يتأثرون بخوالهم وأطباعهم لو كانوا ساكنين بعيد عنهم ومايشوفونهم الا مره أو مرتين بالسنه ؟

وهل إذا كانت البنت أو الولد حادر شعيب :) " يعني منتهي مهبول " :) يتهمون الخوال بتردي الأبناء ...

اتمنى كل واحد يتأمل شوي قبل مايرد على الموضوع في أقاربه وخاصة اللي أمهم من خارج الأسره أو القبيله هل فعلا هم طالعين على خوالهم في أطباعهم ، والا لا ويعطينا رائيه في الموضوع ....


تحياتي
شموخ

[سلطان الشمري]

والله ياشموخ

حيرتيني ..قبل كل شيء عيدك مبارك
..

بصراحه هذا اللي نعرفه ..انه يطلع لخواله ..

بس اعتقد انه مجرد تنظير .. يمكن يرجع للأمور الوراثيه ماله دخل الاحتكاك
..

بس باقولك شيء.. انا اخواني الكبار ..



طالعين لاهل جدتي ام ابوي.. : من الغازي .. :) بشكلهم ..

كنك تعرفين الغازي عاد :( المهم انهم من عبده :)


وبطبيعتهم ..

واحد منهم مثل خالي.. ( خير يامال الخير) صمت وثقل ولا تقدر تحاكيه الا رسمي كنه مهو اخوك :(


والله شغله بصراحه .. بس الله اعلم انها امور وراثيه ..بحته ..

وبعدين ..


يقولون يابغى الواحد يعرس الشيبان الأولين :

عرب وليدك عربه .. النار من مقباسها
بنت الردي لاتاخذه .. لوهي طويل راسها
.
.
.
وش دخل ابو البنت بالسالفه؟؟؟؟؟ هنا السر



عاد هذي اللي ماله طب :(

[الأصيل]

ياكثر الصور الي حاطتهن هالحرمه بالموضوع:good1:






عيدتس مبارك يامشرفه ( الله يرزقنا ):goooood:







موضوع الولد وثلثينوه على خالوه ... أعتقد مسألة نسبية


ولكن

ربما تكون فيه بعض التشابه في الصفاة



مثال حي:d:



أنا بناخيي مهو علي .. ليه ؟؟



أنا مزيوووووون ( الله يخليني ) وهو مهو كل هذا:a:

وأنا أعتبر شاعر العصر ( وهو شاعر الظهر والمغرب ):7ayyoh:













بعيد عن المزح ....

عيال أختي فيهم شبه كبير جداً من صفاتي ..

وسبحان الله ....

[المطنوخ]

^
^
^
كفّك



شموخ ماتجي الا وتحدنا نرد :)
مادري منين تجيب هالمواضيع اللي تحفز الواحد...يهيب:)

اقول
انتي تقولين ان الواحد بعيد عن خواله وشلون يطلع عليهم

ابي اعرف وش دخل البعد بالطبع
هذا الدم <--هذا اللي طلع معي:)

والعرق دساس<-هي متسانه بهذا؟:)

يعني لو الواحد بوه (الله يكفينا وياكم شره) برص ووالدينوه مابهم شين قالوا اكيد بحدى جدانوه
يعني الزبده
اذا كان المرض يلحق ماتبين الطبع يلحق<--الجمهور يوقف ويصفق لهذه المعلومات الكبيره:)

بس ماهو شرط ان تردى الولد وهو بعيد عن خوالوه يقولون انه من خواله
يمكن يكون التربيه تكون له صله


ومثل ماقال رحمة موسوليني :
قال الاشارة حمراء قال وقف لايخالفونك:)

[ابو غازي]

السلام عليكم

عيدك مبااااااااارك / ياخاله n)



الولد وإن طاب قالوا : من خواله
بالخوال يسـال قبـل الوالدينـي

حضور / ياخاله فقط :thumb:

[تعاليل]

مرحباااااااا شموووخ :)

أحييتس على هالموضوع :thumb:


بالنسبه لي ... ولأخوووواني
كل من شاااااااافنا قال ... (( مســـتخولين ))
سواء بالشكل ولا بالطبع ..

إلا أثنين من اخواني العيال ..
مابهم شين من خوالي ...

وش يدل هذا ... :luvlove: إن العرق دساس



علشان كذا الأولين .. قالوا .. إن بغيت
تخطب لولدك .. تنقى لوه بنت الناس الطيبين وعلمهم غانم
<<<< عررررب وليدك عربوه ...

[شموخ]

أهلين نبرااس

وانت بخير وصحه وسلامه ..

بس ياخوي الوراثه والجينات وماادراك مالجينات والصفات المتنحيه والسائده :) أعتقد تدخل بالشكل وبعض الأمراض الوراثيه مثل السكري والصلع هذه اللي تنتقل بالوراثه :) أما الطبع أحس مال الوراثه علاقه فيه وخاصه لكان بعيد الخال :) ...

شاكره لك مرورك الكريم ..

تحياتي لك
شموخ

[شنقل]

هلا ياخاله

عن اذنك ابروح احلل الـــ DNA

انا واخو سعدى
ابشوف حنا طالعين لخوالنا.......

[اخو سعدى]

واللي خواله عمامه
وش يطلع ..
ههههههههههه

كوكتيل ... ههههه


شنقل .. التحليل يبيله شوين ..

[شموخ]

أهليييين ابو ثوب (كثر من الثياب الشتاء على الأبواب ) :)


وانت بخير وصحه وسلامه ياخوي :)


يعني عيال اختك مثلك بالصفات بس ماادري انت ساكن قريب منهم والا بعيد اذا قريب اكيد بيتطبعون بطبوعك :) :)


شاكره لك مرورك اخي الكريم ..

تحياتي
شموخ

[شموخ]

أهلييييييين بطنخان :)

انت تقول وش دخل البعد بالطبع :) طيب الطبع مااعتقد إنه ينتقل بالوراثه لكن القرب أكيد بالمعايشه ومخالطتهم يتأثرون فيهم :) والأمراض معروفه بعضها وراثيه والبعض الآخر مو وراثي :)

والله شي محيرني كيف يتطبعون باطباع خوالهم وهم بعيد عنهم :)


شاكره لك مرورك يابو طنخه :)

تحياتي
شموخ

[مناكد]

اختي شموخ موضوع مميز...



والبيت لمحمد العجمي الملقب بالذيب...
وهو:


الولد ياطاب طيبه من خواله=عن الخوال يسال قبل الوالديني

ومعناه ان الواحد لياشاف له شخص وخاصة اذا كان في مقتبل العمر وأعجب منه بشيء يسأل اللي قريب منه هذا منهم خواله!!!



واكيد الإنسان يبي يطلع على اما خواله او عمامه!!!


اجل يبي يطلع على البعيدين...




واذكر قبل حوالي عشر سنوات كنت في دورة تدريبية واللي يدرس الدوره أمريكي وخلال الإستراحه كان يتناقش مع بعض الحضور عن موضوع يخص احد أبنائه...


ولم اكن منتبه لموضوعهم الا حين سمعت الإمريكي يقول طالع على خواله بلغة عربية مكسرة (تالأ ألا كواله)...

وأفز وأستوقف مناقشته مع الشباب وأسأله هل انتم تعتقدون بهالأشياء؟؟؟




فأجاب بنعم...


وسلامتكم...

.

[مشــــعل]

حتى ان بمجالسنا
ياشافو الولد طيب قالو منهم خوالوه

وان انعفن قالو خوالهم مابهم خير

وانا اؤيد النضريه هذي 100%
ان البناخي لخوالوه

تسلمين ياشموخ

[قطراوي]

والله..لاني اشبه عمامي ولا اني اشبه خوالي..

..ولااني اشبه يدي ولايدتي ولا ابوي ولا امي..

..اقول ماكو حد يشبهني ولا اشبه..احلى اطلع مميز

من العايله خخخخخخخ..:)

[شريف روما]

انا طالع على عمامي :)

حتى اذكر واحد قالي انت ولد فلان << فلان هذا عمي :)
هو حسبالوه اني انا ولد عمي << فهمتوا هذي :)

وبما ان الولد << دشينا بالرياضيات :)

وبما ان الولد ثلثينوه لخوالوه

ابشركم اني بس بالشكل طالع لعمامي وبالطبع طالع لخوالي

يعني انا مزيج من الكتل الصخرية بين هذا وذاك << دشينا بالاحياء :):)


وتسلمين ياشموخ
عزالله خوش موضوع

تحيااااتي

[ابو غازي]

خاااااااااالتي / شموخ

اما القرب والبعد عن الخوال هذا الشي ليس لهُ دخل بتقمص طباع وصفاات الخوال
وهذا الشي مثبت
وكم سالفة ن وقصيدة بهذه المواريث في وراثه يابنتي واذا الله سهل وحصلت من هذه السوالف
وقصايدهن بحول الله ........ أزودك إنتي شخصياً بهن
صدقي بالله البارحه انا واحد كنت اسأله عن القصايد وكنت ناويهن لك ولكن الرجال اعرفه والظاهر
ماهو حافظ ن زين لهن ولايبي يتفشل معي

بحفظ الله / شموخ

[بنت الشمال]

هلا وغلااااا بك اختي شموووخ

دائماً مواضيعك متميزهـ ولها لفته مميزه :) عز الله انتس تميز X تميز :)

بالنسبه للموضوع فمن ناحيتي افتخر اذا كان فيني الكثير من صفات
الخوال او العَمام .. فعلاً كثير مانسمع في امثال عديده ياقالوا (طالعن على خوالوه :) )


والله شي محيرني كيف يتطبعون باطباع خوالهم وهم بعيد عنهم

ماعتقد انه ضروري قرب او بعد الخوال السالفه ومافيها عن طريق الدم
هذا والله اعلم :)


تسلمين يالغاليه على هالموضوع الجزل ولاااااهنتي ...

اطيب التحايااا
غيـ السحايب ـث

[( المسك )]

ره وديت امي الله يخليها لي للسووق


واشارع زحمه


يالف علي واحد اقوم اشااتم والاعن

وهي تراعيلي


قالت ياويليدي طالعن على خالك فلان


قلت ليش


قالت مشل سوايااك يسووي يشااتم ويلاعن اذا هو بالسياره


ههههههههههههههههههههههههههههههههههههههه


بس عن جد موضووع راييييييق يااشموووخ

[شموخ]

وعليكم السلام

هلا بالعم ابو غازي :)

الله يبارك بعمرك وعساه ينعاد عليك وانت بأتم الصحه والعافيه ...
شرفنا حظورك ياعمده :)

تحياتي
شموخ

[شموخ]

هلاااااااااااااااااااااااا والله بتعاليل :)

يالله حيّها ..

صار انتي طالعه على خوالك :)

شاكره لك عزيزتي على المرور .

تحياتي
شموخ

[شموخ]

هلا ابو الشناقل :)


طيب لاتأخر بالتحليل :)

تحياتي لك
شموخ

[شموخ]

هلا بالدكتور :)

حلل مع راع الهيلا هوب وعطنا النتيجه :)

واكيد اللي خواله عمامه بتطلع الصفات سائده ماهي متنحيه :)

تحياتي لك
شموخ

[شموخ]

هلا باالأخ مناكد

البيت ياخوي سمعته بكذا روايه يعني مرات الصبي ومرات الولد ومرات في الشطر الثاني اختلاف وماعاد ادري وين الروايه الصحيحه :)


أما مسأله انه بيطلع ياعلى عمامه أو خواله ليش حصر على الخوال الطيب والردى العمام مالهم ذكر في أغلب الأحوال دايم الخال اللي متورط مع بنيخيه إن كان تردو:)

أما سالفة الأمريكي ول عليهم حتى خضران العيون معترفين بتأثير الخوال :)

تحياتي لك وشاكره لك مرورك .

شموخ

[شموخ]

حتى ان بمجالسنا
ياشافو الولد طيب قالو منهم خوالوه

وان انعفن قالو خوالهم مابهم خير

وانا اؤيد النضريه هذي 100%
ان البناخي لخوالوه

تسلمين ياشموخ

هلا بالأخ مشعل

طيب لكان طيب من حظ الخال لكن المشكله لتردى وش ذنب الخال ياحظه الأقشر :)

شاكره لك مرورك اخي الكريم ..

تحياتي لك
شموخ

[المتوقد]

من العايدين الجميع ..مع راعية الموضوع...


وو الله أنا ..أقول انه نعم ..الابناء يتأثرون بالخوال ..والعمام أيضا يعني نسب متفاوته...ولذلك نجد أجدادنا حرصوا على الحفاظ على السلاله والرقي بها الى جيل مثالي ...



مثلا لو رجعنا للماضي ...لو فرضنا أن شخص قدم الى أي قبيله ..لاي سبب من الاسباب


سنجد ان هذه القبيله ..ترحب به وتقوم باكرامه..الا النسب..لايزوجوه الا اذا عرفوا انتماءه القبلي والاسباب اللتي أدت الى قدومه هل هي شريفه!؟


اذا اتضحت ..الاسباب ..وقبلوا بخصاله الاخرى الظاهره وعلى رأسها الشجاعه والكرم ..يكون هنا قد تأهل لان يتزوج ..لو توقعنا ...أبناءه مستقبلا...ووضعهم وصفاتهم سنتوقع انهم سيكسبون الصفات المنتخبه مسبقا ...من آبائهم وأجدادهم وسلسله بنفس المقياس


تماما ...كمحصول برتقال ..منــتخب ..ويتم بعد ذلك فرز النخب الاول

ويعاد انتاجه ..ويستبعد رديئه وهكذا ..النتيجه انتاج كامل المميزات


ولذلك أرجع وأقول ان الشخص المجهول اللذي قدم الى هذه القبيله ويصر على عدم كشف هويته,,,هو في الحقيقه يحكم على نفسه بالموت..سيعيش معزز مكرم ولكن ..لن يزوجوه ...وسيضطر لان يتزوج ممن هي بنفس وضعه أو أبوها بنفس وضعه..ولذلك هذا الشخص وسلالته ..ستمتد بخط موازي لهذه القبيله وبنفس الاتجاه ولكن لن يمتزج معها يوما من الايام ..لان الاسباب اللتي أصر على عدم كشفها هي اسباب غير شريفه باسباب وراثيه ورثها !؟


ولذلك أفراد القبيله ...حرصوا على كل صفة ترفع معدل أسهمها بين القبائل

وهذه القبيله ..مقبله على حروب والمقاومه من أجل البقاء


ولن تكون في المقدمه وتبقى متسيده الا بالمحافظه على ما سبق ذكره






يعني في السابق ..كان الشخص اللذي يسئ الأدب..لايسمح له بالجلوس مع الرجال أو مد فنجال القهوه له



لكن انظروا الآن بعد ما تنازل الناس عن أكثر الثوابت


نعاني الآن من الانتاج السئ!؟




طبعا الخوال والعمام..//



لو فرضنا ان الجزيره العربيه مروجا وأنهارا..من الاساس..هل ماحدث سيحدث..؟وهل ستكون تركيبة المجتمع مثل ماهي عليه اليوم؟



أنا أقول والله أعلم لا


لان أهم سبب يجعل القبائل تتشكل ..هي ندرة المراعي اللذي يؤدي

بالناس لاستعمال القوه ولذلك يلجأون الى الجماعات اللتي تؤدي لاحقا

الى تشكيل القبيله والصراع


ااااااااااذا أهتموا بالخوال...مازال العصر يتطلب نخب أول


ووووودمتم بخير


وسلمتي شموخ


كااااانت وجهة نظر خاصه مقتنع أنا منــــها

[ابو غازي]

رد / لشموخ
طيب لكان طيب من حظ الخال لكن المشكله لتردى وش ذنب الخال ياحظه الأقشر

لاياشــــــــــموخ ... لاتفهمين كذا ... الخال الطيب طيبه ثابت حتى ولو تردى ابناخيه ... لاسمح الله
بل يقال له النار ماترث إلا السماااااد ولا خالوه فلان والله والف نعم بكاالشارب

حبيت أوضح لك فقط

أما / ابو روان ...... فهوا جابها الله يعطيه العافيه

[شموخ]

اهلين بالاخ قطرواي

صار انت لاطالع على خالك ولا على عمامك ولا جدك ولاجدتك :)

مميز وياميز في وصوفك :)

شاكره لك مرورك ..

تحياتي
شموخ

[شموخ]

اهلين بالزقروطي

يعني انت شكلك على عمامك انت تشوف فيك شبهه من عمك والا هالرجال اللي قال لك مثل عجيز"ن" جارة خوالي كل ماشافتني تسأل هذه من بنات فلان تقصد خالي مع ان مابيننا شبهه ومره من المرات تقول لي والله ان شبه أهلك عليك وجدك ابو ابوك أصيل كل عياله يشابهون له فشكل العجيز مخبطه :)

بس طبعك مثل خوالك خلاني أشك في ان العيال يطلعون للخوال بالطبع :)




تسلم على المرور ...

تحياتي
شموخ

[شريف روما]

الاخت / شموخ

مو بس الرجال قالي حتى اخواني يقولن بك شبه كبير من من عيال عمنا
حتى بعض مرات ينادوني بإسم واحد منهم لاني اشبهوه حييييل :)
حتى اخواني طالعين على عمامي لكن انا بالشبة اكثر منهم بواجد :)

وحنا وغدانا ووغدان جماعتنا مابهم اللي يطلع على خوالوه الا القليييييييييييييل كل مااشوف لي واحد يا شبه ابوه ولا حدى عماموه

وتسلمين عالموضوع الشيق
تحياااااااااااتي


برايفت قطراوي

انت ماتشبه لا خوالك ولا عمامك !!
انت مو مميز انت اصلا شاذ عن العائلة :)

[اخو سعدى]

شموووخ

مايبيلها شين ..
الطبع والطباع توخذ من الخوال ..
قولي وشلوووووووون ...
سهله جدااااااااااا ..

الطفل ياخذ كل الطباع ..من امــــــــــه
وامـــــــــه .. اخذتن صفاتها وطباعها من اهلها ...
بكذااااا .. وبنتيجه منطقيه ...
تنتقل الصفات والطباع من الخوال للطفل
وذلك عن طريق امـــــــــه ..


واااو ..تذكرت معادلات الرياضيات واثباتها
ههههههههههههههههه


يسلموووووووو شموووووووووخ

[شموخ]

اهلا بعمنا ابو غازي :)

يالييييييييييييييييت والله تزودنا بها القصص والقصائد عاد انا احب قصه وقصيده :)

استعين براعي الوتسيد اذا اشكل عليكم شي " لازم نشغله ":)


تحياتي لك
شموخ

[شموخ]

هلااااااااا والله بالغيث وغيث السحايب :)

تسلمين عزيزتي كلك ذوق :)

أكيد كل وحده بتفتخر بخوالها ( كل فتاة بخالها معجبه :) قلبت المثل)

تحياتي لك
شموخ

[شموخ]

هلااااا بالمسك

صار انت مشكلجي :)

الله يعين أمك :)

شاكره لك مرورك اخي الكريم .

تحياتي
شموخ

[شموخ]

اهلين ابو روان

فعلا الاهتمام بالنسب شي مطلوب ومهم ، بس اللي محيرني هل الطباع تنتقل بالوراثه وخاصه لكانوا بعيدين بالسكن عن خوالهم هذا هو الشي اللي حيرني .


شاكره لك مرورك الكريم وشرحك :)

تقبل تحيات اختك
شموخ

[شموخ]

هلا ابو غازي

ايه بس احيانا ينسب الطيب والردى للخال وهم بعيدين عن الخوال يعني لو تلاحظ أحيانا يكون رجل متزوج من ثنتين وحده منهن اخوانها اهل شجاعه ووحده اخوانها على قدحالهم مستورين حال :) فإذا طلعوا عيال الأولى شجعان قالوا مثل خوالهم واذا طلعوا عيال الثانيه أقل شوي قالوا مثل خوالهم نفسي أعرف لييش الأبو ماله دور في الطيب والردى وكيف أثر الخال على الولد وهو بديره وولد أخته بديره كيف انتقل فيروووس الخال وهوبعيد الوراثه مااذكر انى درست فيها كذا :)


تحياتي
شموخ

[شموخ]

الاخت / شموخ

مو بس الرجال قالي حتى اخواني يقولن بك شبه كبير من من عيال عمنا
حتى بعض مرات ينادوني بإسم واحد منهم لاني اشبهوه حييييل :)
حتى اخواني طالعين على عمامي لكن انا بالشبة اكثر منهم بواجد :)

وحنا وغدانا ووغدان جماعتنا مابهم اللي يطلع على خوالوه الا القليييييييييييييل كل مااشوف لي واحد يا شبه ابوه ولا حدى عماموه


ماشاء الله أصيلين على قولت العجيز جدك أصيل :)

وتسلمين عالموضوع الشيق
تحياااااااااااتي


برايفت قطراوي

انت ماتشبه لا خوالك ولا عمامك !!
انت مو مميز انت اصلا شاذ عن العائلة :)


ههههههههههههههههههه

ههههههههههههههه

أكيد طالع على الاولين اللي مالهم أثر قد ماتوا :)

تحياتي

[شموخ]

اهلين اخو سعدي

صحيح الأم تأثر في ابناءها بس وين دور الأب والعمام وخاصة لكان الولد قريب منهم ..

تحياتي
شموخ

[( المسك )]

لله يابعد حيي انتي ماني مشكلجي ولا شين


مغيرر خذيت من خالي هالطبع بس

يعني نفيستي ونا بالسيارره على راس خشمي


الله يستر ياسمحوو بسواقة الحريم وتسقطين على بالطريق


هههههههههههههههههههههههههههههههههههههههه


كان تصير علوووووووووووووم


الله لايقوله ويسمحونه به




يسلموووووووووووووووو شموووووخ

[راعي الطيب]

اول شي اختي شموخ عيدك مبارك


ثاني شي انا لي كم يوم اقرا العنوان وانحاش ليه مدري بس اليوم قريت الموضوع

وانتي ما تجيبين الا المواضيع الحساسه

طيب زي ماقال اخو سعدى اللي عمامه خواله زيي شيسوي او شلون يطلع؟؟

اختي شموخ

المعروف عند العرب اللي قبلنا يعني الجيل انه الواحد اذا بغى يتزوج قالوا لوه

شف اخوان البنت او اختر خوال طيبين لعيالك ومن قصيد الشاعر ناخذ هالبيت

الولد وإن طاب قالوا : من خواله *** بالخوال يسـال قبـل الوالدينـي

وفيه بيت مشابه اذكر خالي دايم يقولوهوهو

الولد وان طاب طيبه من خواله *** وان تردى ترا خواله خايبيني

والكثير من شيباننا اليا جاء ولدوه متاخر للمجلس ويبي يعرف الموجودين عليه

يقول هذا ولدي فلان او هذا خواله ال فلان .......

وكثير من شيباننا يسال الولد انت منهم خوالك او منهو جدك لان اعتقد والله

اعلم ان اكثر الصفات اللي تتوفر بالابناء من الخوال وتكون من العمام اذا عاش

الولد بينهم واخذ من صفاتهم

ابي اعطي مثال : زيي انا مثلا لامن خوالي ولا من عمامي انا يقولون اللي
لهم خبره اني طلعت على ابوي وعلى جدي حمود الله يرحموه وهو معروف
بين العرب وهو كان يغليني بالحيل وما يستانس الا اليا شافن عندوه ويمكن
من الاعضاء اللي هنا يعرفونوه وكان عليه رحمة الله اذا بغى
احد منه شي يروح هو ويخلصوه لوه حتى لو جاه واحد عاشق يروح ولا يرجع
الا والبنت ماخذتن اللي عاشقه حتى اذكر من سوالف ابوي عنوه يقول فيه واحد
من الجماعه حب وحده واهله عيوا يعطونه اياه

وجا لجدي وقال تكفى يا ابو علي عاد جدي ما يرضى احد يقولوه تكفى قال
يالله مشينا يمهم

وهو يروح يمهم قال خوذو كل بناتي (عددهن سبعه) بس عطونا فلانه لفلان

قالوا تراهي جتك عطيه ماوراها جزيه والرجال هالحين موجود وحي ن يرزق
وعندوه عيال وهو موجود بالخفجي بس ماني ذاكر اسمه لاني ما احتكيت
بوه الا عن بعد
اختي شموخ اعذريني على الاطاله والف شكر لك على هالموضوع الرائع

لا هنتي اختي

[شموخ]

لله يابعد حيي انتي ماني مشكلجي ولا شين


مغيرر خذيت من خالي هالطبع بس

يعني ماأخذت غير هالطبع كان أخذت شي أحسن من كذا :)

يعني نفيستي ونا بالسيارره على راس خشمي


الله يستر ياسمحوو بسواقة الحريم وتسقطين على بالطريق


هههههههههههههههههههههههههههههههههههههههه


كان تصير علوووووووووووووم


الله لايقوله ويسمحونه به


الله لا يقوله :)
يسلموووووووووووووووو شموووووخ

تسلم بس وسع صدرك وانت تسوق :)

[شموخ]

اول شي اختي شموخ عيدك مبارك

وانت بخير وصحه وسلامه .

ثاني شي انا لي كم يوم اقرا العنوان وانحاش ليه مدري بس اليوم قريت الموضوع

وانتي ما تجيبين الا المواضيع الحساسه


وليه تنحاش :) وش فيه حساسيه موضوعي لايكون خوالك معنا هنا بالمضايف وودك تقول شي :)


طيب زي ماقال اخو سعدى اللي عمامه خواله زيي شيسوي او شلون يطلع؟؟

اختي شموخ

المعروف عند العرب اللي قبلنا يعني الجيل انه الواحد اذا بغى يتزوج قالوا لوه

شف اخوان البنت او اختر خوال طيبين لعيالك ومن قصيد الشاعر ناخذ هالبيت

الولد وإن طاب قالوا : من خواله *** بالخوال يسـال قبـل الوالدينـي

وفيه بيت مشابه اذكر خالي دايم يقولوهوهو

الولد وان طاب طيبه من خواله *** وان تردى ترا خواله خايبيني

أعتقد انه هو نفس البيت بس ورد بروايات عديده :)

والكثير من شيباننا اليا جاء ولدوه متاخر للمجلس ويبي يعرف الموجودين عليه

يقول هذا ولدي فلان او هذا خواله ال فلان .......

وكثير من شيباننا يسال الولد انت منهم خوالك او منهو جدك لان اعتقد والله

اعلم ان اكثر الصفات اللي تتوفر بالابناء من الخوال وتكون من العمام اذا عاش

الولد بينهم واخذ من صفاتهم

ابي اعطي مثال : زيي انا مثلا لامن خوالي ولا من عمامي انا يقولون اللي
لهم خبره اني طلعت على ابوي وعلى جدي حمود الله يرحموه وهو معروف
بين العرب وهو كان يغليني بالحيل وما يستانس الا اليا شافن عندوه ويمكن
من الاعضاء اللي هنا يعرفونوه وكان عليه رحمة الله اذا بغى
احد منه شي يروح هو ويخلصوه لوه حتى لو جاه واحد عاشق يروح ولا يرجع
الا والبنت ماخذتن اللي عاشقه حتى اذكر من سوالف ابوي عنوه يقول فيه واحد
من الجماعه حب وحده واهله عيوا يعطونه اياه

وجا لجدي وقال تكفى يا ابو علي عاد جدي ما يرضى احد يقولوه تكفى قال
يالله مشينا يمهم

وهو يروح يمهم قال خوذو كل بناتي (عددهن سبعه) بس عطونا فلانه لفلان

قالوا تراهي جتك عطيه ماوراها جزيه والرجال هالحين موجود وحي ن يرزق
وعندوه عيال وهو موجود بالخفجي بس ماني ذاكر اسمه لاني ما احتكيت
بوه الا عن بعد


الله يرحمه هذا الرجال السنع يوفق بين راسين :)

اختي شموخ اعذريني على الاطاله والف شكر لك على هالموضوع الرائع

لا هنتي اختي

لا ابد خوذ راحتك اخوي والله يعطيك العافيه على المرور ..

تحياتي لك
شموخ

[شام]

الأخت شموخ ..
شائع لدينا في المجتمع العربي ان الولد يتطبع بخاله ..
ولكن لم يثبت العلم هذه المقولة بشكل علمي ..
و في دمشق يقال ثلاثة أرباع الولد لخاله ..
من اين اتت تلك المقولة لا احد يعلم .. وربما هي نتاج مجتمعي موروث ..
ولكن على العموم .. لا أحد يشبه أحد فلكل طباعه ومزاجيته .. ولكن ممكن أن نقول أن هناك تأثير في السلوك والتصرفات نتيجة القرابة الشديدة بين الولد وخاله ..
عن نفسي وعن أخواتي البنات لا نشبه في الطباع خالتنا لأننا في محافظة وهي في أخرى .. فسلوكها شيء وسلوكياتنا شيء آخر تماماً .. هي ملتصقة بأرضها وبيئتها القروية أما نحن فغلب علينا السلوك المدني نظراً لوجودنا في العاصمة ..ومجموعة أشياء ..
باختصار لايمكن الجزم بان الولد يشبه خاله سوى بالمورثات الوراثية أما الطباع والسلوك فلكل شخص طبعه تتأثر بشكل أو بأخر بالمحيطين ..
شموخة :
موضوعك رائع تشكرين عليه .. والله يعطيك العافية أختي .. دمتِ طيبة

[كحيلان]

كل عام وانتي بالف خير الفاضلة شموخ ...

باختصار في مقوله دايم اسمعها ويمكن بعد انتي ...

اللي هي (( الــخـــال والــــد )) لم تنقال من فراق لان تم تشبيه الخال بالوالد

وان شالله اذا سمحت لي الظروف بجيب لك قصص وقصائدها في هذا الموضوع


اشكرك على هذا الموضوع الذي ليس بغريب على شموخ ان تاتي بمثله ...

لانها رائعة والرائع لا ياتي باقل ما هو رائع وجميل ومفيد ...


تقبلي فائق احترامي وتقديري لك ِ

دمت ِ بخير

[شموخ]

هلااااااااااااااا وغلا والله :)

فعلا مااذكر إن السلوك ينتقل بالوراثه يوم درسنا ن الوراثه بمادة الأحياء :)

تسلمييين عزيزتي على إبداء رائيك في الموضوع ..


تقبلي تحياتي
شموخ

[شموخ]

وانت بخير وصحه يارب

هلا بالاخ جرح


اعتقد ان مقولة الخال والد يقصدون بها إنه بمنزلة الأبو ..

ياليت والله اشهدتوا لنا بابيات او شي ماشيات :) لأني احب المواضيع إذا دعمت بالأستشهدات :)


حيّاك الله اخوي وشاكره لك مرورك العذب ..

تحياتي
شموخ

[كحيلان]

الاخت شموخ ...

لقد اطلعت على ردك بشأن البيت الذي حرف كثيرا ً
وقيل على كذا وزن وقافيه ...

والذي اوردوه الاخوة هنا ...

لقد اتيت لك بالقصيدة والذي صححها ابن الشاعر
بنفسه واكد صحة البيت فيها في امسية قطر
قبل سنتين وامسية نجران

واحببت ان اشارك في هذا الشي

وهذي هي القصيدة اتمنى ان تستمعوا فيها ...

قالها أبن الذيب من هاجس بالـه
كلمةٍ يلعـب بهـا والبـال زينـي

قالها يومـه طراه مـا طرالـه
من هواجس تشيب المر ضعيني

غرّني بعض الرجال بكثرة مالـه
مادرى إن الموت في حبل الوتيني

كيف ينفعني وبعض الناس خالـه
ما يدوم البيت كان الأساس طينـي

ماش وين اللي عوا يده الشك اله
مثل أبن ظافر حمد ليتـه يجينـي

الثنا والجـود دايـم فـي خيالـه
علّمـه ظافـر سلـوم الطي بيني

جـوّد العليـا ولزممها عيـالـه
وأدركوا من علمته دنيـا ودينـي

واهني من باع حظّـه وإشترالـه
سار في درب النبي واخزا أللعيني

موقفـه مآكل رجّـالٍ ينـالـه
ومن بغى ممشـاه يقعـد مرّتينـي

وكم ذبح من حايلٍ من حر مالـه
وعادته لطمه خشـوم العايلينـي

حالفٍ مأخذ على ألطرقي ريالـه
وبالثلاث محرّم إنها مـا تجينـي

لا لقيت اللي على السكة لحالـه
يلتفت ويقول : ويـن المس تحيني

أوقف الموتر حيا وأبغ الجمالة
يوم ولد اللاش وجهه مـا يلينـي

والطمع في كروه ألرجلي رذالة
خصّ به وإن جا مجال الغانميني

والردى في حالةٍ مهيب حالـه
يا عوينـه مـن كـلام الطيبيني

الولد وإن طاب قالوا : من خواله
بالخوال يسـال قبـل الو الديني

وأركبه لعيون مـن زيـنٍ دلالـه
ما تحاكوا فـي قفـاه الرامسينـي

ما بغى غيري وأنا مابغـا بدالـه
قاعدٍ لـي بالرجـا مـدّة سنينـي

ما قعدنا فالعمـل نبغـا الرز اله
نأخذ العليـا طريـق الفايزينـي

وأشرب الفنجال وأكـب البيالـه
تابـعٍ سلمـي سلـوم الأوليني

الشاعر// راشد بن حسن بن الذيب العجمي


اتمنى ان اكون قدمت ما يفيدكم

تقبلوا فائق احترامي وتقديري لكم


دمتم بالف خير

[المشرف العام]

جرح الايام

الله يعطيك العافيه

ومجهود جميل جدا

اثريتنا بهذه القصيده وإيضاح حقيقه البيت


والشكر موصول لاختنا شموخ .. بهذا التساؤل

[سيدة القـــــلم]

صبـــاحكـِ سكر عزيزتي شمـــوخ.. ..

اولاً: كل عام وانتي بخير وصحه وسلامــه.. ..

ثانياً: مقوله ان ( الولد على خالوه)

اعتقــد مقوله عفـــى عليها الزمــــن.. ..

ولأن لا يسألـ الرجلـ من خوالـــه.. .. بلـ تبدلت الاحوالـ وتغيرت المفاهيـــم.. .. وتفتحـــت العقولـ بعد زمن طويلـ من الأنغلاق..

وعندمــا يتقدم الرجلـ للخطبــه والزواج يسأله والد العروس.. هل انت قبيلــي..؟!!

ومن اي العوائلـ انت ..؟!!

ولا نسأل عن طباع وصفات خوالــــه اهي مشرفه او غير مشرفـــه.. .. ..

واعتقد ان هذا هو عيــن العقل والصواب.. ..

وحتى اجيبكـ على سؤالــك .. ..

انا خوالي شمــــر .. .. ولم اكتسب منهم اي صفـــه.. .. ..






شكراً لكـ ...







ღ
ღ
ღ
تحياتي
عشـق القصـيد

[عبدالواحد]

مو شرط الوراثه تجي مباشره من الخال _ ممكن من خال خالك
يقال : احفظ ولدك من خال خاله ؟!!
بعضهم يبحث عن الخوال (اهل الكرم) او (الشجاعه )
ولما يبحثون عن الخوال ينسون خوال الخوال ,,
ويمكن يكونون (ضعفاء) و (بخلاء)
وبدل ما تنتقل صفات الخوال الحميده _ تجيهم صفات خوال الخوال
السيئة ..

ومسأله الوراثه ما تقتصر علي الخوال بس
يمكن بالاهل _ بالجد وتمتد حتي للجد السابع _ ممكن الواحد يورث
منهم مميزات عاد هو ونصيبه ,,,
اللي حظه زين يورث من جده الاول الكرم والشجاع ,, وغيرها
واللي حظه مصدي يورث من جده السابع,, البخل
والسقم __ وكذلك الفقر






همسه صريحه وبدون غموض..شزينك هنا _ يا شموخ ؟ لو كنت اداري _ اتردد الف مره ؟
ولا احطك بالعام مشرفه