المساعد الشخصي الرقمي

مشاهدة النسخة كاملة : متيويخه من متيويخاتي


سلطان زمان
19-10-2005, 01:35
من اسبوع وانا طريح الفراش .. الحمد لله على كل حال .. الدعوى بسيطه التهاب شعب هوائية وحنجره ودغشات من هنا وهناك... طبعا قعدت اعالج نفسي بنفسي .. لاني انا سبب نفسي بنفسي جبت صبعي صوب عيني ...

تخبرون من دخل رمضان وتغير نمطنا الغذائي والمزاجي .. قلت ياولد غير المعسل الى جراك .. والبيلوت الى هند .. وهذي عادات سنويه سيئة بلا شك .. عاد انا يوم طحت بالشيشة الجراك الله لا يعيده ..
مزه من هنا ومزه من هناك .. شوي شوي .. يوم جاوبت وشرقت وطحت نقاحي .. قالوا العيال ما تصلح الشيشة على جوع .. عاد انا لاحقن جوع هكا اليوم .. عزمتن خالتي ولا جاز لي طبخته.. مسويه روحه حضريه .. كل الشغله صحون تلمع فخامة قزاز وخزف وكل واحد عنده ستة ملاعق مدري وش اكل بهن .. .. وفطاير قطعن سنوني .. وشوربه مالغه .. ولقيمات طالعن بهن صعارير .. وحلويات جلي وكريمه وخرابيط .. وهي قاعدتن فوق راسي تورينن الصحون والملاعق وموديلاتهن .. وهذي سالفته سالفه بعدين اكمله لكم ...

نرجع لمحور حديثنا....

واليوم ابشركم اني ما اداني ريح الدخان كله .. رحت مشوين اودي الوغدان للحلاق وانا اشوف واحدن زقيق يدخن .. قلت له طف الزقارة ياحمار.. عاد تدخلوا عيال الحلال وفكوني منه ..
احـمد الـطـرقي
19-10-2005, 01:59
الحمدلله على السلامه سلطان


وان شاء الله الامر هين :8_1_215:


بس يدوام الاستشاري مشرف المضيف الطبي تكون مشكلتك محلوله





لاتقول منهو ...؟



























شفه هذا هو جاي بس لاتكلمه الحين بعدين






























هذاك هو



















:alshbath:
الشبث
19-10-2005, 02:37
المعسل الى جراك ..

من المعسل الى الجراك يابو زمان وتبي تسلم





اقول اكسرهن على راس اللي جابهن لك وعلمك بالشر





تسلم يابو زمان



عزالله انك كاتبنا الاول



استمر بالكتابه وسجلن اول معجبيك




وتقلد تحيتي
المخاوي
19-10-2005, 03:03
وانا اشوف صوتك متغير :)




ماتشوف شر ياسلطان زمان


الا وشرايك تجيب لنا مواعين خالتك والنص بالنص :7ayyoh:




رحت مشوين اودي الوغدان للحلاق وانا اشوف واحدن زقيق يدخن ..


ليه هم اعلنوا العيد :d:





ياحلو سوالفك يابو زمان تصدق لياقريتهن ودي اعسل من الوناسه :goooood:
عجل علينا بسالفة خالتك والمواعين :)
سلطان زمان
19-10-2005, 03:09
حيالك الله اخوي احمد ....

علاجي هذا .. مدري .. مدري .. انا احمسه واسفه سف ... او امصع كراعينه واسلقهن على مرقة ماجي .. او انقعه ليلة بماء واتقردعه ...

مدري .. مدري ..
سلطان زمان
19-10-2005, 03:21
مدري .. مدري .. وش اقولك ياشبيثان ... يعني ما جازت لك الا هالمتيويخات ..

بس عاد تراك اخجلتن باطرائك .. وخليتن اتنومس نوماستن ما تنومسته .. يعني راح اكتب واكتب واكتب مادام ان فيه غالي مثلك ..

وفيدة على ما قال .. ترني اتعلم منك ..

وتقلد تحياتي،،،،،
سلطان زمان
19-10-2005, 03:40
مدري .. مدري يامخاوي مدري انت تبي اللقيمات ام صعارير ولا مطاريس الحلا ...
اقولك هذولا مرتن .. حققوني هريسه بماعون .. خذيته مجامله ..ياعله ماهو بالميازين .. وانا هكا الوقت عزوبي.. اخبر اني عطيت حارس العماره الهريسه بماعونه ..

وراحت الايام .. وصرت سالفه على كل لسان .. ابو زمان خرب علينا طقم المواعين .. يمل الطواعين ..

على طاري الوغدان يوم وديتهم الحلاق وهم اثنين .. عطيت كل واحد عشرة اريل وقلت قولوا للحلاق يحلقكم حلاقة مدرسة .. اول كنا نسميها تواليت .. وطلعت من الحلاق لدرأ المشاكل ... يوم رجعت بعد نصف ساعة .. يمار وغداني .. برا الحلاق يمذرحون وشعورهم معنفشه .. ليه ما حلقتوا يمل الخفا اللي يخفيكم .. قالوا .. الحلاق يقول الحلاقه بعشرين وحنا ما معانا الا عشره .. قلت وعشرتك يالهيس مع عشرة اخوك كم تطلع قالوا عشرين .. قلت خلاص ... بس هذي جينات الخوال ...
المخاوي
19-10-2005, 03:49
^
^

هههههههه

اذا جمعوهن ماراح يحلق الا واحد :)

بس لو انهم محلقين على الصفر ارخص تسان موفرينن عشره :7ayyoh:


والقصه هذي

حنا نسميها نمليه مهي تواليت :hala1:
الشبث
19-10-2005, 06:03
بس عاد تراك اخجلتن باطرائك .. وخليتن اتنومس نوماستن ما تنومسته .. يعني راح اكتب واكتب واكتب مادام ان فيه غالي مثلك ..

بالعكس يابو زمان



انت فرضت نفسك فرض


ولا تعلمت من احد



يكفي ان كل موضوع لك اكثر تفاعل من اللي قبله وهذا يدل ان كتاباتك تعجب الكثير


وان عدد قراءك يكثرون من موضوع لموضوع




تابع كتابتك وحنا معك نقراء






وتقلد تحية اخوك الشبث
الأصيل
19-10-2005, 10:12
سلامات سلامات ياسلطان زمان

والحمد لله على السلامه:7ayyoh:

أجر وعافيه




والحمد لله إنك تخلصت من الدخان


لأن الأضرار تكمن في

الدخان ــ الشيشه ــ المطنوخ ــ الجوع الشديد

ننصحك بالابتعاد عنهن :a:






















مثل ماقال الشبث

شهادتي بك مكصومه:thumb:
سلطان زمان
19-10-2005, 22:25
حياك الله اخوي الاصيل ....

خلاص تخلصنا من الدخان والحمد لله .... ومشكور على النصيحة ..لكن .. لكن ... انت تقول أن الأضرار تكمن في
الدخان ــ الشيشه ــ المطنوخ ــ الجوع الشديد

ننصحك بالابتعاد عنهن

انا حقيقة صعبه صعبه صعبه .. اعذرني مقدر ابتعد عن المطنوخ...

وشهادتك وسام لو هي مكصومه.. والشبث سوى دعايات فوق مستواي.... الله يثيبكم على حسن نواياكم ...