"شمــــــــر " اليا قلّت الحيله

[مشــــعل]

يالله انت محييهم

السالفه حدثت ابان حكم الملك عبد العزيز
وكانت بداية حكم الملك غير مالوفه لاهل الباديه
لانوه منع المغازي
وطبق الشرع على القاتل والغازي يعتبر سارق
فصارت من حض "الطقوع"
يعني اللاش غدى شيخ ماتقدر تقولوه شي
ان لمستوه طبق عليك الشرع سواء حد قتل او سرقه

كان فيه واحد عتيبي جاي من نجد لديار الشمال لحاله على ذلوله

المهم وهو يطب على "الدويد" وهذي هجره بالشمال عند رفحاء
وكانوا نازلين عليه الصلبه ولهم شيخ يقال له "منيف"
المهم ان عتيبي تعبان من الطريق وبكرتوه له مده ماشربت

يوم اقبل على منيف وهو يطردوه منيف>>>> "وهذ اللي انا اقصدوه بمقدمتي"
لاهو اللي اكرموه ولا خلى بكرتوه ترد مع النياق
زعل العتيبي ومشى

وهو يطب على "عذفا" وهذي ديرة عند سكاكا واهله هم الشمروخ

يامار هذا نزل الشمروخ من الزميل من سنجاره من شمر
وشيخهم "الجبيلي"
وهم يكرمونوه ويقدرونوه
ويقدمون بكرتوه على النياق ويخلونه ترد
لانه بالسابق تقديم البل عند الورد يعتبر جماله من قلّ الماء والرزق

المهم ان العتيبي يوم مشى قال هالهجينيه وهي على فكره
من الهجينيات المشهورات بالشمال وعند شمر خاصه
يقول


يابكرتي وان جفاك "منيف"=تردين عذفا على ليله
وجهك على مكرمين الضيف=شمر اليا قلّت الحيله
عند "الجبيلي" يطيب الكيف=وانتي تريحين ياشعيله
عدك على بركة(ن) بالصيف=من مزنة(ن) زايد(ن) سيله
لو ندي شيخ الصلب مايخيف=وراه سطه وترزيله
مار البلا اللي حكم بالسيف=عقبان نجد تراعيله
وهذا اللي اقصدوه بالبيتين الاخيره
يقول لو قصدي منيف اسطوه وارزلوه
مار البلا الملك عبد العزيز


وياعلكم سالمين وغانمين
هذا اللي جبناه وعساه تجوز لكم انشالله

[سلمان النبهان]

تسلم وصح لسانك يامشعل ماقصرت يالغالي
ونعم بالشمروخ وبالجبيلي وبشمر كبير وصغير
الحقيقة قصه ثمينه تدل على الكرم والطيب ...
وذكر المعروف من العتيبي بالقصيده تدل على رجولته وشهامته
وهذا ليس غريب على عتيبة القبيلة العربية الاصيلة ...

[خالد الشمري]

ونعم بالجبيلي والشمروخ وافعالهم ترفع الراس ....تسلم يامشعل والله يعطيك العافيه ومشكور على كل ماتقدم

انا مت ضحك على قولته :
لو ندي شيخ الصلب مايخيف
وراه سـطـه وترزيـلـه:p::p::p:

[الرعب]

والله مصيبه يامشعل،،،،،،،،،،،

ما ادري شلون تبينا حنا نقارن فعل شمر بالصلبه،،،،،،،،،،

هدفك من القصه واضح وهو المساواة بين الطيب والردي،،،،،،،

وان مسالة انك تاخذ حقك بيدك انتهت،،،،،،،،،

بس لو ما قرانت طيبنا بردى الصلبه وشيخعم منيف:)

دمت يالغالي،،،،،،،،،،،،

الرعـــــــــــــــب،،،،،،،،،،

[المطني]

مشكور يامشعل على هالقصيده وهالسالفه

بس اللي سمعته غير كذا سمعت ان القصيده للمظيبري من الشمروخ

من شمر واظن ان اسمه حميدان

وتقبل تحياتي

[هايس الشمري]

مشعل

تسلم و لا هنت


اخووووووك

[شريف روما]

وجهك على مكرمين الضيف=شمـر اليـا قلّـت الحيلـه
عند "الجبيلي" يطيب الكيـف=وانتـي تريحيـن ياشعيلـه

ياملا العافية يامشعل
عزالله سالفة طيبة
والكرم من شيمة الطنايا

تسلم وبانتظار سالفة اخرى :)

تحياتي

[الكاسح999]

شكرا يامشعل على هذه السالفه اللي ترفع رووسنا جميعا

يعطيك الف عافيه

[سلمان النبهان]

مشكور يامشعل على هالقصيده وهالسالفه
بس اللي سمعته غير كذا سمعت ان القصيده للمظيبري من الشمروخ
من شمر واظن ان اسمه حميدان وتقبل تحياتي
*****************************************
اهلا باخي المطني يعطيك العافية وردا على تعقيبك اعلاه
احب اقول لك بان الشاعر المظيبري (( الله يرحمه )) هو حماد وليس حميدان
وهو شاعر معروف ونار على راس علم وله من الشعر الكثير معروف لدى عموم شمر
وهو ليس من الشمروخ بل من ((الرخيص)) وهذا اكيد تماما ..
ومن ناحية القصة والقصيدة فلا أعرف هل هي له ام كما ذكر اخينا مشعل
***************************************************

[المطني]

*****************************************
اهلا باخي المطني يعطيك العافية وردا على تعقيبك اعلاه
احب اقول لك بان الشاعر المظيبري (( الله يرحمه )) هو حماد وليس حميدان
وهو شاعر معروف ونار على راس علم وله من الشعر الكثير معروف لدى عموم شمر
وهو ليس من الشمروخ بل من ((الرخيص)) وهذا اكيد تماما ..
ومن ناحية القصة والقصيدة فلا أعرف هل هي له ام كما ذكر اخينا مشعل
***************************************************

مشكور اخي سلمان النبهان على التوضيح

وكما قلت هو حماد ومن الرخيص لكن انا صار عندي بعض الخلط والقصه السابقه سمعت انا انه له والله اعلم

[مشــــعل]

ومن قال يسلم ياسلمان

حياك الله
وبالفعل الطيب هو اللي يذكر فعول الطيبين

لاهنت

[مشــــعل]

ويعافيك يابو فراج

لاهنت على الاطلاله الرائعه

شكراااااااا

[مشــــعل]

هلابك يالرعب

وان ماقارنت فعلنا بفعل الصلبه
ولافيه مجال للمقارنه

لكن من باب ذكر القصه على اكمل وجه
حياااك الله

[مشــــعل]

هلا يالمطني

اما القصيده شي مؤكد انه لواحد اجنبي
لكن هناك من يقول انه لعتيبي ومن يقول انه لرويلي
والاقرب انه لعتيبي بحكم ماسمعت

اما اللي انت ذكرت ونعم بوه
لكن والله يالمطني هذا اللي سمعت
من هاللي يهيجنونه

هلابك يالطيب

[مشــــعل]

ومن قال يسلم

حياك الله يالذيب
شرفتنا يالطيب

[مشــــعل]

هلابك يالزقروطي

والطيب مرورك

ولاهي غريبه على الطنايا

تشكراتي

[مشــــعل]

العفو يالمنسم

وطيب الشمري تفخر بوه شمر عامه

حياك الله

[مشــــعل]

المطني وسلمان
هلا بهالوجيه

ابرك الساعات مروركم

ولانستغني عن اضافاتكم

خلوكم على هالدقه

[صلفيق]

مشعل
أشكرك على إيرادك النادر من السوالف الطيبة.
السالفة وقصيدته إن كانت لعتيبي (مثل ماسمعت انا أيضا) فهي وسام لشمر.. ونعم فيه، وعزالله انه عرف وين يلجأ للطيب. وإن كانت للمضيبري .. والنعم فيه بعد، ولا هي غريبة من شاعر يعد فعول ربعه. ولا خلاف إن كانت لعتيبي أو لشمري، ولكن سؤالي يالغالي عن منيف: هل هو شيخ الصلبة مثل ماذكرت؟ أو أحد رجال ابن مساعد على لينه مثل ماسمعت أنا؟
{ تكفى يابعد حيي لاتحسبن صلبي أبدافع عن شيخهم }.

[مشــــعل]

لا يابعدي ياصلفيق ومحشوم

اما بالنسبه لمنيف هو شيخ الصلبه
وكان المامور على الدويد

هلابك

[راعي الوقيد]

تسلم يامشعـــــــل ولاهنـــــت يابعـــــدحي ،،،

ومشكوووووور على هالسالفة الرااااايقه:)

وننتظــر منــــــك المزيـــــد من الرووووووعة:)

تحيتـــــــي لك ،،،

والسلااااااااام ...
..

[تعاليل]

أخــــــــــــوي ... مــــــــــــــشعل ...




وجهك على مكرمين الضيف .............
...................... شمـــــــر اليـا قلّـت الحيلـه




لا شــــــــلت يمينك على هالقصه الطيبه .. تسلم
فعــــــــــــــــــل ينومس ...












تعاليل

[صلفيق]

أخوي مشعل .. الله يعطيك العافية على هالسالفة،
ولو أني سمعته ، وسمعت إن منيف هو من رجال الشنيفي ، أمير لينه من هالزمان. والسالفة حدثت على لينه مثل مارويته. ولكن ماأدري القصيدة للمضيبري أو لعتيبي مثل ماقلت !
لاأوافقك الراي أنها حدثت على الدويد ، لأن لو السالفة مثل ماقلت .. العتيبي من قبيلة ونعم الرجال، ولاهو راد أو مشاور الصلبة ، لاعلى زمن الملك عبدالعزيز ولا بعده. ولا الصلبة مانعينه من الورد.
ولكن المهم القصيدة إن هي كانت للعتيبي أو للشمري ، فالهدف واحد ، ونعم بعتيبة ونعم بشمر ونعم بكل القبايل اللي تستاهل قولة ونعم.

وابضيف بايعدي حيي اللي انا سمعت .. يقولون يوم وصلت الذلول على بيت الجبيلي وهي تتسفت بالرفة من شدة العطش والتعب، وراعيه عليه، حاول راعيه يطلعه ، ويحلف عليه الجبيلي ان يتركه كما هي . وقم يالجبيلي ويجر الراويه عنده بالرفة ، ويشق جنب الراويه علشان تشرب وهي باركة بالرفة.

[مشــــعل]

ومن قال يسلم ياراعي الوقيد

شرفتنا بمرورك

لاهنت يابعدي