حفاوة حولا

[الجازي]

هلا والله وغلا ,, هذي والله الساعة المباركة اللي شرفتوني فيها ,, وربي إني فرحانة بشوفتكم حتى لو مارديتوا ,, مادام اسماءكم تلق فوق يكفي :)

<<<<<<<عسى ماشر وش تبي ذي !!؟ >>> هكذا يقول لسان حالكم :)

أبد ,, بس حبيت أسوي تطبيق عملي لموضوعي وأشوف ردة فعلكم عليه :)

الموضوع باختصار >>>> وحطوا تحت كلمة اختصار عشرطعش خط ملون :) لأني ماوراي اختصار :)

حبيت أتكلم عن صفة لها تأثير إيجابي كبير في الناس لكننا مهملينها مع إنها سهلة ولا تحتاج منا لأي جهد ,,

كلامي عن (( الحفاوة )) ,,

يعني استقبالك للشخص اللي قدامك بأسلوب فيه احتفاء فيه ,,

مثلا لو كنت متعود تقابل الشخص اللي قدامك سواء كنت تعرفه وتشوفه كل دقيقة :) أو لا ,, بكلماتك المعتادة من طقة : هلا ,, أهلين ,, مرحبا ,, إلخ :) >>>>> ماش أحس اني مافهمت حتسيي وشلون بتفهمونه أنتم :)

برجع لطريقتي القديمة اللي هي ضرب الأمثلة الواقعية :) :

لما يرجع أبوي من العمل أول مايدخل يسلم ,, وحنا نتعدل في جلستنا ونرد السلام وأحيانا نحط كلمة هلا قبل رد السلام :) >>> دقيقة جدا :)

عاد أبوي ياعميري تسنه تحوم تسبده منا ومن أسلوبنا يقوم يمد الغرض اللي معه تسانه جايبن معه شيء ويطلع لغرفته :)

وأكيد طبعا ربعي واجد :) يعني مليون في المية بعضكم فيه هالصفة يرد برد بارد لأنه متعود على هالروتين :)

لكن لو جرب إنه يكون ذرب شوي ويعطي من هالكلام الحلو اللي مايكلف شيء غير تحريك الحنك :) >>> والله ان تحريك الحنك كليف بعد :) >>>خوش ناصحة :)

ويفز ويهلي ويرحب وبدل مايقول هلا حاف ,, يقول هلا والله وغلا >>>> شكلي ناشبتن لهالعضوة مدري ليه :) الظاهر إني فاقدتها ومشتاقة لها :)

ويشق خشته من أقصى اليمين لأقصى اليسار طبعا شق ابتسامة مب شق تكشيرة :)

وش تتوقعون راح تكون ردة فعل الشخص اللي أمامك !!؟

والله ردة فعله راح تكون غير طبيعية ماأقدر أوصفها لكم :) >>>> تسني فضحت نفسي :)

يعني شوي ويحطك فوق راسه من الفرحة لأنك حسسته بقيمته وقدره ومكانته عندك ,,



لي بنت عم ماوطت درب الأدناس >>>> أفا عسى ماشر !! الظاهر فيوزاتي بدت تلتمس يوم وصلت لنهاية الموضوع :)

أقول : لي بنت عم ماتقابلني إلا بهالأسلوب ,, يعني من يوم تشوف وجهي وهي تهلي وترحب وأنا شوي والتفت وراي أخاف انها تحاتسي وحدة غيري :)>>> الثقة معدومة :)

بصراحة أحس إنها ملكتني بحلاوة لسانها مع إن علاقتي بها رسمية جدا بسبب الفارق الزمني :) (( العمري )))

((( هلا والله عاش من شافتس ياشيخة وش هالغيبة ؟؟ )))
7
7
7
7
تصدقون عاد إن هالكلام ينقال لي :) لا ومن وحدة كبر أمي :) >>>>> والله اني أضيع معها :)

المهم أنا الحين قررت أصير مثلها وودي عاد تصيرون مثلي :) عشان أصير قدوة حسنة لكم :)

ويبيلي عاد أستعد لدورات تدريبية خصوصا إننا مقبلين على مناسبات واجتماعات في هالصيفية ,,

يعني الله يعين ضحاياي علي :)
.
.
.
.
.

ذكرت قصة يوم جيت أرسل الموضوع قلت والله لأقولها حتى لو أحطها بموضوع لحالها :)

اثري سنعة منذو مبطي وأنا ناسية :) يعني عرق هالحفاوة فيني من زمان بس فيه حوالة شوي :)

أذكر مرة إتصل صديق أخوي وكان شخص ملتزم ,,

المهم هو قال السلام عليكم من هنا وأنا أستلمه من هنا :)

قلت له : هلا والله وعليييييييييييييييييييييييييييييييييكم السلام والرحمة ,, ياخي وينك مالك شوفة ,, على شمسك غيوم ,,

قاطعني وقال : فلان فيه ؟؟ (( يبي أخوي :) ))

قلت : هه !! عمي عسى ماشر ماعرفتني !! أنا ريم :) >>>> جبت العيد وكملت الناقص :)

قال لي وتسن نبرة صوته تغيرت :) : لو سمحتي إذا جاء فلان قولي له محمد اتصل عليك !!!!!!

!!!!!!!!!!!!!!!!!!!!!!!!!!!!!!!!!!!!!!!

حفاوة حولا :) بس ولو بشارة خير :) يعني فيني عرق ,, صح انه حول بس يمديه يتعدل مع الأيام :)

[الاصمعي]

يا هلا ومرحبا بالريم

ياهلا به وبمواضيعه الرايقه والمفيده كذلك

هذي الحفاوة وبكرى التعليق على الموضوع تساننا حيين

تحياتي

[بـنـت النـور]

موضوع رايق ولي عودة بالرد

[شموخ]

هلا باللي به الخافق يهلي ............ من الفرحة وروحي به تهلي
الى شفته ولو في الصدر ضيقه .......... تفرج كل همي واضمحلي


ياهلاااااااااااا وياغلااااا ويامرحبااااااااااااااا يارووح روحي " عز الله بتنفقع مرارته لو اقابله بها الشكل يبقول عندها طلب " :)


نرجع لصلب الموضوع :)
الصراحه الترحيب شي ضروري ويعجبونى الناس اللي حيين بترحيبهم يعنى حار ترحيبهم ماهم ميتين وهم حيين يعنى باردين بترحيبهم :)حتى اذا جاكم ضيوف وكان ترحيبك حار بهم تحسين انهم ياخذون راحتهم معك لانهم حسوا من ترحيبك انهم مقبولين هم وزيارتهم ..


وحقيقه هنا موضوعك ذكرنى بشي ان البعض في هالزمن مايعلم اولاده كيف يرحب بالضيف ويعزمه يجيك الولد الطول طول النخله ومهبول مايرحب ولا يعرف يحلف على الضيف انه يتقهوى ويتعشى حتى لو ابوه مو موجود :):)

تحياتي
شموخ

[راعي الوقيد]

قلت : هه !! عمي عسى ماشر ماعرفتني !! أنا ريم >>>> جبت العيد وكملت الناقص
افااااااا :):halelah:

هها وبعــــــديــن:)
قال لي وتسن نبرة صوته تغيرت : لو سمحتي إذا جاء فلان قولي له محمد اتصل عليك !!!!!!ههااهههههه

صدز حفاااااااوة حولا .؟.؟!!

الريــــــــم

والله مادري وش اقول ومنين ابدأ ما خليتي لنا مجال الله يسعدتـس:)

بس انتبهــي مرة ثانية تقعيـن بمطفوووووووق .!!:)

تحيتـــــــــي لك والتقـــــديــــــــــر ،،،

والسلااااااااام ...
..

[خالد الشمري]

الرفق مطلوب في كل شي ومن باب اولى محادثه الناس واللين معهم وحسن المنطق معهم ....بارك الله فيت وجزات الله خير

[مجد]

أذكر مرة إتصل صديق أخوي وكان شخص ملتزم ,,
المهم هو قال السلام عليكم من هنا وأنا أستلمه من هنا
قلت له : هلا والله وعليييييييييييييييييييييييييييييييييكم السلام والرحمة ,, ياخي وينك مالك شوفة ,, على شمسك غيوم ,,
قاطعني وقال : فلان فيه ؟؟ (( يبي أخوي ))
قلت : هه !! عمي عسى ماشر ماعرفتني !! أنا ريم >>>> جبت العيد وكملت الناقص
قال لي وتسن نبرة صوته تغيرت : لو سمحتي إذا جاء فلان قولي له محمد اتصل عليك !!!!!!



8
8
₪₪₪ يووووووووه بسم الله عليك وش ذا الحفاوه البايخه هههه!₪₪₪
يالريم ياراعية السواليف
موضوعك كثير حلو ورايق
الحفاوة .. شيء طيب ولكن للي يستاهلها ويقدرها
ولكن أسوأ شيء في الوجود أنك تحتفين بانسان ما يستحق حفاوتك
ذاك الوقت .. وش بيكون شعورك ؟!
لالالالالا ما عندي استعداد ان أضع نفسي بهذا الموضوع
الحفاوة لها أهلها وناسها
أما الحفاوة المفتوحة للكل أنا ضدها
ع فكرة ترا أنا أقولك كذا
ولكن .. ما تتصورين وش كثر أن أحتفي باللى حولي ..
واحتفي بكل الناس ..
والحمد لله ما حصل لي موقف سبب لي ردة فعل عكسية
ولكن أنا اعطيك رأيي بها بموضوعية
وسلالالالالالالالام


اختكم المجد

[سنين]

.


الريم يازينج ويازينك ويا زين مواضيعك
تدرين عاد انا وش اقول لابوي لا دخل علينا
اقوله ..هلاااا ومرحبتين .. شو حلو يخزي العين
ياهو يشق الضحكه الوالد منييييييييه لي مناك

المهم يقول المثل لاقيني ولاتغديني
فالحفاوة في الترحيب تسوى لها جمل
هذا رايي

ودامت مواضيعك الشيقه


سنين

[عبدالرحمن]

هذا وانتي مختصرة الموضوع:puzzled:


ماقل دل وزبدة الهرج نيشان:)


لكل شخص ميزة يمتاز بها عن غيره


وانتي من تتميزين عن الكثير منا


بهذه الروح المرحة


التي بها تزداد فائدة مواضيعك .


اما المداخلة


اعتقد ان الاستقبال شيء مهم


وقد يكون في احيان كثيرة اهم من قضاء


حاجة المحتاج !!


فكيف ان كان هذا الزائر غير محتاج


غير الاستقبال الحسن وبشاشة الوجه.


شكرا اختي الفاضلة الريم على الموضوع .

[الاصمعي]

عاد أبوي ياعميري تسنه تحوم تسبده منا ومن أسلوبنا يقوم يمد الغرض اللي معه تسانه جايبن معه شيء ويطلع لغرفته :)
اسمحيلي أختي الريم مادري ليه هنا كأني أتخيلكم مصارية على سالفة يمد لكم الغرض الي بيده ويطلع لغرفته:)


لكن لو جرب إنه يكون ذرب شوي ويعطي من هالكلام الحلو اللي مايكلف شيء غير تحريك الحنك :) >>> والله ان تحريك الحنك كليف بعد :) >>>خوش ناصحة :)

ويفز ويهلي ويرحب وبدل مايقول هلا حاف ,, يقول هلا والله وغلا >>>> شكلي ناشبتن لهالعضوة مدري ليه :) الظاهر إني فاقدتها ومشتاقة لها :)

ويشق خشته من أقصى اليمين لأقصى اليسار طبعا شق ابتسامة مب شق تكشيرة :)

وش تتوقعون راح تكون ردة فعل الشخص اللي أمامك !!؟
أكيد بيستانس تسان مهو خابر انك تبي منه حاجة,,


لي بنت عم ماوطت درب الأدناس >>>> أفا عسى ماشر !! الظاهر فيوزاتي بدت تلتمس يوم وصلت لنهاية الموضوع :)
لي بنت عم بعده الفكر محتاس<<<أحسبه محاورة:)



المهم أنا الحين قررت أصير مثلها وودي عاد تصيرون مثلي :) عشان أصير قدوة حسنة لكم :)
لكل إمرء من دهره ما تعودا!
ولكن لا بأس من المحاولة لتحسين صيغة السلام وبث روح الحياة فيه وجعله يعطي المعنى الحقيقي له وهو السلام والوئام


ويبيلي عاد أستعد لدورات تدريبية خصوصا إننا مقبلين على مناسبات واجتماعات في هالصيفية ,,
لا يكون ماخذه دوره وجايه تطبقين الي درستيه عندنا:)


ذكرت قصة يوم جيت أرسل الموضوع قلت والله لأقولها حتى لو أحطها بموضوع لحالها :)

اثري سنعة منذو مبطي وأنا ناسية :) يعني عرق هالحفاوة فيني من زمان بس فيه حوالة شوي :)

أذكر مرة إتصل صديق أخوي وكان شخص ملتزم ,,

المهم هو قال السلام عليكم من هنا وأنا أستلمه من هنا :)

قلت له : هلا والله وعليييييييييييييييييييييييييييييييييكم السلام والرحمة ,, ياخي وينك مالك شوفة ,, على شمسك غيوم ,,

قاطعني وقال : فلان فيه ؟؟ (( يبي أخوي :) ))

قلت : هه !! عمي عسى ماشر ماعرفتني !! أنا ريم :) >>>> جبت العيد وكملت الناقص :)

قال لي وتسن نبرة صوته تغيرت :) : لو سمحتي إذا جاء فلان قولي له محمد اتصل عليك !!!!!!

أي والله الحفاوة الحولا وخذي شبيهته من بنت عمٍ لك:)
فيه بنت تسمع أبوه وعمانه ليا ذكر اسم رجال قالوا ونعم ويمكن انهم بعد يلقنون عيالهم الصغار قولة ونعم ، المهم البنت تسبرت وصارت مرة ولا ردت على التلفون وقال المتصل قولي لأبوك فلان يبيه ردت عليه "والله ونعم":)

طبعاً هي كلمة حفاوه حلوة بس استخدامه بغير مكانه أساء لمستخدمها,,

ونختم ردنا ب"والله ونعم" منك ومن موضوعك المفيد جداً,,

تحياتي

[الجازي]

أخي الكريم الاصمعي ,,

المهلي مايولي :)

تصدق عاد انها جازت لي هالحفاوة :) ترفع المعنويات :) >>> وش دعوى معنوياتي طايحة :),,

تسلم على أسبقية الرد وعلى الحفاوة وعلى العودة بعد الحفاوة :) >>>ثلاثة في واحد :)

بنوتة ,,

هاه عاد ,, وش رايتس فيني الحين !!؟ :)

هالموضوع عن شهرين لقدام :) >>>>> هذا وهم مثبتينه :)

يسلمو بنوتة على التثبيت ولو إن الموضوع مايستاهل :) بس من ذوقك يالغالية ,,

وفي انتظار تعليقك ,,

[سلطان الشمري]

الله حيّه ياهلا والله وغلا .. وين ايامك ؟ والله اشتقنا لك

<<<ينقال عنه انه يطبق الحفاوه على ارض الواقع :)

اله يغربل شيطانك الريم ../ تصدقين عاد .. بطبيعتي حتى لو ارد على جوالي

هلا والله وغلا .. دايركت تطلع لو اني اكره الشخص .. هذا .. :(

المهم لي نكسه

[الجازي]

هلا باللي به الخافق يهلي ............ من الفرحة وروحي به تهلي
الى شفته ولو في الصدر ضيقه .......... تفرج كل همي واضمحلي

شوشو ,,

لو ماجانا منتس غير هالبيتين يكفي :)

شفتي وشلون صاير حلو مطلع ردتس يوم بديتيه بهالبيتين :)

تصدقين اني انلخمت احسبهن لي مادريت انتس تبين تعلقين عليها :)

يالله بغمض ولا نيب قاريه اللي بعدها :)


ياهلاااااااااااا وياغلااااا ويامرحبااااااااااااااا يارووح روحي " عز الله بتنفقع مرارته لو اقابله بها الشكل يبقول عندها طلب " :)


لا عاد ياشوشو ,,

فرق بين اللي يهلي من قلب وبين اللي يبي يتمصلح من وراتس :)

يعني روح الحفاوة مفقودة :)


نرجع لصلب الموضوع :)
الصراحه الترحيب شي ضروري ويعجبونى الناس اللي حيين بترحيبهم يعنى حار ترحيبهم ماهم ميتين وهم حيين يعنى باردين بترحيبهم :)حتى اذا جاكم ضيوف وكان ترحيبك حار بهم تحسين انهم ياخذون راحتهم معك لانهم حسوا من ترحيبك انهم مقبولين هم وزيارتهم ..

عين العقل ,, وهذا هو الكلام السليم ,,


وحقيقه هنا موضوعك ذكرنى بشي ان البعض في هالزمن مايعلم اولاده كيف يرحب بالضيف ويعزمه يجيك الولد الطول طول النخله ومهبول مايرحب ولا يعرف يحلف على الضيف انه يتقهوى ويتعشى حتى لو ابوه مو موجود :):)

وهذي هي المصيبة :(

لأني بصراحة اكتشفت ان الدعوى عدوى :) أو تقدرين تقولين وراثية ,,

يعني الأم أو الأبو إذا كانوا يقابلون ضيوفهم بوجه طلق فتأكدي مليون بالمية ان عيالهم بيطلعون مثلهم ,,

أما الأهل اللي الله بالخير فعيالهم الله بالخيرات :)

يعطيك العافية شموخة على هالإضافة الجميلة

[فاصــ بيضاءــلة]

هلا والله تو مانور مضيف الأسرة وانا أقول حنا اقبالية ليل وش السالفة الشمس توه تطلع
واثاري الريم هنيّا ياهلا ومرحب تعالي تعالي عندي خلينني املى عيني بشوفتك..
7
7
7
عسى ماشر..

نبدا بالحوار.. والمناقشة
والله حنا عندنا في العايلة ناس السنتهم تقطر عسل ومرة وحنا على العشا قررنا اننا نصير كلنا زي هالناس وكنت أنا صاحبة القرار..
ولقيت تأييد من الكل وأولهم جدتي وأثناء العشاء قمت بجيب لي غرض من المطبخ يوم رجعت وقابلتني جدتي الله يحفظه بكلمة انا انبطحت بالصالة من الضحك على هالكلمة

قالت: تعالي ياعزيزتي << لغة عربية أصلية

عاد الحين نرجع للحوار مرتن ثانية
اللي ابغى أوضحه ان الترحيب والحفاوة طبع يعني مو بسهولة التصنع لكن لا بأس من المحاولة

[المطنوخ]

بسم الله يالريم متى نزلتي الموضوع؟؟:)

قسم بالله لي رجعه:)

[بـنـت النـور]

هلا والله وغلا ,, هذي والله الساعة المباركة اللي شرفتينا فيها ,,

صدقتي والله ياريم :)
تلاحظين بعضهم ترحيب وحفاوه دائما معهم لمين ماكان والبعض الاخر من طقة : هلا ,, أهلين ,, مرحبا ,, إلخ

بعضهم ممكن الطبع يلعب دور ماادري لكنهم باردين بالترحيب للضيوف
مما يولد الشك بنفوسهم :) اما اذا كان الاستقبال والترحيب حار مثل ماقالت شموخ بيحسون انهم مقبولين :)

ونقطه مهمه جداً جداً ذكرتها شموخ
وهي تعليم الابناء الترحيب بالضيف وهذا شي مهم يغفل عنه الكثير

سلمتِ لطرحك وتنوير مضيف الاسره
دمتي بحفظ الله ورعايته

[محمدالشمري]

اللــــــــــــــــــــه حيـــــــــــــــــــــووووووه

هذه الكلمة الكثير منا أعتاد على سمعها منذ مبطي وما زالت ترادفنا حتى الآن ، وتعلمنا على قولها لكل من يدخل من الباب ،وهي نوع من الحفاوة ، وأن كانت قديمة ولكنها جميله وعفويه .

أختي الكريمة الكلمة الجميلة والحلوة ، وفي مقابلها الكلمة القشرة والسيئه ، وجميعها تخرج بكلفة واحدة ومن لسان وجسد واحد ، ولكن الأولى تجذب من هو في المقابل والثانية تجعله نافر منها .

الحفاوة نوع من أنواع الكرم وشعور من مشاعر الأنسانية واحترامها وعدم تحقيرها ، وهي دائما تسجل لصالح مستخدمها .

لك مني جزيل الشكر والأمتنان على ما تقومين به من تميز في الطرح والأسلوب البعيد عن الحول .
تحياتي

[الجازي]

هلا براعي الوقيد يالله إن تحييه :) >>> تسني جدتي :)

ايه والله ربك ستر ولا طحت بمطفوق ولو ان فشيلتي في هالأجودي عن مية مطفوق :( بس يالله أشوى انه درى اني غلطانة وأحسبه عمي >>>>والا وش ناوية بعد :)

ألف شكر لمرورك أخوي راعي الوقيد ,,

[الجازي]

أخوي خالد فراج الشمري ,,

مثل ماقلت أخوي الرفق مطلوب في كل شيء ,,

واللين مادخل في شيء إلا زانه وما نزع عن شيء إلا شانه كما قال عليه الصلاة والسلام ,,

بارك الله فيك أخوي ,,

[الجازي]

هلا بالغالية مجودة ,,

صدقيني يامجد الحفاوة تعبر عن شخصيتك وما لها علاقة باللي يستاهلها أو مايستاهلها ,,

يعني أهم شيء تكونين بالدرجة الأولى راضية عن نفسك ,,واحترامك راح تفرضينه على الجميع حتى اللي مايستاهلون بطريقة احتفائك بهم ,,

واللي مايستاهل بيطيح وجهه من معاملتك واستقبالك له بالبشاشة والبشر والترحاب ,,

يعني مع الجميع راح تكونين أنت الرابحة :)

مشكورة على المرور والتعليق ,,

[الجازي]

لاقيني ولا تغديني :thumb:

عز الله انك جبتيها ياسنين :)

وعشان أفزع معك بالأمثال خذي هالمثل :

مقابل الجيش ولا مقابل العيش :)

مقابل = لاقيني :) وباقي المثل حطيه على جنب :)

يسلمو سنين على التشريف

[الجازي]

حياك الله أخوي عبدالرحمن ,,


هذا وانتي مختصرة الموضوع

من قال ؟؟

أنا قلت حطوا تحت كلمة اختصار عشرطعش خط ملون لأني ماوراي اختصار :)

اشكرك أخوي على إطرائك اللطيف ومثل ماقلت حسن الاستقبال قد يكون أهم من قضاء حاجة المحتاج ,,

تشرفت بمرورك أخوي عبدالرحمن ,,

[الجازي]

اسمحيلي أختي الريم مادري ليه هنا كأني أتخيلكم مصارية على سالفة يمد لكم الغرض الي بيده ويطلع لغرفته

:) أصدك يعني قايب معاه شوية كفتة على حتتين كنافة !! :)


وخذي شبيهته من بنت عمٍ لك
فيه بنت تسمع أبوه وعمانه ليا ذكر اسم رجال قالوا ونعم ويمكن انهم بعد يلقنون عيالهم الصغار قولة ونعم ، المهم البنت تسبرت وصارت مرة ولا ردت على التلفون وقال المتصل قولي لأبوك فلان يبيه ردت عليه "والله ونعم

هذي بنت العم السنعة ,, أخاف إنها أنا بس :)

يسلمو على العودة أخوي الاصمعي ومشكور على المداخلة ,,

[الجازي]

حياك الله أخوي نبراس ,,

بس ترى (( هلا والله وغلا )) ماتكفي لحالها :) يعني الكلام اللي بعدها هو اللي يثبت اذا كنت تتقن فن الحفاوة ولا لأ :)

مشكور أخوي نبراس على هالتشريف ,,

[الجازي]

فاصلة بيضاء :)

حسبي الله على ابليسك بغيت أصدق :)

ياحبي لجدتك بس ,, سلمي لي عليها وقولي لها ترانا ننتظرها في الفصيح :)

فاصلة ,, اسعدني حضورك الجميل ,, شكرا لك ,,

[الجازي]

بسم الله يالريم متى نزلتي الموضوع؟؟

قبل ماينزل ردك بثلاث أيام :)


قسم بالله لي رجعه

ماودك أدفع عنك كفارة اليمين :)

[الجازي]

الغالية بنت النور ,,

أسعدني جدا مرورك وتعليقك ومداخلتك الجميلة ,,

لك مني فائق الشكر والتقدير ,,

[الجازي]

أخي محمد الشمري ,,

أشكر لك تفضلك بالمرور والتعقيب الرائع ,,

دمت سالماً ,,