المساعد الشخصي الرقمي

مشاهدة النسخة كاملة : كثر الدق يفك اللحام


الجازي
09-05-2005, 22:50
كثر الدق يفك اللحام
^
^
^
هالمثل ياكثر ماأسمعه خصوصا بين الحريم :) وبالأخص المتزوجات :) :)

نمت مرة عند واحد من محارمي :) >>> على بالي مابيكم تعرفون منهو :)

وزوجته الله يجزاها خير كانت متحمسة وحاطتني فوق راسها ,, ويوم جاء العصر قالت وش رايك نروح للسوق ؟؟ قلت عادي براحتك :) هالكلام طبعا على أساس إنها متفقة مع زوجها وموافق :)

بس طلع ظني ماهو في محله :) اثرها توها بتطلب منه يودينا :)

المهم قالت له وحنا على الغداء :) قال : ماله داعي خليها بعدين :)

قالت : لا ودي الحين مادام ان ريم عندنا :) عشان تروح معي :)

قال : لا مايناسبني اليوم خليها يوم ثاني ونمر على ريم عشان تروع معتس :)

قالت : بس اليوم أنسب لنا ومضمون لو أجلناها يمكن ظروف ريم ماتناسبها >>>>ياعمري ياأنا طلعت موضوع الحوار وأنا مالي صوت :)

قال : لا مايخالف مرة ثانية ان شاء الله :) >>> الله من العناد بعد هو :)

قالت : طيب ريم ودها اليوم :)

هنا ماقدرت أتحمل قلت : هيه لا ماودي لاتحطينها فيني ,, خلاص يابنت الناس خليها يوم ثاني ,,

قال : هه هذي ريم تقول خليها يوم ثاني :)

المهم خلصنا من الغداء وجابت الشاهي وهي ناشبتن في حلقه وأنا طاح وجهي عنده بيحسب الفكرة فكرتي :)

المهم الرجال لبس ثوبه بيطلع وهي وراه كنها ظله :) وتكفى ودنا ,, الله يخليك على الطريق ,, جعلك في الجنة فرصة اليوم ووووووووووووووو إلخ ,,لين ما صك الباب في وجهها :)

بصراحة حامت تسبدي :) قلت لها : تصدقين عاد اني كنت متوقعة في أي لحظة انه يعطيتس طراق معتبر على كثر حنتس ورنتس :)

قالت : عاد وش رايتس اننا كل يوم على هالحالة :)

قلت : منتب صاحية !! ياشيخة ماتحوم تسبدتس من هالطريقة ؟؟

قالت : لو حامت تسبدي تسان مافيه أمل تشوفيني طالعة من البيت ولا حتى شبر ,, ياحبيبتي الرجال ماينفع معهم إلا كذا ,, والا أبشري بالتطنيش والقعدة لحالتس في البيت :)

قلت لها : بس ماتتقرفين من نفستس وانتي ناشبتن له في حلقه :) ياشيخة يكفيني اذا قال (( لأ )) خلاص ماله داعي أحرج نفسي وأنا عارفة انه رافض :)

قالت : ياحليلتس ,,(( لأ )) هذي لازم يقولونها حتى لو كانوا موافقين :) يعني تقدرين تعتبرينها مثل (( الو )) للتلفون :) >>>> الله من زين التشبيه بعد :)

وبعدين كثر الدق يفك اللحام :) يعني حتى لو كان رافض مع كثر الطلب والحنّة والرنّة :) يلين ويوافق :)

قلت والله مايلين الا بيفتك من الصجة المسكين :)

معقولة كل الرجال كذا مايمشون الا بهالأسلوب :)

أذكر وحدة تقول : أول ماتزوجت على بالي مؤدبة إذا قلت له توديني للمشوار الفلاني وقال لي(( لأ ))خلاص ما أطلب منه مرة ثانية ,, المهم مع كثر اللأآآآآآآآآآآت تقول جاء ذاك اليوم وطلبت منه يوديني عند أهلي لأن عمومتها متجمعين وهيصة وزنبليطة :) طبعا كالعادة قال(( لأ )),, وطلع :(

يوم رجع آخر الليل قالت له : حرام عليك وش استفدت الحين انت انبسطت وسهرت برا وأنا انحرمت من اجتماع أهلي وسعة الصدر والوناسة ,, وش قال هالمملوح :) قال : لو انك حريصة كان ألحّيتي !!!

يقطع ابو القهر :(

بصراحة ,, عالم غريب :)

وش رايكم أنتم بهالنظرية يامعشر الرجال :) ,,خلوكم واقعيين وصريحين :) ترى مافيها شيء الاعتراف بالحق فضيلة :)
منيره
10-05-2005, 05:00
ما ألومه اذا تزوج عليها

أنا لو محله كفختها وبردت قلبي هاهاها

تبين الجد الحريم سبب رئيسي لأمراض القلب وانسداد الشرايين والزهايمر وهشاشة العظام هاهاهاها
المهرة
10-05-2005, 13:30
والله يالغلا 00
الحريم اجناس 00 وانتِ قلتي وش رايكم يارقاله ههههههههههه
وانا قررت ارد ههههههههه
والله الرجل بزعمي مثل الطفل كل شئ بالطيب يمشي وليس بالعفرته
يعني على رأي زوجة اخوي كلمتين حلوه تلين عقل الرجال
وتشاااااااااااااااو
عبدالعزيز
10-05-2005, 14:08
اوي والله دبلة تسبد ياداقكن الدقّاق قولن آمين
واما موقفنا يامعشر الاشناب من هالحاجة دايماً نواجهه بقولة "بسسسسسسس" من اول مايتكرر الالحاح فان نفع فها يعني ان الرجال يمشي على خطى ثابته ولاهو خيخة :puzzled:
اجوديه
10-05-2005, 17:57
مااااقووول غيررر الله يعينه ويصبررره على بلاواااه

بصررراااحه كثرت الحنه تقصررر العمررر:)

وبعدين مااعتقد الرجااال يجووون بهالطررريقه :)تقدر هي بكل بساااطه تسوووي اللي بررراااسهاا بصورة تخليه يعتقد ان هووو صاااحب القرار في الاخير الرجل هو عبااارة عن طفل كبير مع احترررااامي لجميع الرجاال وهذا لايعني تقليل من شأنهم او استخفااف بعقولهم بس المرأة الجيدة هي اللي تقدر تأخذ من رجلهااا اللي تبيه من دووون ان تحسسه انهااا تبي الحاااجه ذي

مشكووورة أختي الريم على طرررحك لهذا الموووضوووع الرائع:)
ابو غازي
10-05-2005, 18:30
اوي والله دبلة تسبد ياداقكن الدقّاق قولن آمين
واما موقفنا يامعشر الاشناب من هالحاجة دايماً نواجهه بقولة "بسسسسسسس" من اول مايتكرر الالحاح فان نفع فها يعني ان الرجال يمشي على خطى ثابته ولاهو خيخة :puzzled:


لاتخاف يالبنيوات n) ترن هالي فوق :wavey: حنين ورقيق:) حس بعد :p:

كشخه :eek:
ريم شمر
10-05-2005, 19:24
كثر الدق يفك اللحام صــــح

تاليتها بينفك اللحام وتتطلق هالمزيونه :)

شوفي ريومه

هو من ناحيه ان الرجال يبدأ بكلمه لا

هذي معروفه وشي اساسي من تكوين الرجل
لانها حركه من حركات ارضاء غروره

مستحيييييييييييل ان يكون رده الاول
لاي طلب بكلمه ابشري والا من عيوني
والا اي كلمه تعني القبول الا في بدايه الزواج
اما بعدين فيامالتس من اللاءااااات


بس الخبله هذي مع كامل احترامي

تستخدم طريقه قديمه جدا للحصول على

ماتريده بكثرة الحن والزن وملاحقته الين يصك الباب
بوجهها :)

كلنا نعلم ان اللاء الاولى غالبا ليست نهائيه

وانه لم يقلها عن اقتناع

وانه غالبا ينتظر النقاش

لذلك فعلى المرأه ان تجهز اسلحتها للمواجهه

حسب مايناسب شخصية ( صاحب الفخامه )

ان كان طيب وحنون او عصبي او رومنسي

او شاعر او انسان عملي واقعي

واما التفاصيل فلا اريد فضح المزيد من اسرار المرأه :wink_2:

لكن المهم في كل هذا الاحتراااااام

والمهم ايضا التمييز بين (لا) النهائيه و(لا) القابله للتراجع

ف(لا )التي يقولها وهو يعني فيها (لا )بشكل نهائي

يجب ان تنصاع المرأه وتتوقف عن اي محاوله

ويجب ان يكون الرد ( سم وابشر ) حتى ولو لم تقتنع

فليس هناك اجمل ولاالذ طعما من شعور الرضى

الذي يعقب طاعة الزوج والانصياع لرغبته

حسب ماوجهنا اليه ديننا وسنة نبينا


الريم دائما رائعه بمواضيعك العفويه

التي تلامس اغلب الامور المهمه في حياتنا

تسلمين ياقلبي

بس بيني وبينك اغسلي يدينك من سالفة

ان يرد عليك رجل بكل صراحه ووضوح

لايستطيع ابدا ان يعاكس طبيعته :thumb:
بـنـت النـور
10-05-2005, 19:32
8
8

ماراح ازيد على كلام ريم شمر
اوافقها الرأي بكل اللي قالته

والشكر للريم
موضوع جميل

دمتي بخير
هايس الشمري
10-05-2005, 19:43
خخخخخ


يا حليلكن







المهم

انا اقول احيانا لا لاهلي

علشان بعدين اذا وافقت املي شروطي تبون ولا ما فيه :)



سلاااااااااام
راعي الوقيد
13-05-2005, 09:40
وانا قررت ارد ههههههههه
والله الرجل بزعمي مثل الطفل كل شئ بالطيب يمشي وليس بالعفرته
يعني على رأي زوجة اخوي كلمتين حلوه تلين عقل الرجال

والله متفائلة < اخت متفائــل:)

وهي ناشبتن في حلقه وأنا طاح وجهي عنده
:p:
يا ملاا البعـد لزقه

تسان آخذته من حلقه وحاطته بوجهتس:a:

اوي والله دبلة تسبد ياداقكن الدقّاق قولن آمين
واما موقفنا يامعشر الاشناب من هالحاجة دايماً نواجهه بقولة "بسسسسسسس" من اول مايتكرر الالحاح فان نفع فها يعني ان الرجال يمشي على خطى ثابته ولاهو خيخة
واهاا عااد:(
الجازي
13-05-2005, 14:44
ما ألومه اذا تزوج عليها

أنا لو محله كفختها وبردت قلبي هاهاها

تبين الجد الحريم سبب رئيسي لأمراض القلب وانسداد الشرايين والزهايمر وهشاشة العظام هاهاهاها

هلا والله بمنيرة ,,

طيب لاتلومينه اذا أعرس ,, بس ماتتوقعين انه يستاهل اللوم على لاْْْءءءءءءءءاته :)

يسلمو منوري على هالفزعة المقلوبة :)
الجازي
13-05-2005, 14:49
والله يالغلا 00
الحريم اجناس 00 وانتِ قلتي وش رايكم يارقاله ههههههههههه
وانا قررت ارد ههههههههه
والله الرجل بزعمي مثل الطفل كل شئ بالطيب يمشي وليس بالعفرته
يعني على رأي زوجة اخوي كلمتين حلوه تلين عقل الرجال
وتشاااااااااااااااو

أهلين بالمهرة ,,

أنا من رايي تاخذين دروس خصوصية عند مرت أخوتس :) شكلها سنعة :)

بس يالمهرة تتوقعين فيه رجال مايمشي معهم إلا هالأسلوب ؟؟ مثل ماقالت اللي في القصة :) أو هي ماعرفت تتعامل معه ؟؟
الجازي
13-05-2005, 15:00
اوي والله دبلة تسبد ياداقكن الدقّاق قولن آمين
واما موقفنا يامعشر الاشناب من هالحاجة دايماً نواجهه بقولة "بسسسسسسس" من اول مايتكرر الالحاح فان نفع فها يعني ان الرجال يمشي على خطى ثابته ولاهو خيخة

هلا بعبدالعزيز ,,

بالله منين لك هالرقة ؟؟ :)

أجل اذا قلت بسسسسس فهذا يعني انك تسير على خطة ثابتة :) لا والله أجل أبشر بالعثرات وأنا أختك ,, هالحين ماعاد تنفع قولة بسسسسسس ,, إن كانها بثرة فهي بتصجك وتستمر في إلحاحها :)

وإن كانها سنعة ورقيقة فهي بتزعل عليك أنت وردك هالرقيق :)

أقول ,, سلم لي على خطاك الثابتة :)
الجازي
13-05-2005, 15:04
مااااقووول غيررر الله يعينه ويصبررره على بلاواااه

بصررراااحه كثرت الحنه تقصررر العمررر

وبعدين مااعتقد الرجااال يجووون بهالطررريقه تقدر هي بكل بساااطه تسوووي اللي بررراااسهاا بصورة تخليه يعتقد ان هووو صاااحب القرار في الاخير الرجل هو عبااارة عن طفل كبير مع احترررااامي لجميع الرجاال وهذا لايعني تقليل من شأنهم او استخفااف بعقولهم بس المرأة الجيدة هي اللي تقدر تأخذ من رجلهااا اللي تبيه من دووون ان تحسسه انهااا تبي الحاااجه ذي


الأجودية ,,

كلامك رائع ,,

لكن للأسف نسبة قليلة اللي تطبقه ,,

يسلمو يالغالية على هالرد المتميز
الجازي
13-05-2005, 15:07
حيّ الله خالي ابو غازي ,,

ماهي غريبة عليك تدافع عن عبدالعزيز :)

بس ليتك أعطيتنا رايك من واقع خبرتك وتجربتك ,, وأنت عارف ان لك وزنك بيننا ,,
الجازي
13-05-2005, 15:23
كثر الدق يفك اللحام صــــح

تاليتها بينفك اللحام وتتطلق هالمزيونه :)

شوفي ريومه

هو من ناحيه ان الرجال يبدأ بكلمه لا

هذي معروفه وشي اساسي من تكوين الرجل
لانها حركه من حركات ارضاء غروره


صح ,, وعلى قولة الذيب لإملاء شروطه :)




كلنا نعلم ان اللاء الاولى غالبا ليست نهائيه

وانه لم يقلها عن اقتناع

وانه غالبا ينتظر النقاش

لذلك فعلى المرأه ان تجهز اسلحتها للمواجهه

حسب مايناسب شخصية ( صاحب الفخامه )

ان كان طيب وحنون او عصبي او رومنسي

او شاعر او انسان عملي واقعي

واما التفاصيل فلا اريد فضح المزيد من اسرار المرأه :wink_2:



يعني الأسلحة لابد منها :)

بعدي والله ريوم ,, هذا الكلام السنع ,, فرصة نتثقف ونثقف باقي الصبايا في المضايف :)

أما اسرار حوا :) فحتى لو فضحتيها ,, التنفيذ مايقدر عليه إلا المرأة :)



لكن المهم في كل هذا الاحتراااااام

والمهم ايضا التمييز بين (لا) النهائيه و(لا) القابله للتراجع

ف(لا )التي يقولها وهو يعني فيها (لا )بشكل نهائي

يجب ان تنصاع المرأه وتتوقف عن اي محاوله

ويجب ان يكون الرد ( سم وابشر ) حتى ولو لم تقتنع

فليس هناك اجمل ولاالذ طعما من شعور الرضى

الذي يعقب طاعة الزوج والانصياع لرغبته

حسب ماوجهنا اليه ديننا وسنة نبينا



كلام يكتب بماء الذهب ,,



الريم دائما رائعه بمواضيعك العفويه

التي تلامس اغلب الامور المهمه في حياتنا



أقول الله يخلي لي الزوالة :) ماجت العفوية الا بسببها :) والا والله الود ودي إني اذا كتبت موضوع يطلع متكتك ومهندس مثل مواضيعتس ومواضيع باقي الصبايا :) بس الزوالة شينة :)




بس بيني وبينك اغسلي يدينك من سالفة

ان يرد عليك رجل بكل صراحه ووضوح

لايستطيع ابدا ان يعاكس طبيعته :thumb:





ماتدرين يمكن يهدي الله واحدن منهم :) ويجيتس يعترف في لحظة تجلّي :)
الجازي
13-05-2005, 15:32
الغالية بنت النور ,,

موافقتك لريم شمر ,, دليل على أنك فتاة ناضجة وعاقلة :) >>> تسني أمتس هنا والا لأ ؟؟ :)

يسلمو بنوتة عالمرور,,
الجازي
13-05-2005, 15:35
أهلين بالذيب ,,

الحين طلعتوا على حقيقتكم :)

أجل ماتوافق الا بعد ماتتشرط عليهم :)

الله يذكر أخوي بالخير ,, اذا طلبت منه شيء ,, قال لي :: بس بشرط تكتبين لي البحث :) أو تلخصين لي الكتاب الفلاني :)

يقطع ابو المصالح ياشيخ :)
الجازي
13-05-2005, 15:40
هلا براعي الوقيد ,,

أشوفك ماقضّبتنا علم :)

ماسكن في هالردود تعلق عليها ولا أخذنا منك حق ولا باطل :)

الا وش الطريقة المثالية في نظرك للطلب من الرجل ؟؟ :)
سلمان النبهان
13-05-2005, 16:31
اهلين بالريم موضوع حلو يناقش امر احلى ...
وهو قبول ورفض اوامر صاحبة الفخامة (( الزوجة ))
وطريقة الامتثال لاوامرها المطاعة طبعا ...
ووجهة نظري الشخصية لو دققا النظر للحياة الزوجية
لوجدنا ان الرجل المسكين هو عبارة عن منفذ طلبات
ومطيع جيد لصاحبة الفخامة وقد يمضي عمره كله جاهدا
في سبيل ارضاءها دون ان يتحقق طلبه ...
وحقيقة الامر ان تلك المخلوقة المتسلطه هي من يقرر الجواب وليس هو
فهي من تستطيع ان تجعله يقول ..لا .. وايضا تستطيع ان تجعله يقول ..نعم
فكثيرا من الرجال المساكين يمضى عمره وهو تحت الامر والسمع والطاعة
وقليل او لايوجد تقريبا من يستطيع الفكك من تسلطها ...
رغم الكلام الكثير عن بطولات وهمية لهم ( مساكين )
بس اعجبني مشهد النقاش على الغداء وهم يتناقشون
والنقاش حامي وانتِ اخذتي فرصتك طايحه اكل طبعا
عموما صحه وعافيه الريم على قلبكِ وجبة الغداء وشكرا على طرح الموضوع ..
الجازي
14-05-2005, 20:01
^
^
^
تراني حبيبة على طول أصدّق :)

أجل أنتم مساكين !!؟؟

لكن قالتها ريومة :) مافيه أمل يطلع واحد منكم ويقول الحقيقة المرة :)

أما سالفة إني أخذت فرصتي وطحت بالأكل ,, لا والله :( الا انسدت نفسي :) خصوصا لما صرت طرف في القضية وأنا مظلومة :)

يعطيك العافية عمو سلمان ,,
المطنوخ
17-05-2005, 12:22
ليا اعرست ارد عليتس

هالحين اخاف اقول شي وليا اعرست اجيب العيد :)
خالد الشمري
17-05-2005, 16:00
الاخت الريم بارك الله فيت
الجازي
18-05-2005, 11:22
ليا اعرست ارد عليتس

هالحين اخاف اقول شي وليا اعرست اجيب العيد :)

^
^
^
أنا من رايي تعلمنا هالحين أحسن ,, على الأقل تقدر تتميلح وتسوي لي فيها سي السيد :)

لكن الخوفة باتسر لو أعرست وجبت العيد ماعاد يمديك لاتنصّب علينا ,,وصعبة انك تسكت بعد لأن سكوتك دليل على إنك جايب العيد فعلا :)

بعدين هالسؤال ماهو خاص للمتزوجين ,, يعني عطنا انطباعك حتى مع أهلك مثل الذيب :)
الجازي
18-05-2005, 11:28
وبارك الله فيك أخوي خالد ,,
شنقل
18-05-2005, 14:54
مايبغالها حلها بسيييييييييط

لاتقول ايه ولاتقول:)

قل ان شاء الله اشوف
يكون خير

ومتى مادقت براسك قل مشينا:)
الشمري محمد فهد
18-05-2005, 17:36
\/
|

بتنشب بحلقك لين تخليها تدق براسك غصبن عليك http://www.shmmr.net/vb/images/smilies/tongue.gif

تدري عاد :g:

أنا إن قلت لا يعني لا :angry2:

<<--- حمش و ما عنده تفاهم .. :590r:

عاد يفهمونها أهلي و يزيدون ( دهن السير :d: ) <<--- ما عمري وديتهم ببلاش :mf_gap:

وشكل حتى المسز عويصف ما راح تسلم بعد :)

تشكرات خالة http://www.shmmr.net/vb/images/icons/icon7.gif

إلا ما تبيني أوديك يمين يسار :puzzled:

ترا بعطيك خصم :thumb:

بس البنزين عليك http://www.shmmr.net/vb/images/icons/icon11.gif

<<--- Broke و في رواية لتشارلز دكنز : لا يملك شروى نقير .. http://www.shmmr.net/vb/images/icons/icon9.gif

[لوحة15] Peace [/لوحة15]
الجازي
21-05-2005, 16:42
[لوحة12]مايبغالها حلها بسيييييييييط

لاتقول ايه ولاتقول

قل ان شاء الله اشوف
يكون خير

ومتى مادقت براسك قل مشينا [/لوحة12]

والله شكلك عايش في ديرتن لحالك :)

الحين ناوي تقول لهم ان شاء الله يكون خير وتبيهم ينتظرونك :)

هم ماراح يخلونها لما تدق براسك :) بيدقونها فيه غصب :)

ياحليلك اثرك منت يم الدنيا :)
الجازي
21-05-2005, 16:49
والله ودي أشوف مسز عويصف :) أحس انها بتبرد قلوب أهلك منك :)

أنا مابي منك مشاوير وانا خالتك ,, أبي الوعد اللي شكلي بكتبه في وصيتي عشان يطالبونك به الورثة :) >>> شكلهم مب وارثين غيره :)