تصحيـــــــح معلومه

[مشــــعل]

يالله حيهم

اخواني يمكن تكون المعلومه هذي موجوده عند اغلبكم
لكن حنا قلنا خل نجيبه للي مايعرفه

هذا سلمكم الله شايب عتيبي سيّر على واحدٍ من الربع بحايل
المهم سوولوه عشاء
حضرت انا العشاء وبدا العتيبي يسولف من ضمن ماجاب سالفة "جدعة محسن الفرم"
وقال ان اللي جدعه مطني بن شريم
انا استحيت اغالطه علشان انه رجال اكبر مني وخليت السالفه بوجهه
والمعلومه ماشيه مع عدد كبير من الناس

والصحيح ياخوان ان اللي جدع محسن الفرم من شمر هو "ضاري بن طواله"
والفين نعم بمطني لكن السالفه ماهي له

ومطني طبعا هو مطني بن العاصي بن شريم من عبده من شمر
يقولون بأحد معارك الملك عبد العزيز مع شمر لاحظ الملك عبد العزيز فارس من شمر
يقولون يامنه رد على القوم نصفهم نصين ويجدع هذا ويصوب هذا
يوم نشد عنه الملك عبد العزيز قالوا هذا مطني بن شريم
ويوم زانت الامور راح الملك وخطب اخت مطني اللي هي فهده بنت العاصي بن شريم
وانجبت ولي العهد

المهم نرجع لسالفة ضاري
"يقولون غزا محسن الفرم ومن معه من ربعه على عربان متفرقه من شمر وهو ياخذهم
ويقفي بحلالهم يقولون يوم جاء من باكر ياهذا المرسول يوم لفى على محسن
قال محسن وش عندك قال المرسول انا ارسلن ضاري ويوصي لك يقول "لاتاسم" الابل
شمر يبونه>>>>وهذي معناته تحدي لمحسن

المهم جاء عقبه بفتره ونوى محسن المغزى قالوا ربعه من تبي قال محسن ابي شمر
عندهم هالوضح اللي تقل ضباء
قال واحدن من ربعه ياخو حسناء نزلوا ورانا عرب والظاهر انهم من شمر
ويغزون عليهم ويوم وصلو الحلال ياهذولاك الفرسان يوم طلعوا عليهم
وتصير عركه دون الحلال وينكسر محسن الفرم وحرب
ويرجعون لبيوتهم يوم فطنوا يمار الفريس لحقوهم وتصير عركة ثانيه عند بيوت حرب
يامار مع فرسان شمر واحدن متلطم وراكب على حصان اسود
وهو يرثع بفريس حرب
وهي تصيح اكا المره من حريم حرب طول حسه "عليكم براعي الاسود"
وهو ينتخي محسن الفرم وانا شريدة الفرسان اخو حسناء وهو ينطح الفارس
يامار هذا ضاري قال محسن انت ضاري قال ضاري وصلت على خير
ويصير بينهم اكا الطراد وهو يجدعه ضاري
قال ضاري :"مانت للموت يافريمان">>>وهذي من شيمة العرب يوم الطيب يشح على الطيب بالموت وهي مشابهه لفعلة عدوان بن طواله بعقاب العواجي يوم جدعه شح عليه بالموت

وللمعلوميه "راعي الاسود" هي من القاب ضاري

الله يرحم محسن الفرم وضاري بن طواله سطروا من الامجاد ماتفخر به قبيلتيهما
والله يرحم الامير الفارس مطني بن شريم

تقبلوا تحيات اخوكم

[عيوووون باااكيه]

الله يرحمهم ويرحم اموووات المسلمين

ويعطيك الف عاافيه اخوي مشعل

على المعلووومه

وتسلم مليووون


ولاااهنت

[خالد الشمري]

الحمدلله على السلامه ياولد العم وبارك الله فيك والله يعطيك العافيه على ماذكرت والصحيح ماقلته اخوي مشعل وليت كل غيبه بسالفه

[راعي الوقيد]

هلا والله وغلا بك اخوي مشعل

معلومة دسمة ومثمنة

وتسسسسسلم لا عدمنا هالحضور المميز

لك التحية اخوي

والسلاااااام ...
..

[خلف الرويتع]

اخوي مشعل تسلم على هذا الايضاح

مشاركاتك دئماً رائعه ومفيده والتصحيح مطلوب هذا تاريخ وامانه يجب ان توضح مالديك من معلومات وتتقبل اي نقد او تصحيح من شخص اخرى حتى لو اختلفت معه يضل هناك حق احترام واجه انظر الاخرى

تقبل تحياتي واعجابي

[عايدالشمري]

اخوي/ مشعل

مشكور على المعلومات الطيبه

ويعطيك العافيه 0000 وماقصرت

[الصيرمي]

قبل كل حاجه

اخوي عايد مررحبابك عند اخونا مشعل

الله يسلمك البيتين الي بتوقيعك ممكن نتشرف بقرايه القصيده كامله ولمين هيا:)
ومشكووووور
------

معليش مشعل دخلنا بمشاركتك زي ماتقول كدا طول وبلعرض ههههه

سامح ياسيدي:)

ومعلوماتك جدا مفيده ليا ومين هو مثل حالتي

مشكور على المعلومات الطيبه

ويعطيك العافيه 0000 وماقصرت

ههههههه

[مشــــعل]

اختي عيون باكيه

ياعل مايبكن هالعيون

لاخلا ولاعدم

[مشــــعل]

الله يسلمك يابو فراج

وشرفتنا بمرورك

لاهنت يالطيب

[مشــــعل]

هلابك ياراعي الوقيد

ونستنا بمرورك

وشرفتنا بشهادتك

لاهنت

[مشــــعل]

تسلم ياخلف

وماقلت هو عين الصواب

يعطيك الف عافيه

[مشــــعل]

ومن قال يتعافى ياعايد

لاهنت على هالمرور

[مشــــعل]

تسلم يالصيرمي

يعطيك العافيه

لاهنت

[هايس الشمري]

مشعل


تسلم والله

و كل من ذكرتهم سطر لهم التاريخ امجادا


و نطالبك بامثال هذه القصص

اخوك


الذيب

[المهرة]

الله يرحم جميع موتى المسلمين
وكلمة شكر لاتوفيك حقك 00 في نقل الابداع
سلمت الانامل 00 وماقصرت
دمت بخير
اختك 00 المهرة

[حمد العطوني]

بسم الله الرحمن الرحيم
اخواني الاعزاء جميعاً
اولاً: كما تعلمون ان شمر قبيله لها تاريخ عريق
ويجب الاهتمام به علماً بانني من المهتمين في ذلك
والهدف هو التوصل الى الحقايق وليس لاهداف اخرى الذي لايستفيد منها الانسان غير النقص ويجب على أي شخص يختلف مع الاخرين ان يستمر في النقاش لاجل التوصل الى الحقايق ان كان المتحدث عاقل فهذا هو الهدف.

ثانياً : عن ما اورده الاخ مشعل عن الذي جدع محسن الفرم من شمر ويقول هو "ضاري بن طواله"
ليس مطني بن شريم اخي مشعل والنعم بكل هؤلا , اما الذي خذا الشويطات ابل محسن الفرم
وهو مطني بن العاصي ابن شريم ولوتسال أي واحد من بني علي قبل شمرعن الذي اخذ شويطات قالو لك مطني ابن شريم , اما ضاري ونعمين في اخو صلفة وهذا شي يخفى علينا ورب مايكون صحيح او خطا,
امامن الموكد ان الذي جدع محسن الفرم وذبح فرسه
واعتقه من القتل وهو سند الربع من افرس فرسان شمر المذكورين بدون مبالغة والقصة رواها لي شخص شمري ولايزال على قيد الحياه يقول سيرت على محسن الفرم وسالني عن سند الربع وقال هل صار له عيال وقلت لم ينجب غير بنت وقام يتوجد عليه ويمدحه ويقول صاحب الرواية انني قلت وانت ياخو حسنا منت من دونه قال لايابناخي سند مهو بسيط فيه سنة من السنين معي بني علي ونازلين شمال الصمان
ونزل علينا راعي بيت وعرفنا بنيت بيته انه شمري وارسلت يمه علي قلت علمه نبي نرد على الخبرا ويقول يوم اقبل عليه علي لمار تمشط قرونه زوجته يقول قام وتلقا علي و قال اقلط
وقال مني قالط انامرسلني عليك محسن الفرم
نبي نرد على الخبرا ونبيك ترد معنا وقال سند بلغنا العلم ورجع المرسال واخبرني وردنا وهو ماورد
وعند ماصدرنا لهذا هو عقبنا على الخبرا وراد يقول معهم بنت راكبه على الجمل الي عليه اروي
يقول يارقبته تقل رقبت عنود ويقول محسن يوم شفته ورد رجعت انا وعلي وقمنا نراقبه من بعيد
كله خوفاً من مطير وعند ماوصل الى الخبرا وقامت البنت تروي الروي وهن على ظهر الجمل معه قربه و تاخذ الماء بالقربه وتصبه من راويه الى الاخرى وقبل يخلصون وتغير عليه مطير على خيل وتاخذ الابل وتبقى البنت على وقفته ويقول محسن نمره وهي على وقفته وعرضنا عنده ولاترد علينا يقول يهذا سند توه يلحق من البيت خيال ودعيناه نبي نلاوح القوم ولاشك مارد علينا ويقول محسن من شفت رجله لاهذي رجل الفارس يقول ويفكهن ويجيب عشر قلايع من الخيل ويرجع أبله على الخبرى وتشرب وتروي البنت رويه ونصدر حناوياه ويقول ارسلت علي يم هلنا يجهزون العشا وقال سند يامحسن لاتعطلني هلي مطرفين وانااخاف على نياقي وقلتله نرسل الى نياقك حماية حتى تعشاء وخيله القلايع معه و فعلاً بعد صلاة المغرب قدمنا بالعشاء وعند ماتعشاء قام يم الخيل وتخير منهن وحده والباقيات قال لكم يابني علي وتقوم بني علي واحد ركب على الثاني يبون الخيل ويقول بعد ايام خطبت البنت وعطانياه وهي تسمع الكلام وقالت يامحسن يااخو حسنا سند عطاك و انا مالي غير الله ثم سند وانا محيريني الربعة
وذالتهم يذبحون سند وقلت الله لايجيب الساعةالذي يذبح به سند وبعد هذا راح سند الى ديار شمر
وكما قال ايضا فيه سنة من السنين كنا في الربيع
وكان الموالين لنا من شمر التومان والاسلم من شمر وعند تالي الربيع اقفو شمر يم ديارهم
وتفقنا ان نغزيهم وفعلاً الحقناهم وهم رحيل وكان السلف قدام المظاهير والدبش ورا المظاهير وخذينا الحلال وانهزمنا وصار مسهمي انا وعلي ابل سند الربع وعند ما عرفنا وسم سند عرفنا اننا وقعنا بلشة
وحنا نقطع طريق قومنا وننهزم وحدنا وعند مالحقت
فزوع شمر معه سند ولم يجد نياقه ورجع يدور الجرة وجد جرتنا واتى ورانا وعند مالحقنا قلت ياعلي اطرد له لاجل يتبعك وانااريد اتقفاه وجنب علي ولحقني وطلعت من الابل وانهزمت ولحقني وكل ما ياقف على الركابات تهفي الفرس وعند التالي زرقني بالشلفا واصاب الفرس وطحت اناوالفرس وعند ماطحت عرفني وقال ليه يامحسن غداجداك تخذ نياقي وقلت هذا الي صار وخلاني و رجع الى علي مع الابل وذبحه ورجع سند الربع في نياقه هذا ماشهدبه محسن الفرم نفسه رحمهم الله جميعاً

[مشــــعل]

ومن قال يسلم يالذيب

ويعطيك الف عافيه

[مشــــعل]

اختي المهره

يعطيك العافيه

وشاكر مرورك

[مشــــعل]

الاخ عبيد العطوني

حياك الله
ومرور شخص بمقامك العلمي شرف لي

وزي ماتعرف السوالف هذي ماحضرناه ولاعلينا الا نسمع اللي اكبر منا
اما جدعة محسن والفين نعم بسند الربع ولاهي غريبه عليه كانه له

اما السالفه سألت عنه اكثر من شخص
واكدوا لي انه ضاري بن طواله
و احد الشيبان اللي سولفه علينا هو حربي ويمكن اتكون غريبه عليك
انه يقول:
ان ابوي وابن مساعد وواحدن من عتيبه زاروا محسن ببيته
ومن ضمن السوالف انشدوه قالوا عمرك خفت ياخوحسنا
قال ابي اقولكم هالسالفه واحكمو عليه خوف ولا لا
وذكر السالفه السابقه والله اعلم
مع العلم اني مانشدت لاواحد ولا اثنيين اكثر من شخص اللي سألت


بالنسبه لسالفة محسن الفرم واخت سند
سمعته براويه تختلف جدا

اختصارا
"يقولون يوم تقاصروا محسن الفرم وسند الربع سير محسن يبي سند الربع
يامار سند ماهو بهذا
واثناء زيارة محسن لقوم سند اغارة القوم على حلال سند وتاخذه
يامار اخت سند تراعي وهو ينتخي قدامه محسن ويرد على القوم ويعجز يرد الحلال
يقولون وينكس لاخت سند
ويامنه اقبل عليه قال:لعيناك
وهي ترد عليه االبنت قالت:"يجيهن راعيهن"

وعلى هالشكل اكثر من مره
ينكس يمه ويقول له لعيناك وتقول يجيهن راعيهن تقصد سند
ياما جاء سند ورجع الحلال

والله اعلــــــــــــــم

[حمد العطوني]

الاخ العزيز مشعل

ا ما عن ما تكلمنا به فهو شي ثابت


اولاً : شويطات جميع شمر تعرفهن واخذهن مطني بن شريم وهي بالاصل لمحسن الفرن

ثانياً: الذي جدع محسن الفرم وذبح فرسه وهو سند الربع

والكلام عن محسن الفرم نفسه ليس قول يقولونه والذي روى هذي

القصه على قيد الحياة الان

واكتفي بالرد السابق

[الوطني]

أخ مشعل

دامك أستحيت لا ترد على الشايب العتيبي و أنت أصغر منه سن
أحترام و تقدير منك

شيبان شمر يا البناخي أحق أنك تستحي منه و أحق أنك تقدره

ياليتكم يالربع عطيتونا من شواهد السوالف (القصيد) و دمتم سالمين

[مشــــعل]

ابو عبيد

يعطيك العافيه
الشويطات ماجبت له طريا
ونعم بمطني وعزالله يفعله

اما سالفة محسن
انا اكتفي باللي قلته بعد

والله اعلم

[مشــــعل]

الوطني
يالغالي

بالنسبه للعتيبي اي بالله قدرناه واحترمناه
وشيبان شمر لهم اكثر تقدير واحترام

لكن انا مادري منهم الشيبان اللي ماحترمتهم
كانك تقصد الا خ ابو عبيد
تقديره محفوظ

ولااظن ان مخالفة الراي تعتبر قلة احترام

[النمر ..]

أخواني / السلام عليكم

القصه ماهي غبيه

وسمعت أن جدعت محسن هي لضاري بن طواله

والسالفه كالتالي كما روها شيبانا

أنه في مجلس الملك عبدالعزيز وكان النقاش

حول فرسان الجزيره

التفت الملك ممازحا" لمحسن الفرم قائلا" : ـ

أخو حسناء محسن الفرم ( أسألك بالله مابعد ذليت )

قال :ـ ياعبدالعزيز لا سألتني بالله

هذا يومن من الايام غرنا على أبل وخذيناها

ماثار عندها بندق وعليها وسم شمر

وطردنا عنها رعيانها وقفينا عليها.

وكل ما خذيت التفت (أبحر) اطالع لحق أحد

يطلب البل ولا ما لحق أحد

و أصيح على الجماعه اللي معي لاشفتوا طلابه علموني.

يقول والله ما حلمت وعلمت الا يقول واحدن

من الربع اللي معي نظره طيب

يامحسن لحق راعي حصان أسود

يقول هو قاله والا ما قاله ياعبدالعزيز

الاواونست في نفسي خيفه

يقول وأنا أصيح عليهم قفوا بالبل لارحمتوا وانا بنطحه .

يقول وانا الكد الفرس وأنا أغير عليه

يقول يوم أقبلت على راعي هالحصان الاسود وأنا أصيح

(شريدة الفرسان وأنا أخو حسناء)

قال وهو يرد علي فاتحا" فمه أنطح

يا أخو حسنا ء هذا يومن مالك به.

قال : ـ والله ياعبدالعزيز أن أول مارتعدت أنها فخذي

قال : ـ وانا أومي عليه بالرمح ويذريه ربه .

قال : ـ وهو يهوي علي ياعبد العزيز بذيك الشلفاء

اللي ضربتها من فخذي على جنب الفرس.

قال : ـ وهو يعود علي طايح .

قال :ـ أخو حسناء والله واجبك أن الارض تجبر عليك

لكن سلمت .

وهو يمزع الشلفاء من فخذي ويلكد

على ربعي ويرد أبله .

ويمرني ويعالجني عنده ويكرمني لين طبت .






السالفه الثانيه مع ( سند الربع )

يقول شفت بنت مزيونه عند أبلها .

قال : ـ وتحير أقدامي عندها .

قال : ـ وتوافق شوفتي لها صلاه واقوم وصلي وكل ما سجدت أوحيت هذب خيل

قال : ـ وأرفع يدي بعد الصلاه أن الله يجعلهم مغيره على أبلها كود تشوف فعلي لافكيت أباعرها

قال : ـ أشوي الا أبلها صاكين عليها المغيره ومقفينن بها .

يقول قلت أستجاب الله لي وأنا أعرض عليها وأعتزي أبشري بابلك يارعيت البل.

قالت : ـ أرتح ياجنوبي البل يجيها راعيها

يقول : ـ وانا الكد عليهم وطرحلي اثنين يقول ليني خارجن منهم طول

يقول لينها في وجهي وانا أصيح كله العينك يارعية البل.

قالت : ـ مابك شين ياجنوبي لكن أرتح راعي البل يلحق.

قال : ـ وانا الكد عليهم مثل الاوله.

يقول على ضهرتي منهم لينها في وجهي .

يقول وانا أرفع صوتي كله العينك يارعية البل.

قالت : ـ مابك شين ياجنوبي لكن أرتح راعي البل يلحق.

قال والله ماخذيت الا راعي ذاك الحصان

في راس ذاك المذروب (أرض مرتفعه )

عند أفرسه يوم كب 0رمى) سبيل" معه

(دخان/ عظم) .

وربط شماغه على راسه وركب الفرس

قال : ـ وهو يلكدها عليهم وهو ينصفهم نصين

ضاهرن منهم طول محولن بمجموعتن منهم

يقول : ـ وهو يعود عليهم ومثل الاوله

يقول : ـ وهم يخلون البل يدورون السلامه.

يقول : ـ ويحوش أبله معرضن علي قال ماقصرت ياجنوبي.

أنت من يقال لك؟؟

يقول : ـ قلت له أنا محسن الفرم.

قال : ـ ونعم والله يعشاك انه الليله عندي على فعلك الطيب.

قال وتعشى عنده وغيب سنتين وأرجع له

قصدي أخطب أخته اللي شفتها عند الابل



قال : ـ وضيفه يوما" ما

وقبل لا أمشي من عنده كلمته في خطبت أخته.

قال : ـ وهو يضحك هاك الضحكه رافعا"صوته الله وامانه ما يحصل.

تدري ليش يامحسن ؟؟؟؟ .

قلت وأنا زعلان لا والله ما أدري.

قال : ـ وهو يرد بمرد فارس عربي أصيل أقنعني وأستريت منه

قال : ـ والله مازوجك أختي ويجي ولدها بكره

ابوه محسن الفرم وخاله سند الربع

يجي زر بحلوق شمر لاوالله يامحسن بتعفيني يابعد حيي

قال : ـ وانا أضحك مسترا" من حسن رده علي ورفضه الزواج بطريقه شهمه

لايمتلكها الا الفرسان مثل سند الربع


ولكم مني التحيه.

[حمد العطوني]

اخواني الاعزاء

اما عن قصة سند الربع ومحسن الفرم

اختلفت عليها الروايات و ان كان بعض الاخوان يريد ياتي بتحسينات من عنده وهذا منما يمله بالقصه لوكانت القصة صحيح اما الذي جدع محسن الفرم وذبح فرسه وهو سند الربع

والكلام عن محسن الفرم نفسه والراوي والذي نقل القصة من محسن

وهو على قيد الحياة الان .
هذا وتقبلو تحياتي

[مشــــعل]

النمر

حياك الله

وعزالله هذا اللي سمعناه

لاهنت يالطيب

[مشــــعل]

اخواني

انا سمعت كان ماني مخطي
ان اخونا خلف الرويتع من التومان

وبما ان سند الربع تومي

اتمنى من ابوعتيق
يجيب اللي عنده

لان السالفه هذي عامة لشمر
وطيب الشمري وفعله يعلم الله اننا نفخر به
سواء هالشمري عبدي او اسلمي او سنجاري

لاهنتوا