المساعد الشخصي الرقمي

مشاهدة النسخة كاملة : من طلع من داره قل مقداره


المطنوخ
09-04-2005, 10:37
سلخير كل ابوكم

ماش يوم جيت ابي اكتب موضعن متخمخ سمعت صوت صرصره باصابعي<<فديتهن:)

وانا اقوم بساع اركض للبنشر واغطهن بزيت البريك يوم تقل راح الصوت

عاد خلوني اكتب قبل لا ينكسن الصرصره:)

لقيت لي واحد وانا مسافر قاعدن بمقهى وشكله مهموم

بس وجهه يقط ملامح عربي

قلت بالخير يافلان

قال حياك حياك

وتسني ماصدقت وانا اسبط دزداموه

واقعد اطلب من هالطلبات انواع واشكال بعضهن بس شكل ولاطعمهن

يجيبن ابوصفار:)

والرجال ماهو يمي

عاد قلت شينن بلاش ربحه بين:)

واقعد اتجمل على الطاولات اللي بجنبي واقعد اطلب لهم

تسن ذابحن الكرم

والرجال غاديتن الدنيا بعينوه تقل صبع نمله من الهم

الله يرفع عنه:)

قال تبي تسمع قصه اغرب من الخيال

قلت قسم بالله اني متفرغ ولا عندي شغل

قال اجل اسمع هالسالفه وهو يهل سالفته

تعالوا اسمعوا بلسانوه...

من اول يا اخوان الواحد ينبسط ويتفيخر بأهله وربعه وجماعته ... ويحس أنهم أحسن ناس .. او أقوى ناس .. واللي مامثلهم ... وكانت هالامور تتراكم من كثر جلسات الوغد مع عمانه
ويبدون ينصبون ويهلسون عليه ...
كنّا نسوي من اول .. وكنا نسوي من اول ... وحنا رحنا وحنا جينا ... ويحطون أنفسهم بأزين مكان ( وان جينا للصدز لقيتهم بس يتكمخون )
وتشوفون البزر متكي بين شلّه الانس فاتحن افمه .. ويتخيل عمّانه قرندايزريين <<جمع قراندايزر :) لحد يدقق

كبر هالبزر (انت ياللي عازمني ) ... وكبرت النصبات معي .. وكنت أبهرهن وأزود عليهن !!
وأحتسي بهن عند أخوياي والشباب بالمدرسه ... حتى أنهم صارو يحسبونّي ( حاله خاصه )
وصارو يتجمعون حولي ... وكلن بيصير صديقي عشان فعايل عماني ( المزعومه ) .. او حتى ممتلكاتهم اللي نصبوا علي فيها

دخلت الجامعه بواسطه من واحدن يبي يظبط معاي عشان سواليف عماني والاشياء اللي سووها ... على أمل انه يلقى من وراي شي .... وتوسط لي بعد عند الدكاتره عشان اتخرج بأسرع وقت ... كله من هالسواليف ...


الوكاد اني عقب ماتخرجت .... رحت طايرن لأميمتي فرحان ومبسوط ... خلاص تخرجت وأبي أتأهل ..
ابي أعرس ...
أبي اتزوج ...
ابي اجيب لي وغد .. عشان اكمل عليه سواليف عماني ... وادخل نفسي بينهم !!<<امحق

تفاجأت الصراحه بأن امي ماهي متحمسه .. مع أني ولدها الوحيد ... وماتسنها فرحانه ... وماقالت الا
( الله يكتب اللي فيه الخير ياوليدي )

حبيت راسها .. وقلت لها .. ماعليتس يايمه .. ماني طالعن من البيت ... واذا اعرست أبقعد عندتس لاتخافين
وانتي الاساس والاصل .. والله لايخلينا يايمه ... ومن هالكلام اللي يسمونه ( بهارات )
ومشت الامور على اساس انها اقتنعت !!

وفي يوم من الايام جتني أمي الصبح تبي تقومني من النوم ... بس اليوم كان نبره صوتها غريبه ... وتكلمني بهدوووء وتقول
قم ياوليدي أبي أقول لك شي ... قم أبحاتسيك !!

تنبّهت عليها وقمت وقعدت على الفراش وهي بجنبي ... وقالت !!
أسمع وانا امك .. فيه شي لازم تعرفه ... وكان ودي أني أقوله لك من مبطي ... بس ماطاع قلبي !!
وكل يوم يزود الهمّ وتزود ضيقه صدري على هالشي

عركت عيوني شوي .. أشوف هي صادزه والا تستعبط ... هالحين مقومتني ضحويه عشان تسولف علي ...
قلت لها .. سمي آمري .. وش بغيتي !!

قالت لي :
انا من يوم أني صغيره وانا احب الوغدان ... وهذا الشي اللي خلاني أتعجل واعرس على أبوك ... وعقب مالله وفقنا واعرسنا .. اكتشفت ان ابوك مايجيه عيال
( وجه متنفخ من النوم وما أستوعب )

قلت لها ... طيب وبعدين وش صار !!
قالت لي ..
وفي يوم من الايام ... كان ابوك جاي من صلاه الفجر ... وجهه أصفر ومتلطم وبيده كرتون موز .. وكنت اتشوف وش بوسط الكرتون وتسني أشوف شراشف بوسط الكرتون
سالته ...

هنووو ..وش بك مصوفرن ومرتبك .. ووش هالكرتون اللي بيدك !!

فتح الشراشف ووراني ... ولقيت وغد وش حليله ... يلعب بأصابعه وخشمه مسدود .. بس انه أبيض ويعطي بحمااار خاصتن على الخدود !!
انا تعلقت بهالوغد عقب ماقال أبوك ... هذا لقيته عند باب المسجد ... وودي نربيه !!

كان هالوغد أنت !!
(( وجه مصفوق برضمه ))

نمّلت جبهتي ... وقشّعر ظهري كلّه الى عصعصي
وحسيت رجولي تنفّخن
تنهّت لي ربع ساعه ... وقلت لها ... يعني الحين أنا ماني ولدكم ...
وانتي منتي أمي !!

قالت لي .. أسمع ياحبيبي !!
انا رضّعتك من صدري (( أجل من سرّها )):)<<<احد يقولي وشلون ترضع وهي ماتجيب لا افقع وجهه:)
وربيتّك أحسن تربيه !!
وكنت لك الام والاخت والاخو وكل شي !! وكنت اداريك عن ظلالك ولا ابي أحد يتكلم علي
وكنت خايقتن من يوم تسألني (( يمه ليه أنا ابيض وانتم سمر ))
بس الظاهر وانا امك انك فاهي ماجت ببالك !!


حسيت أني دبشه .. ورخمه
وقعدت أصيح بس مو مثل العاده على حجرها .. لاني بصراحه أستاحشت عقب مادريت أنها ماهي امي ..
وان مضاوي بنت خالتي بدريه ماتقرب لي ...<<اكبر همه:)

طلعت امي من الغرفه عقب ماكسرت خاطرها بردّه الفعل الرائعه مني .... وصكت الباب وراها ... تاركتني اغرق بهواجيسي ... مدفون بين أحلام سراب

رحت امشي بخطى متثاقله ... حايمتن تسبدي ... وقافلتن معي وخانقتني العبره !!
أحس انهم يمزحون .. بس لافكرت بها صدز ... انا ابيض وهم سمر ..
يعني كلامها صدز

رحت والقى الكحله الكويحه متكي بالصاله (( هذا انت يابوي )) ... وأسلم عليه من بعيد .. قربت وقعدت قدامه علطول ... التفت علي ونزّل نظاراته البشاوري ويسألني
وش فيك ياوليدي ..
قلت له .. انا ماني وليد لأحد .. وابيك هالحين تعلمني السالفه ..
من هم اهلي ... ووش سالفتي بالضبط ...

رد علي وقال .. يعني قالت لك الملسونه وش السالفه... انا ضايقن صدري من اليوم اللي تبي تقوله لك ... وانا داري انها ماتقدر تقمط على لسانها ... الله لا يبارتس فيها
وكمل كلامه وعلمني السالفه اللي قالتها ( مرضعتي ) وطرّشت في وجهه ومشيت من زود حومه التسبد:)

جلست لي يومين بالغرفه لا اطلع ولا ادخل ولا اسوي شي ... ما ابي احد ولا احد يبيني ... وأحس اني منبوذ من جد ... والعالم كلهم يتهججون عني ..


وبليله من الليالي ... طلعت لغرفه اهلي ... وفتحت الدولاب ... وفتحت الصندوق الصغير .. ومليت كل اللي أقدر عليه من الذهبان والفلوس ... وغوايش دقه عبدالغني والدركتل وانحشت !!
طلعت من البيت

طلعت ماعاد لي ردّه .. هم ماهم اهلي !! واني مالي اهل ولاتربيت ( جحدهم ):)
وصارووخ على المطار ... وأحجز لي اقرب رحله كانت على أيطاليا
قلت في نفسي عزّ الطلب ..

ديرتن حمران عطران ... ولايسالون عن الاصل ... والمافيا هناك على قفا من يشيل ..
أشتغل معهم قصاب والا حنشل والا يشوفون لي هم دبره ... موب يخالفون !!

وأركب الطياره وأسدح امها نومه الين وصلنا ... اعنبو بليس من قالت أمي الخبر ماجاني النوم ابد ..
طلع كلامي عن عماني واهلي كله نصب ... واني صايعن ضايع مالي أهل !!

الوكاد اننا وصلنا المطار وأنزل اول واحد من زود الشفقه ... واتسحب لي شوي بالمطار وأشوف هالفطافيط وهالبنيات يالله من فضلك ... ماهنا أحد يردع ..ولا احد يستنكر الموايدز !!

وألقى لي ثنتين ماعندكم بأطيب منهن ... كل وحده تقول الزود عندي ... وجالساتن على مكتب في صاله المطار .. شكلهن من بعيد يقول .. الله العالم ان عندهن شيّن للبيع !!
وأجلس عندهن على المكتب اترزز واتميلح عليهن .. وهن لعنن والدي والديني بالابتسامات والضحكات .. وانا انوااااع الخورااان خايرن معهن ورايحن وطي للركبه !!!

وكل شي يقولونه اقول ايه ... لعنبوهن أقبل منهن كل شي ... وجيهن سفره !!
أخر شي أشوفهن طلعن أله حاسبه ... وطلعت ورقه وكتبت فيها وخلتني أوقع وأبصم ومدري وشو ... وانا عاد بحكم النباهه والذهانه دريت أن الدعوه عقب شوي ... حساااب

طلعت من دراهم صندوق أمي .. وأبدى أرمّي عليهن الفلوس .. وأشيل شوي وأحطه في وسط شعرها .. وشوي أحطه في بيدها ... متعودن على مراقص سوريا ماعمري طلعت لديرتن أجنبيه ..

من كثر الحتسي اللي طلع .. والبربره اللي مافهتها لقطت لي كلمتين .. ان الدراسه يوم السبت ..واخذت العنوان اللي دريت عقبهها بعد اني سجلت في معهد للغه ..
قلت أزين .. خلني اكمل دراستي ... وابدى مستقبلي من اول


بدت الدراسه ... وياحبي لها من دراسه !! الواحد مستعد يواصل أسبوع كامل ولايغيب يوم ..
وكعادتي من خليجي .. قاعدن ورى أخر واحد ... حاطن رجلي على كرسي اللي قدامي عشان يجلس عليه واقول ... اووه معليش مادريت !!
والمخابي مليانتن فصفص وعلوك ... والزقاير حاطها في وسط علبه الهندسه والمقلمه
يعني أسترجعت زحف وهبال الخليج كله على ظهورهم

يحلفون أنه ما انتهى (الكورس) الترم الا وورق شاهي اللبتون متعلقن بالسقف ... والكراسي من ورى مليانتن علوك:)

أستنكرت بصراحه أن اللي يدرسوننا يجون لابسين أسود في أسود .. وانا مخقخق معهم أقول يلعن ام اللبس الرسمي ... مو يجينا مدرس الفيزياء .. اللي يشوفه من بعيد يحسبه مقاول والا سباك !!

والا اشوفه لافّن عمامه بيضاء وانا اقول يلعن أم الاحترام ياناس .. عشانهم شافوني عربي .. قالو نبي نسوي شي يوسع صدره ويذكره بديرته !!

ابصراحه ماكنت أفهم شي ... بس تخرجت والسبب يرجع لهالبراشيم .. الله لايبارك بها !!
يحلفون اني ماتخرجت الا ونص أيطاليا طايحين بالبراشيم !!

وأول ماتخرجت عينوني في كنيسه ...
امحق سالفه ... يعني من اول جالس أدرس في معهد حق قساوسه !!
وانا هالحين صرت قسيس
الواحد يتخرج مهندس .. دكتور .. سباك .. زبال .. بس ماخبرت الواحد يتخرج قسيس
وصلوني للكنيسه اللي بداوم فيها .. ودخلت أشوف وش السالفه ياولد عدل بدّل مافيه عندهم بلديات وزارات شي .. لو في محل ابو دينار !!

وادخل القى العالم زحمه ماسكين سراا ... امحق امداهم يدرون اني داومت !!
المشكله اني ما ادري وش أسوي .. واني هالحين بلحالي ومتوهقن بنفسي ... وهذولا يتحروني أسوي لهم شي ما ادري وشو
وأجرّ الفراش واساله .. هالحين هذولا وش يبون
قال لي ... الا تعرف ماذا يريدون ...
قلت له ياخوي حنا هناك عندنا النظام غير .. واخاف اشتغل على نظامنا يستنكروني ويروحون لمكان ثاني
مهما كان هذولا زباين !!

علمني وش اسوي ... وشلون أبدى معهم .. وانه كل واحد بيجيني ويكب عشاااه عندي ... ويقول لي وش سوى ووش ماسوى .. وانا اقول له اللي ابيه !!
يا اما سامحته .. والا االعن والديه !!
ويدخلني الفراش في شبك ... وفيه كرسي برى .. انا اشوفهم بس هم مايشوفوني ...وهذا كان احلى شي في الجلسه ..
ويجيني اول واحد ... ويبدى يبربر ويخثردز ويتبتسبتس ... ويقول ..
انا سرقت بنك وانا ما ادري ... واعصب عليه واقوم ألعن والدي والديه وآخذ منه نص الفلوس وأطرده !!

وجتني عقبه وحدتن شمحووطه .. ناعمه .. نص الاغاني والقصايد انكتبت فيها !!
وقالت
انا خنت زوجي

طبعا بحكم العرق اللقافه والشفايه اللي فيني ... سألتها وقلت لها ... علميني وش السالفه من طقطق لسلام عليكم !!
وهي علطول جابت الاول والتالي .... وكبت الاولي والتالي !
تسن اللي قدامها قطو ... موب انسان ! وانا فاقن أثمي عندها وانواع السعابيل
يحلفون أن نظارتي قامت تبوّخ ...:)
ما اخفيكم اني حاولت اشغل نفسي بعد القوب اللي موجوده بالشبك اللي بيننا

قلت لها هالكلام موب يصلح وانتي المفروض ماتسوين هالشي وانه موب أي واحد تخونين رجلتس معه (( وجه واحد يلمح عن نفسه ))

الوكاد ان ذاك اليوم مشى كل واحد يجيني ويقول كل البلاوي اللي سواها ... وانا بصراحه موانس على الفضايح اللي أسمعها ... والفضايح اللي طلعت !!

عقبها جاني الفرّاش وطلعني وقال لي ... يالله مشينا عندنا عرس ... انلخمت .. قلت له .. وين ياخوي نشتغل طقاقات تقول لي عندنا عرس ... تراني منيب اعرف أحد
ركبت معه ورحنا والقى العالم مجتمعين .... والعروس وش حليلها واقفتن مع واحدن فاغر فاهي ...
عطاني الفراش ورقه وقال لي رح أقراها عليهم !!


وقفت قدامهم ... وبديت أقرى ... هل تقبلينه عريس وهل تقبلها عروسه (( منيب احتريهم يجاوبون ))
فليبارك لكم الرب وليرزقكم ومدري وش بعد وقمت أزود كلام من عندي ... خابرن الذرابه من جلسات عمّاني
يوم خلصنا ويسوقون العروس بسياره به قواطي من ورى
مااخفيكم ان الدعوه خربطه ...وخثردزه ..
وانا تسني بديت أكبر ... وماش الشيب لعب في راسي !! ولازم أعرس يبيلي وغدان وعيال !! أبطيت معنّس !!
ويطلع خبر اني ودي اعرس ويجوني حقين الكنايس ويلعنون جدفي .. قالوا
انتم مالكم عرس ... انتم وهبتو حياتكم ولازواج لكم ...
جمدت أطرافي من حتسين سمعته .. وقمت اتلاعن انا واياهم واتهاوش ويطلعون الورقه ويحطونها في وجهي واتذكر انها ورقه المطار اللي وقعتها .. اول ماوصلت الديره !!

دريت اني تدبست بالموضوع .... واكمل هذيك الفتره حايمتن تسبدي ... أي أحد يجي يعترف لي العن والديه ... وأطردهم كلهم .... وماش الوضع ماجاز لي ..

وتجي في راسي فكرتن ماهي صاحيه ... اني اعرس مسيار ...مافيها شي ولاأحد يدري عني ... دام اني أبوسع صديري .. وأفلها خلاص عزّ الطلب !!
وابدى اتشمشم لي وحيدتن تبي مسيار .. وان كانكم تبون الصدز .. محد فهم وش أقصد الوكاد اني لقيت وحدتن بطرف المدينه .... وانا اخذتها والنيه مسيار والا هي الظاهر معتبرتني اولد فرند

ومشت الايام والسنين وانا فالها مع هالشمحوطه وموسعن الصدر ... الين يوم من الايام وانا جالس افصفص في غرفه الاعتراف ... وجالسن اتسمع على الفضايح ... وأتقهوى شاهي .. طبّوا علي ثلاثميه واحد ... جرّوني مع رقبتي .. ومسحوا فيني بلاط الغرفه ... وركبوني في صندوق الهمر ... وراحوا لمكان الله اعلم به

وانا طايرتن بوهتي ما ادري وش السالفه .. وش فيكم يا اخوان وش مزعلكم عساا ما اخطينا عليكم
ويجيني واحدن واضح انه كبيرهم .. ويقول لي
جلي ماحنا علمناك .. انه مافيه عرس !!
وشوله تذيهن علينا وتعرس من ورانا .... وشوله تقيم علاقه غير شرعيه من ورانا !!

بلشت بعمري ابصراحه ما ادري ملاعين الجدف شلون عرفوا عن سالفتي .... مع انه ماعلمت أحد بها ... بس الظاهر انها هي راحت تعترف عن أحد ثاني اني موسعن الصدر معها ...

حطوني في شبك ... وهالشبك في وسط قليب ... وهالقليب في وسط قلعه ماياصلها لأنس ولاجنّ ... ريحتي تقل جيفه وخياسي متلطمّن من ريحتي ... وانواع ضيقه الصدر من ذاك اليوم ..

عقبها دريت ... من طلع عن داره ... قلّ مقداره

ويوم خلص ليا والله حساب طاولتنا بعد التحويل حوالي 75 دينار كويتي

قلت ابي اجيب البوك واجي وحط رجلك يالمطنوخ

وانا اجيكم بوجهي ولا شافتوه عيني:)



واعذرونا على القصور
وسلامتكم
شنقل
09-04-2005, 15:03
فليباركك الرب

المطنوووخ

ياخي خشيت جو وانا اقرى
تقل........
الا خويك هذاك
احد توظف برقمه والا لا
علمن ترى به واحدن
يبي يتوظف محله


واشوى اني فصلت الاتصال

المطنوووخ
اسمح لي ان اقول لك
يامبــــــــــدع

يعطيك العافيه على هالسولافه
ابو غازي
09-04-2005, 15:16
بارك الله فيك اخونا / المطنوخ

الحقيقة مشاركة ولاكل مشاركة فهي تهدف لعدة وجوه جمعتها لنا بوجه واحد بريء
هنيئاً لنا بك ودااااااام قلمك الذهبي
لاتحرمنا المزيد من هذه الرواااائع
واعذرني لكوني رديت عليك بعجلة ن من أمري وسوف اعود وأقراء الموضوع مرات ومرات بحول الله
ابو خليف
09-04-2005, 15:17
زودن على قرد هالقسيس

يالمطنوخ تدبسه بخمس وسبعين يالمسبوع


واحمد ربك الي يوم انك جيت المطار مادبسوك بورقه مثله
او هالسالفه ماهي بيطاليا
الرعب
09-04-2005, 16:39
ياااااوااااااايلي:a:

كل هذي ساااااااااالفئ:)

الله ينطيك عااااااافيئ

ويسعدكككككككككك

دمت سالما،،،،،،،،،

الرعــــــــــــب
الوكاد
09-04-2005, 17:00
مساء الخير للجميع

وين فلة الأحجاج وين الوناسة

وينكم................................................................... أخخية

تعزمونن ولا القا احد
ابو غازي
09-04-2005, 19:10
مساء الخير للجميع

وين فلة الأحجاج وين الوناسة

وينكم................................................................... أخخية

تعزمونن ولا القا احد

7
7

الله محييك وابشر لوتبينا نذبح لك ابالحصاااني :p:
بس انت اطلق عنان قلمك وخلنا نشوف نثره بساااااااااع عجل علينا يالوكااااد
ايضاء تسان راسك دايخ ن على الكيف اللي هي القهوة :rolleyes:لايروح فكرك بعيد :eek:
شف العيال يدقون ويجولون بالمجلس ... مجلس فلة حجاج .. خذلك فنجال هناااك ترى المحروووم والشبث وشنقل والمطنوخ .. متكين بالمجلس ... والمخاوي هو الأمير .. دق المعرفة معوه وخلوه يعطيك الفاعور وعقب ماتتقهوى نبيك تحطب لنا هههههههههههههههههه :eek:

السموحه يافلان :p:
الأصيل
09-04-2005, 19:13
سالنور يابو زبون:goooood:

أخيراً .. طلع النور من التنور

اسبوع وحنا نتحرا موضوع:

من طلع من داره .. ضيع طريدزوه:a:

..........................

(( فليباركك الرب ))

أنا اقول منين لك هاللغه ..

ماني خابر خوالك من هكا الديار :c:

لكن..

إذا عرف السبب .. بطل العجب ..

..................

أخوك الأصيل أبو ثوب .. ذهيييين

هالحين .. انكشفت أوراقك

وعرفنا وين غبت من هالأيام اللي مضت

أثريك مسافر للسنغال !!!!!!!!!!!!!:315r:

((ذكي الله لايحرمكم مني ( أتابع كونان ومغرم بوه )):eek:

.................................

والله ياهي قصه

قريته من طأطأ لسلام عليكم ،، عليكم السلام ورحمة الله:biggrin:

ابتداء من السرد والتسذب اللي بالمدرسه

للتخرج .. لموضوع الزواج

مروراً بكشف الحقيقه المره

اتصالاً بالهروب التسبير من البيت

للمطار ( عاد لو إنك معطينا تفاصيل شوين )):redface:

للكنيسه

لزواج المسيار ( ذابحوه الدين ):d:


ليما رضخوه طيور روما ( مثل طيور شلوا ):359r:

وانتهاءً بموقفك البطولي يومنك فركت له :p:






























يابعدي على هالموضوع ..

لاتنسى ..

عقب هالجهد الجهيد

ترا أصابعك بحاجه إلى زيت بريك وغسيل وتشحيم

( تخبر المغسله اللي قبال جمعية الصناعيه ؟؟تراه كذا:thumb:

.................................

بالله عليك ..

لاتحرمنا من هالجديد اللي يوسع الصدر

وتحياتو لأبو توب ( يعني : تحيات أبو ثوب ):goooood:
اليم
09-04-2005, 22:20
سولوتير ايتاليانو

وجهك مهو غريب(ن) علي يالمطنوخ:)

شكلي مار(ن) عليك وهاذ(ن) عليك قصتي بحدا هالكنايس

عزي لاهل المسكين تلقاهم قلبوا بيض عقب ما فارقهم وجه النحس:)

يعني لا حد يطلع من داروه للمطبخ يتوهق:)

ولاحد يعطي اموه وجه اذا جت تبي تقولوه عندي لك شي ابي اقولوه

بس مدري وش اقول :)

صرفه وغير الموضوع وقل ما ابي اسمع السالفه

اخاف توهق :)

همن تبلش




لاهنت خيوه مطنوخ

سلمت اناL M ك
هايس الشمري
10-04-2005, 00:25
و الله ياهي سالفة


هههههههههههه



سلمت يداك ((المطنوخ)) :)


الذيب
سرحــان
10-04-2005, 02:00
المطنوخ


تسلم والله يالغالي


والظاهر يبيلي ارجع للموضوع


الصراحه رائع



تحياتي
عبدالله المهيني
10-04-2005, 13:09
صبع نمله <<< يلعن إم التشبيه


لا واوراق اللبتون اللي فوق

والبراشيم

والعلوك

والفصفص :)


لا حتى عند الطليان زواج مسيار مو بس عندنا :) <<< يلعن أم الفله




المطنوخ


حسبي الله على شيطانك

أضحك الله سنك



أجل الشعب بهذا يبون يصفون سرا على هالمعهد

عندي إحساس إنك تبي تكسب ذنوبهم


مار ننتظر شيء يكرهم به بحلاوة هاللي انت كتبت وحببهم به


شاوووووووو ياملي
أبو مقرن
10-04-2005, 18:17
المطنوخ..
من طلع من داره..قل مقداره..
عز الله إنك صويدز..
***
أما هالمسيكين..والله إن قصته قصة.ن.أتلت على الشعيرات السود اللي بدزفوي هالراس..وصارن مثل ألايفهن..شهب:g:
ياخوي..هذا من بداية حياته..وهي لولسة الله يحمانا وياقانا..
ابتداءً بمقابل هكالعمام اللي تكرررررخ..
ومرورا..بالواسطات اللي تمصلح معوه..
وتاليته..أهل هكالديرة يدورون بوه الحيل يبون يجدعونه..
***
المطنوخ..
أجبرتني على القراءة أكثر من مرة..
لأن المتميز من المواضيع يأسرك..ويعقل رجليك إسلوب كاتبه..وعندها
لايسعك إلا أن تقول:
للإبداااااااع أناس يحبهم ويحبونه..وأنت على رأس قائمة أولئك الناس:
thumb:
***
دمت بود.ن.وعافية..
احمدالسلطان
10-04-2005, 18:20
اخوي / المطنوخ

الله يعطيك العافيه


صراحه سالفه ( مسريه ) لا قبله و لا بعده


تسلم يمينك يامطنوخ فعلا اسم على مسمى



تقبل تحياتي
مخاوي الوقت
10-04-2005, 23:33
وااااااااااااااااااااااااااااااااااااااا اااااااااااااو يالمطنوخ
لو كل من طلع من داره لقى هالعز يالمطنوخ كان ماحدن رجع الديرته
خل خويك يحمد ربه على العز يلي بايطاليا
بعض الناس يروح للغرب (يسبع مواااعين)
لكن مقيولة(يعطي الحلق للي ماله اذاااااااااااااان)
والشكر لك ايها المبدع فعلا موضوعك يستحق الحملة الدعائية
ويستاهل الضجة الاعلامية
متميز دائما يالمطنوخ
من القلب لك الشكر واضحك الله قلبك
تحياتي
المطنوخ
11-04-2005, 00:51
الزعيم,,,شنقل



فليباركك الرب

بوركت يافتى:)




المطنوووخ

ياخي خشيت جو وانا اقرى
تقل........
والله اني حاسن بك يالعشير....؟

مثل جونا يوم يزخنا قاسي الباس خخخخخخخخخ:)<<مايتسمى شين



الا خويك هذاك
احد توظف برقمه والا لا
علمن ترى به واحدن
يبي يتوظف محله
خبرك عتيدز

مار قل عسى الله يرحم الحال

تقول وظيفه ها؟




واشوى اني فصلت الاتصال
ماتدري ان من اهداف الموضوع هدم الاقتصاد بالنت:)
ونفخ الفواتير وتنحيق المخابي:)



المطنوووخ
اسمح لي ان اقول لك
يامبــــــــــدع

يعطيك العافيه على هالسولافه

شهادتك تاج على نفوخي من فوووء

تسلم على مرورك المطعم بالعبيثران<<يحسبه مدحه:)
المطنوخ
11-04-2005, 00:59
العم ,,, بوغازي ...الغالي


بارك الله فيك اخونا / المطنوخ
واياك اخوي الغالي



الحقيقة مشاركة ولاكل مشاركة فهي تهدف لعدة وجوه جمعتها لنا بوجه واحد بريء
ماشالله عليك على هالنظره الثاقبه

وقد عرضت الفكره بأسلوب فكاهي حتى نستسيغه ونروح عن انفسنا برسم الابتسامه



هنيئاً لنا بك ودااااااام قلمك الذهبي
هنيئا لي بمتابعة رائع مثل ابوغازي ولا يهونون الاخوان




لاتحرمنا المزيد من هذه الرواااائع
واعذرني لكوني رديت عليك بعجلة ن من أمري وسوف اعود وأقراء الموضوع مرات ومرات بحول الله

بشغف ننتظر عودة العميد ابوغازي


دمت بكل ود
المطنوخ
11-04-2005, 01:06
اللي ماتطلع الكلمه منه الا بطلعة الروح ,,,, ذيب شراف:)


زودن على قرد هالقسيس
يالمطنوخ تدبسه بخمس وسبعين يالمسبوع

ياخوي وشعمل

الدعوى بلوشي والرجال لو انه حارصن على حليلوه تسان صفقن بالطلبات بس الرجال الظاهر تسثرانتن دراهموه:)



واحمد ربك الي يوم انك جيت المطار مادبسوك بورقه مثله
او هالسالفه ماهي بيطاليا

بلاك ماتدري وش سووبي بالمطار

الله يجيرك قالوا لي وين تبي تسكن قلت ماحددت وهم يحطون وريقتن صفراء بجوازي
وهو يجيني واحدن وجهه يجيب الضيق لو انت بسعه:)
وهو يقول...........؟
ماني مكمل علشان الشفايه تمرس تسبودهم:)


ياحلو طلتك ياذيبان

تكفى انا طااااااااااالبك لاتحرمنا منها:)
المطنوخ
11-04-2005, 14:03
ياااااوااااااايلي

كل هذي ساااااااااالفئ

الله ينطيك عااااااافيئ

ويسعدكككككككككك

دمت سالما،،،،،،،،،

الرعــــــــــــب

الرعب

هذي لو واحد يحفظه وعندك خط 500 كم

حرام ماتخلص الا وانت واصل:)

تسلم على المرور
المطنوخ
11-04-2005, 14:08
مساء الخير للجميع

وين فلة الأحجاج وين الوناسة

وينكم................................................................... أخخية

تعزمونن ولا القا احد


الوكاد

ابشر والله بالسعد

بس اصبر يابعدي شوين

نعنبوا ابليسك 3 مشاركات

هذا حار بحار

وانا اخوك تبي تشوف الفله مولعه؟

ابزخ لنا من هالمواضيع اللي تطيب الخاطر وتطلع ضرس العقل السابع عشر:)

تسلم على مرورك
المطنوخ
12-04-2005, 16:30
سالنور يابو زبون

أخيراً .. طلع النور من التنور

اسبوع وحنا نتحرا موضوع:

من طلع من داره .. ضيع طريدزوه

مقدمه رائعه دون الاصيل<<تعرف وش معنى دون؟تابع فيلم العراب:)

..........................


(( فليباركك الرب ))

أنا اقول منين لك هاللغه ..

ماني خابر خوالك من هكا الديار

لكن..

إذا عرف السبب .. بطل العجب ..

حتى انت قمت تحرث بإزدواجية الجنسيه:)

..................


أخوك الأصيل أبو ثوب .. ذهيييين

هالحين .. انكشفت أوراقك

وعرفنا وين غبت من هالأيام اللي مضت

أثريك مسافر للسنغال !!!!!!!!!!!!!

((ذكي الله لايحرمكم مني ( أتابع كونان ومغرم بوه ))

السنغال؟
اموت واعرف بس منو قالك اني مسافر لموزمبيق<<ياشين اللي يفتهم:)

على طاري كونان وشصار بالحلقه القبل الاخيره ؟

هل قضوا عليه الاشرار

هل استعمل ددتسن اخوه؟

هل شرب من لبن الخلفات ام من البيبسي؟

.................................


والله ياهي قصه
بالله عليك:)



قريته من طأطأ لسلام عليكم ،، عليكم السلام ورحمة الله
يهيدنا ويهديك الله:)


ابتداء من السرد والتسذب اللي بالمدرسه

للتخرج .. لموضوع الزواج

مروراً بكشف الحقيقه المره

اتصالاً بالهروب التسبير من البيت

للمطار
( عاد لو إنك معطينا تفاصيل شوين ))
تعال اعلمك بالخاص ياهو جو مو طبيعي:) بس لاتجيب معك شنقل تروه مايصمل:)


للكنيسه

لزواج المسيار ( ذابحوه الدين )


ليما رضخوه طيور روما ( مثل طيور شلوا )

وانتهاءً بموقفك البطولي يومنك فركت له

ليباركك الرب ولتدوم النعم عليكم:)



يابعدي على هالموضوع ..

لاتنسى ..

عقب هالجهد الجهيد

ترا أصابعك بحاجه إلى زيت بريك وغسيل وتشحيم

( تخبر المغسله اللي قبال جمعية الصناعيه ؟؟تراه كذا

ابودينار ونص اللي من تدخل الصناعيه على اليمين؟

الله يرحم ايام التويجري:).................................


بالله عليك ..

لاتحرمنا من هالجديد اللي يوسع الصدر

وتحياتو لأبو توب ( يعني : تحيات أبو ثوب )

ابوثوب لقد تمت ترقيتك لرتبة ريّس الاساقفه :)

فليباركك الرب من الحبر الاعظم

ابوزبون
العبديه
14-04-2005, 13:56
يالمطينيخ


شفتلي سوالف طوال بس مثل هالسالفه ماشفت
وجعتن رقيبتي وانا اقرى

واذن علي العصر ..وكلو الغدا عني وانا اقرابه ...


تقل شخلنا ابو السالفه

يعطيك العافيه
الشبث
16-04-2005, 02:01
وشلون ترضع وهي ماتجيب لا افقع وجهه

ترضعوه بحليب السعوديه

خخخخخخخخ





المطنوخ

بارك الله فيك على هالقصه المميزه

والاسلوب الاكثر من رائع



ياحظ الفله بك






وتقلد تحيتي
المطنوخ
16-04-2005, 23:09
اليم<<ريس الالغاز


سولوتير ايتاليانو

وعليكم السلام :)


وجهك مهو غريب(ن) علي يالمطنوخ
لا يكون ساكن بصقليه؟

انا اللي بيتي يفتح دزبله:)



شكلي مار(ن) عليك وهاذ(ن) عليك قصتي بحدا هالكنايس
واخزياه عقب اعترافك الاخير ماش دريت انك مخرب ام الدعوى:)




ولاحد يعطي اموه وجه اذا جت تبي تقولوه عندي لك شي ابي اقولوه

بس مدري وش اقول

صرفه وغير الموضوع وقل ما ابي اسمع السالفه

اخاف توهق

همن تبلش

وانت الصادز ليا دخلت امك غرفتم وسكرت الباب وراها اعرف ان وراها شي

مار ضيع السالفه ولا صرفها قل لا تبسط عندك:)





لاهنت خيوه مطنوخ

سلمت اناL M ك

حبيب ألبي ذا سي

لاعدمناك
المهرة
17-04-2005, 06:16
المشكله انسجمت مع القصه وشوي وابكي http://www.asmilies.com/smiliespic/psmilie/001.gif
واقول وش ذا الحظ المقرود اللي جابني مع ذا الصبح اقرأ هالقصه الهنديه http://www.asmilies.com/smiliespic/psmilie/029.gifوانا مبطيه عن هالافلام اللي نهايتها سعابيل وصياح http://www.asmilies.com/smiliespic/sad/013.gif

وفي النهاية اعرف سوالفك قليل خاتمه تخلي الرجال وتهج مايردك الا الكويت http://www.asmilies.com/smiliespic/sad/051.gif
وهو المسكين يدفع الفاتوره وين سوالف العربان وسلوم اخو مسيلمه الكذاب
وانا بين مصدقه ومكذبه http://www.asmilies.com/smiliespic/sad/094.gif وتجمعووا علي بنات جيرانااااااااا من كثر مااصيح http://www.asmilies.com/smiliespic/sad/088.gifوقالو ا وش السالفه يافلانه قلت
الفيلم كان فاضي وضاق صدري وقمت اصيح وطبعاً هن مسبهات http://www.asmilies.com/smiliespic/sad/096.gif
وتوته توته خلصت الحدوثه وش رايك بالفيلم الفاضي http://www.asmilies.com/smiliespic/new/010.gif
تشاااااااااااااااااااااااو
المطنوخ
17-04-2005, 07:13
و الله ياهي سالفة


هههههههههههه



سلمت يداك ((المطنوخ))


الذيب

اجل جازت لك يالعشير:)

ابشر باللي تطيب خاطرك بعد بس اقهر شوين

غدينا نشوف مذرحة شنقل:)
المطنوخ
18-04-2005, 05:31
المطنوخ


تسلم والله يالغالي


والظاهر يبيلي ارجع للموضوع


الصراحه رائع



تحياتي

سرحان سمي الذيب

لاهنت يالغالي على مرورك

شرفت ولا كلفت
صلفيق ابو قناة
18-04-2005, 11:42
المطنوخ تسلم ويعطيك العافية على هالسولافة الي ما مثله لو اني خشيت جو وتقل تأثرت بمأساة رفيقك البابا.......


سلام
راعي الفزعة
18-04-2005, 23:46
و الله ياهي سالفة


هههههههههههه



سلمت يداك ((المطنوخ)) :)






راعي الفزعة
المطنوخ
23-04-2005, 18:24
المطنوخ


حسبي الله على شيطانك

أضحك الله سنك



أجل الشعب بهذا يبون يصفون سرا على هالمعهد

عندي إحساس إنك تبي تكسب ذنوبهم


مار ننتظر شيء يكرهم به بحلاوة هاللي انت كتبت وحببهم به

ع.المهيني<<هالولد عليه حركات:)

لا لا لاتعمل لهم شين

ماش ياخوي تقل توالفت معاهم عقب هالعيش والملح والـ.....؟:)

اقول تسان عندك احد تبي تعمده علمن تر اعرف لي كم واحدن زقرتي بهكالديره

المهيني

فليباركك الرب
الـمـحـروووم
23-04-2005, 21:38
المطنوووخ

لايكون أنت


تراك تسويها يابعد حيي
المطنوخ
29-04-2005, 20:58
المطنوخ..
أجبرتني على القراءة أكثر من مرة..
لأن المتميز من المواضيع يأسرك..ويعقل رجليك إسلوب كاتبه..وعندها
لايسعك إلا أن تقول:
للإبداااااااع أناس يحبهم ويحبونه..وأنت على رأس قائمة أولئك الناس:
thumb:

ولا مهونة للربع

حضر النار اللي على راس العلم

ابومقرن

شهادة يعلم الله انها وسام اعتز فيها

مرور عسى الله لا يخلينا منه

دمت بكل ود