الطفل العلة

[الجازي]

قررت أعطيكم دروس خصوصية في كيفية التعامل مع نفسية الطفل العلة واشرح لكم شوي عن شخصيته ,, لأنه يعتبر أصعب أنواع الأطفال :)

طبعا خبرتي في التعامل مع هالنوعية من الأطفال ناجمة عن معايشتي لحالتهم :)

لأني مع احترامي الشديد لشخصيتي :) كنت يوما ما طفلة علة :) :)

مايحتاج أعلمكم وأقول لكم إن الأطفال أنواع ,,

فيه منهم الهادي اللي ينفع معه التعامل بالهدوء ,,

وفيه منهم العصبي اللي يحتاج للسياسة في التعامل ,,

وفيه منهم الذكي اللي ماينفع معه إلا إنك تعامله على إنه شخص بالغ وعاقل وفاهم :) >>>عؤبال عند ولادكو :)

وفيه منهم اللي يدربي راسه ولا يدري وين ربه حاطه فيه وهذا مايحتاج له معاملة من أصله :) :) لأنه زي الخاتم في إصبعك :)

وفيه اللي يعتبر علة مستعلة إن عاملته بهدوء يحس إنك بارد وفاهي :)

وإذا عاملته بسياسة يحس إنك تستضعفه وتحتقره وتستهين بقدراته العضلية :)

وإذا عاملته بذكاء واحترام يستغبي بقوة عشان يثبت لك إنه أذكى منك وكاشف مخططاتك :)

ولو عاملته بعنف وقسوة ماتشوف منه غير التطنيش وكأنه مايحس بأي ألم جسدي ولا معنوي :) وهذا خطر عليك أنت لأنك بيرتفع ضغطك من تبلد إحساسه :)

وإذا ماعاملته أبدا ولا احتكيت فيه عفس عليك الدنيا :)

طيب وش الحل معه أجل !!؟

بالنسبة لي ,, كنت كذا أيام الطفولة ,, والضحية بصراحة كانت الماما المسكينة :)

لأن احتكاكي بها أكثر من البابا :)

كنت إذا ساعدتها أو سويت شيء يعجبها ماأبيها تمدحني :) لأنها إذا مدحتني أحس إني كني بزر :) >>> العلة إني بزر بس ماخذة مقلب في نفسي ذيك الأيام :)

وفي نفس الوقت مستحيل أسوي أي شيء عن طريق الأوامر :) يعني اذا قالت لي وأنا رايحة للمدرسة ريم بنيتي إلبسي جاكيتك عن البرد ,, أعاند ولا ألبسه حتى لو اني طاقتني النفاضة من الجمدة :) >>> وش رايكم بس في هالعقوق ,, درجة أولى مع مرتبة الشرف :)

ولو هاوشتني على غلطة أنا ماسويتها مثل لو كسر أخوي كاس وكانت تحسبه أنا ,, فمن سابع المستحيلات إني أقول لها تراه أخوي مو أنا >>> طبعا ماهو من باب الإيثار :) بس كذا لكاعة ولأني ماأحب يطلع شكلي مظلومة :) >>> يقطع ابو المنطق الحول :)

ولو تطاقيت مع واحد من إخواني وزدت عليه العيار حبتين :) واضطرني إني أخليه ينزف :) وجت أمي وضربتني ,, برضو مستحيل إني أصيح (( إت مينز أبكي :) )) حتى لو صار الضرب جامد :) وكان هذا يضيق صدر أمي لأنها تحس إني متبلدة :)

طيب وش الحل معي !!؟

أبد ,, الحل إني كبرت وأمي ياعمري مالقت لها حل معي ,, واضطرت تتحملني كل سنوات الطفولة الجميلة وهي تتمنى إنها ماتجيها نسخة مكررة مني في باقي إنتاجها :)

الخلاصة ,,

أنسب طريقة للتعامل مع هالنوعية ,,

هي التلميح :)

يعني لو احتجت انك تطلب منه طلب لاتطلبه مباشرة ,, يكفي انك تلمح بحاجتك لهالشيء من دون ماتخصه شخصيا بالأمر :)

لو أخطأ ,, لاتعاتب ولا تعاقب :) لأنه هو حاس في قرارة نفسه بالذنب وعفوك عنه وصمتك أشد عليه من أقسى أنواع العقوبة :) لأنك اذا عاقبته بيخف عنده الشعور بالذنب ويتبلد إحساسه :)

ولو حبيت تكافئه مايحتاج انك تمدحه قدام أمة الثقلين لأنه يحس انك مستصغره :) وتعطيه على قد عقله ,, يكفيه منك إنك تبين إعجابك بإتقان الشغل اللي سواه من غير ماتسأل من سواه ولا تشكره شخصيا :)

هذي خلاصة علتي :) عطيتكم مفتاح الحل والباقي عليكم ,, هذا إن كان عندكم أطفال علل :) :)

ولو صار عندكم مثل هالعينة العلة لاتضيق صدوركم ,, لأن النهاية راح تكون سعيدة :) مثل نهاية طفولتي :) :)

<<<<<<<<< مقطعتها الثقة :)

[راعي الوقيد]

الريـــــــــــم !!

يالله عافــه ،، لا تعبتـــــــي:)

اقــول هذا طفـــــــــل والا مـــوظـــــف:g:

اقرئي:) ما يقوله حقــــــــون علــــم النفـــــــس التـــــربــــوي :-

يختلف الاباء في تربية ابنائهم ،،،

بعضهم يسلك طريق القسوة وانزال العقوبات الصارمة المؤذية والمؤثرة

على شخصية الطفل ونموه الانفعالي معتقدا ان التصويب يكون باظهار

القوة من جانبه والخنوع والاستسلام من جانب الاولاد ،،،

والبعض الآخر من الآباء والامهات تتحكم فيهم عواطفهم ويستسلمون

امام تعنت الطفل واصراره علىاشباع رغباته فيتركون له الحبل على

الغارب فينشأ الطفل بمفاهيم طفولية وبسلوكيات لامسئولة خالية من

ضبط النفس ومعرفة الحدود فيمارس ما اعتاد عليه في اسرته مع

المجتمع الخارجي ، فيصطدم بالواقع المختلف عما نشأ عليه ويصبح

عرضة للإحباطات والإضطرابات النفسية ،،،

وحسب تربيتنا الخاصة التي تربينا عليها كما هو حال التربية للآباء

والأجداد !! البعيـــدة كل البعـد عن اصول التربية الحديثة كما يسمونها ؟؟

ولا اعترف بغالبيتها ..!!

يعني إذا العين الحمراء ما جابت نتيجة << الا تجيب مية نتيجة هذا حمار

عين من عيون الأولين الله يحلهم:)

وإلا بأكبر ما عندهـ او اللي بيدهـ لو هي يد نجر << مار الله فكّه:(

يسلمووووووو ع الموضوع الهام والحيوي مما اتاح لنا الفرصة إبداء مانراهـ

وما نستنير به .!؟

والسلاااااام ...
..

[مجموعة إنسان]

.


ياحياتي أمك

وربي إني تعاطفت معها المسكينه

عانت وذاقت الأمريّن منك

ياويـــــــــــــــلك من الله ياشيخه

(( من هاللي قاعده تحكي ؟؟ )) << مجموعة إنسان :232r:

أنا بعد اتعبت أمي بطفولتي لكن تعب من نوع ثاني

أنا اتعبتها بحاجتين ( بكثر الأسئلة والحساسيه )

كل شئ استفسر عنه وكثير تبتلش بي وتصرفني :(

أي كلمة تقولها لي تلاقيني ابكي أما ورى باب او بالزاويه لين تلقاني نايمه بدموعي


:008b::008b::008b:


ريمووو :

اطلبي السماح من امك :thumb:


...

بالنسبة للطفل العلّه :

مثل ماقلتي التلميح يغني معه عن التصريح


أحسنتِ ريمووو

:thumb:

.

[ابو غازي]

أثرررررررررررررررررريتس مره :(

الله يعين اختي عليتس يابن اختي :p:

سلمت يدينك يالريم :thumb:

[الجازي]

راعي الوقيد ,,


اقــول هذا طفـــــــــل والا مـــوظـــــف

:) :)

موظف بس بدون راتب :)

أخوي راعي الوقيد ,, أنا تكلمت عن نوعية صعبة من الأطفال ,, يعني يبيلهم راسن صاحي في التعامل :)

أما باقي الأنواع فهم أكيد التعامل المعتدل معهم يجيب نتيجة لأن أهم شيء إنك تعرف نفسياتهم وبناء عليها تختار الأسلوب الأمثل ,,

أما العلة فهذا يبيله من يألف فيه سلسلة إصدارات في طرق التعامل وليس التربية :)

غالبا هالعلة يربي نفسه بنفسه ويستغني عن فلسفة الآخرين (( اللي هم الأهل :) ))

لكن المشكلة هي في طريقة التعامل معه !! وكيف تقدر تاخذ وتعطي بدون مايرتفع أمبير الضغط عندك :)

إلا ماقلت لنا وش كانت طفولتك من بين هالأنواع :) ماهقيت انك قلق مثلي :) بس أتوقع إنك مزاجي :)

يسلمو أخوي راعي الوقيد على المداخلة الجميلة ,,

[راعي الوقيد]

إلا ماقلت لنا وش كانت طفولتك من بين هالأنواع :) ماهقيت انك قلق مثلي :) بس أتوقع إنك مزاجي:)
شلون ينعـرف المزاجي ؟

او ماهي مواصفات هذا المزاجي الظاهــرة للعيان:(

كلهم يرون ذلك فيّ ويصرحون به او يلمحون ..!؟

هل تعتبر المزاجيـــــة شيء سلبي !؟:g:

وماهو الحــــل:(

اصبحت قلقا ًومتوترا ً:a:

يو ول كوم دوك:)
...

[الجازي]

ياحياتي أمك

وربي إني تعاطفت معها المسكينه

عانت وذاقت الأمريّن منك

ياويـــــــــــــــلك من الله ياشيخه

والله تبين الصدق ,, أحس إنها تحسفت على ولادتي :) >>> وش دعوى :)

بس أبشرتس عوضتها يوم كبرت وأثبت لها إن الروس اليابسة هي اللي تنفع وقت الشدايد :) :)


أنا بعد اتعبت أمي بطفولتي لكن تعب من نوع ثاني

أنا اتعبتها بحاجتين ( بكثر الأسئلة والحساسيه )

سالفة كثر الأسئلة هذي شرق وانا غرب :) تعرفين ليش ؟؟

لأني عارفة تصريفاتهم ومافيه أمل يعطوني إجابة شافية :)

قلت وشوله أذل نفسي وأسألهم ,, خلني أعتمد على مصادري الخاصة في البحث والتحري :) وعز الله إني نجحت :)

أما الحساسية ,, كنت مستحيل أعترف بها ومثلك عارف مافيه إنسان مخلوق من جدار :) >>> مع ان الطين والموية هي مواد الجدار :) >>> يالله فوتيها لي يامجمج لاتدققين :)



أي كلمة تقولها لي تلاقيني ابكي أما ورى باب او بالزاويه لين تلقاني نايمه بدموعي

لا والله أنا عصيّة الدمع شيمتي الصبر :) :)


ريمووو :

اطلبي السماح من امك :thumb:

أبشرتس دايم تدعي علي ان الله يرزقني عيال مثل طينتي :) :)

لاتشيلين هم مثل ماقلت لك يوم كبرت عوضتها :)

يسلمو مجمج عالمداخلة ,, وتبين الصراحة شخصيتك وانت صغيرة تناسبك بعد ماكبرتي :) >>>بالله وش هالذكاء :)

[مجموعة إنسان]

,, وتبين الصراحة شخصيتك وانت صغيرة تناسبك بعد ماكبرتي :) >>>بالله وش هالذكاء :)

8
8

حرام عليك ياشيخه الحين تراني ماأصيح وراء الباب

تطوّرت شوي :tongue:

وبعدين الحين أنا ماني كثيرة اسئله ... :tongue:

هي طاقه وخلصتها بأمي وأنا صغينونه

:)

.

[نافع بن طواله]

هههههههههههههههه


بس بجد باين من كلامك إنك متسنده على جبل


وهالجبل هو اللي يخليك تعاندين أمك


لو عندك أخو يمشع شعرك إذا راددتي أمك أو يعجن فرّتك


كان إنحلت كل هالأمور وكان مثل هالمواضيع ماتعرفين تكتبينها


بس الله يسلم هالجبل اللي يهجّد كل اللي ما يعجبك


ـــــــــــــــــــــــــــــــــ

بس بجد يالريم

أنا أتشاءم من المواضيع الطويله بس إذا إسمك بالموضوع

يهوّن الموضوع علي




أبو هدلاء (لعيون بنات المضايف)

[الجازي]

خالو ابو غازي ,,

ولو بنت اختك طالعة عليك :)

والا نسيت يوم أهبّل بك ذيك المرة :) >>> شكلي بصدق تالي عمري :)

[الجازي]

شلون ينعـرف المزاجي ؟

او ماهي مواصفات هذا المزاجي الظاهــرة للعيان

كلهم يرون ذلك فيّ ويصرحون به او يلمحون ..!؟

هل تعتبر المزاجيـــــة شيء سلبي !؟

وماهو الحــــل

اصبحت قلقا ًومتوترا

وانت وش مضيق صدرك ؟؟

المزاجي ولا أحسن منه :)

صح ان اللي حوله تطقهم النفاضة من الروعة اذا جو يتعاملون معه :) >>> مزحة تاليتها رزحة الله العالم :)

لا والله من جد ياراعي الوقيد ,, المزاجي بالنسبة لي هو اللي يتحكم فيه مزاجه :) >>> فسر الماء بالماء :)

مثلا لو مزاجه رايق مستحيل تلقى شيء ينكد عليه ,, لأنه خلاص حاط في باله انه رايق طول اليوم ,,

يعني لو تجيه وانت معصب قابلك بكل هدوء وروقان وصار يهدّي فيك ويسايسك :)

ولو صار مزاجه متعكنن على قولة المصاريا ,, مالك الا إنك ماتحاتسيه ذاك اليوم حتى لو تبي تبشره بالسيل :) >>> كلن على همه :)

وهكذا .....>>> كناية عن اني بحلت بباقي الحالات :)

وأنت أشوفك كذا في المضايف :) عاد لاتسألني وشلون :)

المزاجي عموما يعتبر أهون بكثير من العلة :) ولا أعتقد إنها سلبية ,, بس يمكن صعبة شوي على اللي يتعاملون معه :)

عساني بس بردت قلبك في الاجابة :) ,, تراها من راسي :) يعني احتمال كبير يطلع ماعندي سالفة :)

بس تكفى لاتقرا ردي الا وانت في حالة مزاجية رايقة جدا :)

[شموخ]

هههههههههههههههه
ههههههههههههه

الريم

الله يقطع ابليسك ذكرتني بايام الطفوله.

وربي كنت عناديه:188r: ، اتذكر مره من المرات كنا عند خوالي وكانت امي تحاول فيني البس وانا معنده مابي هذا الفستان كنت امسك على نوعيه وحده من الملابس بعض الملابس مارتاح فيها مع انها حلوه، المهم اخذت الفستان من امي وتحسبني بلبسه ورحت لخالي وكان ايامها برد وشاب النار ورميته فيها وربي :188r: صراحه يوم اتذكر تصرفاتي وانا صغيره تصرفات مجنونه وللحين خالي ماسكها علي دايما يذكرني فيها :)


وفعلا الدموع اكره انزل دمعتي في اغلب المواقف مع انى احس لدرجه انهم يحسبونها قسوة قلب بس مدري احس الدموع فيها ذل لي وكسر لشموخي :)

تحياتي

[الجازي]

لو عندك أخو يمشع شعرك إذا راددتي أمك أو يعجن فرّتك

شكلي شوهت سمعتي :)

ترى الحين كل هالسوالف اللي قلتها لكم ماتتضمن أي مرادد لأمي :) يعني السالفة إني أرد بصمت :) والظاهر الصمت مفعوله أقوى من الكلام :) :)

يعني الدعوى كيدية لا أقل ولا أكثر :)

وإلا تراني وش حليلي ماأعتدي على أحد :) بس حقي أخذه بطريقتي الخاصة حتى لو ماأحتجت للعنف :)


بس الله يسلم هالجبل اللي يهجّد كل اللي ما يعجبك

الله يخليه لي ولا يحرمني منه :)

أبو طوالة :) ,, تسلم على المرور والتعليق وعؤبال ماتشوف هدلاء كربون طبق الأصل من بنت عمها الريم :) :)

[راعي الوقيد]

الريــــــــم:)

جبتي المفيد:thumb:

كأنـك تتكلمين عني بالضبط:a:

سلااااااام ...

[ريم شمر]

والله انتس خطيره يالريم :puzzled:

ولااكبر طبيبه نفسيه :thumb:

تصدقين اني قريت الموضوع والردود اكثر من مره

وتصدقين اني معجبه حيل باسلوبك في تشريح
وتحليل النفسيات

روووووووووعه ريومه

حرام عليك دافنه هالمواهب :)

اول مره احس اني فعلا استفدت من موضوع

يتحدث عن التعامل مع الاطفال

تسلمين الريم

فعلا ماقصرتي


على فكره بما انكم انتي ومجمج وشموخه

طلعتوا علل كلكم :eek:

فانا عكسكم تماما

يوم انا صغيره مثل نسمه الهوا مااحد يحس فيني
هاديه ومطيعه ووديعه

بس ابشرتس عوضت عن كل هالحرمان من الشقاوه

والشطانه يوم كبرت :055r::055r:


.

[الجازي]

هلا والله بشموخة ,,

الظاهر عقدة اللبس موجودة في كل البنات :)

أذكر مرة حرمت أهلي من طلعة بسبب عنادي في اللبس :)

يعني أنا مثلك كانت أمي تبيني ألبس فستان وأنا معندة :) آخر شيء قلت لها خلاص أجل مابي أروح معكم (( على بالي بحط أمي قدام الأمر الواقع :) )) طبعا أمي طيحت وجهي وقالت : أبرك لاتروحين أنتي اللي حارمة نفسك من الروحة :(

وكالعادة كبرت في راسي قلت والله ماأروح عقب هاللي صار :) >>>لازلت أقاوم :)

المهم من الزعل رحت لغرفتي وقفلت على نفسي ودقيتها نومة :) >>> أكبر غلط انك تحطين المفتاح عند بزور :)

هالكلام بعد الغداء ,, والطلعة كانت العصر ,, المهم ان العالم تكسرت يدينهم وهم يطقون باب غرفتي وأنا في سابع نومة :) >>> الظاهر مع الزعل يثقل نومي :)

قالت أمي خلاص نخلي عندها الشغالة ونمشي ,, بس ابوي ياحبيله قال ولا تعتبون شبر برا البيت الا وهي معكم :)

طبعا اختس في الله ماقامت الا عقب المغرب :) بس والله إن النفاضة كانت طاقتني :) قلت الله يستر من تواليها :)

طلعت وأمي مكتمة ولا زادت على قولها :: عاجبتس كذا يالشاطرة :)

أبوي ياحبيله شكلي فزعت له بهالنومة وريحته من هالمشوار :) لأنه ماقال لي شيء :)

والمفتاح تمت مصادرته عشان ماتتكرر الحادثة المأساوية :)

يعني ترى عندي وعندتس خير ,, بس ولو حلولتس أنتي أحسن لأنها مستعجلة وصارمة مافيه مجال للتراجع :)

يسلمو شوشو ,,

[الجازي]

وتصدقين اني معجبه حيل باسلوبك في تشريح
وتحليل النفسيات

تشريح !!!؟

ياولية حرام عليكي :)

دنتي حتئطعي رزئي كده ,, وأنا ماسدئت إنهم خدو مألب في فلسفتي :)

أما سالفة انتس مثل نسمة الهوا :) هذي اللي مستحيل تخش عقلي :)

وحتى لو كان هالكلام صدق هذا مايمنع انتس دافنة مواهبتس العللية وموفرتها للمستقبل البعيد :)

يسلمو ريمو على الحضور والتشريف ,,