سلام ياهل المنتدى والله على خلقه رقيب!!!

[((بعيدالنظر))]

للجميع بدون تخصيص . والطارف سداد .
للإستفاده من شعراء المحاوره
سلام ياهل المنتدى والله على خلقه رقيب=والهرج بالميزان . والدنيا كفى الله شرها

جينا نسلّم والسوالف ما أنقطع منها النصيب=والقاف دوبه زان . والدنيا كفى الله شرها

[متأمل]

هلا...و غلا يا عبيدالله

استلم...



هلا يا مرحبا يا بن الوفا ترحيب ما به ريب=قدّامك الميدان...و الدنيا كفا الله شرها

بعد جينا تجهّز يا صبيّ و دق سلف الجيب=مشينا للصمان...و الدنيا كفا الله شرها
تحياتي...

[((بعيدالنظر))]

المهلي مايولي يالمتأمل.
وإستلم لاهنت..



يالله لعل إلك البقا ياشاعرٍ صوته غريب=فارس بظهر حصان ..والدنيا كفى الله شرها

عوّد على درب السنع ياللي تلقيت الشعيب=الدرب لك مابان .. والدنيا كفى الله شرها

[ابو غازي]

إيه عاااااااااااااشو شعارنا :thumb:

عااااااااااش عبيد الله العرابي

عاااااااش متأمل

تروني بالصف الأول قاعد ومتابع وتسني أسمع حس الأصيل جاي :g:
وجايبن متفاائل وثامر والقديمي ونبراس وكم شاااعر معهم و يتلتلهم يقول وين انتم ياعيال :d:

[فهد الاسلمي]

هلا هلا هلا ... هــــــــــــــــــــوى


هلا والله بعبيدالله العرابي ومتأمـــــــــل إيـــه هذا هو اللعب سريع سريع ورد

اقوى من السرعة بعدي والله اتحفونا اطربونا انعشونا حركونا بس احرصوا لا تنومونا تكفــــــــــــون




..... ( معاكم قاضب الصفوف )......... هــــــــــــــــــــــــــوى

[متأمل]

وين الصفوف...يا النشاما

استلم يا عبيدالله...


تركّد لا تحسبك يا عبيّد قايد التدريب=توّك بدون ضمان...و الدنيا كفا الله شرها
أنا ما أدري عميلي ذيب و الا أنه خويّ الذيب=ماله عضود سمان...و الدنيا كفا الله شرهاالليل ...يا أهل اللعب

[فهد الاسلمي]

أنا ما أدري عميلي ذيب و الا أنه خويّ الذيب= ماله عضود سمان...و الدنيا كفا الله شرهـا

أنا ما أدري عميلي ذيب و الا أنه خويّ الذيب= ماله عضود سمان...و الدنيا كفا الله شرهـا


قاضب الصفوف ......... هـــــــــــــــــــوى

[متأمل]

أرحب...يا بو غازي

أبرك الساعات....مرورك...و يسعدنا تشجيعك

إن جاء الأصيل...فأهلا به وسهلا...و اللي معه كلهم خير و بركه

يزيدون...ما ينقّصون...

فهد الأسلمي...أخجلتنا بتشجيعك ..طال عمرك

متابعه متميره...استمر بتواجدك لا هنت

تحياتي...للجميع

[((بعيدالنظر))]

نحضر على وضح النقا وآنته ولو تحضر تغيب=وقناعك البرهان .. والدنيا كفى الله شرها

ترى عميلك يحفظ أسرارك وللعله طبيب=ماهو قليل إحسان .. والدنيا كفى الله شرها

[((بعيدالنظر))]

أبوغاااازي / حضوووورك تشريف للجميع هلا وغلا .. لاهنت يامشرفنا المتألق

فهد الأسلمي / حياك الله يافهد وبحضورك نحاول أن نكون بقدر ماتتمنى ويتمنى الجميع ..لاهنت يالغالي

[فهد الاسلمي]

سنايدي والله طيور شلوى ,,هل المحاوره, ما يتأخر حديكم عن الاخر

هذا هو اللعب الصحيح اما كذا ولا بلاش :)


انزح عني شوين ابو غازي خلن احبهم :) :)


ترى عميلك يحفظ أسـرارك وللعلـه طبيـب
ماهو قليل إحسان .. والدنيا كفـى الله شرهـا


ولا زال قاضب الصفوف,,, هـــــــــــــوى

[سعد الحامد]

عوّد على درب السنع ياللي تلقيت الشعيـب
الدرب لك مابان .. والدنيا كفى الله شرهـا

الله الله الله على هالطارووووق اللي يسد عن قهوة الصبح ويقعد الراس

سروها بليل ترى الصبح بعيد والصفوف ازهلوها

[متأمل]

هلا...بالربع

استلم...يا بعدي


أناغي من يجر الصوت و الداعي يجيه مجيب=قدامه العنوان...و الدنيا كفا الله شرها

أنا من جيت سوق العلم يقفى للأديب أديب=دايم يجي فهمان...و الدنيا كفا الله شرها

سنايدي و الله..يا فهد

مرحبا بك يا سعد الحامد

تحياتي...

[فهد الاسلمي]

هـــــــــــــــــــــــــوى
انا هنا واقف واصفق للصفوف ....
عشت متأمــــــــــــــــــــل... ابداع
اها وينك يا عبيدالله أروج يابعدي ,,اطرح الرجال :) اشوى الّي ما وقع عقالي عقب هالابتسامه

قاضب الصفوف .... هــــــــــــــــــــــــــــوى

[سرحــان]

هلا والله




بعبيدالله العرابي ومتأمـــــــــل




الله يعطيكم العافيه





بالصف الاول مع ابو غازي وفهد الاسلمي



تحياتي

[الأصيل]

ياعيال ...

كلن يقضب صفوه

مايحتاج .. أنا وابوغازي بصف ( حنا يالشيبان ) :d:



ترا مواري اللعب يبي يزين بالحيل

شاعرين .. يعني شاعرين .. :thumb:


وصح لسان الشاعرين ،،

استمرووووووووووو

[متأمل]

خشمك...يا الأسلمي

طول الليل و أنا عيني عليك...عساني ما أنظلك

عندك ما شاء الله عليك طول نسم...و روحك حلوه....لا هنت

سرحان_ الأصيل

مروركما يسعدنا...أخي عبيدالله و أنا

نشكركما على التواصل و التشجيع...

تحياتي...

[فهد الاسلمي]

السلام عليكم ورحمة الله وبركاته ,,,,,,
متأمل انت وعبيدالله والّي شرواكم

تخلون الناس تتابعكم واللي يزيد في تشفقها للمتابعة هي قراءة مابعد البيت الذي سبق

يعني ما يحتاج الاطراء الّي قلته يابعدي ..

هالشي هو الّي يخلي الرجل منّا يحضر ويتابع لعبة المحاورة خصوصا لا صارت مع اثنين تعرف انهم فطاحل بمجرد ما تقرا قوة ردودهم ...

فسيروا ونحن من خلفكم

ولا زال متقضبٍ بالصفوف

[((بعيدالنظر))]

الله الله يالمتامل..

إستلم لاهنت وآسف على التأخير للظروف أحكام ..

ليتك تركت العلم لهله والنجابه للنجيب=يالتاجر الطفران .. والدنيا كفى الله شرها

زاحمتنا فالسوق ياراع الهلل ماتستعيب=ولابدا لك شان .. والدنيا كفى الله شرها

[((بعيدالنظر))]

أخوي // فهد الأسلمي بيّض الله وجهك يالقرم عزالله إنك ماقصرت وإن كان به قصور فهو منا ومن ظروفنا أما أنت لك أجمل التحايا وأرقها لاعدمتك.. مرورك شرف وتكراره يزيدنا حماس أنا وأخي المتأمل


أخوي // سعد الحامد .. هلا وغلا بمرورك الجميل والرائع وإضافتك اللي تدل على رقي فكرك .. أشكرك يالغالي ..


سرحان الرائه // هلا ملايين يالذيب ولاهنت على تعليقك ومرورك اللي يزيدنا بهجه تحياتي لقلبك ..

الأصيل // والنعم وبالفعل أنت الأصيل إسم على مسمى وحضورك فخر لنا جميعاً ..
تحياتي لك ولروعة حضورك وعطورك ..

[((بعيدالنظر))]

أخي العزيز///فهد الأسلمي ..

في كل مره أجد إسمك أتفائل بأنها ستكون محاوره قويه بالفعل ..نحن بدون تواجد الأنقياء أمثالكم لن نقدم شيء ..
أشكرك يافهد على تواضعك وشرواك الطيّب والغالي ..

تحياتي

[متأمل]

عساك أمورك كلها بخير دايم...

مثلي يلتمس لك الأعذار...ما عليك خلاف يا بعدي

استلم لا هنت...


لقيتك يا بلد يعرب قفر خالي من التعريب=طول الدهر عطشان...و الدنيا كفا الله شرها

يقولون العراقي ما حفظ داره من التخريب=دايم و هي بركان...و الدنيا كفا الله شرها
لك الصدر يا الأسلمي دون العالمين أو القبر...أخجلتنا

لكن شد حيلك...الدور الجاي عليك يا صاحبي...شكلك شاعر و متنكر

[((بعيدالنظر))]

وأنت على الخير دايم يالغالي
أشكرك على روحك الجميله ودام عزك يالقرم

وإستلم لاهنت

بندقك فيها عيب يارامي خطا عيّت تصيب=والعيب فا المشحان .. والدنيا كفى الله شرها

يقلون مايقلون وأنته لابعيد ولاقريب=تقلط مع الضيفان .. والدنيا كفى الله شرها

[فهد الاسلمي]

منيــــــــــــــن شاعر يا غالي (اعض الرضم) لا شاعر ولا رسام......



المبدعان عبيدالله العرابي ,,,,, متأمــــــل
فعلا اتحفتونا .

اقول كذا ماهو عشان تنهون اللعبه احرصوا الا هذه :) اشوى ما وقع عقالي ...

المقصد انكم تتابعون ف (سيروا ونحن من خلفكم )
عبيدالله ..


ليتك تركت العلم لهله والنجابه للنجيـب
يالتاجر الطفران .. والدنيا كفى الله شرها
زاحمتنا فالسوق ياراع الهلل ماتستعيـب
ولابدا لك شان .. والدنيا كفى الله شر ها

متأمل..

لقيتك يا بلد يعرب قفر خالي من التعريـب= طول الدهر عطشان...و الدنيا كفا الله شرها

يقولون العراقي ما حفظ داره من التخريـب= دايم و هي بركان...و الدنيا كفا الله شرهـا
عبيدالله...


بندقك فيها عيب يارامي خطا عيّت تصيـب=
والعيب فا المشحان .. والدنيا كفى الله شرها

يقلون مايقلـون وأنتـه لابعيـد ولاقريـب=
تقلط مع الضيفان .. والدنيا كفى الله شرهـا
هـــــــــــــــــــــــــــــــــــــــ ـــــوى

الله الله الله كملوا ترى الصفوف مولعة ... قاضب الصفوف

[سرحــان]

عبيدالله العرابي ,,,,, مــــــتأمــــــــــــل





الله يعطيكم العافيه


الاصيل خل عنك ابو غازي


ابوغازي بصفي .......

قاضــــــــــب الصـــــف مع الربع

[ابو غازي]

عااااااااااااااااااااااااشو :thumb:

حيالله ســـــــمي الذيب

هو منهو هالي وقع عقالوه ياسرحان :p:

[متأمل]

إخوتي...و أحبتي

الأسلمي - أبو غازي - الأصيل - سرحان - سعد حامد

عز الله أنكم ما قصرتوا ...لا في التشجيع...و لا في مسك الصف

أشكركم على روحكم العاليه...و أخلاقكم النادره

عميل الخير...عبيدالله...لا هنت على اللعب الراكد و الأخلاق الطيبه

و أعتذر عن عدم الاستمرار... على أمل اللقاء القريب

تحياتي للجميع...

[فهد الاسلمي]

بودنا ناخذ منك اكثر متأمل ولكن لك الحرية عزيزي .. على كل يعطيك العافيه وماقصرت كتبت وابدعت صح لسانك .... اما عبيدالله عساك على القوه ...وو وش بقول وشبقول اقول .. .





انا جيت البديل اللي نوى اللعبه بعد تدريب =
والضرب بالميدان ... والدنيا كفى الله شرها
عبيدالله خصيمك بثّ بأعذاره ولا به عيـب =
ياوافي الميزان ... والدنيا كفى الله شرها

[((بعيدالنظر))]

أخوي متأمل مرحبابك ملاااايين وعساك بخير .. هذا الهم وعذرك معك وكفيت ووفيت وبيّض الله وجهك ..

أخوي فهد الأسلمي / كلكم غالين وحياك الله والقاف إعتبره على أوله لكن إنتبه لاتكرر بعض القوافي اللي سرت يالوافي .



إن جا فهد وإن راح متأمل على الصدر الرحيب=البيت له بيبان .. والدنيا كفى الله شرها

الفرق مابه فرق لانجمٍ ولاسهمٍ عطيب=ماني بهم بلشان .. والدنيا كفى الله شرها

[فهد الاسلمي]

عبيدالله خلاص توبه لله اني اعوده ...:) عوذا انا كل ما ابتسمت كود اجوّد عقالي اذل انوه يقع :chinese:




وبك البقى يا شاعرٍ يلعب على الوزن الرهيب =
معيّر الاوزان .. والدنيا كفـى الله شرها
عبيدالله يوصيني بميقافٍ عليها ريب =
يا مناشب الشيبان .. والدنيا كفى الله شرها

*******************************************

أما عاد هذه مناشب الشيبان ...حكاية :) :) :) :) :) :) :)

[((بعيدالنظر))]

هلا وغلا يافهد ..
قصدي تنتبه ياشايبنا .والعقال يابعد حيي خلوه للشباب .
إستلم لاهنت يالأسلمي..
أهل المثل يقلون تكفيك الإشاره ياللبيب=وفلان مثل فلان .. والدنيا كفى الله شرها

أسلم لهم تاريخ وأنته ياعجايب ياعجيب=تضحك بغير أسنان .. والدنيا كفى الله شرها

[فهد الاسلمي]

تر سالفة العقال هذه معي مبطي ... ومقصدي به هذه -- > :) تقل يبي يقع عقالوه يابعد حي ... والقلوب اصحاب والشك زايل

وصح لسانك يابعدي .. استلم لا هنت :-




الشعر الاسود يا عميلي ياخذ ايام ويشيب =
لاتوقد النيران .... والدنيا كفى الله شرها
الله يسلم ربعنا تهدي لنا السن الذهيب =
بطلب لك الغفران .. والدنيا كفى الله شرها

[((بعيدالنظر))]

أبد يالغالي كلامك مابو شك .
والمقصد أموزح معك .

إستلم يالغالي لاهنت :luvlove:


ماني غشيم تعلمه والعمر مدري وش يجيب=أشك فيك أحيان ..والدنيا كفى الله شرها

يالأسلمي لابد ماتصبر رضا ولا غصيب=دنيا فرح وأحزان .. والدنيا كفى الله شرها

[فهد الاسلمي]

بعدي والله العرابي ..... استلم لا هنت :-









اما الرضى ولا الغصب مابه غصايب يالحبيب =
ماني لها زعلان .. والدنيا كفى الله شرها
مثل الشمال اللي تخبر عسرٍ يسلم للطليب =
يوم انكسر خسران .. والدنيا كفى الله شرها

[((بعيدالنظر))]

عساك تسلم يالغالي ..

وإستلم لاهنت

ماهو بكيفك رد سيفك في جفيره ياشبيب=العلم مسّ بطان .. والدنيا كفى الله شرها

الوقت الأول راح لا تطلع على المنبر خطيب=الذيب يرعى الضان ..والدنيا كفى الله شرها

[فهد الاسلمي]

صح لسانك العرابي استلم لاهنت




هذا البلا يا الاجودي الطير ذلّ من الخريب
قم اكفخ الجنحان .... والدنيا كفى الله شرها
اللي يبي العليا لزوم انه عليها ما يهيب
واللي جلد ضميان .. والدنيا كفى الله شرها

[سرحــان]

متأمل مشكورررر وماقصرت



والخير والبركه في عبيدالله وفهد الاسلمي



الله يعطيكم العافيه


متابع وبالصف الاول وهذا ابو غازي معي

[حمود الشمري]

ياسلام عليكم شعرا وافين امعنا الكلمه


والله لايهينكم

[فهد الاسلمي]

بعـــــــــــــــــــــــــــــــدي سرحــــــــــان والله سمي الذيب


عندك الصفوف جوّدها


لاخلا ولا عدم تسلم على مرورك وتشجيعك

[فهد الاسلمي]

مشرفنا حمود الشمري مرورك يشرفنا

وتشجيعك لنا يحفزنا

عشت ودمت لاخلا ولا عدم

[((بعيدالنظر))]

أخي الرائع والجميل / فهد الأسلمي
بيّض الله وجهك على إكمال هذه المحاوره بهذه الروح الجميله وهذا التفرد .. والحقيقه إن الأخ متأمل كان أيضاً ذو خلق وبعد نظر وأنت كذلك يا أخ فهد . وأتمنى أن أكون قد نجحت ولو بنسبة الواحد بالميه في هذه المحاوره .
لكنني لا أنكر أنني إستفدت منكم جميعاً الكثير .. وربما أتهم نفسي بالتقصير . لكن ظروفي أخرتني عن متابعة المحاوره . وأحببت أن أشكركم وبإذن الله سيكون لنا لقاءات أخرى هنا في مضايف الغانمين .

والشكر موصول للجميل في حضوره المتجدد معنا بنوره / سرحان الذي تابعنا من بداية هذه التظاهره التي أعتبرها إختبار لي وأنتظر نتيجته ..

وللأخ مشرف مضيف المحاوره قبلات التقدير على دعمه لنا وحضوره وإشادته وشهادته وأعتبرها نجاح لنا جميعاً ..
تحياتي لكم أحبتي وأتمنى أن نكون قدمنا مايحوز على القليل من تطلعكم ورضاكم ..
أخوكم / العرابي

[فهد الاسلمي]

الاخ العزيز والغالي ... عبيدالله العرابي اتحفتنا وانا من يشكرك على إتاحت الفرصة لي بأن العب مع شاعر يمتلك هذه الثروة اللغوية التي طالما حلمت بأن اكون احد ممتلكيها ... فهنيئا لك بها يا عبيدالله .... تقبل من اخوك اجمل باقة ورد معطر بريح الجوري على هذا الابداع...



على نهج المضايف نختم اللعبه ياذا اللعيـب =

والحكم للعربان .. والدنيا كفى الله شرها

من بعد زلات الوسم نبحث عن الروض العشيب =

نعلق الطلّيان .. والدنيا كفى الله شرها


رسالة شكر اوجهها لجميع الاخوان الذين شاركوا هذا الموضوع في طرحهم وإرشاداتهم حيث

اضرموا بتعليقاتهم نار القوافي لينتج عنها تلك الابيات التي طالما اسعدتنها كثيرا ... ورسالة شكر

للذين قاموا بالمرور ويكفينا منهم قراءتهم له فلكم منا جزيل الشكر


اخوكم / فهد الاسلمي

[متفاائل]

عبيد الله ،،، ومتأمل ،،، وفهد

الف صح لسانكم على ماقدمتم من روعه شعر المحاوره


الله يعطيكم العافيه ولو اننا متأخرين ولكن فرضتم علينا الرد لانكم تستاهلون
وياليت ماتبطون علينا بمثله لاهنتوا

[الأصيل]

حمل الرايه عبيدالله العرابي

صال وجال

وفهد الأسلمي ثاااابت ثبوت الجبل


رووووعه

والحكم للعربااان

العربان يقولون / صح لسانكم كلكم

[الاصمعي]

إبداع لا متناهي لله دركم

عبيدالله العرابي شاعر متمكن جداً :thumb:

فهد الأسلمي صاروخ الشعر القادم :thumb: <<روعة وخيال خصب وجزالة تجبرك على المتابعة والتلهف لما سيأتي به وفوق هذا عقال مايل:)

تحياتي

[سعد الحامد]

ماهو بكيفك رد سيفك في جفيـره ياشبيـب
العلم مسّ بطان .. والدنيا كفى الله شرهـا

الوقت الأول راح لا تطلع على المنبر خطيب
الذيب يرعى الضان ..والدنيا كفى الله شرها

وانا اشهد ان عبيد الله مايلحق له طرف
صح لسانك مليون والحقيقة انها متعه من بدايتها لنهايتها

لا تبطون علينا