للرجل : ماذا تريد من المرأة ؟؟

[الجازي]

الظاهر هذي أول مرة أعرف أكتب عنوان سنع :) الله يستر عاد لايطلع الموضوع ماهو بيم السنع :)

طرى على بالي هالموضوع بعد ماذكرت سالفة واحد من ربع أبوي ومن أصدقائه المقربين يوم جاء عند أبوي يشتكي له من حياته مع زوجته ,,

طبعاً الشكوى ماهيب رسمية :) بس جت من عرض السواليف والفضفضة على قولتهم :)

من إيش يشتكي بالضبط ؟؟ هذا ماستعرفونه في الحلقة القادمة :) >>> سيلفر في جزيرة الكنز :)

شيء طبيعي لو كان يشتكي من كثر مشاويرها أو كثرة طلباتها أو إنها قلق يعني حنّانة ورنّانة >>>> أوصاف مسكتة :)

أو إنها مثلاً عجازة أو مشاكسة أو عنيدة أو مسيطرة ومستبدة أو مهملة لزوجها أو أو أو ... إلخ من قائمة الصفات العسل :)

لكن صاحبنا هذا ,, قصدي صاحب أبوي :) ,, مايشتكي من هالأشياء ,, بالعكس هو يشتكي من عكسها !!

يعني شلون ؟؟

هذا ماستعرفونه في الحلقة القادمة :) >>>هالمرة من مسلسل عدنان ولينا :) >>>>> مصلت الحركة عارفة ,, بس مدري تسنها جازت لي :) :)

أبد ,, كل السالفة إن الأخ يشتكي من مثالية زوجته ,, يقول عنها بعظمة لسانه على قولة المصاريا >>> مع إن اللسان ماله عظم بس مضطرين نجاريهم ونشلح أمثلتهم للضرورة القصصية :)

يقول : عمرها مارفضت لي طلب ,, كل ماطلبت منها شيء قالت : أبشر ,, إن شاء الله ,, سم ,, مايصير خاطرك إلا طيب ,, ولا يهمك ,, اللي تبيه يصير ,, أهم شيء إنه يعجبك ويريحك .... إلخ من الردود المؤدبة والمطيعة :)

يعني عمرها ماقالت لي : لأ ,, أو صارحتني بشيء مايعجبها ,, أي شيء أجيبه أو أسويه أو أشتريه تقول إنه أعجبها,, مع إني أحياناً (( والكلام له مب لي :) )) أحس إنه ماجاز لها ,, بس عمرها ماصرّحت بهالشيء أو بعدم الرضا ,, وأنا بصراحة مليت من هالعيشة ..

قال له أبوي : أنت مهبول !! >>>>>> تسن أبوي متعقدن من أمي :) عاد والله أمي عسل وش حليلها :) >>> إلا ماتسني نسيت الموضوع وبديت أطلّع فضايح أهلي :) ,, خلوني أرجع للسالفة الأصلية أصرف :)

نرجع لـ قال أبوي : أنت مهبول !! ,, هذي حورية ماعاد تلقاها في هالزمن ,, حافظ عليها يالخبل (( خبل ؟؟ عادي يمون على خويه :) )) ,, تمسّك فيها وعضّ عليها بالنواجذ >>>> ماش سالفة العض ماجازت لي :) تسن فيها دموية شوي :) >>>> تكفين يالرقيقة :)

قال صديقه : والله ياأبو فلان >>>> فلان هذا هو أخوي الكبير :)

مليت من هالحياة ,, أنا أبي وحدة ترد علي الصوت ,, ما أبي أسمع صدى صوتي >>> مشروع أغنية :)

أبي أسمع صوت جديد ورأي ثاني ,,أبي وحدة تعطيني رأيها بكل صراحة حتى لو كان عكس رأيي ويخالفني 180 درجة ,, وحدة تشاكسني ,, تعاندني مرة وتخالفني مرتين ,, تزعل مني وأزعل منها ,, يتغير جو البيت شوي ,, أما كذا أحس إني عايش كأني سي السيد أربع وعشرين ساعة

>>>>> ليت من يعطيها من يبسة راسي شوي عشان يعرف طعم المشاكسة ويقدّر النعمة اللي عنده ويحرّم يتميلح مرة ثانية :)

قال أبوي : الله يخلف عليك ,, إحمد ربك بس,, الناس مايلقون مثل هالعينة الحين ,, والله بكرة لو تطيح لك في وحدة من هاللي تبي إن تندم على الساعة اللي هوجست فيها مثل هالهواجيس ,,

النهاية ,, >>>>> خلاص مافيه تابعونا في الحلقة القادمة :)

هذي هي خلاصة القصة أو تقدرون تقولون هذا اللي وصلني منها >>> كل هالبربرة وخلاصة :) :)

طبعا القصة حقيقية ميتين بالمية وسامعتها بإذني من أبوي مباشرة>>> أجل بعيني :)

بس أكيد حطيت فيها بعض البهارات والتوابل الهندية للحفاظ على النكهة القصصية :)

بالنسبة لزوجته أنا أعرفها مثل ماأعرفكم :) >>>> هذا إن كاني أعرفكم :)

تزورنا في المناسبات ,, إنسانة أخلاق وذوق وأدب وحشمة ودين وثقافة وفي نفس الوقت موظفة ,, يعني مافيها شيء يعيبها :)

بس تبون الصراحة ,, بعد ماحطيت نفسي مكان زوجها ,, بيني وبينكم عذرته ,, حسيت بمعاناته الحقيقية ,, لأنه فعلاً هالوضع يجيب الملل ,, وتطلع حياته كلها روتين بايخ ,, كأنه مدير شركة ,, يعني اللي يشوفه يحسده على هالعيشة وهو مايدري عن حقيقة الوضع :(

السؤال الحين اللي يطرح نفسه >>>> خطيرة يطرح نفسه ذي :)

المعروف أو على الأقل اللي كان معروف عندي ,, إن الرجل أو الزوج بالأخص يحب في زوجته طاعتها له في كل أوامره ونواهيه وإنها تسوي له اللي يحب وتترك اللي يكره ,,

لكن بعد هالسالفة اختلّت الموازين عندي ,, وحسيت إن فيه حلقة مفقودة بين الزوج والزوجة سرّها موجود عندكم يالرجال ماراح يدلنا عليها غيركم ,, عاد عطونا وجه وتكرموا بأرائكم ونظرتكم حول هالموضوع ,,

أتّينشن للصبايا :) >>>>> ياحبيلي وأتّينشني ماشلحتها من أفلام كرتون أبد :) :

اصبروا لاتطبون بوسط الموضوع وتعلقون عليه ,, خلونا نسبر أغوار هالرجال ونطلع اللي في بطونهم ,, وبعدين نعقد اجتماع مغلق نتفق فيه على تكتيك مناسب للرد عليهم :) :) >>> مؤامرة اغتيال :)

[المطنوخ]

انا اقول لجماعة ابناء آدم :)

حفظا على رونق الرجال :) <<<<ودحرا لشفاية النساء n)

وحتى لا نكون كتابا مفتوحا كل من هب ودب من النساء يقرأننا<<< صح هالكلمه؟؟

فلنصوت ضد انكشاف اسرار معشر الرجال

وبصوتن واحد تهتز له شباصات وبكلة كل بنت n)

نقوووووووووووووووووووووووول

تبطن عظم وانت ما عرفتن شين عننا :thumb:

وبهذا اقول لأي رجل :)

يريد ان يشارك بالموضوع ان يلعب بحسبة الحريم

ومايعطيهن اللي يبونوه ويدحر شفايتهن n)

والله من وراء القصد :)

[مجموعة إنسان]

8
8

تروووه ينكّت

لاحد ياخذ حكيه جد :hammer:

النطول نطووووول :p:

..


ريّومــه

هذا أنا طبّيت

بس ماعندي ماأقوله

وأنتظر معك ومع الباقيات آراء الأخوان

:brows:

[الجازي]

النطول


بالله أنتم عندكم أسرار !! :)

الله يرحم حالكم بس :)

أقول هات اللي عندك واذكر الله :)

مجمج

ياحبيلتس ياشيخة :)

ياأنا متلهفة بقوة لسماع تعليقك ,, بس ان شاء الله أسمعه في أقرب فرصة :)

[الشمري محمد فهد]

بإختصار ..

محد يحب الروتين ..

[راعي الوقيد]

هذي ايه ازين هي والا اللي كل شوين ابومحمد تر مابووووهـ رز n)

اذا جاء يرتاح ابومحمد تر مابوووووهـ دجاج وإذا جاب الدجاج تنطحه

بباتريوت تررررررررر ماعندنا لحااااااام << لحم بس مع الصوت طالت:)

وعلى هالدقه الى ما تطلع رووووحه !.!.

اما الأجـوديه << اسميه اجوديه على نياته صافيه :tongue:

ما تقول له ما عندنا شيء ابد كلش عندنا عسى الله يطول لك ...الخ

الريم ،،،

سلمي على الشايب وخليه ينصـح رفيدزهـ يطـق الثانيــة n) n) ابـرك

على شان يعتـدل الميـزان عندهـ << اخاف تصير اردى من الأوله ..

عاااااااد هذي فيدت اللي يقول !! قال : طلقه وخذ اخته ...

قال : الله يلعنه ويلعن اخته:)

وش المطلــوب بس قولي لي وانا اهـل السـالفــة :a:

سلااااااااااااام ...

[عبدالله المهيني]

تصدقين يوم قريت موضوعك هذا

تذكرت مسلسل نورة :) :) :)


/
/

عودة لسؤالك

صحيح الرجال منا يحب الزوجة المطيعة له

ولكن الانقياد التام أمر يرفضه الكل لا الرجال ولا النساء

يعني هل الرجل كامل ؟ أي يتصف يصفة الكمال ؟

أجزم بأن الجواب لا الكمال لله سبحانه وحده

إذا لماذا لا يكون لهذه الزوجة رأيها خصوصاً في أمورها مع زوجها

أعتقد بأن الرجل بهذه الحاله لن يكون سعيداً أبداً

بوجه نظر أخرى للمقتبس أدناه



وفي نفس الوقت موظفة ,, يعني مافيها شيء يعيبها :)

^
^

برأي يخص عبدالله المهيني وحده دون غيره

يرى هذه النقطة عيب في الزوجة تحسب ضدها لا لها

قد يكون غيري يراها ميزة لابد أن تمتاز بها من سوف تكون زوجة المستقبل له

ولكن لكل منا رأيه فأنا أخافه الرأي 180 درجة على قولتك


تشاوو

[ريم شمر]

تنفيذا لطلب شيختنا n)

انا باخذ لي كرسي

واقعد عليه واتفرج بس ماضمن اني ماتلقف

قبل لانعقد الاجتماع :a:



تعرفيني ريومه انا ماصبر :puzzled:





.

[الاصمعي]

واحد من ربع أبوي ومن أصدقائه المقربين يوم جاء عند أبوي يشتكي له من حياته مع زوجته ,,

لكن صاحبنا هذا ,, قصدي صاحب أبوي :)

نرجع لـ قال أبوي : أنت مهبول !! ,, هذي حورية ماعاد تلقاها في هالزمن ,, حافظ عليها يالخبل (( خبل ؟؟ عادي يمون على خويه :) ))
قال صديقه : والله ياأبو فلان >>>> فلان هذا هو أخوي الكبير :)

>>>>> ليت من يعطيها من يبسة راسي شوي عشان يعرف طعم المشاكسة ويقدّر النعمة اللي عنده ويحرّم يتميلح مرة ثانية :)

قال أبوي : الله يخلف عليك ,, إحمد ربك بس,, الناس مايلقون مثل هالعينة الحين ,, والله بكرة لو تطيح لك في وحدة من هاللي تبي إن تندم على الساعة اللي هوجست فيها مثل هالهواجيس ,,

طبعا القصة حقيقية ميتين بالمية وسامعتها بإذني من أبوي مباشرة>>> أجل بعيني :)

بالنسبة لزوجته أنا أعرفها مثل ماأعرفكم :) >>>> هذا إن كاني أعرفكم :)

وفي نفس الوقت موظفة ,, يعني مافيها شيء يعيبها :)

:)
^
^
الإقتباسات الي فوق نوع من الفذلكه والتذاكي والفلسفه ماله أي علاقة بما سأعلق به على الموضوع:wink:

الموضوع جيد ومثل ما يقولون أول مراحل العلاج الإعتراف بالمرض:)

وبعد أن أجرى الله هذا الأعتراف "عدم فهمهن لآدم" على لسان المتحدثة بإسمهن وكانن يتهمن آدم من قبل بعدم فهم حواء:)

وبما إن إختنا الريم طلبت العلاج بإسم حواءn)

نقول بأن ما يريده الرجل من المرأه هو فهمه أولاً ومن ثم موافقته:)

يعني تفهم ما يريد وماهي ميوله وما الصفات التي يحبها وأولوياته في حياته البيتيه وخارج البيت وهكذا,,

بمثالك السابق يبدو إن زوجة صديق أبوك لم تفهمه ولم تحاول أن تفهمه بل إكتفت بالطاعة الروبورتيه"الرجل الآلي" وهذا ما سبب ضيق زوجه منها.

طبعاً لو كان الزوج جدوله مزدحم وهو بنفس الوقت من النوع المتسلط لأعجبته جداً مثل الزوجة التي ذكرتي الا أن تكون درويشة مرة عاد هذي مابه طب:)

تحياتي

[الجازي]

راعي الوقيد ,,

طيب أنت حط نفسك مكانه وعلمنا بانطباعك :) يعجبك الوضع وإلا لأ ؟؟ :)

المهيني ,,

لاتكفى :) لاتجيب طاري نورة :) تراها محومتن تسبدي :)

والبلشة اني أتابعها غصبن علي من حومة التسبد :) كل يوم أقول كودهم اليوم يصيرون واقعيين :)

ومن بدا المسلسل الين خلص وهم على هالسماعة ماتعدوها :)

وربي قصة تقرف :)

<<<< أما لو يطيح وجهي ويطلع مسلسل نورة ماهو اللي ببالي :)

وبالنسبة لكلامك عن الوظيفة ,, أنا ماجبتها في سياق إنها خاصية تميزها عند زوجها لأ !!

أنا قلت انها موظفة يعني عندها غير ضغط البيت ضغط العمل ومع كذا ماتغيرت على زوجها أو صارت نفسها خايسة مثل بعض الموظفات المتزوجات :) :)

هذا قصدي من هالنقطة :)

شكرا لكم على اثرائكم للموضوع :) >>> أخلاق هالآدمية :)

[تركواز]

:wavey:<< رافعة يدها بتشارك يوم تسمح لها الابلا :290r:

بس موظفة و مطيعة و هادية ماش تسن سالفتس ريومة مادخلت مزاجي :232r:

الواحدة مهما كانت طبيعتها والله يالوظيفة تخليها :2gunsfiri

ما عمري قابلت موظفة حليوة ومطيعة الا كلهم قد حالهم:201r:

[عبدالرحمن]

اهلا بشاعرتنا الريم وهذا الموضوع المهم.

حقيقة ان مناقشة مثل هذه المواضيع مفيدة جدا

خصوصا للشباب - الجنسين - لأسباب كثيرة واهمها

ان اغلب من في الموقع هم من بيئة واحدة وبالتالي

فهم مشاكلهم مشابهة لبعضها ان لم تكن واحدة ؟!

اما هذه الزوجة - الظل - وزوجها - المشاكس-

كثير من الازواج لا يرضى بأن تكون زوجته

كقطعة من قطع اثاث البيت ؟ بل يريد زوجة تشاركة

افكارة وتبادل معه مناقشة بعض الامور التي تتعدى الشأن البيتي

الى ماهو اكبر من ذلك بكثير.

ويوجد بالمقابل من الازواج من لا يريد من زوجته

غير تطبيق الاوامر بحذافيرها وبدون مناقشة !!

قرأت قبل مدة استبيان

ولفتت نظري فقرة فيه تقول هذه الفقرة

انه يوجد الكثير من الزوجات يفضلن

الزوج العنيف الذي يستعمل معهن الضرب بدل العتاب!!

ويبررن اسباب هذا التفضيل انهم يشعرونهن بأنوثتهن!!

اخت الريم اكرر الشكر 0

[الجازي]

القلب العاصف ,,

ترانا مااحنا في الفصيح :) يعني هنا تقدر تحتسي بالعامي بدون رقابة :)

وراك عفستني جاية برد عليك لقيتك شاطفن المثل اللي قاطتن فيه أمي مع أبوك في حقوقه المحفوظة :) بس أمي تزيد : (( إن الله أشا وأراد :) ))

المهم متى مارجعت بتلقى مكانك محفوظ :) >>> بالله :)

في انتظار سماع رأيك حول الموضوع بالتفصيل ,,

[الجازي]

الإقتباسات الي فوق نوع من الفذلكه والتذاكي والفلسفه ماله أي علاقة بما سأعلق به على الموضوع

وأنا من الصبح أعيد وأزيد فيها على بالي فاهمة ودي أكتشف الشيء اللي ناوي تعلق عليه :)


الموضوع جيد ومثل ما يقولون أول مراحل العلاج الإعتراف بالمرض:)

أهم شيء نحدد مكان المرض :) فينا ولا فيكم :)


وبعد أن أجرى الله هذا الأعتراف "عدم فهمهن لآدم" على لسان المتحدثة بإسمهن وكانن يتهمن آدم من قبل بعدم فهم حواء:)

يازووووووووووووووووووووووووول :) آدم عصمان :)


وبما إن إختنا الريم طلبت العلاج بإسم حواءn)

نقول بأن ما يريده الرجل من المرأه هو فهمه أولاً ومن ثم موافقته:)

يعني تفهم ما يريد وماهي ميوله وما الصفات التي يحبها وأولوياته في حياته البيتيه وخارج البيت وهكذا,,

حلو ,, كلام مقبول ومعقول ,,


بمثالك السابق يبدو إن زوجة صديق أبوك لم تفهمه ولم تحاول أن تفهمه بل إكتفت بالطاعة الروبورتيه"الرجل الآلي" وهذا ما سبب ضيق زوجه منها.

طيب مايعتبر من الظلم أن يعاب عليها حسن خلقها مع زوجها ,, يعني لأنه مايعيش المشاكل ولا النكد يطلع الخلل والعيب فيها هي !!؟ :(


طبعاً لو كان الزوج جدوله مزدحم وهو بنفس الوقت من النوع المتسلط لأعجبته جداً مثل الزوجة التي ذكرتي الا أن تكون درويشة مرة عاد هذي مابه طب:)

لأ ,, هي فعلا إنسانة محترمة وتفرض على اللي يجالسها إنه يحترمها ,, ولو انها ماتناسبني أبد :)


تحياتي

شاكرة لك يابو خالد مداخلتك :)

[الجازي]

<< رافعة يدها بتشارك يوم تسمح لها الابلا

توتة :) <<<< حامت تسبدي عجزت ألقى لتس دلع مناسب :)

يابعد رزة هالاصبع بس ,, يلوموني في الطالبات المثاليات :)

اصبري شوي بس ولتس مني أخليتس تبردين قليبتس من معاشر الرجال :)


ما عمري قابلت موظفة حليوة ومطيعة الا كلهم قد حالهم

لا والله فيه ياتركواز :( الا بعد يرفعون الضغط من هدوئهم وبرودة أعصابهم :puzzled:

تجين مقلعة تبين أحد يبرد قلبك واذا دريتي طحتي في وحدة تخليك تفحطين في مكانك من تطنيشها وترويقها :) >>>متعقدة أيام الدراسة :)

المهم هالسالفة يبيلها قعدة بس اصبري نعقد مؤتمر الحوار الوطني للنساء :) بعدين نتفاهم :)

[ريم شمر]

8
8
8
البنت هذي تبي لها طق الين تقول بس
على هالتطنيشه :590r:

هين ريموووه الوعد اذا جيت من سويسرا :147r:

[سلطان الشمري]

اللهم سلّم سلّم..


أما قبل ../

ياريم .. هذي..وين تنلقي في زمننا الحالي..؟!! :)


لابد وانها حاله خاصه ونادره جداً لذلك يجب مراعاة الأمر على انها

( طفرة جينيه) ... :)

لأنه اغلب بنات حواء ذوات طبائع متشابههــ .. حنّانات ورنّانات.. :a:

الرجل يريد من زوجتهــ.. المشاركه والنقاش الودي والأخذ بالراي والراي الأخر

لايريد أن تكون (تحفه) ثابته يتزين بها البيت .. هذه المرأه سلبيه بلا شك

بغض النظر عن حرصها على زوجها وبيتها وعدم خلق المشاكل,, فبطريقتها تلك تخلق الروتين الممل جداً ,,

لماذا تجعل نفسها (نكره) امام زوجها,,لماذا لاتعبر عن رأيها ,,

ومع ذلك فهي نادرة الوجود ,, او تكاد تكون كذلك ..لأن البقيه الباقيه من بنات جواء يأخذن مايردن ومالا يردن .. سليطات اللسان,,ناكرات للإحسان ,,لستُ انا من قال ذلك ولكن ..

حينما سقط حكم احد الولاة .. لا اذكر اسمه .. ربما ذكرتموني..
دخل السجن وزراته زوجته وبنتاه ..

واخذت تشمت وتتكلم وقالت :لم ارى معك يومٌ جميل في حياتي..!!!

فقال لها ولاحتى يوم الطين..

هل تتخيلون ماهو الطين ..؟؟!!

الطين = زعفران وازهار وعطورات خُلطت جميعها لتكون لهم طيناً يلعبون به..!!

يا لهذا الإجحاف الإنثوي..!!

<<<<ماتشوف نفسك طلعت عن الموضوع :)

>>>الاوالله بس ياخي غصب :smileyb:


لن اطيل.. ولكن المرأه مطالبه في بيتها ..بكسر الروتين..بطريقتها..

لا اقول اجعلي البيت معقل للنزاعات والمشاجرات ولكن لكي تكون الحياة جميله قوم بخلق جو مناسب لزوجك بعيداً عن التذمر..قريباً من النقاش الهادئ الجميل

ابدي رايك بعقلانيه ,, افعلي ماتريدين مع ما يتوافق مع اراء زوجك ,,

شاركيه في همومه ,, ارفضي مالا تريدينه انتي..بكل أدب,,

و (ذرابه) <<<نعن ام الفصحى :(


((* والحل في نظري *))
ان يخبر هذا الرجل زوجته ..بما يريد .. وما يتمنى بطريقة جميله ,,يعودها على أن تبدي رأيها بكل صراحه ووضوح..أن تقول ماتراه مناسب ,,


فالنتيجه أحد الأمرين احلاهما حلوووز


إما أن تغير من طريقتها وتكون كما تريد وبذلك منّ الله عليك بنعمه لاتحصى وجوهره نادرة الوجود

_ مع احترامي لبنات حواء n) وجل تقديري.._ :)

وإما أن تظل كما هي فقد منّ الله عليك بهذه الزوجه الطيبه وهي بذلك خيرٌ من غيرها بسجاياها الجميله..




<<<<صفاً الى صف..معك ايها الرجل :thumb:



تشااااااااااااااااااو طااااااااااااااااااااااااااط :luvlove:

[الشمري محمد فهد]

مرحبًا..

في البداية , جميع ما قرأتيه و ما ستقرئينه من أراء تمثل وجهة نظرنا كأفراد

لا كمتحدثين رسميين عن الكائن المسمى بـ " الرجل " ..

سألتي عنه , ماذا يريد من المرأة .. أو بمعنى أدق من الزوجة ..

وساجيبك من وجهة نظري بانه يريدها متزنة الطباع , لا تقود و لا تُقاد ..

ترخي إذا شد و لا يمانع - بعضنا - أن تشد إذا ارخى ..

لا يريدها بلا شخصية - كصاحبتك - بحجة الأدب و الطاعة .. إلخ مع الزوج

ولا مسترجلة متسلطة يُقاس لسانها بالأمتار ..

و تذكري أن الأبناء تتشكل شخصياتهم على الأغلب من أمهاتهم قبلاً من أبائهم ..

يريدها قاتلة للروتين في حياته لا منتجة له ...

يريد شخصًا يحس بوجوده , و يتفاعل معه لا دميةً يلهو بها إلى حين ..

وكإجابة عن سؤالك للأصمعي :

" المرض فينا و فيكن " <<--- بس على الأغلب يصيبكن انتن أكثر http://smilies.sofrayt.com/%5E/1/rolls.gif

تحية ..

[فهد المويهي]

الريم ...


قبل كل شي بصراحه انا اشارك والدك رايه لما قال عن خويه يامهبول :)


والشي الثاني وبكل صراحه


(( بني آدم مايملا عينه الا التراب ))


(( وفاقد الشي مايعطيه ))


انا اعتبرها مثاليه وانسانه راقيه بكل ماتعنيه الكلمه


من وجهة نظري ياليت تكون عندي وحده مثلها


يعني انتِ من كلامك انها ماتظايقه ولا رفضت له طلب .... اجل وش يبي


بس شكله يحب المشاكل هالشايب اللي قال عنه ابوك مهبول


على العموم ماابي اطولها وهي قصيره


الواحد او الوحده :) :) مايملا عينهم الا تراب فقط لاغير



شكلي ابي اطولها :)


والا تدرون شلون خلاص


بس الريم ...... برايفت .......


وجهة نظري خاصه ولا اتكلم عن جميع الرجال :)



شكرا



فهد المويهي

[الجازي]

أخوي عبدالرحمن ,,


اما هذه الزوجة - الظل - وزوجها - المشاكس-

هو بصراحة ماهو مشاكس بالعكس هادي وحبوب >>> بحسب معرفتي له أيام الطفولة :)

الرجل أتوقع إنه يشتكي من الملل والهدوء السائد في بيته واللي صار يعتبره نوع من السلبية في شخصية الزوجة ,,

أنا أحس إنهم كلهم مظلومين ,, هو بالروتينية اللي صارت في حياته ,, وهي بعدم ارتكابها لأي ذنب أو تقصير ومع ذلك يراها مقصرة :(



انه يوجد الكثير من الزوجات يفضلن

الزوج العنيف الذي يستعمل معهن الضرب بدل العتاب!!

ويبررن اسباب هذا التفضيل انهم يشعرونهن بأنوثتهن!!

:a:

أنت متأكد من هالاستبانة :)

يعني ممكن أصدق واحد من مية بالمية إن فيه نوعية من هالنساء تفضل الضرب على العتاب :) وأتوقع إنهم ساديات :)

لكن مافيه أمل أصدق إن الضرب يشعرها بأنوثتها :puzzled:

يمكن يشعرها برجولته :) وهذي بعد همجية بس يالله عن قولة إنه متوحش :)


اخت الريم اكرر الشكر

وأنا أشكرك أخي الكريم على مداخلتك الجميلة ,,

[الجازي]

ريومة ,,

وش أسوي والله دخلت من جهاز ثاني بس فيه عرق نذالة مايطيع يرسل أي رد :)

هذاني جيت ,, وتراني خلاص عطيتكم الضوء الأخضر للرد على معشر الرجال ,, لأني عارفتكم قليلات صبر وأخاف تعطوني ركبة وتردون من وراي :) خليني أحفظ موية وجهي أصرف :)

[الجازي]

لابد وانها حاله خاصه ونادره جداً لذلك يجب مراعاة الأمر على انها

( طفرة جينيه) ...

المشكلة هالطفرة الجينية ماجازت لزوجها :(


وإما أن تظل كما هي فقد منّ الله عليك بهذه الزوجه الطيبه وهي بذلك خيرٌ من غيرها بسجاياها الجميله..

يعني ماسوينا شيء ,, من يقنعه هو ؟؟

شكرا على المداخلة أخوي نبراس

[المخاوي]

وش السالفه وين راح ردي :a:
والا انا متوهم :)

[الجازي]

^
^
^
ماش ماتليق عليك الزوالة :) خلها لأهلها :) >>>> يعني أنا وبس :)

وارجع الله لايهينك اكتب ردك من جديد وعطنا رايك بالموضوع :)

[الجازي]

وساجيبك من وجهة نظري بانه يريدها متزنة الطباع , لا تقود و لا تُقاد ..

ترخي إذا شد و لا يمانع - بعضنا - أن تشد إذا ارخى ..

لا يريدها بلا شخصية - كصاحبتك - بحجة الأدب و الطاعة .. إلخ مع الزوج

ولا مسترجلة متسلطة يُقاس لسانها بالأمتار ..

و تذكري أن الأبناء تتشكل شخصياتهم على الأغلب من أمهاتهم قبلاً من أبائهم ..

يريدها قاتلة للروتين في حياته لا منتجة له ...

يريد شخصًا يحس بوجوده , و يتفاعل معه لا دميةً يلهو بها إلى حين ..

وكإجابة عن سؤالك للأصمعي :

" المرض فينا و فيكن " <<--- بس على الأغلب يصيبكن انتن أكثر http://smilies.sofrayt.com/%5E/1/rolls.gif

تحية ..

إجابة شافية ووافية أخي القلب العاصف ,,

لكن أين دور الرجل في كل مايريده من المرأة ؟؟

ألا ترى أن الرجل يسهم بشكل كبير في تكوين شخصية زوجته منذ الأيام الأولى لزواجهما ,,

غالباً ماتكون المرأة عجينة طرية في بداية الزواج يستطيع الزوج تشكيلها وفق رغباته >>> معليش بنات طلعت الفضايح :)

لكنه يسيء تشكيل تلك العجينة فينقلب السحر على الساحر :) ثم يعود باللوم عليها آخر الوقت :(

أما إجابتك على سؤالي للأصمعي ,, فأعتقد أنها تحتاج إلى مراجعة منك :) خصوصاً بعد ردي على كلامك :)

<<<<<<< أحلى ياخطيرة :)

[الجازي]

قبل كل شي بصراحه انا اشارك والدك رايه لما قال عن خويه يامهبول :)

مشكور على المشاركة الوجدانية :)



انا اعتبرها مثاليه وانسانه راقيه بكل ماتعنيه الكلمه


من وجهة نظري ياليت تكون عندي وحده مثلها


يعني انتِ من كلامك انها ماتظايقه ولا رفضت له طلب .... اجل وش يبي


بس شكله يحب المشاكل هالشايب اللي قال عنه ابوك مهبول

معنى كلامك إن الخلل فيه هو :) أجل أنتم اللي فيكم البلا وحنا وش حليلنا :)

أخوي فهد كل الشكر لمداخلتك الكريمة ,,

[المخاوي]

يعني عمرها ماقالت لي : لأ ,, أو صارحتني بشيء مايعجبها ,, أي شيء أجيبه أو أسويه أو أشتريه تقول إنه أعجبها,, مع إني أحياناً (( والكلام له مب لي :) )) أحس إنه ماجاز لها ,, بس عمرها ماصرّحت بهالشيء أو بعدم الرضا ,, وأنا بصراحة مليت من هالعيشة ..

هذي بأي كوكب :biggrin:

قال له أبوي : أنت مهبول !! >>>>>> تسن أبوي متعقدن من أمي :) عاد والله أمي عسل وش حليلها :) >>> إلا ماتسني نسيت الموضوع وبديت أطلّع فضايح أهلي :) ,, خلوني أرجع للسالفة الأصلية أصرف :)

ايييوااا كملي معاتس على الخط :biggrin:


مليت من هالحياة ,, أنا أبي وحدة ترد علي الصوت ,, ما أبي أسمع صدى صوتي >>> مشروع أغنية :)أبي أسمع صوت جديد ورأي ثاني ,,أبي وحدة تعطيني رأيها بكل صراحة حتى لو كان عكس رأيي ويخالفني 180 درجة ,, وحدة تشاكسني ,, تعاندني مرة وتخالفني مرتين ,, تزعل مني وأزعل منها ,, يتغير جو البيت شوي ,, أما كذا أحس إني عايش كأني سي السيد أربع وعشرين ساعة

صراحه معاه حق حتى انا مليت وانا ماني حوله :p:


طبعا القصة حقيقية ميتين بالمية وسامعتها بإذني من أبوي مباشرة>>> أجل بعيني :)
بس أكيد حطيت فيها بعض البهارات والتوابل الهندية للحفاظ على النكهة القصصية :)

وانا اشوف ذبحن العطش :rolleyes:

تزورنا في المناسبات ,, إنسانة أخلاق وذوق وأدب وحشمة ودين وثقافة وفي نفس الوقت موظفة ,, يعني مافيها شيء يعيبها :)

والله اللي جابت تاريخها :smileyb:

وتطلع حياته كلها روتين بايخ ,, كأنه مدير شركة ,, يعني اللي يشوفه يحسده على هالعيشة وهو مايدري عن حقيقة الوضع :(

تصدقين انتس صادقه بالله علميهم :)

السؤال الحين اللي يطرح نفسه >>>> خطيرة يطرح نفسه ذي :)

المعروف أو على الأقل اللي كان معروف عندي ,, إن الرجل أو الزوج بالأخص يحب في زوجته طاعتها له في كل أوامره ونواهيه وإنها تسوي له اللي يحب وتترك اللي يكره ,,

لو ان الدعوى من هذي وجاي كان هوينه :)


لكن بعد هالسالفة اختلّت الموازين عندي ,, وحسيت إن فيه حلقة مفقودة بين الزوج والزوجة سرّها موجود عندكم يالرجال ماراح يدلنا عليها غيركم ,, عاد عطونا وجه وتكرموا بأرائكم ونظرتكم حول هالموضوع ,,

الحلقه هذي يقولون انه بوسط بطن الحوت ولا يطلعه الا المرأه يالله عاد ورنا شطارتكن :)

[الجازي]

^
^
^
الزبدة : ماجازت لك هالآدمية :)

أجل الله يرزقك بوحدة عكسها قل آمين :)

[المخاوي]

لا بالله ربنا وربه الله ماقول به شي انفض جيبي :biggrin:
لكن كواقع نعيشه اليوم هنالك القله القليله النادره :) امثال تلك المرأه حفظها الله من كل مكروه
وبعدين لاتدعين كفانا ماجانا يالله تحمانا :)

[هايس الشمري]

<<<<<<<<جاي مطفي النوووووووور


انا اعتقد مو السالفة سالفة رجل و امراة


هذا طباع يجبل عليها الشخص :)


يعني مرات يكون لك صديق


تريد منه معارضتك احيانا ولكنه لا يفعل حتى في اتفه الاشياء


و على سبيل المثال :)


لي صديق لا يقول رايه في شيء ابد

يعني كل شي بكيفك

لدرجة حتى ان

المطعم

ما عمره قال اليوم نبي نروح المطعم الفلاني او قلت نبي نروح مشوار قال لا فلفلة :)

الوضع ايزي عنده


بس عاد يرفع الضغط والله.

تبي واحد يا قلت نبي ليالي صنعاء قال لا نبي القدس

و اذا قال القدس تروح لليالي صنعاء :)

[الجازي]

المخاوي ,,


لا بالله ربنا وربه الله ماقول به شي انفض جيبي
لكن كواقع نعيشه اليوم هنالك القله القليله النادره امثال تلك المرأه حفظها الله من كل مكروه

أجل الله يرزقك من هالقلة القليلة النادرة أمثال تلك المرأة :)

يسلمو يالمخاوي على التعقيب ,,

الذيب ,,

هذا مع صديقك وارتفع ضغطك :) أجل ماينلام صديق أبوي اذا طفش :)

عموما الصديق فيه حل ,, على الأقل ماهو معك أربع وعشرين ساعة ,, لكن الزوجة هي اللي يبيلها قعدة ,,

يعني المسكينة تعتبر مظلومة لو طفش منها وضاق صدره ,, خصوصا انها ماسوت شيء يستوجب الزعل :(

وفي نفس الوقت يمكن يجرحها لو صارحها بعذروبها وطالبها بالتغيير من هالروتين الممل ,, وأخاف بعد ماتقدر تغير طبايعها وتروح فيها :(

أتوقع ان الحل موجود في يد الزوج بس لازم يكون مع بداية حياتهم الزوجية ,, لأنها تكون قابلة للتغيير وتقبل الحياة الجديدة ,, لكن عقب هالعمر الطويل ماظنيت لهم علاج ,,

مشكور يالذيب على المداخلة ,,