حجاجاوي خلف الكواليس

[الأصيل]

السلام عليكم



بالخير ياعرب

(( ترونن طمعنا بكم ، لكن وسعو صدوركم )):)

************************

أنا ذابحن موضوع هاللي عند قصرانا أهل الشعر الشعبي(النبطي )

هاللي حدرنا ، مابيننا وبينهم ألا مضيفن واحد

(سبحان اللي رفعنا عليهم درجه ):d:

وكل يومين جايبين لهم واحد وجادعينه خلف الكواليس

أنا ماأعرف الكواليس

بس هقوتي أنه مثل السجن الانفرادي :rolleyes:

وأتخيل ( انتبهو لأتخيل ):thumb:

وأتخيل إن اللي خلف الكالوس ( مفرد كواليس )

إنه متلطم وقاظبن قناته بيده ، منبطح بحدا الشعبان ، متولم يبي يظارب:c:

واللي حارق أعصابي إني كل ماأرمع على حدا الشعار

ليوالله أنا مشرّق والحل مغرّب:puzzled:

وبنت الحلال ( الدهور ) ماعمر قالت لي مبرووووك

تسني ذابحن واحدن من جيرانهم :d:

عاد قلت يالأصيل يابوالأصايل

ليه ماتبني لك كالوس صغير (على قد الحال )

وتحط بوووه حد دخاترة الفله

واللي به خير يعرفوووه

***************

للعلم تراهي حلقه وحده بسسسس:)

ولاني معلم بوووه لعقب عيد الضحيه

******************

شروط المسابقة :

3 ـ اللي يعرف الحل : يجاوب ، واللي مايعرفوووه برضه يجاوب

9 ـ يجب الالتزام بجمييييع الشروط التسعه السابقه.

16 ـ الشرط هذا ملغي ( إنت يارقم 16 )
**************************



سلام ياللي يتعب الهيس ممشاك=يابن الكرم والطيب يابو الأصاله
ياللي ركاب المرجلة..تتبع خطاك=يا تاج راس المكرمة والشكاله
ماظنّ يرجع خايب.ن.من تنصاك=يالصاحب الليّ نفتخر في وصاله
عسى ولي العرش يالقرم ياقاك=والعسرِ تلقى اليسرِ دايم بداله
وأقول يامرحب وسهلا وحياك=في شوفتك عيدي..تبيّن هلاله
نرجي وصالك ..ونتحرى هداياك=ونفخر بمضمون الشرف والجزاله


( الله حق إن هالشاعر بالغ بالمدح حيل )

مــــــــــــن هـــــــــــــــــو الشــــاعر ؟؟؟؟








بسرررررعه قبل لايجوننا أهل الشعر الشعبي :055r:

[اليم]

صايم

ولي عوده بعد الفطور

:)

[سلطان الشمري]

اعترض بقوه ابو الاصايل :g:



ياخي اشحليلك اول




وش اللي غير اطباعك امانه قولي اش صاير

..



اقول اعقلوا وخلوا هالسوالف :puzzled:

[بتول آل علي]

ههههههههههههههههههههههههههه


الأصيل و " خلف الكواليس " >>> بس ميد إن تايوان :)


أجل شايلها بخاطرك إنك ما عمرك فزت ؟؟؟


بس يجي دورك خلف الكواليس خمّن صح :)


الا اقول ... مهي أنا اللي خلف كالوسك ؟ :):):)







اللهم سكنهم في مساكنهم :)

[راعي الوقيد]

الأصيــل متعدد المواهب والإبداعات :thumb:

احد إكتشافات ابو اربع طعش الفل حجاجية :awink:

اقول يابو الليد وينهو كالوسكم خلونا نشوف اللي لابد به هو وقناتووه

شاعـرك اللي متغيب حيّرنا كلامك مرة دكتور قلوب ومرة ابو قنااااة ومرة الونش :g:

حيّرتونا مع هالجوع والخرمه :a:

سي لااااااااا مي

[أبو مقرن]

لي نكسة..وحوصة.ن.مانا قربه.. :)
بس ياما أقضي من هاللي بيدي.. :smileyb:
<<<<<متحضن.ن.سطل هالـ(قمر دين)..ويغفج من هاللقيمات :awink: :p:
***
الأصيل..
تحياتي

[ابو غازي]

ياســــــــــــــــلام يالأصيل

دايم وانت اصيل ووافي وهذي والله تســـــــــــــجل لك ياشاعرنا القدير :thumb:

اما الشاعرة الدهووور n)
حيلك بها تراها دايم تتجاهل الكثير وهذا يدل على كبريأها يعني يابازعيم انا الشاعرة وبس >> ودايم وهي متخفية ن خلف الكواليس :g:
يبيه يأدبها الأصيل >>> ههههههههه :p:
ياويحك يالشاعرة :d:

اخلفتن والله مادري وين وجهت المسابقة
علمن يابو مقرن :g:

ههههههههههههه :p:

[الونش]

:) :) :)


يالاصيل نفخر بمثلك وشرواك = ياللي لك بالشعر قوه وبساله
ياصاحبي جعل الرخوم تفداك = ويفداك اللاش وجميع النذاله
شفنا البيوت الشامخه لاعدمناك = ومن حصل شين بالجد ناله
شاعرك بالمدح اجزل وعلاك = وبه من (........) دلاله
واذا الله قسم لنا وعيدناك = نعطيك اسمه ونكتب خواله



:) :) :)

[هايس الشمري]

فيه من اسلوب الشاعر... :)


و فيه من فخر الشاعر... :)



بس اعتقد لاهو الاول ولا الثاني :)


اتوقع





















راجع بس بفكر و اجي :)

[الأصيل]

أخونا الصايم ( اليم )

أفطرت الناس وقربت العشر التوالي ... ويييينك؟ :)






نبراس

لاتزعل يابعد روحي

ترا زعلك غالي

والله ياخوك أنا على قولتك ( عاقل )

لكن هاللي بالفله مايخلون الواحد بكيفه

واعتراضك بمحله ،،

والسعال ننتظر حله :d:






الدهور

(يافضيحتنا بين المضايف :) )



صوت للدهور من ... الدهور ( ياولد يالتقليد :p:


تراهم ساكنين برمضان

سعدنا بمرور أختنا هنا

حاولي نوبتن ثامنه :p:







هلا راعي الوقيد

يابن الحلال ،، أنا داخلن على الله ثم عليك من نبرااااس :d:

هاللي جاينا بسرعة 240كم ( شبح )

أما الحل ،،

تسان تبيني أدزه لك برساله خاصه ... حاااااضر :)






مساك الله بالخير يأبومقرن

أي لقيمات الله يعافيك؟؟

حنا مبتلشين .. والمشرف مع القمردين :d:

خلك قريّب ،، ترا الجو بوووه غيوووووم






مرحباً بأبي غازي ( لازم نجره بالياء)

هالكالوس اللي حنا بووووه ،،

غير عن كواليس أختنا الدهور

ماتشوفه جت ركض

وبعدين بيني وبينك وبين الجميع :)

حنا الظاهر سحبنا البساط من حدره n)

وتحياتي لك على باقة المدح






صح لسانك يالونش

وشرواك الطيب

وماعليك زود

لو تملى الفراغ أقول لك / مبروووووك :d:






والذيب يبي يجي عقب شوين

أعتقد أن معه الحل :thumb:

وكلنا ننتظر الذيب

[اليم]

بالخير

العذر يالبناخي يالاصيل تخبر عقب الفطور خذيت لي غطه :)

ولا قمت الا قبل شوين :g: الله يلعن العزوبيه :g:

الواحد اعوذ بالله تزود رفالتوه

<<<<وش رايك بهالمبروك اللي يمين تروه يفداك

والله اني شكيت بالونش :)

[أبو مقرن]

الغالي الأصيل: أنا أبشرك عرفت الحل..وأرسلت لراعي القصيدة
رسالة خاصة..
قلت:أنا أبي أجاوب على (الأصيل)..واسمك يبي ينكشف ياللي ورى الكالوس:)
والرجال:قام يتدخل.ويقول: الجايزة اللي يبي يعطيك الأصيل.أعطيك
كثره ثلاث مرات..بس لا تعلم باسمي..:thumb::thumb:
<<<<يخبروه مفضح..ويبي يشري سكوته:d:
قلت: تدري..والله مايجيك أثقل من هاللي عليك..عاد يوم أنا أقول هالحتسي
هو لابسن لوه ثوبين وكوت وفروة..<<<وش أثقل منهن:a::a:
عاد الرجال: ماقصر وأرضانن..ومتوجه.ن.بي عليك إنك تستر عليه..
وهالأبيات مني على لسااااانوه..والحل أبي أزعجوه يمك برسالة خاصة..:smooch:
بس لايدري..وتصيرمقاضب شوش أنا وياه ..تالي هالتوجهه!:d::p:

ياأصيل شاعركم يصوّت وينخاك=يقول بالفلّه..حكوا في مجاله
دامه تخّفى واستجار بزواياك=خله بعيد.ن.مستظل بظلاله
ولاأظن مقصوده عسير.ن.ويخفاك=ياواحد.ن.تحفظ حقوق الزماله
الشاعر اللي مختفي من هذولاك=ولااظن يعرف ياملا من مقاله
لي رمعة.ن.ماظن مثله ترى جاك=من صاحب.ن.ياصل هدفكم نباله
ويمكن تكون الرمعة اللي عطيناك=أبعد من (المغرب)عن آخر(صلاله)
بس الوعد ياصاحبي خلّه هناك=عند التحكم ..أو بعد..هي شماله
هذي يميني للعهد هات يمناك=نضفي على المخلوق باقي جلاله***

[مفتاح14]

عرفتوه بس مابي اخرب عليكم المسابقه :)


تسلم يالاصيل.. كواليسن ماله مثيل:)

[المطنوخ]

العلم وشو؟؟؟<<<<<ادري كلكم التفتوا يمي مطيرين عيونكم:147r:

[الأصيل]

اليــــــــــــــم

ليه عزوبي ؟؟؟ :a:

ماكثر الله ألا البنات

توكل على الله ، وادخل القفص الذهبي :d:


أما الحل : فما لك لوا :)

واللي على اليمين عساو سالم








أبو مقـــــــــرن

هاللي لابسن ثوبين ( خايف لاينشق حدا ثيابه ) :d:

ماخذن احتياطه ( لايذوق اللي ذاقه الأصيل :(

وبعدين ياخووووي مايصير تسذا

بهالحاله راح ينهدم كالوسنا


عاد هالرجال بيني وبنوووه مساجلات وردود

لكن ...

لخاطر أبومقرن ،،

ماراح نعلم عليه ،،

أمانه معك ،، لاشفته سلم عليه

وصح لسانووه

وبالله إنك تبلغوووه هالبويتات الكالوسيه :d:



هاكم يميني ،، بالعهد ماخدعناك=سلم(ن) لنا لازم نرد الجماله

أثقل من الثوبين ياصاح ماجاك=قل له ترا مالي وملكي .. حلاله

( كم باك ) ( ماي فرند ) كم باك كم باك=(كالوسنا) زايد هواه ودلاله

( وصح لساني ...... صح بدني) :)






مفتاح 14

الحمد لله على السلامه :thumb:

والله العظيم وبالله الكريم

يإني كتبت موضوع كامل ، استفسار عن سبب غيابك

لكن الجهاز الملوي طفا فجأه :g:

وظاع الموضوع

والحمد لله لقيناك :d:


عطن إذنك

تسانك عرفتوووه شاورن مشاور :)

انتبه ،، شاورن مهو شارون :chinese:







ومن شر حاسد إذا حسد

أأأخخخووويييي الغالي النطول :good1:

ماأحد مطيرن عيونه

الله يفكنا من شر عيونك :d:



لكن توقيعك ( عطاء بلا حدود ) روووووعه :p:

وين الرمعه يالغالي ؟؟

[سلطان الشمري]

الاصيل والله بديت اشك بك :(




الله يخارجنا..




الرمعه .. ياطويل العمر ..






اليــــــــــــــــــــــــــــــــــ.....






لالالا مهو هو ..





اعتقد انه .. سويتس اربع طعش :thumb:


ورمعةن طيبه

[الشبث]

اويلي

ذبحتن الشفايه

تكفوووون يالربع جيبوا الحل


تروني مادري وش السالفه :g:






ابو الاصايل عقدتنا

بس وراك وراك






وتقلد تحيتي

[شنقل]

لالا عاد انا اللي

ابحلوه لكم


يعله بالشبث الغالي
وعشيري المخااااااوي

اني مابحياتي حليت لغز
ولو عطيتوني اختيارات
ابطي ماحليته

الوكاااااد
تسانكم حليتوه

كزوه لي من خلف الكواليس :)

شكرياااااااااااااااات
عشيركم شنقل
زعيم فلة الحجاج

[الأصيل]

نكسه أخرى لنبراااس ،، يشك بي ثم يرمع ... :a:

ورمعه طيبه من طيب

بغا يقول اليم ... بس ذبحوه الحيا :)

ثم يصوب الرمح نحو : مفتاح خمس وعشرين ناقص 11

ماشاء الله عليك ،،

الله يبعد عنك عين النطووووووول :)

ونقول له :

ألف






ألف






ألفين






حاول نوبتن أخيره :d:








الشبث هنا :a:

ومتعقد :a: :a:

ماعاش من يعقدك ونا خوك

تسان تبي الحل ،، اتبع الخطوات التاليه :

اتصل على اليم ، وخوذ منه رقم جوال نبراااس

وهو ( إنت يانبراااس )يدلك على بيت أبومقرن

وياجيت أبومقرن وتقهويت عندوه، تروحون جميع عند مفتاح 14

وهو راح يقول لك بصراحه أنه مايعرف الحل :d: :)


متقلدين تحياتك من زمااااان :p:








أخيراً .... شنقل هنا :a:

مشااااركه رووووعه ( حتسي ومجاملات ) :)

ورمعات تكاد أن تصيب الهدف ( منين؟؟ :d:


يازعيم الفله ( شنقل )

ممكن سعال ؟؟ ( تفضل ) :goooood:

المكان : تونجيقيا...!!!!!!!!!

هذي تسم تبعد عن راس تنوره؟؟

[المخاوي]

حيا الله الاصيل

وش هالموضوع المتميز :thumb:

كواليس فلة الحجاج :)

الشاعر هذا مايبيلوه تفطن ونعرف اثروه مع السماء >>> من زود الثقه :p:
لكن وين الكاس لازم فيه كاس ولا ماراح نجاوب :tongue:

الشاعرهو

ابو مقرن :)

[بتول آل علي]

و أنا أقول انوه أبو مقرن :)

لأنوه هو اللي يكتب النون كذا .ن :)

و بعدين لما يحط نقطتين ورا الكلمه ما يخلي مسافة..يعني كذا..كله ورا بعض..من غير مسافات

هذا و الله أعلم

إلا إذا تبون تتوهونا و تقلدون اسلوبه :)

[الأصيل]

المخاوي

هلا بك يالغالي ،،

ربما يكون الموضوع متميز ،،

ولكن وجودك هنا هو التميز بعينه :thumb:


إذاً ... المخاوي

يوجه أصابع الاتهام إلى

أبو مقرن !!!!! :a:

( الله يهديك يالمخاوي ، عمرك شفت قصيده ولا محاوره لأبومقرن؟؟ :p:

أما الكاس ،، فالعذر والسموحه

والله ماعندنا ألا فنجال قهوه عقب الفطور ( مهو قبلوه) :good1:

خبرك أهل الفله على قد الحال ،،

تسان تبي الكاس ،، إمس عندنا ، واصبح عند الشعر الشعبي :hala1:








الدهور :

تضيف صوتاً آخر لأبومقرن !!

والسبب ،، أدلة البحث والتحري ( صايره كونان )

كونان هذا ( الله لايبلانا ) وغد يعرف اللي حدر القاع

لو يلقى له علبة ببسي فارغه ،،يعرف المجرم اللي شرا المجله :d:

وكونانتنا الدهور : تقول : بوه نقطتين والنون .. وهو الدليل!! :a:

ياخيّه ... أنا اللي نسقت القصيده ،،






انتظرو الحل بعد عيد الضحيه :d: :good1:

[الشبث]

الاصيل

بس بس بس

وقف المسابقه لقيت الحل

والجوااااب هو













ابو مقرن :) :)


















لا تنسون الشيخ زايد بالدعااااء

وتقلدوا تحيتي

[شنقل]

يازعيم الفله ( شنقل )

ممكن سعال ؟؟ ( تفضل )

المكان : تونجيقيا...!!!!!!!!!

هذي تسم تبعد عن راس تنوره؟؟

هلا بالعشير
بالنسبه لسوعالك طال عمرك
عن تونجيقيا


هذي الله يسلمك
تبعد عن راس تنوره

اممممممممم

حوالي 200 كيلو
شماااااااال دون الخفجي بربعين كيلو
وتونجيقيا السابقه الذكر لها راس مثل الراس اللي عندكم
بتنوره

ذكرتني باللي يقول
نوره في جده وانا في راس تنوره :)

شكريااااااااات
عشيرك شنقل
زعيم فلة الحجاج

[الأصيل]

أعلن فيلسوف الفله / السيناتور / الشبث :)

أنه يجب وقف إطلاق الفشق ،

حيث توصل بعد عناء طويل إلى أن الحل هو / أبومقرن

من جانب(ن) آخر ، صرح مصدر مسعول والناطق الرسمي

بلسان الأصيل بقوله : ياحييييف ،، حاول نوبتن تاسعه :p:

فيما لم ترد أية ردود فعل حتى ساعة إعداد هذا التقرير :awink:







على الصعيد نفسه

تم الكشف عن هوية ((تونجيقيا))

حيث تبين أنها تقع مطلاع شمس عن راس تنوره

هذا وسنوافيكم بما يستجد من أحداث

****



اللي بعدووه