غرور الشمامرة

[الجازي]

عنوان استفزازي مايبيله كلام :)

بس وش أسوي توني عارفة حركات الأكشن قلت أجي أتفلسف بها عندكم :)

عموما السالفة والله تستاهل ,, لأنها من جد ,, اكتشفت هالحقيقة بعد مشوار طويل من البحث والتحري والتدقيق >>>>>>> محقق بوارو على غفلة :)

السالفة ياطوال الأعمار بدت من فكرة جت في بالي ,, وطبعا مايخفاكم أفكاري الداجة ,, اللي على قولة أخواننا الكويتيين : وين ماأطقها عوياء :) >> عوجا :)

المهم كانت لحظة من لحظات التجلي الفكري اللي نزلت علي وأنا مبشكة مع صديقاتي أيام الدراسة :) مبسوطين ومستانسين ومستاسعة صدورنا ,, قلت لهم ,, وياليتني ماتفلسفت :) :

بنات تتذكرون أول مرة تعرفنا فيها على بعض ,, وش رايكم نتذكر هاللحظات مع بعض وكل وحدة تقول كيف كان انطباعها عن باقي البنات ؟؟ >>>> هذا شكلي اذا صرت على بالي رومانسية :)

البنات قالوا : يالله الفكرة فكرتس ,, قولي لنا أنتي أول وش كان انطباعتس عنا ؟؟

عاد أنا بحكم الموانة الزايدة عليهم جبت اللي وراي واللي قدامي ولا خلّيت في نفسي شيء إلا وقلته ,, طبعاً كنت صادقة وكنا متفقين على الصراحة وبدون زعل ,,

بديت عاد أفلّ الشريط :) وقلت :

أنت يافلانة والله من شفتس وأنا مرتاعة منتس :) ,, قلت هالبنت شكلها حارة وشخصيتها قوية ولا تبي أحد يحارشها :) ,, وفعلا طلعتي مثل ماتوقعتس ,, وهذا اللي خلاّني أصادقتس ,, عشان نحطتس واجهة للشلة تخوفين الباقين :) >>> وش دعوى شلة أبو جلمبو :)

وأنت يافلانة حسيت انتس سنعة وتبردين القلب وأحس إن أهلتس يعتمدون عليتس بقوة ,, وعز الله انتس طلعتي قول وفعل :) عليتس قهوة انما إيه بس الله يكفينا شر هالمراقبات لايصادرونها :)

وأنت يافلانة مدري ليه كسرتي خاطري ورحمتس وحسيت انتس ضعيفة وملعوبن عليتس شكلتس بائسة بقوة ,, يمكن لأنتس هادية :)

يالله عاد هذا انطباعي عنكم أول مرة شفتكم فيها ,, لاتزعلون تراكم والله الحين تسوون بنات المدرسة كلها :) >>>> ياشين الترقيع :)

جاء دوركم الحين علموني وش انطباعكم عني أول ماشفتوني :) >>>>>>> ذابحتها الثقة :)

قالت اللي أحسبها مسكينة وبائسة وعلى نياتها :( >>>>>> والله أنا اللي طلعت على نياتي :)

قالت : بصراحة ياريم أول ماشفتس داخلة الفصل قلت في نفسي : ألا يامصادقتها هذي !! مافيه أمل أتعرف عليها ,, كنت أحس انتس مغرورة وشايفة نفستس ورازة خشمتس :( >>> تسنه طاح وجهي ؟؟ عااااااادي متعودة دايماً :)

طرطنطن >>> فاصل كهربائي :) يعني كني تكهربت من حتسيها :)

أفا يافلانة وش دعوى مغرورة حته وحدة >>> على الأقل حتتين أشوى شوي :)

يعني وشلون شفتي هالغرور ,, كلامي ولا لبسي ولا نظراتي ولا وش السالفة ؟؟ :( >>>> مع اني انهبل من اللي عليهم نظرات ترفع الضغط :)

قالت : لا والله ,, ماسمعت كلامتس ولا حتى جلست معتس بس مدري ليه كنت اذا شفتس من بعيد ماشية مع وحدة أو تسولفين معها أحس فيتس غرور يكفي بلد :):) >>> عادي تصير في أرقى العوائل :)

قلت لها : لاعاد بلا مبالغة تراتس مصختيها :( أنا مانيب من هالبنات اللي مسوين لي فيها ,, يعني وش حليلي حطني تلقاني :) >>> مثل يطلع وقت الزنقة :)

بالله من وين لي هالغرور ورزة الخشم ؟؟

قالت : عاد وش أسوي هذا انطباعي أول ماشفتس ,, والا تبيني ألعب عليتس ؟؟

قلت : لاخلاص الشكوى لله ,, الله لايعيده من اقتراح :)

التفت على باقي الشلة كودهم يقولون شي ثاني ,, الا والله كل البنات يقولون : حتى حنا والله ياريم هذا هو انطباعنا :)

بس عاد من عرفناتس وحنا مغيرين نظرتنا ,, اكتشفنا انتس حبيبة وطيبة ووو >>>> في هاللحظة حسيت كني بزر يعطونه حلاو مصاص عشان مايصيح :)

طبعا طاح وجهي ورجعت البيت :) >>>>>>>> هذي هي زبدة الموضوع :)

المهم بعد فترة مدري وش اللي فتح نفس هالموضوع عند أهلي وسولفت عليهم بقصتي مع شلة السعادة :) مادريت الا والشعب السعودي اللي في البيت كله يفضفض باللي عنده ,, وكلهم يقولون ان ربعهم يقولون عنهم ان أشكالهم مغارير >>> مغارير بنت جيران مغاتير :)

لا والمصيبة ان أبوي حطوه جنتل مان ورجل أعمال :) مادروا انه حاطن اللي وراه واللي قدامه في هالمزارع :) >>> ُمزارِع صالح >>> تسلفناها من مواطن صالح :)

يوم شفت الدعوى عامة ويمنع اصطحاب الأطفال :):) قلت مابدّهاش أكيد فينا بلا :) وقررت أشوف تصرفات أخواني في المناسبات العامة اللي يكونون فيها مختلطين مع الناس ,, وبصراحة شفت اللي ماينلامون صديقاتي عليه :) أنواع رزة الخشم وأنواع عزة النفس كنهم ماعجبهم شيء,, البلشة وأنا اشوفهم بغيت أصدّق ,, لولا إني عاجنتهم وخابزتهم بيدي :)

نفس الشيء شفته في بنات عمومتي مع انهم والله عسل ينقّط :)

وفي المدرسة وحدة من زميلاتي شمرية ونفس الطينة :) وتوريني بنات عمها ونفس العجينة :) >>> منعاً للتكرار :)

قلت الظاهر والله أعلم إن هالغرور اللي يشوفونه الناس هو نفسه عزة النفس اللي زايدة حبتين في الشمامرة مع انهم والله طاهرة قلوبهم وطيبين بشكل خيالي :) بشهادة اللي يعاشرهم من غير الشمامرة واسألوا بعد شموخ :) >>> ماوهقتها أبد :)

أذكر مرة ان الشاعر فيصل اللويش قال ان فيه شباب يوم شافوه في طلعة النعيرية ماكانوا يتخيلونه بهالصورة لأنهم كانوا يحسون انه مغرور وشايف نفسه ولقوه العكس تماماً :) والظاهر هذا هو الانطباع السائد عن باقي الشمامرة :)

تم بحمد الله :)

ماورد أعلاه كان محاولة متواضعة لكتابة الصفحة الأولى من مذكراتي التاريخية والتي فيها قصة حياتي :)

عارفتكم بتهزؤوني :) بس بالله عليكم ماقد مر عليكم مثل هالموقف ؟؟ والله المسألة صارت عامة ,, الا انكاني ضاربة فيوزي ولا عاد أشوف زين :):)

في انتظار شرشحتكم ومعها تعليقكم الكريم ,,

وبليز يالفاضي تسانك ودك تسيّر على موضوعي انك تكفيني شر توقيعك ,, حطه عند الوالدة وتعال الله يحييك :):)

[سلطان الشمري]

اقول الريم:




شكلك خريجة مدرسة ساحة الاقلاع :)



قويهير بنات



ياملا الفشاش :thumb:


لي نكسه لاني ماقريت الا الموضوع وجيت مطبدز :puzzled:




لي رجعه

[عبدالعزيز]

اول ماشفتك قلت الحمد لله والشكر والى اليوم وانا اقوله :)


صدز خبلة :)

[متفاائل]

الريم :chinese:

المهم هل اقتنعتي وصدقتي او نكمل الناقص من شان تتأكدين
لا بصراحة عاد ماهو غرور حرام نظلمه لاني احسه بسيط بل اعلى مراتب الغرور بمرتبة معالي .
بعدين بس انتي الشمامره حبوبين متواضعين طيبين .
بس هذا طبع المغرور يبي اذا كشف يحاول يسحبل اللي حوله من شان يندفن . :hala1:
اما هجوم كاسح من جميع الجبهات ترى بس ابي اتعلم يعني >> قولي مناورة ههههه :) :goooood:

شكراً على هذا الموضوع الشيق اختي ريم :hala1:
وشكراً على مروري . اخاف ماتقولينه :)

[راعي الوقيد]

ما هو غرور هذي سمه يمنحه الله لمن يشاء من عباده وقد وهبها سبحانـــــه للشمامــــرة(عــــزة وثقــــــة بالنفــــــس) من دون الناس الثانين << آدى الله وآدي حكمتــــــــه <<حد عندهـ اعتراض

عارفتكم بتهزؤوني:)بس بالله عليكم ماقد مر عليكم مثل هالموقف ؟؟ والله المسألة صارت عامة ,, الا انكاني ضاربة فيوزي ولا عاد أشوف زين :):)
الحق هـــذا الشيء يصيــــــــر دايماً !!


[color=#FFCC00]اول ماشفتك قلت الحمد لله والشكر والى اليوم وانا اقوله

صدز خبلة
مجهــــــــود واضــــــــح التعب فيه:thumb:

[بو رائد]

الاخت الريم السلام وبعد
موضوع شيق وينم عن ادراك وسعة افق واسعين وسوف يتم انتقادك بشكل او باخر ولكن الحقيقة
تبقى....ما اثرت فيه بعض الصحه ولكن بشكل ضيق ومحدود..في نظري انه لايجب التعميم ابدا..
ولكن حتى (الشيبان) سابقا ان هذا الرجال (شمري) من فخذ لااود ذكره ماينزل الذباب على خشمه لانه متكبر ...لكن الان ولله الحمد كثير بل كثير جدا من شمر ناس طيبون ومتعلمون
وليس عندهم هذه الصفات من الغرور والتكبر...واذا خلى الانسان مع نفسه !!!!!! فلماذا الغرور
والتكبر ونحن مخلوقون من تراب ونعود اليه؟؟؟؟؟؟ اختي الريم هي مشاعر انسانيه لااستطيع انا
و لا انت التحكم بها ...فلكل انسان تركيبه خاصه به لانستطيع تغييرها ابدا,,,,,
ولكني لازلت اقول وفي نظري المتواضع ان شمر او كما تقولين (الشمامرة) ناس طيبون جدا ولا
ينسون العشره الطيبه ابدا وكل صفة وخصله حميده تجدينه بهم (الغالبيه منهم) حتى لانكون متحيزين ..اعانك الله على هذا الموضوع وتجملي عواقب ماجادت به نفسك وافكارك متمنيا لك
كل توفيق ولك التحيه والتقدير....

[الجازي]

قرى إيه ياقدعان ؟؟؟ إنتوا بتفهموا إزاي ؟؟

دنا باينّي وئعت ولا حدّش سمّى عليّا :) :)

بالله وش فيكم ؟؟ عسى ماشر :) وراكم قلبتوا الموضوع هجوم كاسح :)

أنا أقصد السمة الظاهرة مع إنها في الحقيقة غير موجودة ,, يعني مثل ماضربت لكم مثال بموقف أخونا الشاعر فيصل اللويش الله يذكره بالخير ,,

الناس من بعيد وبدون احتكاك مباشر معهم يحسبونك مغرور ورازن خشيمك :)

أصلا حتى تمييلة العقال أو انصلاتته على قولتكم كأنها توحي بهالشي :)

يعني بصراحة حركتهم حلوة ,, لأن عزة النفس ماتنعاف خصوصا إذا ماكانت في النهاية معها كبر وغرور حقيقي ,, يعني الأصل طيبة قلب والسماحة والظاهر عزة النفس :)

تدرون عاد من حتسيكم اللي فوق ,, بديت أشك في نفسي وفي نظرتكم لي :) >>>>>>> جملة استعطاف (( يعني طرارة بالعامي :) ))

والله الظاهر اني رازتن خشمي عليكم وشايفتن روحي وأنا من الصبح خالي أبو غازي ينفخ فيني ويقول هالبنت قلبها أبيض :) :)

عاد هدّوا اللعب وارجعوا اقروا الموضوع بروّية وتؤدة :) >>> هالكلمتين خارج نطاق الفلة :)

واقروه من زاوية فلة وسعة صدر لاتقرونه من باب انه تسنه محتاج ينقل للعام :)

نبراس ,,

والله أحس انك أنت اللي فهمتني من ردك :) بس العلة انك مابعد قريت الموضوع الله يستر لاتغير رايك :)

عبدالعزيز ,,

أنا ودي مرة وحدة بس تدخل واحدن من مواضيعي وتبرد قلبي برد حلو :) ياخي خل الشماتة في آخر الموضوع :) يعني أدلي بدلوك قبل ,, وبعدين خذ راحتك :)

دنتا كلمتك تئيلة وليها وزن عند الناس :)

متفاءل ,,

وش اللي تكمل الناقص :) ,, دحنا فضيحتنا بئت بقلاقل :)

بس ودي أعرف وش فهمت من موضوعي ؟؟؟ عشان أقدر أناقشك بناء عليه ,,:)

تسلم على مرورك >>>>>> بقولها اذا رجعت لي بالتفاصيل :)

راعي الوقيد ,,


ما هو غرور هذي سمه يمنحه الله لمن يشاء من عباده وقد وهبها سبحانـــــه للشمامــــرة(عــــزة وثقــــــة بالنفــــــس) من دون الناس الثانين << آدى الله وآدي حكمتــــــــه <<حد عندهـ اعتراض

بعدي والله ,, ايه هذا الكلام السنع اللي يجمد على الشارب :) >>> مالها سنع هالجملة :)

يعني الى الآن أحس انك بجملتك هذي ياراعي الوقيد انت الوحيد اللي فاهمني ,,

هذا اللي ودي أوصل له ,, ماهو غرور ,, سمة وهبها الله لمن يشاء من عباده ,, عزة وثقة بالنفس

بس عندي سؤال :

ليه خصصت فخذ عبده بالذات ؟؟مع اني أشوفها سمة عامة في أغلب شمر :)

بس كأنك خربتها بكلامك عن النفخة :) :)

بالنسبة للنفخة ,, ترى هذي ماشفتها والله فيهم ,, أنا اللي أقصده ان مظهرهم يدل على الغرور بس لما تكلمهم وتسولف معهم تكتشف انك كنت ظالمهم بحكمك عليهم بالغرور :)

يعطيك العافية ياراعي الوقيد ,, أثلجت صدري وأنا أختك بهالرد الحلو :thumb:

بو رائد ,,

وعليكم السلام والرحمة ,,


ولكن حتى (الشيبان) سابقا ان هذا الرجال (شمري) من فخذ لااود ذكره ماينزل الذباب على خشمه لانه متكبر

يمكن أختلف معك في هالنقطة ,, أنا اللي شفته إنها ظاهرة خارجية يعني حقيقة الشمري انه بعيد كل البعد عن هالكبر والغرور ,, لكن ربي عطاه هالشكل وهالهالة اللي أعطت انطباع للي يشوفه انه يظنه متكبر ومغرور ,, ومثل ماقلت من الظلم التعميم :)

يعطيك العافية على الاطراء العام والخاص :) وتسلم على مرورك الطيب

في الختام ,,أتمنى ماينفهم موضوعي بالمقلوب :) :)

[المخاوي]

اهلين بالريم :)

تصدقين كنت اتخيلتس كذا من قبل بس عقب هالموضوع حسيت انتس طيبه :p:

اما عزة النفس هذي وهايب ماهي نهايب من العزيز الحكيم :rolleyes:

وهذا راعي الوقيد جاب لكم الدليل القاطع :)


وهذا اول الخير وبانتظار مذكرات تاريخيه اخرى :)

[منيف المهيلب]

ربما " لفهد عافت " دور في ذلك
عندما قال : " الشمري للشمس شد المطايا "

[الشبث]

عشان نحطتس واجهة للشلة تخوفين الباقين >>> وش دعوى شلة أبو جلمبو

ليييييه داخلين هوشه يالريم


والشمامره ياحليلهم ونعم فيهم جميع

وانا عن نفسي اتمنى اكون منهم

( ماني شمري ) للاسف










وفي المدرسة وحدة من زميلاتي شمرية ونفس الطينة وتوريني بنات عمها ونفس العجينة >>> منعاً للتكرار


صار فيها عجن وخبز اهربوا










في انتظار شرشحتكم ومعها تعليقكم الكريم ,,



الله يعطيتس العافيه يالمغروره ياللي شايفتن نفستس على ايش مادرد<<<على الطلب





الريم انتي رائعه








وتقلدي تحيتي

[ابو غازي]

الله يرحم جدتي يالريم :0022:

صدز إنتس خبله ومهبوله بعد :p:

وربي مافهمت ولا شي دايم تخور هالبنيه :p:

مارالشكوى لله ابي ادلي بدلوي مع الربع والربعات
هذي ياجدتي ... ماهي نفخه ولا غرور .... هذي اجبلية الشمري فقط :thumb:

عاد لاتصيرين تلخه ... وتبلشين بنا وتدلين تسعلين وشلون وشلون :0027:

:0022:

[تركواز]

اصبري ريم اكمل عد الايقونات و بعدها أقرأ الموضوع :)

حسبي الله على شيطانك خلصيتي هالايقونة :) عن اهل الفلة

بس تبين الصراحة هذي حقيقة كلنا يالشمامرة ماخذين في انفسنا مقلب على ايش مدري يالله لك الحمد :good1:

صدق انا مغارير بس و الله يحق لنا كلنا ملح و قبلة :tongue:

[تذكار]

حبيبتي الريم .. ما عليتس من الضبان .. منقهرين منس هههه

عاشت الريم الشمرية المغرورة :d:

أختس

تذكار

[شموخ]

[/size][/font]


ههههههههههههههههه

هههههههههه

ليش شهادتي بيعتمدون عليها الناس يالريم :)

بس تصدقين اني ماعمري تعرفت شخصيا على بنات شمريات غير مدرسة كانت تدرسني بثالث متوسط وكان لقبها( الرشيد ) وماكنت عارفه وربي ان الرشيد يرجع شمري الا قريب بعد وفاة طلال الرشيد حتى سألت المشرف العام يوم شفت الموقع مقفل وجاوبني ان الرشيد شمري n) .

لأني زمان اعرف ان الرشيد من حايل واعرف عن بطولاتهم وحروبهم بس انه يرجع لشمر والله ماعرفت غير قريب لاتنصدمون مني n) n)

بس الحق حق وربي انها أغلى معلمة عرفتها في حياتي وزاد الغلا لشمر حتى وصل لحدود نجم الثريا بعد ماعرفت انها ترجع لشمر وفعلا تواضع شفته في هذه الانسانه لدرجة انها والله العظيم هي اللي تتصل فيني مع ان الحق لها وتنصح نصيحة اخت كبيره بعد ماخلصت اول ثانوي اتصلت فيني تبارك لي النجاح و نصحتنى ادخل علمي بس انا ماحب هالقسم ومادخلته :) :)

يعنى اتوقع لو فيهم غرور ماتصلت على طالبة لا واللي قاهرني انى ماطلبت رقمها مع اني اموووت فيها بس كنت انحرج أطلب رقمها وانقطعت العلاقه ،ونقلت من المدرسه واللحين وربي ابحث عن رقمها وياما سألت محد عرف رقمها والمشكله ماعرف غير اسم ابوها بس وزوجها ماعرف اسمه وياكثر عائلة الرشيد اللي بأسم ابوها :g: .


الا ياحبي لكم ياالريم ماعليك من اللي يقولون عنك مغروره " قول عني ماتقول " :) :) :thumb: او قولي لهم بيت على ماظن لفيصل

وشلون مانغر وربعي سناعيس :) :)

تحياتي لك ولشمر :thumb:

شموخ

[أبو مقرن]

الريم..
كفانا الله وإياتس شر الغرور..وهذي الظاهر كله مظاهر خارجية..والكلام على الجوهر..ماهو بعلى المظهر..
وأنا مرة من المرات..واحد كنت أشوفه بالشارع..بالكلية..بالسوق..
مايسلم! ولاعدّه يشوفك..(بس تروه ماهو شمري)..المهم إني حقدت عليه :( وناوي.ن.به النية اللي ماتسره..وقلت: والله لو ألقاه يبي يموت عطش بهالنفود..ماأسقيته جغمة ماء!!! :(
ويصير مناسبة هكاليوم عند واحد..وأجيه ..ويوم جيت ياولله هذا خويي عندوه..ويسلم علي..وهات يهالسوالف وينفلت بهكالعلوم وهكالقصيد..و180 درجة عما كنت متخيله.. :a: :a:
قلت: وش غيرك؟؟مانت كذا أول؟
قال: والله إن مصيبتي إني حياوي بلحيل..ولا أسلم ولا أحتسي حياء..
والنا س يحسبونه كبر وغرور..!!
وشمر أتوقع اللي فيهم ماهو غرور..وإن كان فيه شواذ..ولكن الشاذ لايقاس عليه..فهم ولله الحمد تربطهم صلات نسب وقرابة وصداقة وزمالة بجميع أبناء القبائل الأخرى..ومجتمع اليوم خير شاهد !!
أشكرتس على تسفية هالدلو..بفلتنا..

[متفاائل]

قرى إيه ياقدعان ؟؟؟

متفاءل ,,

وش اللي تكمل الناقص :) ,, دحنا فضيحتنا بئت بقلاقل :)

بس ودي أعرف وش فهمت من موضوعي ؟؟؟ عشان أقدر أناقشك بناء عليه ,,:)

تسلم على مرورك >>>>>> بقولها اذا رجعت لي بالتفاصيل :)



:) :)

الريــــــم:hala1:

اأطعي دراعي كان فهمت شين :)

شوفي ياخت الريم احم احم الشمري ابتداء من لبسة العقال المايلهذا :) اللي مايعرفون عوايدنا

يحسبونها علينا غرور . الشمري لايتطفل او يرمي بنفسه مناسبة كانت حتى لو كانت مناسبة

عامة ولو كان هو بامس الحاجة . من ايام الجوع حتى وقتنا هذا . ويمكن تحسب كبر وهي عزت

نفس . الشمري كما قال الاخ ابو مقرن قد تصل عنده ان يستحي من السلام لانه يكون احيانا

بوقت غير مناسب فلربما حسب عليه تنبيه لاجل كذا او حسب كأنه شحذة لهولاء ليدعوه للقهوة او ....الخ .

من الامور المحرجة ايضا العزيمة فنحن لانحب ان نكلف الاجنبي من جهة ولانحب ان نترك لاحد

معروف علينا مادمنا في غناء مع احترامنا لمن حاول القيام بواجبه . ولكن قد تحسب على انها

\تكبر . طويلة هذه الامثلة . ولكن اختصره لكي بهذا المثل ويجب ان لايغيب عن اعيننا خاصة ونحن في مجتمع غير مجتمعنا وغير عاداتنا وتقاليدنا .

((من لايعرفك مايثمنك ))
هاها
تقولينه هالحين :)
تحياتي لكي على هذه الكتابات التي تجمع دائما بين الجد والفرفشه لتصلي بهذا لهدفك المنشود :)

اكرر شكري

[ابو خليف]

العقل نعمه :p: :p: :p: :p:

[مفتاح14]

صراحه مادري وش اقول .. كل ماكتبت كلمتين اكتشف ان اللي قبلي قالوهن وارجع وأمسحهن:)




يعني حاولت ادلي بدلوي بس مالقيت له مكان:)..



الريم.. ياكثر اللي قروا موضوعتس.. عاد مادري السبب هو شعبيتس والاعناوينتس اللي مادري وش تبي :)


ابنزل موضوع هاليومين وابيتس تحطين لوه عنوان لعل وعسى يكثرون الزوار :)


نوّرت الفلّه :)

[الجازي]

أخوي المخاوي ,,


تصدقين كنت اتخيلتس كذا من قبل بس عقب هالموضوع حسيت انتس طيبه

الحين كل ردودك علي هذيك الأيام وأنت تحسبني مغرورة !! أجل هالحين وش تبي تسوي بي عقب الموانة ؟؟ :)


وهذا اول الخير وبانتظار مذكرات تاريخيه اخرى

لا ياشيخ ,, هونت ,, الحين الصفحة الأولى من مذكراتي وحستوا أبو جدي :) أجل لو توصلون للصفحة الأخيرة وش تسوون بي ؟؟؟ :) :)

يعطيك العافية أخوي المخاوي على التشريف

غاليتي عذف ,,


ربما " لفهد عافت " دور في ذلك
عندما قال : " الشمري للشمس شد المطايا "

وربما فهد عافت لم يقل ذلك من فراغ فهو يترجم الواقع بأبياته الشعرية الرائعة :thumb:

لك كل الشكر عزيزتي

أخوي الشبث ,,


وانا عن نفسي اتمنى اكون منهم

( ماني شمري ) للاسف

الله يحييك ياخوي بيننا بأي صفة تجي بها ,, وضيفنا منا وفينا حتى لو ماكان شمري >>>> ذابحتها الأخلاق :) :)


الله يعطيتس العافيه يالمغروره ياللي شايفتن نفستس على ايش مادرد<<<على الطلب

مغرورة وفهمتها :) بس الكلمة الأخيرة (( مادرد )) هذي يبيلها بحث في قوقل :) :)

تسلم أخوي على المرور والاطراء الرقيق :)

خالي أبو غازي ,,


الله يرحم جدتي يالريم

صدز إنتس خبله ومهبوله بعد

وربي مافهمت ولا شي دايم تخور هالبنيه

ياخالي آمين الله يرحمها وجميع موتى المسلمين ,,, بس عاد بلاش فضايح ياخال :)

هالحين أمدحك وأجيب طاريك وأقول خالي وش حليله يمدحني :) وآخر شيء تطيّح وجهي قدام الربع والربعات :) :)

طيب اصبر لما يصدون شوي :) :)

بعذر عبدالعزيز فيني :) دام ان خالي يسوي بي هالسواة ,,, ماينلامون الأجناب :) :)

تركواز ,,


اصبري ريم اكمل عد الايقونات و بعدها أقرأ الموضوع

تركواز ,, شكلتس متأثرة بالتعداد السكاني هاليومين :) هذا انكانتس بعد ماتشتغلين معهم :) :)

مدري كم طلع عندتس من أيقونة ؟؟ :)


بس تبين الصراحة هذي حقيقة كلنا يالشمامرة ماخذين في انفسنا مقلب على ايش مدري يالله لك الحمد

المشكلة مانحس بهالشيء ,, يعني لو الواحد يشوف نفسه وشلون شكله قدام الناس كان أتوقع يضيق صدره من هالهالة اللي عليه :) :)

مافيه أحد يحب الغرور ولا يتمناه لنفسه بس عاد اذا كان شكلنا كذا هذا مايعني اننا من داخلنا متكبرين ,, يعني زبدة الحتسي ,, حنا ماأخذنا في أنفسنا مقلب ,, الناس اللي ماخذين فينا مقلب مادروا اننا نقطر حبابة وطيبة :) >>>>>>> ماتسن هذا الغرور بعينه !!؟؟ :)


كلنا ملح و قبلة

ياوليّة اعئلي بلاش فضايح :) :) خلّي الطابئ مستور :)

يسلمو تركواز على الحضور والتشريف ,,

تذكار ,,


عاشت الريم الشمرية المغرورة

الله يقلع شرتس :) ,,,شكلتس بصمتي على غروري البصمة السابعة >>> شماغ البسام :) :)

يسلمو تذكار على المشاركة الفعالة :)

شموخ ,,


ليش شهادتي بيعتمدون عليها الناس يالريم

أمَّاااااااااااال ,, دنتي الخير والبركة :)


بس الحق حق وربي انها أغلى معلمة عرفتها في حياتي وزاد الغلا لشمر حتى وصل لحدود نجم الثريا بعد ماعرفت انها ترجع لشمر وفعلا تواضع شفته في هذه الانسانه لدرجة انها والله العظيم هي اللي تتصل فيني مع ان الحق لها وتنصح نصيحة اخت كبيره بعد ماخلصت اول ثانوي اتصلت فيني تبارك لي النجاح و نصحتنى ادخل علمي بس انا ماحب هالقسم ومادخلته

شوشو ,, ماودتس تعطيني رقمها :) :)

بعدين يالدافورة وش عاجبتس في الأدبي تكفين ؟؟ وقسمن تجيب النوم دراستكم :)


الا ياحبي لكم ياالريم ماعليك من اللي يقولون عنك مغروره " قول عني ماتقول "او قولي لهم بيت على ماظن لفيصل :

وشلون مانغر وربعي سناعيس

ياحبيلتس والله أنتي :) ,, وسالفة ماعلي من اللي يقولون عني مغرورة ,, أصلا مابيدي شيء أسويه :) ,, إلا انكان أقعد أدور على العالم وحدة وحدة عشان يعرفون اني مانيب مغرورة :) >>> وحدة صحيحة :)

تسلمين يالغالية على مشاعرتس اللطيفة :)

أخوي أبو مقرن ,,


(بس تروه ماهو شمري)..المهم إني حقدت عليه

هذا وهو ماهو بشمري وأنت شمري وحقدت عليه !! :) أجل بعذر العالم يقطعون في جلودنا :) :)


قال: والله إن مصيبتي إني حياوي بلحيل..ولا أسلم ولا أحتسي حياء..

هذا مار عذروبه الحياء ,, بس حنا اللي وش حليلنا داخلين بقوة في العالم ومع ذلك ماافتكينا :) :)


أشكرتس على تسفية هالدلو..بفلتنا..

وأنا أشكرك أكثر على تسفية دلوك اللي تشرفت به في موضوعي

أخوي متفاءل ,,


اأطعي دراعي كان فهمت شين

ماتخافش ياقدع ,, دحنا في الهوا سوا ,, يعني انتا مش حتئطع دراعك وأنا مش حائطع دراعي مافيش حدّ أحسن من حدّ ,, لانا فاهمة انتا بتؤول ايه ولا انتا فاهم حاقة :) :)


طويلة هذه الامثلة . ولكن اختصره لكي بهذا المثل ويجب ان لايغيب عن اعيننا خاصة ونحن في مجتمع غير مجتمعنا وغير عاداتنا وتقاليدنا

كفيت ووفيت وأنا أختك بهالتفصيل الرائع ,, فعلا مثل ماقلت ,, هذي بعض الأسباب ,,


تحياتي لكي على هذه الكتابات التي تجمع دائما بين الجد والفرفشه لتصلي بهذا لهدفك المنشود

أخجلت تواضعي أو غروري بهالمجاملة الرقيقة >>> اللي يجوز لك منهم حطه :) :)

والحين أقدر أقول لك تستاهل قولة : تسلم على مرورك :) وفعلا شرفتني بهالرد الوافي ,,

أخوي ذيب شراف ,,

قهوة ,, شاهي ,, أي خدمة وأنا أختك !!؟؟

مشكور على المرور ولو انه كلمتين :)

أخوي مفتاح14 ,,


يعني حاولت ادلي بدلوي بس مالقيت له مكان

أفا وانا بنت أبوي بنته :) مالقيت مكان والمحل محلك :) :)

أدلي بدلوك وأنا أختك لو مانلقى له محل الا في سلة المحذوفات :) :) >>>> تسني خربتها :)


الريم.. ياكثر اللي قروا موضوعتس.. عاد مادري السبب هو شعبيتس والاعناوينتس اللي مادري وش تبي

والله الظاهر يامفتاح 14 إني اكتشفت سر كثرة القراء :)

السر وأنا أختك موجود في هالأيقونة :) >>>> :) :) ياهي تستقطب القراء من كل حدب وصوب :) >>> مفتاح اطمر هالجملة والا شتها هناك لمضيف الفصيح :) :)


ابنزل موضوع هاليومين وابيتس تحطين لوه عنوان لعل وعسى يكثرون الزوار

مفتاحوه تبي الصدز ترى مواضيعك مسكتة بس بلا تواضع ,,, لاتصدق ان الشمامرة متواضعين :) :) >>> هذي اللي نسفت موضوعها من أوله :)

يعطيك العافية وأنا أختك على هالزيارة الكريمة