ابشـــــرح التشويــــــــــــش

[مشــــعل]

السلام عليكم ورحمة اللة وبركاتة

ارجوا من الاخوة اللي عندهم دراية بالشعر يقولون رايهم بدون مجاملة

ابشرح التشويش ياناش الزمن تشويش=وقت يحش الخير وللشر حواش
كم حش من شغموم النشاما المداغيش=يوم النشاما هوشم بخضر الانماش
هل الدبش و الجيش تسمى دراويش=واللاش بن اللاش يسمى بشوش وهشهاش
ان زاد مالك جتك الشوارب بواشيش=وان نش مالك شبهوك بخضر الاجحاش
وخلاف ذا ياراكبن زبن الملاييش=يامشى يشدى ذيب صابة خراش
يشلع كما الشيهان يامن بنصها نيش=غالي الثمن ماقيل شارية فراش
تمنوة اللي عن ديار اهلهم مطاريش=نزي الحصى منة تقل ضرب رشاش
صانعة اللي ماصاب فكرة تشاويش=من سرعتة لاطوال المسافات قشاش
نمشي بة بقفر من الغنم مانيش=بصحصاح دوٍ ندهلةوقت الاغباش
ليت منهو عن الهوا يزبن على القيش=عرش العقل منداش واصبحت مرعاش
من واحدٍ فتش القلب تفتيش=وطحن قلبي طحن حبٍ بمهباش
من سبة ابو قرون عكاريش=ابو خدٍ يجهر تقل طقة فلاش
حبة تسرب لي مع النخاشيش=واصبحت منة تقل شارب غراش
لوللهوا بخشيش ندفع بخاشيش=ولوللهوا مهراب واللة لانحاش
هذا وانا وصيت ان كنت ماعيش=وهنيت منهو ضايع العقل منداش

[ابو خليف]

مشعل صح لسانك وبدايه موفقه

وان شالله نشوفك بالنبطي عن قريب

تحيتي لك

[بتول آل علي]

أخي الفاضل

مشعل


لا استطيع أن أفتي لك بشيء

>>>> الله وكيلك ما فهمت شي |513|

لكن من قراءتي الأولى أشعر أنني أمام قصيدة جزلة

موزونه و مقفاه و اترك التعليقات للشعراء :)


أختك

الدهور

[المشرف العام]

حياك الله اخي مشعل

ماشاء الله عليك

وقصيده جميله .. امّا الرأي فأتركه لشعرائنا وشاعراتنا وإن شاء الله مايقصّرون

وبصمة شاعراتنا الدهور على القصيده أوّل الغيث وشكري وامتناني لها


تحياتي

[بتول آل علي]

أخي العزيز

مشعل


و ربي رجعت للقصيدة اكثر من مرة

و في كل مرة أقتنع انني امام درة

و بالأخير قررت أنقلها للشعر النبطي

فهو بالتأكيد المكان الانسب لهذه الجزلة


ألف صح لسانك

الدهور

[مشــــعل]

مساكم اللة بالخير /او صبحكم اللة بالخير

تسلم ياخوي ذيب شراف انت والمشرف العام على مروركم الكريم

وتسلم يمينك ياختي الدهور على نقلك للقصيدة وعلى شهادتك اللتي اعتز بها

[بنت الشمال]

اخوي .. مشــــــعل

صح لســـــانك مليون
قصيده رااائعه جداً تسلم يمينك
ولاهنت ...
ونحن بإنتظار المزيد من إبداعاتك

تقبل تحياتي
اختـــــــــك

رهــف

[ابو غازي]

اخونا مشــــــــــعل

بداية رائعة وموفقة بحول الله
وشهادة شاعرتنا القديرة اااااااالدهور .... خير دليل
صـــــــــــــح لساااانك

ابو غازي

[مشعل العبدالله]

الاخ ..الشاعر .. مشعل ..



قصيـدة .. تميـزت بقافيـة ليست بالسهلة .. سواء ً بقافية الصدر .. أو العجـز ..


صح فكـرك ..


وأثق بأنك تحمل الكثير من الجمـَـال ..



فقط نحن بإنتظارك ..




مشعل العبدالله
عريـــب الساس

[مشــــعل]

السلام عليكم ورحمة اللة وبركاتة

الاخ ابو غازي

الاخ مشعل العبداللة

الاخـت رهف

تسلمون يالغالين وشاكر لكم على مروركم الكريم

[بو رائد]

الاخ الغالي مشعل القصيده جزله وصح لسانك لكن الاخراج ماكان مضبوط مثل شبك الكلمات مع بعض
وهذا يفقد القصيده ويربك القاري عموما صح لسانك ولاهنت
اخوك بو رائد

[عبدالله الجعيثن]

ياناس ابشرح وقتنا دون تشويـش=وقـت يحـش الخيـر وللشـر حـواش
كم حش من شغموم النشامـا المداغيـش=يوم النشاما هوشـم بخضـر الانمـاش
هل الدبش و الجيـش صاروا دراويـش=واللاش وا بن اللاش بشوش وهشهاش
ان زاد مالك جتك الشـوارب بواشيـش=وان نش مالك صرت مع خضر الاجحاش
وخـلاف ذا ياراكبـن زبـن الملاييـش=ليا مشى ذيـب قد صابـة خـراش
يشلع كما الشيهان بالبنص لا نيـش=غالـي الثمـن ماقيـل شاريـة فـراش
هو منوة اللي عن دياراهلهـم مطاريـش=نزي الحصى منة تقل ضـرب رشـاش
صناعة اللي مابفكـرة تشاويـش=من سرعتة لطـوال المسافـات قشـاش
نمشي بقفـر ماسكنته هل الجيـش=بصحصـاح دوٍ ندهلةوقـت الاغبـاش
ليت منهو عن الهوا يزبن القيـش=عرش العقل منداش واصبحت مرعـاش
مـن واحـدٍ قد فتـش القـلـب تفتـيـش=قلبـي كما حب طحـن وسط مهبـاش
مـن سبـة اللي له قــرون عكـاريـش=ابـو خـدود(ن) كنها طقـة فـلاش
حبـة تسـرب مع مسار النخاشـيـش=واصبحت منـة شـارب خمسة غـراش
لـوللهوا بخشيـش نـدفـع بخاشـيـش=ولـوللهوا مهـراب واللـة لانـحـاش
هذا وانـا وصيـت ان كنـت ماعيـش=وهنيت منهـو ضايـع العقـل منـداش

مشعل

صح لسانك

قصيده جميله

اعجبتني قافيتها وانتقاءك لمفرداتها الا ان الوزن فيه بعض الاخطاء البسيطه واللتي يمكن تداركها في المرات المقبله.

ولأعجابي بها اردت ان تظهر بأجمل من ذلك.

فقط اعط نفسك الثقه وحاول القراءه للشعراء واستعمل التلحين لابياتك.

وانا متأكد ان القصيده القادمه ستكون اجمل.

نصيحه للجميع: ارجوا من الشعراء اللذين هم في بداياتهم ان يبتعدوا عن القافيه الصعبه حتى يتمرسوا ويصبحوا قادرين على نسج القصائد.

شكرا للجميع.