قصيدة الشاعر فهد عافث بالمرحوم طلال الرشيد

[أخوزرقاالدندشي]

لو الحزن دمـع .. الله يحـرم يبـاس المـوق
على العيـن .. ليـن يغـرق الجفـن مجهاشـه

ولو الوزن شمع .. اللي من كبودنـا محـروق
ينيـر الظـلام بنـجـر الاضــلاع مهبـاشـه

على سلـم جدانـه يمـوت و جبينـه : فـوق
لو ان الجـدي يرقـى علـى سهيـل مـا ناشـه

وطيب .. لو ان المسك ما ارخصه عرض السوق
غـدا مـن قواريـره .. ومـن طيـب غراشـه

"طلال الرشيـد" اللـي تجيـه المنايـا .. بـوق
على صدق وعد المـوت ، الاسبـاب : غشاشـه

نصاه الرصاص : ضيوف ! .. قلطهم : المعلوق
وعشى ضيوفـه : مهجتـه ! .. رابـط ً جاشـه

يا ربع يهبا ريح الفشـق .. وشكثـر معشـوق
تقل .. عيب احد من "شمـر" يمـوت بفراشـه !

وهذا مهو بـايـات احـد .. يعجـز الطـاروق
يوفيـه قـدره لـو هـو السحـر .. ودهـاشـه

أمير التواضـع و الحيـا و الأدب .. و الـذوق
والاخـلاق .. ملفـى كـل طيـب .. و مطراشـه

سرى للنوايف _ راس "شمر" _ مهو مسبـوق
تقـل وحـده "السـاري" والآنـام : "غباشـه" !

نعم .. مايكبـره "اللقـب" .. يكبـر المنطـوق
بالافعـال وعـزوم الرجاجـيـل .. بطـاشـه !

حثينا على وجه السحـاب : التـراب .. حقـوق
لو الله عفـا منـه اكـرم الخلـق .. ماحاشـه !

يا رب اغفر لعبدك "طـلال ارشيـد" .. وسـوق
لـه مـن البـرد مايبهـج الـروح .. رشراشـه

وعسى "ربـي : الله ونبيـي : محمـد " طـوق
يوقـي بهـا عـن ظلمـة القبـر .. واوحاشـه

بجاهك .. وعزك .. وبجلالك .. ياربـي عـوق
عن النـار : جسـم عـل "الاستبـرق" قماشـه

يا رب .. وعسى صحبته "ابو بكر" و "الفـاروق
بقدرتـك ياللـي تـرزق الطـيـر باعشـاشـه

يا رب .. وعسى اللي عندك من السعد مفهـوق
لـه بكـل عمـر ماتـه ابـن ادم .. وعـاشـه


فــــــــــــــــهد عـــــــافت