ياهلا ويا مرحبا يالاصيل

[ثامر]

سلام رده وهم بثني سلامي = واليوم يا شعار عندي كلامي
شايف الاصيل لعبه فيه احترامي = يوم الكريم سل سيفه بيمناه


يا مرحبا في دار ِ مكرمين الضيوف = تحيه من شاعر ما يرد التحيه


. . . . . . . . .


أمسك طريقك وخل عنك الطرايق = من شان نصبح أنا وأنت رفايق
من قوم ملفي ولا قوم ابن شايق = يوم الكريم سل سيفه بيمناه


إن كان ودك نحط النقط فالحروف = ولااا نخليها حروف ٍ أعجميه

[الأصيل]

ياأخ ثامر ،،، إنت مشرف محاوره ،، وأنا توي ضيف ،، وعلى قد حالي

وجبت لي هالطاروق اللي مايشيله إلا أمثالك من الشعراء ،، لكن الجود من

الموجود ،،،،





أحلى تحيه من ضميري لثامر=عندك ننوخ متعبات الضوامر

بيتك لمدهال المسايير عامر=يوم الكريم سل سيفه بيمناه


دامك معي ونا معك ننزل الخوف=الخط واضح والرساله خفيه !!

***********************************************


طريقنا واضح ولا به خفايا=نظهر لكم بالنظم حسن النوايا

والله يكافينا كبار البلايا=يوم الكريم سل سيفه بيمناه


احذر تبدل منتج القطن بالصوف=الدرب ظلما والمسافه بطيه

[ثامر]

فيك الخير والبركه اخوي الاصيل وكلنا متعلمين (( جدد )) في هالمجال والحال من بعضه وانا اخوك ;)



" زبني " تكلم . صوب وزن الثقيلي ؟ = والهرج هذا ما يصح ياعميلي
والعلم ِ هذا مثل ِ علم الهبيلي = يوم الكريم سل سيفه بيمنااااه


أحب أنا الشجره اللي ما فيها قطوف = حيث أنه تباعدني عن فعل الخطيه


..........................


بعض الفعايل فيها نقص ٍ وزودي = وكم قالها قبلي شيخ ٍ وعودي
عطني جوابك واضح ٍ بالردودي = يوم الكريم سل سيفه بيمنااااه



(( سلطان )) ؟ مايحب ِ هل العقول الضعوف = عاكسين النوايا ما فيهم حميه

[الأصيل]

الله يستر من تواليها ،،،،استلم لاهنت ،،


هرجي منزه عن جميع العذاريب=لاذم، لاتجريح، لالمز ، لاعيب

ماقلت نقص ولا بدا فيه تثريب=يوم الكريم سل سيفه بيمناه


ترا الخطيه مو مع كل مقطوف=ولا كل غصن(ن) يقتطف منه سيّه


****************************************************


خوينا نحميه لاصار مضهود=نرفي خماله لو بدا منه منقود

تلزمك يا ثامر مواثيق وعهود=يوم الكريم سل سيفه بيمناه


تبغا هجوم وننطح السيف بسيوف=ولاّ تبي كلن يعاون خويه ؟؟

[متفاائل]

خوينا ماينضهد من اساسه = يبقي عزيز ورافع-ن فوق راسه
مايشتكي ياكود كثر الوناسه= يوم الكريم سل سيفه بيمناه



وانا تراني جيتكم عرض ملقوف= واحذر من النيه تراها مطيه



================================








واحذر يجي في نفسك الكبر والزوم= تراه يلحق صاحبه نقص ملزوم
واذا نويت الدرب مع اول القوم = يوم الكريم سل سيفه بيمناه



انته من اجواد لهم صيت معروف = والاجودي يصير به حسن نيه

[الأصيل]

إنت العزيز وجيتك تشرح البال=(متفائل) معرب من العم والخال

والحر حر ولو عسور الزمن طال=يوم الكريم سل سيفه بيمناه



أنتم مثل سمعي وثامر كما الشوف=أحمي نظر عيني وسمعي بديه

*******************************************************


راكد ولاني بالتماثيل مطفوق=يعينني من يرسل النصر من فوق

ماني عجول وكل مطرود ملحوق=يوم الكريم سل سيفه بيمناه


الكبر عيب وراعي الكبر معيوف=واللي به العله يداوا بكيه

[متفاائل]

اشكرك هذا بس من حسن ذاتك = اسمك موافق يالاصيل لسماتك
افرح اذا حصلت من به صفاتك = يوم الكريـم سـل سيفـه بيمنـاه


تسلم ولا يسلم ردي وبه جنوف = سمعك وشوفك ماتجيه الاذيه






........................................................................






من لايتركد بالتماثيل غلطان = طفاقته لابد يدفع لها اثمان
من لايعرف الرمي ماصاب نيشان = يوم الكريـم سـل سيفـه بيمنـاه


انت رجل تعرف امر الخسوف من الكسوف = انزل الميدان وارضه ترى ماهي خليه

[راعي الوقيد]

الله لا يهينكم ....

ورااا......

حبيت ابين لكم انه فيه من يتابع ...

وفيه من ينتظر على احر من الجمر...

تسلمون

[الأصيل]

حيا الله المشجعين والشعراء ،،،





نصيحتك تشرا ولو زادو الكيل=متفائل وهرجك تنزه عن الميل

دامك معانا يزهي اللعب بالحيل=يوم الكريم سل سيفه بيمناه



المجد بحر وغالي الدر بصدوف=ومن غاص قاعه جاب در(ن) بهيه
************************************************


محاوره نقصد بها ضرب الأمثال=نبعد غثاث الحكي من قيل أو قال

نصيحة الناصح كما الضو شعال=يوم الكريم سل سيفه بيمناه


شرب القراح وأكلنا تمرة الجوف=أخير من رزق(ن) دروبه رديه

[ابو غازي]

عاااااشو ااالشعااااااار http://bestanimations.com/Careers/Entertainment/Entertainment-02.gif

[متفاائل]

حنا بزمن يالله ستر الحال = ماهوا لنا هذا زمان حثال
زمان اهل القيل والنقال = يوم الكريم سل سيفه بيمناه


واهل الصخى يوم الزمان حتوف = ضاعوا وولد العفن من زيه





..........................................


المصلحة صارت هي الغايه = والناس صارت مابها عبايه
النصح راح وكثرت الساية = يوم الكريم سل سيفه بيمناه


يصنع لك التاريخ لو انت منتوف=ويكتب لك امجادن من الجاهليه

[راعي الوقيد]

كاتب الرسالة الأصلية : ابو غازي
عاااااشو ااالشعااااااار http://bestanimations.com/Careers/Entertainment/Entertainment-02.gif

معهم.........

عاشوا......

اذكرونا......

عاشوا.....

[متفاائل]

الف شكراً لك راعي الوقيد على هذا التواجد الدائم
وشكراً لكل من مر من هناء حتى ولو لم يسجل تواجده .

[راعي الوقيد]

يوم الكريم سل سيفه بيمناه...

العفوا بابن العم......

آقف معك وان بغيت انطح معك والم...

لكن.. ماشاء الله عليك..

كفو..

[الأصيل]

حيا الله أبو غازي وراعي الوقيد ( فازع لابن عمك تبي تنطح معه ؟؟ تراني ابن

عمكم ،، أشوف ما أحد فازعن لي )

وحيا الله الجميع

***************************************



تبقا المعادن ياعزيزي أصيله=تفنى الحكايا والعلوم الهزيله

كم واحد(ن) عايش بخدعه وحيله=يوم الكريم سل سيفه بيمناه



شوف العجب مع دورة الدهر بصروف=نوبه عجول ونوب يمشي شويه

***************************************************


اصبر على مر الليالي والايام=طبع الفتى يبحث عن المجد قدام

من هم قام وقلل النوم ما نام=يوم الكريم سل سيفه بيمناه


من جد بالممشى ترويه بكفوف=والضامي النايم يجافيه ريه

[أبو مقرن]

الأصيل ومتفاءل..
كلكم بني عم وغالين...وتستحقون المتابعة والإشادة...
وإن بغينا نفزع مع أحد.ن. على أحد..خربت السالفة...:p:p

***
ومادام كيفكم (حلوة الجوف)..واصلوا لاقطع الله حبل الوصل بينكم يالعزوة..

***
عاشووووا الشعاااار..
***
المتابع بشغف..(أبو مقرن)

[متفاائل]

يوم الرجال تقوم الخايب = ماله مقام لو هو شايب

كلن رفع نفسه لهم هايب= يوم الكريم سل سيفه بيمناه


واليوم كلن قال ماني بمكلوف= راع الردى والطيب عنده سويه




...............................





ياما افتخر في فعله الضايع = راح الخجل من وجهه المايع

للدين ولسلوم العرب بايع = يوم الكريم سل سيفه بيمناه



عيالنا باكر يحسبون به نوف = ولا يعرفون العيب والمنقديه

[متفاائل]

هلا والله وغلاء

ابو مقرن عندنا
الايام مبروكات وابركهن اليوم اللي شرفتنا به


شكراً لك على المشاركه

[الأصيل]

ياهلا وغلا يبو مقرن ،، تراني أمزح ،، كلنا إخوان ، والتقدير بالقلوب ،،




مايقوم البيت من غير العمد=ولايتيه اللي ليا ضيّع نشد

وما يخيب اللي رجا الفرد الصمد=يوم الكريم سل سيفه بيمناه


الصبر زين وناتج الصبر معروف=حيث الفرج ياتي بصبح وعشيه


************************************************
للصفوووووووووووووووووووووووووووووووووووو وووووووووف

أهلا يبو مقرن تحيه وتقدير=مع أبو غازي والرجال المناعير

وراعي الوقيد ياريف ركب المسايير=يوم الكريم سل سيفه بيمناه


سلام للي يسند الصف بصفوف=تستاهلون اليوم أغلى هديه

[ثامر]

هلله هلله

عاشو كملو الله لا يهينكم

[متفاائل]

يفرج لمن ينكر على الغلطان = على قدر مايستطيع ادان


لكن من خل اضعف الايمان =يوم الكريم سل سيفه بيمناه



بخلوا بها من دون خوف ولاضروف=باعوا رضاء الله في رضاء الادميه






.........................................
للصفوووووووووووووووووووووووووووووووووووو وووووووووف


يامرحب براع الوقيد ابتدينا = وهلا بابوغازي وذيك اليدينا


وبمرور الغالي ابو مقرن علينا =يوم الكريم سل سيفه بيمناه



جو بالصفوف وشالوه والغي الاوف= مع انهم ثلاثه حساب ميه

[متفاائل]

ثامر
حقك بالبايت ماهو بالفايت انشاء الله
عذرا وقت كتابتي للرد ماكان لك مشاركه
تحياتي

[المخاوي]

الاصيل - متفاءل

لو اني جاي متاخر:)
بس ماقصروا اللي حضروا
صراحه محاوره ممتعه وشيقه وفيها
حكم ونصائح جمه ;)
الله يعطيكم العافيه
ونرجوا منكم المواصله لاهنتوا

[سرحــان]

الأصيل ومتفاءل..


كلكم بني عم وغالين...وتستحقون المتابعة والإشادة:)

وإن بغينا نفزع مع أحد.ن. على أحد..خربت السالفة:mad:

الله يعطيكم العافيه


تقبلو تحياتي
سرحــان

[متفاائل]

كاتب الرسالة الأصلية : المخاوي
الاصيل - متفاءل

لو اني جاي متاخر:)
بس ماقصروا اللي حضروا
صراحه محاوره ممتعه وشيقه وفيها
حكم ونصائح جمه ;)
الله يعطيكم العافيه
ونرجوا منكم المواصله لاهنتوا

المخاوي

وافي يالغالي
اشكر مرورك اصالة عن نفسي ونيابه عن الاصيل
نورت وشرفت اللعب والله الله عاد يومنك دريت امسك الصف

[متفاائل]

كاتب الرسالة الأصلية : سرحــان
الأصيل ومتفاءل..


كلكم بني عم وغالين...وتستحقون المتابعة والإشادة:)

وإن بغينا نفزع مع أحد.ن. على أحد..خربت السالفة:mad:

الله يعطيكم العافيه


تقبلو تحياتي
سرحــان

سرحان / حياك الله والساعة المباركة
شكرا على الاشاده
وافي يالغالي
اشكر مرورك اصالة عن نفسي ونيابه عن الاصيل
نورت وشرفت المضيف والله الله عاد ياصرت فاضي ومر بك الفال علينا امسك الصف

[الأصيل]

الشكر لكل الحضور ،،، لاهنتو ،، والحقيقة المقصد هو الفائدة والنصيحة

والحكمة ،، ومتفاءل ما قصر أبد ،،



من وصايا ديننا ( حق الجوار)=نحتمل خيره وشره يوم جار

والمهادي جيرته عز وفخار=يوم الكريم سل سيفه بيمناه



واليوم حق الجار بالناس معيوف=ماظل غيره بالقوب وحميه

*************************************************

ياكيف جار يغازل الام والبنت ؟؟!!= العرض عرضك ونت للعرض ما صنت

يرسل لها (الايميل) موعد على (النت)=يوم الكريم سل سيفه بيمناه


مامن خجل يرسل رساله بمظروف=ويناظر المنزل بروحه وجيه

[متأمل]

أخواي الشاعران... الأصيل و متفاءل...
طاروق رائع و أبيات رائعه...سجلوني من المتابعين و المعجبين.

جهّز حالك يا الأصيل ...لي لقاء قريب معك...

عساكم على القوّه..

[متفاائل]

متأمل
حي الله من جانا من طول الغيبات جاب الغنايم
شكرا يشرفنا مرورك
الاصيل . ماعليك زود سلمت .




عدّ واغلط من حقوق ضيعوها بالقصور=من حقوق الدين وسلومنا بماضى العصور


ربنا حفظ لنا احقوق حتى بالقبور= يوم الكريم سل سيفـه بيمنـاه



من حج بيت الله لزوم يطوف= ويدعى كريم يجيب داعيه








ياكثر امور حاصله هـالحين=اليوم ماتلقى ولا امر زين


والناس لا نوما ولا صاحين= يوم الكريم سل سيفـه بيمنـاه





تعصون اوامر ربكم ياضعوف =وترجون خير وصلح ذريه

[الأصيل]

حياك الله يالمتأمل ،، اصبر شوين ،، تراني بلشت بعمري ،، هنا متفاءل وثامر

وهناك أبو شنب ،، وعقبه سهيل ،، ماتفزع لي يالاجودي ،،

تسلم يالمتفاءل ،،،،،،،،،،،،،،،،واستلم لاهنت ،،،،،،،،،،،،،،،،،،

*******************************************************


قطيعة الأرحام جابت لنا الشر=وين الصله بين القرابات والبر

والوالدين من الولد ذاقو المر=يوم الكريم سل سيفه بيمناه


أبناء خلو دمع الآباء مذروف=ياويلهم من حكم رب البريه


*************************************************


مشاكل الأزواج يطفح بها الكيل=ضرب ومسبات وجروح وولاويل

حكم الولي بالعدل مابه تماييل=يوم الكريم سل سيفه بيمناه


تسريح بالحسنى ومسك(ن) بمعروف=والعاقل المدرك حياته هنيّه

[متفاائل]

ياحامي الكعبة تحمي الدين = لبس ثياب اهله من الغاوين

لاهداف في انفوسهم ماشين= يوم الكريم سل سيفه بيمناه


استغلوها وسيله لاجل غايه ياحسوف=كرهو في ديننا عالم ماله دريه






===========





قصر ثيابه واسبل اللحيه = ضايع لقاء بهذا العمل قدره

مظهره عكس امور في صدره=يوم الكريم سل سيفه بيمناه


مايامرون الناس بالمعروف = نيات ملتويه وملويه

[الأصيل]

الدين دين الله كتاب(ن) وسنه=تفسير مع كتب الحديث احرسنه

وجهاد للكافر بضرب الأسنه=يوم الكريم سل سيفه بيمناه



نهج السلف واضح ، منقّا ومرصوف=يامر وينهى بين شد ورويه

******************************************************




اللي بغا الفتنه عسى الرب يخزيه=والقلب يظهر من فعوله مواريه

ومن ضل منا جعل مولاي يهديه=يوم الكريم سل سيفه بيمناه


نحمي حما التوحيد روف(ن) ورا روف=ونصد عنّه كل ريح(ن) قويه

[متأمل]

مرحبا بكم أخوىّ الكريمين..

متفاءل: ما دريت انك حاضر ولا كان لعبت معك, لعبك زين و موزون

الأصيل: أبشر بالنصره لكن ليس الآن, أشوفك تكافح القوم و انت
قوى.. لكن لا حسّيت بالتعب ...ازهمني...


تحياتي لكما..

[المشعل]

الف الف شكر للشاعرين المبدعين والمميزين


على هذه المحاوره الطيبه والموضوع الجيد :mad:


بس فيه بعض الملاحضات وياليت تصححونها


وحنا متابعينكم بشغف

ولكم الشكر..........

[متفاائل]

الدين اهانه واحدٍ كان صايع =بالمجتمع محدٍ ملفيه ضايع

لا علم لا اخلاق ربا بشوارع= يوم الكريم سل سيفه بيمناه


لقاء احترام قبل ماهو بمالوف= كم اجودي بلوه ماله قضيه





-----------------------------------





ماقصدى الاحداث والارهاب = المجتمع مستلغفٍ له داب


سيماه سيما الدين وهو كذاب= يوم الكريم سل سيفه بيمناه


اللبس شبه والشكل كنه العوف=والمنطق اقشر عاق ربك نويه

[الأصيل]

مشكور ( يالمشعل ) ونقدك على الراس=ياصاحبي وضّح ترا النصح نبراس

توجيهكم أغلى من الدر والماس=يوم الكريم سل سيفه بيمناه



هات الخلل ومكمل النقد بوصوف=ترا التواضع للنشاما سجيه

********************************************************

(
متأمل) متابع على طول معنا=يمدح ويثني بالمشارك رفعنا

طال اللعب ، حنا عطشنا وجعنا=يوم الكريم سل سيفه بيمناه


تبغون مندي تيس أو لحم خاروف=الحين راحه ،، والمسافه بطيه

[متفاائل]

هلا وغلا
بمتأمل والمشعل شكراً لحضوركم الطيب
الاصيل


كانك تقول انا تعبنا وجعنا=كانك تبي نرجع ترانا رجعنا


الامر بيداللي من اول جمعنا= يوم الكريم سل سيفه بيمناه



اعطيك جمله وانت اعطن حروف = من الحروف الابجديه



-------------




خوينا بالدرب ياحياك = انت الامير وامرنا واياك


اعمل على ماربنا يهداك=يوم الكريم سل سيفه بيمناه



نعز صاحبنا على المكشوف=مانقولها في كل سريه

[الأصيل]

لاهنت يامتفاءل ،،، ( أعتذر عن التاخير لطارئ صحي )



إنت الأمير ، ونردف السمع طاعه=تامر ، وأمرك نفتخر باتباعه

أخاف إن زدنا تمل الجماعه=يوم الكريم سل سيفه بيمناه


عسى التعب باللعب مثمر ومخلوف=والفوز يمكن نقسمه بالسويه
*****************************************************


أبدعت يا شاعر على كل الألحان=رصفت نظم الشعر لولو ومرجان

وما قل دل وزبدة الهرج نيشان=يوم الكريم سل سيفه بيمناه


عزفت لحن الطيب يا خير عازرف=شهادة(ن) مني بفوزك عليه

[متفاائل]

تسلم
عساك سالم استلم



مابيننا الاصيل فوز وهزيمه = اخوان ماحنا غريم وغريمه

اخو عزيز ولك عشمه وشيمه= يو الكريم سل سيفه بيمناه


الربع معنا ماسكين بالدفوف = خوت نشاما كلهم شوشليه









رايك نوقفه افعل ماتشاء = اسودعك الله والى لقاء

انا اذا جاء مطلبك كلي عطاء= يوم الكريم سل سيفه بيمناه


ماني من اللي بالشعر تقل مزغوف= يضيع فيها الظهر والشمس حيه

[الأصيل]

أحلى سلام لكل من رتب الصف=تقدير منا ناقف ونرفع الكف

من شعر (متفاءل) كما البحر ماجف=يوم الكريم سل سيفه بمناه


ننهي سباق الشعر من دون مكلوف=وكل(ن) يكثر بالصلاة لنبيه

**********************************************************


الشكر للجميع على المتابعة ،،،وللأخ العزيز ، متفاءل

نبقى إخوان وأحباب ،،،

والهدف التطوير والاستفادة ،،،

ولكم تحيات الأصيل ،،،،،،،،،،،،،،،،،،