المساعد الشخصي الرقمي

مشاهدة النسخة كاملة : قصيدة إخوي خالدالسعد :) رثاء بطلال الرشيد


فلاح السعد
21-12-2003, 09:35
يالربع هالغليّم غاثن مايداني النشر يوم جاء أكاليوم وأنا القى هالقصيده معه قلت إشي خلن اقراه ويوم قريته قلت عاد اقلب وجهك ياالله هذي ماهي ملكٍ لك لحالك شديد صح :)

المهم لكم القصيده


حفيد الجنازه


ياالله يامنشي على الناس همال=يالواحد المعبود جيتك بعازه
راجيك يالمعبود يامزّين الحال=تقبل عزانا في حفيد الجنازه
جانا الخبر في رابع العيد منهال=انا فقدنا شيخنا ومتيازه
شيخٍ لشمر يوم صكات الاهوال=حلال صعبات العقد بنعجازه
طلال لاعدو زحازيح الابطال= ليثٍ ولد ليثٍ ثقيلٍ مرازه
طلال ياحرٍ على الصيد جوال=صيده سمين ومخلبه في خرازه
طلال حطولك على الطيب تمثال=والطيب قال الضيغمي لي ركازه
لك بالكرم يالضيغمي فن وشكال=جود وكرم والطيب فيك انحيازه
لكن خذاك الوقت ياطيب الفال=والموت حق وكل نفسٍ تهازه
مرحوم ياشيخٍ فقدناك بالجال=يارب تجعل منزله بارتكازه
يارب تجعل جنة الخلد منزال=لطلال ابونواف بالخلد جازه
انت الكريم وطالبك ياذا الاجلال=يحشر مع الابرار يوم انحجازه
وجعل الجزاير ..................=اللي بها شيخ الطنايا جنازه
وتعمي عيون اللي غدر وسط الاجبال=اللي غدر بالشيخ يوم انتهازه
ياجعل يضربه الشلل فيه منزال=ويوجد معه نقص المناعه مخازه
وياجعل يضربه البرص يوم يحتال=يارب تجعل دعوتي في انجازه
وقال المثل مامات من خلّف اجيال=خلف لنا نواف ورث الجنازه
ابوك يانواف حيٍ بالامثــال=الصيت باقي لوفقدنا عزازه
تبكيه حايل والجبل ظل وظلال=وتبكيه نجد وكل ساكن حجازه
وصلاة ربي عد ماهل همال=على الرسول اللي للاسلام جازه

خالدالسعد الشمري
المخاوي
22-12-2003, 12:14
مرحـوم ياشيـخٍ فقدنـاك iiبالجـال = يـارب تجعـل منزلـه iiبارتـكـازه
يارب تجعـل جنـة الخلـد iiمنـزال = لطـلال ابونـواف بالخلـد جــازه
انت الكريم وطالبك يـاذا iiالاجـلال = يحشر مع الابـرار يـوم iiانحجـازه


اَمين
الله يرحمه ويسكنه فسيح جناته

وصح لسان خالد على هالقصيده الرائعه
وبيض الله وجهك على نشرها

أقول يابو سعد لاتخلي هالغليم اللي هذي قصيدتوه
أكيد انه شاعرن ماهو بسيط
مار أما أقنعوه يسجل ويتحفنا بهالروائع اللي عندوه
وألا البركه فيك كل ماهذا انشر حدى قصايدوه

وبيض الله وجهك وجهوه
ونحن بالانتظار
فلاح السعد
22-12-2003, 12:31
أبشــــــــر يابوخالد



ومالك الا اللي يرضيك


والله يابوخالد يابه له وحدنٍ



عن نهاية صدام تبكي النمل :)


بس عاد نشره به حكة علبا :)


صح بدنك يالغالي


وتسلم والله
المخاوي
22-12-2003, 13:10
بالخاص يابو سعد ارسله :)
سلمان النبهان
22-12-2003, 13:14
هلا باخوي فلاح السعد واخوه وصح لسانك يالغالي ولسان شاعرنا خالد ..
حقيقه رائعه تدل على شاعر فحل كبير ......
نبي القصيدة الثانيه وانتم اهل كرم وحنا بالمضايف نستاهل
شكرا لك يافلاح والشكر موصول للشاعر خالد السعد ...
الذي نتمنى ان نشاهد قصائده بالمضايف بالقريب العاجل .
فلاح السعد
22-12-2003, 13:25
المخاوي تبي تجيك له يوم بس ماادري متى



أخــــــــــــاف انه تكفش بالخــــــــــــاص


أقــــــــــــول وش نوحك ماتزرق يمنا لك يوم



نطلع كشته بحروة الكنب ونستانس ونعطيك


دفتر كله من هالنمونه :)



تحيااااااااااتي
فلاح السعد
22-12-2003, 13:27
هلا والله سلمان




ويامرحبابك يابعدي




واللــــــــه ودي انه يكتب




بس ماهو راضي يدخل هالمجال



وقصيده كله على شاكلة الاولين


وشاعره المفضل الربوض :)



يعني بعيداً عن الحداثه



تحياتي لك
المخاوي
22-12-2003, 17:53
والله يابو سعد

ان ودي أجيكم ميتن على المكشات:(

والموتر ذبحه البرد من قل الطلعات :)

مار مثل مانت خابر هالدوام الاقشر :mad:

وأنا أبي أحاول بالربع غديهم يخيمون حولنا ;)

مار ماشوفهم هم وينهم
فلاح السعد
23-12-2003, 09:55
سجل اسمـــــــك بالمضيف العام حضور


ماادري اسمك هناك او لا في المضيف

اللي مقترح فيه ابوسلطان الكشتــــه


يعني انك تبي الكشـــــــــته وعساهم



يصيرون حولـــــــــــنا
بتول آل علي
23-12-2003, 10:00
يؤ

أنا متأكدة اني رديت على الموضوع

وين راح الرد؟

:confused:
بقايا إنسان
24-12-2003, 03:03
صح لسانك يافلاح
وصح لسان أخوك

وتكفى قل لخوك
لايحرمنا من هالقصايد الحلوه
ياخلف جدي

والله يرحم زيزوم الطنايا