المساعد الشخصي الرقمي

مشاهدة النسخة كاملة : ممكن اقترح


محارش
16-09-2003, 13:38
سلامو عليكم


اخواني اعضاء واداريي هذا الصرح الشامخ

اليوم طنت براسي فكرة انشاء مضيف جديد واعتقد انه سيكتسح جميع المضايف :D

فكرة المضيف تتلخص بتبادل المعلومات بين الاعضاء في شتى المجالات والسؤال عما لا تعرف ومن يعرف يجيب .

يعني واحد ما يفرق بين الاديتر والكربريتر ينشد والاخوان يعلمونه :D.

وواحد وده يشتري ثلاجه بس ما يدري وش ازبط نوع ينشد وكل يدلي بدلوه :o.

واذا مثلا واحد جا للشرقيه ووده يعرف وين التطعيس برضه ينشد ويجيه الجواب :p.

<<< زين هالامثله :p

وهالمضيف سيكون متلونا بتلون حربلا الطلح :D يعني موسم الامطار يتناشد بوه الاعضاء وين طاح الحيا وين الربيع ;) ووقت الحج يتناشد الاعضاء وش احسن حمله مهي حملتي انا وواحد الله يستر عليه يقال له الاشعل :)


باختصار يكون هالمضيف هو ملتقى الاعضاء واي واحد عنده اي سؤال يطرحه حتى لو كان غير وجيه في نظره :)

هاه وش قلتوا وتروني حالٍّ بأول موضوع :D


الا ما قلتوا لي وش رايكم بعنوان الموضوع

ما تحسون اني شطوووري :D
الغثه
16-09-2003, 14:12
محيريش _ محاروش:D <<<<< قام يلعب باسمك مافي رسايل تهديد


اقول رايكم والله حلو يجنن

يهبل <<< اللي يسمعن يقول حلاو

وانا ابي تنفتح الشبه بعد


















محارش _ محارش


وصلك سلامي مع شمالي ولا لا





تحياتي الملونه لك ياللي تهددن مبطي:D


الغثه:p <<<< الحين ماهو ذالن منك
عاشق سلمى
16-09-2003, 22:54
هلا بالشيخ محارش

أنا هقوتي كأنّي شايف تلوّح بالمطالبه بشدّه في نسف بعض المضايف :( وهالحين تطلب زود :)

انا اقول عندي حل شبه ايجابي |1|

اللي يبي يسعل عن كلبليتر وبواجي يروح عند الفاضي بالاجهزه ;)

واللي يبي يسعل عن الطعوس ومناطق صيد السمك يروح بعد عند الفاضي بمضيف فله الحجاج

واللي يبي يسعل ان اي شيء ثاني .. يروح يم الغثّة ببوفيه عض شليلك على تقاطع الهارديز مع المخبر الشعبي:p في هضبة نجد:eek:


همسه :
ترى مضيف حراج المضايف لازال مخفي عن الاعضاء:( ولا فيه الاّ مشاركات ابو صياح وابو الرّزقي وساير ، يتساومون 200 إل عنّابي موديل 85 ، وإنقشع الحراج وهم ما وصلوا لبيعه:D
خلف الرويتع
17-09-2003, 10:08
هلا وغلا اخوي محارش

انا عارف اني مقصر ولكن انت شيخ وتسمح

اقترحك جداً ممتاز

فيه واحد يبي يستفسر عن نتائج الثانويه

الاستفسار عن قبول الكليات

الاستفسار عن موقع تعليميه نقل معلمين ومعلمات

الاسفسار عن قيمه السيارت واسعارها نصبح شريطيه

عيوب ومميزات اي سلعه

انا معك في هذا الاقتراح
المشرف العام
17-09-2003, 15:23
انتم فصلوا وانا البس:D

حسب ما يرغب به الاغلبيه ، واللي يبونه يصير;)
الغثه
17-09-2003, 16:29
نبي الشبه:D:D:D



<<<< متحسفن على بدلته الزرقاء


الغثه:p
الفاضي
17-09-2003, 19:27
يعني شبه من نوع ثاني

اجل قدام لعنبوا وراء
الغثه
17-09-2003, 22:13
ينصر دينك يالفاضي

هو انت معاي

الغثه:p
محمد العربي
20-09-2003, 20:24
اقتراح جميل وغير مسبوق , أخي محارش , وأعتقد بأن هذا المضيف سيكون له أثر جيد للتقريب بين الأعضاء ..

أيضاً وإلحاقاً لموضوع .. ممكن أقترح .. أرى لو يضاف مضيف آخر .. يكون مخصصاً للقصة والروايه والإنشاء ونظم الكلام والرسائل وما غير ذلك من فنون الأدب .. ولا يخفى ما لذلك من فوائد .
تركي ثنيان
21-09-2003, 00:38
طنه حلووووووووه |510|


الله لايهينك كثر من ها لطنات السنعه

توسع صدورنا شوي يمكن تطن عندك

وتسوي مضيف قطع تذاكر طيران وحجز

بأفخم الفنادق للي بس بالمضياف

واسطه


صوتنا معاكم / حكم مأبد

تركي ابن ثنيان
عبدالعزيز
21-09-2003, 04:51
أقتراحك يامحارش مردودٍ عليك < ملالي كالعادة و وراك وراك والايام اطول من اهله:p
ياجماعة الربع 28 مضيف ماهن بسيطات هقوتي مابمنتديات الانترنت اللي تنقسم لدرزنين ونص زينا
الا ليه مايصير مجلس المضايف ولا ماهو على اسمه وان قلتو لا يصير بالعام
على الاقل ننوع ونغير شوي بمواضيع تربطنا ماتفرقنا والراي الاول والاخير للمشرفين
عبدالله الجعيثن
21-09-2003, 14:24
انا لا اعتقد...|1||1|

ماادري وش السالفه بس اي اقتراح من محارش وعبدالعزيز

ارفضه وارفع الفيتو.:D:D
حاتم طي
24-09-2003, 03:13
والله اقتراح جيَد .. أنا معكم .

حاتم طي . :)
الشمري محمد فهد
25-09-2003, 23:49
إقتراح مش بطال من شيخكم محارش2 << --- To The Power 2 يعني :rolleyes:

ومهو شرط يكون خاص بالتطعيس أو أسعار الطماط و الثلاجات .. أقترح أنه يكون أشمل و يدخل بوه الأسئلة العلمية .. يعني واحد طق بباله يعرف شلون يشتغل الراديو ( طريقة عمله ) أو نظام الهواتف أو السنترال أو حتى طريقة
تحويل الجرافيك بالتلفزيون أو أحسن لعبة RPG بالبلاي ستيشن 2 ;)

<<--- ينصح بـ FF X لفوق سن التسع طعش :cool:

بالنسبة لإقتراح الأخ العربي أظن إن مضيف الأدب العربي شامل للي ذكر

من جد أبو سلطان ترى مضيف زي كذا راح يستفيد منه الأعضاء ( مضيف الأسئلة العلمية و التكنولوجيا مهو مضيف أسعار الخيار و الرديتر )

وتصير مضايف شمر مضايف تحوي فائدة للجميع من الناحية العلمية و العملية

منارة علم يعني وثق ان هالشي راح يميزه أكثر و أكثر عن غيره من المنتديات

وانا مستعد إني أتابعه إذا سمح لي وقتي بإذن الله باللي أعرفه .

قل تم ;)
المشرف العام
26-09-2003, 03:59
ركّزوووووووووووا على اقتراح ( محارش )

اشوف البعض يقترح انشاء مضايف اخرى:D

لي عوده لأحصي الترشيحات ، واستبعاد الترشيحات التي ترشح وتطلب مضيف آخر:(
الداهية
26-09-2003, 16:47
أقتراح كذا |116|

يا شيخ |505| ..
الشمري محمد فهد
02-10-2003, 00:07
المعذرة على التأخير ..

أبو سلطان أنا حين إقترحت ما كنت أطالب (<<--- لاتركز على هالكلمة )

بمضيف جديد , كنت أقصد ان مضيف محارش حق( يعني بتاع بالمصري ) الأسئلة العامة يتوسع و يشمل الاسئلة العلمية أو اللي مالها سنع بنظر أصحابها مثل ماذكر محارش و لا يقتصر على أسعار السلع و متطلبات الحياة ...

يعني يكون شامل لكل شي و لا يكون مجرد مضيف للسوالف إللي ماتفيد

أو تكون فايدتها على مدى قصير . مثل أحسن نوع لأي جهاز كهربائي و اللي يمكن تكون مجرد دعاية - ما نستفيد منها - لمنتج معين ..

<< --- كان متحمس لدرجة فوّتت عليه توضيح فكرته بدرجة كافية :rolleyes: ...

الخلاصة : أصوت مع تنفيذ الفكرة إذا كان المضيف مثل ماذكرت و بالتاكيد إنجاحه

يعتمد على الأعضاء و إنتقائهم لنوعية أسئلتهم ..

...


شيخهم السابق محارش :)

سـر و نحن أمامك :p سائرون :cool: <<--- ما هم بودي غارد |513|
شمالي
02-10-2003, 17:56
بسم الله الرحمن الرحيم
أنا مع إقتراح شيخنا الفاضل محرش إبن محارش
المشرف العام
07-10-2003, 15:26
طيّب .. اخي الشيخ محارش

ممكن .. تكمّل المشوار

وتكتب لنا سياسة مختصره يتم تدشينها بالمضيف ;)

هذا زود على انّك من سوف يديره بالكامل ;)
مفتاح14
08-10-2003, 13:31
8
8
8
طيب اليا من محارش كتب السياسه المختصره ودشنتوه بالكامل علموووني على عشاان اقتــرح عليكم اسم للمضيف:D:D


بس اتوقع ان هالمضيف الجديد يبي يسحب البساااط من حدر الفاااااضي يماار هو متنكّس:p ويبي يطيح سوق فلة الحجاااااج:D


x XXبرااااااااايفت محــارش ..XXx

بالله وين مكانك يوم تطري عليك هالفكره;) اعترف احسن لك:D:D


ننتظر الافتتاااااااح.. وترووووووني شريت المقص:cool:

يعطيكم العاااااافيه
ابو غازي
08-10-2003, 17:53
السلام عليكم ورحمة الله وبركاته

يااالربع والله من يوم طرح االفكرة خيي محااارش
وأنا أحوس وأدوس بااالتفكير
حتى هذه اللحظة ماني مركز
مار يابو سلطاان
خلو نظركم بعيد باالعواقب والمترتبااات بعد ذلك
أعانك الله يابو سلطاااان
عبدالعزيز
09-10-2003, 07:07
حايل وزان جوه
والطش بدى به ولله الحمد
والجو استبرد
والقيلات بدت




الله واعلم ان هالشتا يبي يقضي وهالمضيف مافتح:mad:

مار على طاري هالمضيف
سجل لي اول طلب منك

ابي انواع النخل والتمور
ياخوي ماعرف بوه ابد ابد
شخاط
09-10-2003, 12:34
مامن اقتراحات :mad:

لاتتعب نفسك

ماحد ملقيك بالك


قطعت مشرفن ونزلوه :p


الغالي محارش تصدز ياشين يوم شفت العنوان حسيت بي


تقول راعي وزاره وسحبوا البساط منه

يقول ممكن :(

وهيالله نشدتك لاتحسر بنا واتم علينا النعمه :D:D:D
محارش
09-10-2003, 14:22
تحياتي للجميع واشكر جميع من تفاعل مع الاقتراح سواء كان مؤيدا او معارضا :)


الغثه

وصل سلامك ياجدي والله يسلمك :)

وبالنسبه لاقتراحك فسيكون ضمن المضيف اما اذا ودك بالشبه كله فاقترح بموضوع ثاني :D

عاشق سلمى :

هههههههههه فطنتن بمضيف الحراج الا اريت منهي لوه الميتين ؟؟؟ هي مهي لمهراس الله يذكره بطيب ذكره :)

بالنسبه لتقليص المضايف لا زلت عند رأيي ولا مانع من قشع المضايف النيمه :D


خلف الرويتع :

مشكووووور على اضافتك وتوضيحك لبعض الامور اللي راح يحتويها المضيف الجديد :)

المشرف العام :

عادتك ما ترد اللي يطلب :)


الغثه ( ثاني مره )

الله من الفضاوه ;)


الفاضي :

الله من الفضاوه انت بعد ;)

الغثه ( كلاكيت ثالث مره )

ما تشوف انك قلبت الموضوع خبيتي انت والفاضي :D


محمد العربي :

ياحبيبي ( بتسكين الحاء وتفخيم الباء وتسكين الياء )
والله فكره طيبه لكن هل تعتقد ان في المضايف من يساند فكرتك , شخصيا اتمنى ذلك :)

تركي الثنيان :

شكرا لك وابشرك الطنات واجد :)

عبدالعزيز :

وشو مردودوه :D


الغازي :

على طاري الفيتو يقولون الفيمتو يبي يحتكره صالح كامل برمضان اللي مهو هالجاي فعاد لا تخلي بنفسك شئ من الفيمتو هالرمضان :D


حاتم طي :

مشكووووور على المسانده :)


القلب العاصف :

تشريف معاليكم لموضوعي المتواضع لهو محل فخر واعتزاز لي شخصيا ولكل المشاركين فكيف وقد تبرع سموكم الكريم باقتطاع جزء من وقته الثمين لاضفاء مسحة من القداسة لهذا المضيف الخديج والذي بدعمكم سيكون عملاقا :)

ياهل الله ياللي فووووووووووء
بصو للي تحت


المشرف العام ( ثاني مره )

شكرا لك :)


الداهيه :

مشكووووووووور على المسانده :)


صاحب السمو الملكي القلب العاصف : ( للمرة الثانيه يا فرحتي )

الارض حمّـالة الثقلين :rolleyes:


شمالي :

مشكووووووووووور على المسانده :)


المشرف العام ( ثالث مره )

تحياتي لك وسأكتب عنه باسهاب نوعا ما بعد هذا الرد ان شاء الله :)


مفتاح اربعطعش :

ههههههههه الله يرجك يا شيخ
هكا اليوم تخانقت انا ورئيسي بالعمل وحط كل الشغل فوق راسي ومن زود الطنوة قلت خلن اقترح <<< هذا وجهي تسان ما عنده انفصام بالشخصيه :D


ابو غازي :

ما عليك يابعدي ان ما لقحت ولا ما ضره الجمل :D

عبدالعزيز :

ذبحت عمك بالودتس :D


شخاط :

اللي بي يكفيني :(
<<< غورقن عيونه :D

اللهم آمين وكل مسلم يارب :)
محارش
09-10-2003, 14:50
كيف سيكون المضيف وماهي اهدافه واللزي منووووو :D


المضيف سيكون كما اتصوره لتبادل الخبرات بين الاعضاء وسيكون شاملا لكل شئ تقريبا :)
والمضايف كما تعلمون تضم نخبة من الاعضاء في مختلف التخصصات وسيكون هذا المضيف فرصة لبقية الاعضاء للاستفادة من خبراتهم .

كما سيكون مكانا لشرح التجارب الحياتيه التي مر بها احد الاعضاء ويعتقد انها ستساهم في تنوير الاخرين او تطوير شخصياتهم :)

كما سيكون سوقا للبيع والشراء وما الى ذلك :)

هذا بالاضافه لما ذكره الاخ ابو عتيق وسمو القلب العاصف :)

ايضا سيكون مكان لالتقاء الاعضاء لزيادة الرابطة بينهم وذلك بفتح موضوع شات يوميا للترفيه ثم يتم حذفه في اليوم التالي وفتح موضوع جديد وهكذا .

والهدف كما هو واضح للجميع هو الاستفاده في امور الحياة العامه ولكسب مزيد من الخبره وزيادة التفاعل بين الاعضاء .

من ضمن اهداف المضيف ايضا محاوله انعاش المضايف وخلق فرص كتابيه جديده :)

كما انه سيكون عامل جذب للاخرين للتسجيل وذلك ( حسب تصوري طبعا ) باظهار اسم المضيف للقراء لكن مع عدم مشاهدتهم لمحتوياته ( طبعا الامور التقنيه لا تمت لي بصله ولا حتى بثومه فالله يعينك :D ) ونظرا للشفايه اللي يتمتع بها الاغلبيه فسيكون تفكيرهم بالتسجل مجرد روتين وماهي الا لحظات وتجد ايميله بين يديك طالبا التسجيل :D

اتمنى ان اكون وفقت في الشرح وان كان هناك امور يصعب شرحها لانها تبقى مجرد خيال .

كما اتمنى ان يضيف الاخوة مزيدا من الافكار حتى تنضج الفكرة اكثر واكثر .


اما بالنسبة لاشرافي عليه فأتمنى اعفائي لان العديد من الاعضاء يمتلكون حماسا اكثر مني بكثير ولديهم طاقات اتمنى تفجيرها لصالح المضايف .


ايضا اقتراح اتمنى ان يؤخذ بعين الاعتبار في هذا المضيف الوليد :

اتمنى لو اعطي الاعضاء المتميزون بتقديم مساعدات للاخرين اشرافا معنويا مع احتفاظ المشرف بالصلاحيات( حتى لا يكون هناك نوع من الازدواجية في القرارات فقط ) .
وهذا لا يعني التقليل من شأن المشرف على المضيف بقدر ما يهدف الى تشجيع الاعضاء للمبادرة بمساعدة الاخرين .

اما اسم المضيف فصراحه بحلت بوه وكل الاسماء اللي ببالي يحومن التسبد ( <<< مفكر يسميه كل شئ بريالين او من كل دزيدز ورقعه :D )
واقترح ان نعود لابو اربعطعش للادلاء بسطله :D

تحياتي للجميع :)
المشرف العام
09-10-2003, 22:57
اما اسم المضيف فصراحه بحلت بوه وكل الاسماء اللي ببالي يحومن التسبد ( <<< مفكر يسميه كل شئ بريالين او من كل دزيدز ورقعه )
واقترح ان نعود لابو اربعطعش للادلاء بسطله

طيّب عطنا الإسم .. وإرس على واحد ، يعطي المضيف وقاره :D ويضفي للمضيف رونقه ;) ويكون معبّر عن محتواه:cool: وملائم لنزعه الشفايه عند الاعضاء:p ومقبول لفظه|118|

ولي عوده .. يالليل ما اطولك:eek:
الشمري محمد فهد
09-10-2003, 23:25
مضيف النشّده ..

إنــّشد عن أي شي لوه أو ماله سنع << --- سطر توضيحي و بخط أصغر للمضيف

_.-.-.-.-.-._

إنشد = إسأل

مفردة دارجة بلهجة شمر و بالأخص سكان حايل على ما اعتقد ..

أقتراحها من باب نشر مفرداتنا و جعلها شائعة للعموم ... مع أعطائكم صلاحيات التعديل أو الرفض ...


سلام ... :)
محارش
10-10-2003, 15:39
المشرف العام :

من قريت ردك وانا اعصر مخي اغديني القى اسم مناسب مار ماش يابعدي كل مره افكر باسم يامار العن من اللي قبل ( <<< طرا عليه يسميه الناس بالناس والكل بالله ( تحسونه عجوز على هالاسامي ) :D )

من جد ما لقيت اسم مناسب الا هذا :

الملتقى
لتبادل المعلومات والخبرات والدردشه ( السوالف )

واتمنى ان يشارك الاخرون لايجاد اسم انسب .

كما لا انسى ان اذكر ان هذا المضيف سيكون المكان الانسب لعمل التصويتات واستطلاعات الرأي ( وش عنده الاندبندنت :D )


القلب العاصف :

شكرا للاهتمام .
ابو غازي
10-10-2003, 16:25
لله در مخيختك ياشيخ محااارش :o
|510|تروه منااااسب واجد ولارايح يجي أوفق منوه
أنا مع هذا الإسم :D
ولنرىونسمع رأي الأخوااان
حاتم طي
10-10-2003, 16:55
معكم على الخير دائماً . :)
المشرف العام
16-10-2003, 03:56
محارش ..

الملتقى
لتبادل المعلومات والخبرات والدردشه ( السوالف )

أرى فيه تداخل مع المضيف العام ، ، يعني ياليت يكون هدفه مخصص ومحدد ، تبادل المعلومات .. والخبرات : يلزمها تحديد لعدم تداخلها مع المضيف العام
الدردشه والسوالف : أيضا تسحب البساط من تحت اقدام مضيف فله الحجاج او العكس :)


حسب ما فهمت من الاطروحات السابقه ، ان المضيف يقتصر على (( النّشدة ))

.
محارش
21-10-2003, 00:10
اخوي ابو سلطان :

لكي ينجح اي منتدى فلا بد من التجديد وهذا نوع من التجديد وهو المقصود من المنتدى الجديد تسان الله سهل ( وهو بالمناسبة مجرد محاوله فإن نجحت كان بها وان لم تنجح فهذا لا يعني نهاية الطريق ولا بأس من محاولات اخرى )

مسألة تعارضه مع المضايف الاخرى ارى انه في مصلحة المضيف الجديد والمضايف الاخرى فهو سيخلق نوعا من التنافس . فإن كنت ترى ان التعارض سيضر فلا بأس من اقتصاره على النشده مع اني ارى ان نوجد التنافس بين كل المضايف فهو محمود العواقب .

وبالمناسبه فعنوان المضيف ووصف ما يحتويه كانت هي الوالمه عندي هاك الحزه وبوه اسم طرا لي هقوتي انه اكثر التصاقا بمجتمعنا وهو :

الدكه
للعلوم الغانمه :D

هاه وش رايك بالاسم الجديد ولا نخليه على طمام المرحوم :rolleyes:

والله بحلت يابعدي وانا مدري انت مع الفكره او تجامل ما ودك تكسحن :D

تسان مهي جايزتن لك طقه كاش وقل الفكره مخرمه يامحارش ولا عاد تسوي نفسك ابو الافكار :D
هههههههههههههههههه

صدز يابعدي ترن عاااادي ما يمديك تقول لي لا عااااد تقترح الا انا لازخكم باقتراح اشنع من اللي قبله :p
<<<< يبي يصير راعي مقترحات بالملعونه واخته :p

تشاااااااااااااااااااااااااااااو

الا على فكره وش نوحك حاظرن بالمسنجر ههههه
داري انك ناسي وكنت تبي تحظر الفاضي وحظرتن
<<< قال رقع يامرقع قال امرح بس :D
المشرف العام
21-10-2003, 01:58
خلني ابدأ من الآخر :D

الماسنجر .. لي اكثر من شهرين ما شغّلته ، يمكن مره او مرتين ادوّر ا لدّعم الفني :)

.

ما عمري حظرت احد .. اقشع ايه ، احظر لا |1|

.

بالنسبه للأقتراح ، لو لي رأي مغاير تسان منذو مبطي قايلوه ، الفكره جميله ولكن :) .. اخاف يتوهون الاعضاء ما يدرون العام من الملتقى هذا كان تاكيدي عليه فقط ..


الدّكه (( للعلوم الغانمه ) يعني ملتقى عام ، وهدف المضيف هو السؤال وجلب المعلومه في امور معيّنه

عطني على الخاص .. لسته او شوف الاسماء التاليه يمكن عيار طايش ويصيب :

النشده ;)

جلسه بين الصلاتين <<< ماهي صاحيه

الشبّه <<< اضمن الفاضي على التصويت

تساؤلات عابره

بث مباشر

إستعلامات المضايف : : وهي الاقرب لتّرجمه الحرفيه للمضيف

بلشت .. خلّ الباقي عليك:p


اكرر .. اخي محارش ، عطني لسته على الخاص ونتفاهم على شيء معيّن

ياليت الليله ، او بكرى بالكثير ، عشان اخلص بعد الترتيبات بدري


تشششششششاو
السنيورا
26-10-2003, 13:54
ينصر ديــــــــــــــــــنك:D:D

على الفكرة الهايله دي;)

أتكل على الله ياشييييييييييييييييخ

وربنا معااااااااااااااااااااااااااااااك:D:D



سلاااااااااااااااااااااااااااااااااام بأه:D