المــــــــــــــــــــــوّال

[ساري^الليل]

استلموا لا هنتم ...


بسم الله أبدا ثم أثني بتسليم = على نبي كرم الدين تكريم
وأقول لاهل الخير سلام تعظيم = قال المثل هذا بلا ابوك يا عقاب



اللي يبي ملعبة شجعان يقلط هنا = واللي يبي يلعب الموال يصبر كثير
واللي يريد السعادة دايمة و الهنا = يقرا التحيات في صبحه و قبل العصير

[ابو جمال المنيس]

حياك الله يا ساري الليل


يامرحبا باللي بدى اللعب موال= ترحيبةٍ نبدا بها من فضا بال
تسري وتلقى مع هل الخيل خيال
قال المثل هذا بلا ابوك ياعقاب
يا ساري الليل جعلك دايم بالهنا=موال والا بلا موال شاعر كبير
ابشر لك بشاعرٍ شايب وصدر دهنا= يجره لشيلت الموال سلك الحرير

[ساري^الليل]

يا الشاعر اللي جيت يا مرحبا بك = والحمد لله جيت والله جابك
في يوم لقيانا نعلي جوابك = قال المثل هذا بلا ابوك يا عقاب


يا مرحبا فيك، نذبح لك من شياهنا = نكرمك يا الشاعر اللي طول عمرك قدير
ومادام شايب نبي ندعي لك إلهنا = يرحمك قبل القبر يرحمك ربٍ خبير

[ابو جمال المنيس]

المعذره من التنسيق ترى شايبك ما يعرف حيل بالكمبيوتر


دام البقا يالشاعر اللي سر الليل= مسرور انا يا الاجودي منك بالحيل
لو كان عرفتنــا قصـيد ومواويل
قـال المثـل هذا بـلا ابو ياعقــاب

الشاه بايران راح وعوضه شاهنا=يا ساري الليل حث الرجل ويصير خير
واسبح بحر مير لا تقرب من مياهنا= وشايبك شايب يشوف الدرب ماهو ضرير

[حمود الشمري]

الخوان ساري اليل والاخ ابو جمال

العب جميل ونحن متابعين

يامالين العافيه

[ابو جمال المنيس]

ياهلا بالشاعر سهيل الشمالي مرورك نورة الملعبه

[ساري^الليل]

الله يحييك أخوي سهيل الشمالي و يا مرحبا فيك

أخوي أبو جمال آسف على التأخير الخارج عن رادتي

استلم لا هنت ...

يا الشاعر اللي كل ما فيك مرغوب = ابغا أسألك عن شيء شايع ومحبوب
كلن يحبه ، يجعل الخب شلهوب = قال المثل هذا بلا ابوك يا عقاب


ما كل سلعة يا أخوك بسوقنا ترهنا = ولا كل نجم بسمانا يالحبيب ينير
كلمتك هذي كبيرة والله بوجهنا = وشلون تحمي ديارك عن خيول الامير



تقديري و أحترامي للجميع

[ابو جمال المنيس]

عزيزي ساري الليل لاداعي للاسف ترى ما جاء منك قصور وكلنا لدينا مشاغل وانا تراني ما لعبت معك الا بعد ان اعجبني الطاروق وعسى ان تكون بداية معرفه طيبه وهلا وغلا فيك واستلم الله لا يهينك ...،،


اللي تنشد عنه ماهو قريبي= الخـب مـاهو حولنـا يالحبيبي
والموت بين الاحمدي والجليبي
قال المثل هذا بلا ابوك ياعقاب
ماجيـت جلاّب ،، لا تغتر باشباهنا= حنا هل الجمع الايمن والصوات الاخير
يا ساري الليل لا تشتـك ووجاهنا= يثت لك ان البحر هادي وجمه غزير

[ثامر]

عاشوووو عاشوووو
صحة السنتكم جميعا وتسلمون والله الا يامنين العافيه والله

ابو جمال ابشكر والله باللي ينسق قصايدك

[ثامر]

اخوي ساري الليل صح لسانك وتسلم

وجودك معنا فخر لنا وللمضايف

[ابو جمال المنيس]

الف شكر يا ثامر وانا توي تعلمت للتنسيق
والف شكر على تنسيق قصايدي وتراني اول مره تهولت يوم لقيتهن منسقات
ولا تخلي شايبك من الفزعه والف شكر على المرور والله يعطيك العافية

[ساري^الليل]

الله يبقيك أخوي ثامر و وجودي مصدر افتخار لي بينكم

أخوي ابو جمال
استلم لا هنت

يا اللي تقول الخب ماني قريبه = وأنا اعرف أنك ما تنزّل لعيبه
مير أرجع لقولي و حاول تجيبه = قال المثل هذا بلا ابوك يا عقاب

الكلمة الزينه تزين لنا افواهنا = والطير يرفع جناحه حين يبغى يطير
حنا جنود الله و تسجد له جباهنا = ما نخاف غيره و نسمع لام سالم صفير

[ابو جمال المنيس]

استلم يا ساري الليل لاهنت
الخب والشلهوب أنا ما عرفته=كانه هدف تراك عني حرفته
واليا صرفت جنيه مثلك صرفته= قال المثل هذا بلا ابوك ياعقاب


الجاه والزين الطاروق من جاهنا= والحمل مشدود يالساري بظهر البعير
ان كان يوجدمريض إعرف ترى دواه انا= خل ام سالم وسـالم زير ماله وزير

[متعجب]

صباح الخير يا عجيل النيس

[ابو جمال المنيس]

صباخ النور يا متعجب ( اكيد انت حولنا مانت بعيد مادام سجلت عجيل بالجيم)
وحياك الله بس ما علقت على الطاروق

[ساري^الليل]

أخوي أبو جمال استلم لا هنت ...


الخب والشلهوب ناس من الناس = واحد كريم وواحد بطبعه أنجاس
مير أنتبه للشي يا راع الاحساس = قال المثل هذا بلا ابوك يا عقاب

لا تنظر بعين وحدة و انظر جباهنا= ولا تحسب إن البحر في غبته كالغدير
والله ميزانكم ما ياصل شفاهنا = ياللي تدور مريض أعرف تراني بخير

[ابو جمال المنيس]

ياهلا يا ساري الليل واستلم لاهنت


خل الكريم بجانبك يا لقيته = والنجس يقمح كل حيه وميته
وانا جهلت إسمه ورقمه وبيته = قال المثل هذا بلا ابوك يا عقاب

يابحر ياللي تلاطم وين دواهنا = الساريه ما نعرضها طريق الصدير
طاروقنا شاب والميزان من جاهنا = فرصه سعيده ودورات الفلك تستدير

عزيزي ساري الليل الطاروق شاب ويعطيك
العافيه وسامحني اذا جاء قصور

[ساري^الليل]

ما جا منك اقصور أخوي



الله يسعد ايامك


ترى الشيء اللي أنا سالت عنه هو ( المال )


حياك الله أخوي و ابرك الساعات اللي عرفتك

[ابو جمال المنيس]

عزيزي ساري الليل فرصة سعيدة ولكن ما هو الرابط بين الخب والشلهوب والمال
نورني جزاك الله خير
.....................
ملاحظة لو انك كملت ثلاثين مشاركة كان دزيت الاستفسار برساله

[ساري^الليل]

الخب هو الرجل المخادع

يقول عمر بن الخطاب لست بالخب و لا الخب يخدعني

و الشلهوب هو الرجل السنافي و لا أظنك تجهله

المال يجعل المخادع في نظر الناس سنافي و تلاقي الناس تكرمه حتى لو كان مرابي و أمواله من حرام فكل من ملك المال نسي الناس عيوبه

تقديري و احترامي أخوي أبو جمال

أخوك ساري^الليل

[ابو جمال المنيس]

عزيزي ساري الليل شكرا على المعلومة التي تخفاني سابقا بالنسبة لمعنى الخب وانا ارسلت لك رساله راجع بريدك عندما تصل الاشتراكات الى ثلاثين والى اللقاء