سوالف شيبان

[الداهية]

اهلا بالجميع

خطر على بالي فكرة جمع سوالف ومواقف ثمينة لا تخلو من الفكاهة.. تعتمد

في بطولتها على كبار السن ( شيباننا حفظهم الله ) واخراجها على الكاتب نفسه .



فمن يجد ذلك الموقف أو يسمع تلك السالفة اللتي لا تخلو من الفكاهة

ومعتمدتاً في بطولتها على ( شيباننا ) فلا يبخل علينا في طرحها في هذا
الموضوع .

أخترت ( الشيبان ) وذلك لما لهم من سرعة بديهة .. ولبياض ونصاعة قلوبهم ..

ولما لهم من رحابة صدر وأيضا لما لهم من روح الفكاهة .. ولم أخترها للقدح فيهم بل لمعزتهم عندي وحفظ بعض ما نستطيع تذكره عنهم .



ولكم مني هذه المواقف :

:) :) :)



1- حدى الشيبان الله يحفظه سرد لنا قصه من قصصة المضحكة وكانت تقول :

ان هالشايب كان يبني له بيت وكان وقته في عز الشتاء والدنيا برد ( أول مرّة أدري أن بالشتاء الدنيا برد :p ) ( جميـــد على حد تعبيره ) ,,

وكان كل صبح قبل العمل ( الدوام )وقبل قومة الطيور يجي و ( يرش صبيّات البيت بالماء) ( <-- أجل بحليب نياق:D ) ومن هالقبيل لتماسك الصبيّات ..

طبعا يقول أجي متلطم ( مغطي كل الحواس الخمس :D ) من شدة البرد ..

وفي ذات يوم يقول ( انت يالشايب ) :"جيت كالعادة أرش البيت وطبعا الجو ( جميـــد ) ".

و يقول :" ما دريت الا والسيارة واقفتن وراي ( خلفي :cool:) وسواقها يتصكصك( ركب المدعو تضرب وتصك اسنان المدعو ايضا ) من البرد ولا

نزل من السيارة وقلت في نفسي ( انت يالشايب ) "يا حول( <-- زين ما قال يا ويسي :D) هالمسكين أكيد أنه بردان ووده يرش بيته بس مايقدر يتحمل البرد ""

ويسترسل الشايب في قصته يقول" يوم خلصت من الرش ونص ملابسي ماء وثلجت رجليي ويديي ونويت أداوم يقول مر علي الرجال اللي بالسيارة وهو يضحك وقال لي " كذا الجيران والا بلاش |512|""

يقول شايبنا " قمت أحلل كلامه في مخيختي وأكتشفت أني انا يالشايب

مطنوخhttp://smilies.sofrayt.com/1/4/eek2.gif!!! ""

:) :) :)




2- حدى الشيبان مسافر ( راكب ) واخوه يسوق معه ,,

وعلى الطريق جتهم نقطة تفتيش ( هي اللي جتهم والا هم اللي جوها |513|) المهم

رجل الأمن : اثابتاتكم؟؟ ( وجه معصب من الشمس ومن المرابطة الله يعينهم ) .

السائق : سم طال عمرك ( <--- لازمة هالكلمة هاليومين للي رخصته منتهية ) .

رجل الأمن : بنفس شينه أفتح الشنطة .

وقام يتفش وثم رجع لهم وقال لشايبنا وش الكيس اللي معك .

عاد الشايب مسك الكيس وقال عاد هالكيس ما تلمسه :confused:

السائق ( وجه متهول وخاف يمكن أخوه مهرب معه شي أو معه سلاح ناسيه ) : ليه عسا ما شر !!! <---- قام يفكر بالزنزانة :D

عطه الكيس وانا أخوك <--- جملة قالها السائق بغير شعور

رفض شايبنا وأصر على الرفض !!!

رجل الأمن ( يفكر بأجازه يومين ) : والله أن تعطيني الكيس لا أسجنك .

الشايب : دام فيها سجن لا والله يا وليدي خذ الكيس .

يوم خذا الكيس لقى العسكري ملابس داخلية لهالشايب .

وقال له الشايب : يا وليدي أنا حاشمك ولا ودي تشوف هالملابس بس أنت أصريت وهن كفوك :D <------ لكيع هالشايب .

:) :) :)



3- عاد سوالف الشيبان مع نقاط التفتيش عد وأغلط

الشايب اللي لوحة سيارته الأمامية تختلف عن الخلفيه وسأله عنها الرجل الأمن ورد عليه بسرعة بديهة :




وجهك وقفاك نفس الشيء والا فيه أختلاف :D:D:D ؟!

رجل الأمن لم يرد الا بكلمة : روّح روح !!



:) :) :)



4- البقية تأتي ....


:) :) :)

[ابو خليف]

هههههههههههههههه

تسلم

والله انا البارح صارلي موقف مع شايب


بحفلة زواج



كنت حاضر حفلة عرس المهم فيه شايب من اصحاب ابوي الله يرحمه

حاضر


ورحت سلمت على الشايب وش اخبارك وشلونك وصارلي فتره ما شفته عاد الشياب

قالي من انت


ما عرفتك قلتله انا فلان الفلان

المهم اعتقد ذكر عيه ابوي قام يبكي الشايب صراحه كسر خاطري


مسكته وجلسته ويعم هذي الدنيا وسبحان الي الي ما يموت هذي حكمته واهديه

وكنت اعرج انا رجلي تكرمون مسكر عليها باب سياره امزح انا واحد سكر الباب على رجلي المهم قاعد اهدي الشايب


وهو يبكي قالي رجلك وش فيها تعرج
قلت طحت قال ل هذي ماهي طيحه قلت له والله ياعم سكر عليها باااب سياره


تدرون اش رد على بدال ما يقول سلامت وهو يبكي قال


عسا ماهي سياره جديده بس

وربي تقطعت كبدي من الضحك



تحياتي

[أبو مقرن]

جيت مرووووووووح هكالليلة ..مجفع.ن. ماشوف القاع.. مع لي طريق .ن. يالله تشوف خشم سيارتك به ؟؟؟؟
يوم تعديت وخذيت لي مسافة ياهذا هالرجال يشر ويومي.. ويصووووووت .. ياولد أوقف<<<<<< إنخرع يحسبنه من هالارهابية المنحاشين!!|111|
الصق إني نويت الفركة...... مار هالمرجلة قامت تعافرن وبتالي طرحتن........
وانا إجيك عاكس.ن. السيد يمه...يمار هالوجه اللي يخرع الذيابة..|119| ولامن خلقتي شفته لابتمثلية ولابفيلم ولابشي.ن. أعرفه<<<< من زين وجهه عاد؟
المهم وش عندك؟؟ قال: هالملوي طفا وعيا يشتغل<< جمس.ن هتيان.ن. ماتركبه لو عقلك على هالمركــــــــــــــــــــــــــــــــــ ــــى..
المهم كني أعرف أنا أحول<<< شاف البنيوات معه بالسيارة . وصارت نذخه|6|
وأنا اعافر هالاسلاك واحوس بهن..يوم خذينا وهو يشتغل<<< عقب كم ساعة؟
وهو ينطنخ الشايب قال من أنت ولد.ن. له: عاااد أنا مصلحن السيارة.. وأنا أعلمه بكل شين : قلت أنا من هكالعرب أبو ي فلان<< علمه بدفتر العائلة كله
قال : الله يعافيك وماقصرت والله يكثر من جنسك<<<< وهو يرتفع راسه......
المهم ثرينن حست هالاسلاك حوس.. يوما مشى له شوين.. يمار هذي الدخنة.. وكل ماله تزيد وهالريح القشرا كتمته.. وهو يوقف ويفتح الكبوت يوالله نار.ن توقد؟؟ ويجونه هكالشباب ويطفوووونه... وأن روحت لهلي ولادريت إنه سعر.. ويوم جيت الشايب : هاه وينك؟ قلت يابن الحلال وانا أسرد السافة كله ومتنومس.ن. إني فازع.ن. له.......
رااحت الايام: ويم جاء هكاليوم اللي ماطلعت له شمس.. وتصير عندنا الشبة..
وتكوووم هالشيبان<<<< دارين.ن. بالسالفة.. ماشاء الله عليك .ز إيه ولد فلان هذي فعايله دايم غاااااازة.ن. الراس<<<< يقرن ثوبه ويصك متونه|76|
وأنا أقهووووي ياهذا الشايب اللي هكاليوم جاين يمشي 100000 كم/الساعة
قال: وين هو سبيع هالابو. اللي أعدم سيارتي.. والله لاشتكيه..وأنا أ حذف الدلة <<< حط رجله يتقمز المراكي وهالعتب..
ويقوم ينجشن الشايب وأزبن على عمامي.... وليا بكر أنا عندهم . ويم هدا الوضع.. قالوا: كل شي.ن. ينعوض .وأبد ماصار شين؟؟
ياوالله تقل إنفشل الشايب<<< مصدقن روحه يبي له تعويض.:p
وتناااااازل عن السالفة .. وصارت سكون. وزانت الامور..
ومنه حلفت لو أشوووف أبوي متعطل.ن. ماقف عنده:D

إعمل خير.ن شر.ن تجزى<<<< أول مرة يدري إن هالمثل صحيح؟
يالله سترررررررررررررررك بالدارين.. والذكر والفال الزين<<<<< منين:D


أخووووووك: أبو مقرن

[شموخ]

الداهيه

هلا اخوي
صراحه قصص تضحك وياحليل هالشايب اللي ماسكن كيسه لا والله فيه حيا

الله يخلي لنا الشياب ويعطيهم طولة العمر

تحياتي
شموخ

[روعه]

سلامي على اللي حاضر معانا...

بصراحه السوالف عن الشيبان حلوه وما تخلص..

انا عندي سالفه صارت من زمان..

هذا مره في شايب مأذيه ولد جيرانهم الصغير

من كثر ما يبكي.. عاد الولد يصيح على الفاضي والمليان..

راح الشايب لابو الولد يهاوشه ويقوله ليه ما تسكتون ولدكم؟؟ها ليه؟؟

الابو مسكين من الفشله قام يتعذر للشايب ويقوله والله الولد

يبكي على طول وما قدرناله..

الشايب استغرب وقال وشعنده يصيح؟؟

قال الابو: والله كل دقيقه يطلبنا حاجه وحنا عجزانين عنه

قال الشايب: والله انتم رفلين ليه ما تجيبون له اللي يطلبه؟؟ ها ليه؟؟

قام الشايب وراح للولد اللي يصيح..

الولد: آآآآآآآآآآآآآآآآآآآآآآآآآآآآآآآآآآآآآآآآ آآآآآآآآآآآآآآآآآآآآآآآآآآآآآآآه

الشايب : وشعندك؟؟

الولد: ابي لبن..

الشايب: ليه ما تجيبون له لبن؟؟ قومو جيبوله لبن.. عاد هذي صعبه؟؟

قامو اهل الولد وجابوله لبن..

الولد:آآآآآآآآآآآآآآآآآآآآآآآآآآآآآآآآآآ� �آآآآآآآآآآآآآآآآآآآآآآآآآآآآآآآآآآآآآه

الشايب: ليه شعندك شتبي؟؟

الولد: ابي ماء

الشايب: يالربع قومو جيبوله ماء..

الشايب يلتفت على ابو الولد: ليه ما تعطونه اللي يبي من زمان؟؟ ها ليه؟؟

الاهل جابو الماء للولد

الولد:آآآآآآآآآآآآآآآآآآآآآآآآآآآآآآآآآآ� �آآآآآآآآآآآآآآآآآآآآآآآآآآآآآآآآآآآآآآآ� �

الشايب شفيك ياصبي ليه تصيح شتبي؟؟

الولد: ابيكم تخلطون اللبن مع الماء:p

الشايب هذذي بسيطه.. وراح الشايب وخلطهم

الولد: آآآآآآآآآآآآآآآآآآآآآآآآآآآآآآآآآآآآآآآآ آآآآآآآآآآآآآآآآآآآآآآآآآآآآآه

الشايب: هااا.. شتبي بعد؟؟

الولد: ابيكم تفصلون اللبن عن الماء.....!!!!!!!!!!!!!:D:D

الشايب: قم يا مسبوع الابو قم.. ويحذف الولد بأكبر شي عنده..

والله ما ينعطي وجه..

[الداهية]

أهلا بمن رد وأهلا بمن أكثر عدد الزيارات

وأخصص شكري (ماهو الواعر ) لمن رد ولم يبخل علينا بأحرفه وأعتذر عن عدم تخصيص ردا لكل واحد منهم
<------- يقولون السودانين كسولين

وأخصص عتبي لمن زار ولم يرد
وأقول له : ( كلمتين لو من تحت الشليل :D)<------- أسلوب شحاذه يمشي مع الحر هاليومين ;)




ونعود للبقية من سوالف شيباننا مع السيارات والمرور ومن هذا القبيل

:) :) :)

4- شايب وقّف عند نقطة تفتيش وطلب منه رجل الأمن ( العسكري <-- لحد يروح بعيد )

الرخصة ,,, وكان ذلك الطلب كالصاعقة على مسامع الشايب ,,وما كان منه الا

أن رد بروح الأصالة والنخوة|513| فقال :" الرخصة في مخباي وتسان بك خير خذه "<-- طالب حرش <--- ماله علاقة بمشرف فلة الحجاج :D

فكان رد الشايب على مسامع رجل الأمن أعتى وأشد من الصاعقة...

وما كان من ردة فعل لديه الا كلمة

روّح روّح :p

:) :) :)



5-شايب واقف أمام أشارة حمراء ( والله والعالم أنه كان يهيجن ) وفي أول لحظة

من أرماشة الأشارة الحمراء وفتحة الأشارة الخضراء ادوى مسامع الشايب ذلك

التطنيب ( الهرن - البوري - ديـــــــــــد ديــــــــــد <-- وين الفاضي على طاريه )

( ديـــــــــد ديــــــــــــد ) : كان ذلك صوتا لسيارة شاب متعجرف ومستعجل

يقف خلف سيارة الشايب المذكور فوق:p

فما كان من الشايب وبلمح البصر ألا أن عشّق القير بالريوس ( الى الوراء ) وصدم الشاب المستعجل<-------- لا يطلع واحد من الأعضاء بس :D

تهشمت سيارة الولد والشايب ما جاء سيارته شي ..

ونزل الشايب للولد وقام يأنبه ويقول : ماتشوف الاشارة حمراء ليه تصدمن من وراء ياللي بك مالا بك,, والشاب فاتح افمه مايدري منهو المخطي ,,

وجاء المرور وقال لهم الشايب أن هالولد هذا ( يعني المستعجل :rolleyes: ) صدمه من وراء والاشارة حمراء ..

طبعا المصدوم من الخلف ليس عليه أي خطأ ...


وأخينا بالله يحلف للمرور أن الشايب ريوس عليه والأشاره كانت خضراء ولاهم مصدقينه

كان هناك لقطة للشايب وهي :

كل شوي يمر الشاب ويقول له سؤال تهكمي بحت :

ديـــــــــــــد ديـــــــــــــــــــــد هــاه ؟؟؟

والولد منقهر وعرف أن هالشايب لكيع ولا راح يقدر ياخذ منه شي

والمرور مايدرون وش فيه وآخر شي جاهم الشايب وقال لهم أنا متنازل عن حقي واذا لكم حق خوذوه منه

يالله بمان الله ....


:) :) :)

6- شايب راكب سيارته في أمان الله وصدمه واحد ... وسلموا ولا جاهم شي ..

جاء هالواحد للشايب وقال له سلامات سلامات ما تشوف شر

والشايب يدور تحت المرتبه ويقول

بينه وبين نفسه تصدمن وتقول سلامات:D !!!

وما درى هالواحد الا هالشايب طالعن عليه بالعجراء ( عصا منبعجة من الطرفين ومفلطحة من الوسط من شرب اللبن قبل النوم :p)

هالواحد انحاش وخلى الشايب وخلى السيارة وهو يضحك لين جاء المرور ..



:) :) :)



7 - البقية تأتي أن لقيت تفاعل ...


:) :) :)

[الشمري محمد فهد]

متعجرف عاد |513|


<< --- مهو هو :p


بإنتظار سوالف عجز :rolleyes: ;)

[مفتاح14]

فكره حلوه يالداهية وانت اسم على مسمّى:)
وموضوع يستاهل انك تتفاعل معه....الا تبي الصدز : غصب نتفاعل معه:)

مادري لو انكم سامعينن بهالسالفه لكن عاد هذي سالفة شايبن باطرااف حايل..
.
.
.
يقولون هذا شايبن نوى انه (يجلب) له غنم..يعني يبي يروح بهن لسوق الغنم يبيعهن:)....المهم ان الشايب يوم صلى الفجر مشى يبي حايل..ويوم اقبل على مدخل حايل وهو يلقف لوه راعي دوريّه..ويقوم يصااايح بالجهااز..على جنب على جنب ياراعي الددسن..لبق على جنب..والشويّب يصفط على جنب الخط:p..قال العسكري: انزل من السياره انزل انزل..وهو يحوّل الشايب ..ومايدري وش الطبخه |513| ..ويوم جا يبي يروح يم راعي الدوريه ..وهو يصيح العسكري:خلّك واقف بمكانك لا تحرّك..يا والله يوم بلش|512| .. وراعي الدوريه واقفن قدامه يمكن ب 100 متر..
وكل كلامه للشايب بالجهاز وهو بسيارته ما حوّل..:p
اخر شي ..قال العسكري: افتح باب الددسن وطلّع البندق اللي ورى المرتبه..وهو ينخرش الشايب..وتهول وش اللي يدري هالعسكري بالبندق اللي ورى المرتبه؟!!!!:confused:
وهو يطلع البندق..وياقف بجنب السياره..وبهاللحظه نزل العسكري من الدوريه وجا يمشي يم الشايب..ويوم شافه الشايب يماار هذا ولده:D ((الشايب له ولد يشتغل بالمرور ويدري ان ابوه يبي يروح لحايل..قال ابسوي بابوي هالمقلب:D))..
المهم الشايب فار دمّه ومن الزعل وهو على طول يفهق البندق ويرمي اكالطلق يمار سفتي الدوريه صايرن نثر:D:D
.
.
.

وسلااامتن تسلمكم واحد واحد:)

.
.
.
الا على فكره يالداهيه...مالقيت للخط غير هالفورمات;)

:D:D

[اليم]

هلا باخوي الداهيه

وموضوع مميز يجبر من يتصفحه على المشاركه


ومن سوالف الشيبان اللي طرت على بالي بوه وحدن يوم قام الصبح

يمار بوه شاة ٍ عندهم مريضه وهكاليوم قالولوه انه فطسة قال اربطوه

بالسياره من ورا ابي اقرطه على الطريق قبل اروح لحايل

وكان خوينا عندوه مراجعه بالمجمع حق حايل ومشى والشاة معوه يجره

ونسيه وحط رجلوه للمجمع ويوم لف يبي يدخل مع البوابه

والله ويقفونه حقين الامن قالوا ياعم وش هاللي معك ورا

قال وشو:confused:

قالوا تعال شف:mad:

ويوم نزل يامار بس رجل النعجه:D اللي باقين معوه

والله وهو يتفشل ويعلمهم بالسالفه:D

((((((((()))))))))))((((((((((((((((()))))))))))))))))((((((((())))))))))


ومن سوالف الشيبان

ايام كانت السيارات قليله

كان بوه واحدن من الربع تووه شارين لوه قلابي من حايل وطالعن بوه

ومر على ما قفة الشعير وحمل لوه كم كيس شعير

ويوم جاء المحطه اللي على طريق القصيم وهو يلقا لوه ناس ٍ من الربع

وهو يشيلهم معوه فوق

ويوم وصولو ا لفتق <<<فتدز<<<<هذا سلسلة جبال قبل حايل ب 25 كيلو

المهم يوم وصل يبي يعطي القلابي نمره<<<يعني يبي يعشق

وهو يضغط على لوه دقمه <<<زر بالانقليزي:D

ومشاء اثريه يوم يضغط على الزر الملوي رفع الحوض حق القلابي

والله وهو يكبهم هم واكياس الشعير :D

ويوم وصل للديره يامار الحوض مرتفع فوق ولامن خويا ولا اكياس شعير:D

مار انه جت سلامات واصابتهم بعض الخدوش وتم اسعافهم



هذا اللي عندي لكم اليوم


ويمكن لي رجعه ان لقيت شين او طرا لي شين

[شنقل]

السلام عليكم ورحمة الله وبركاته


هذا الله يسلمكم واحد من العيال شغال في امن الطرق

المهم مستلمين البشريه تفتيش رخصه واستماره زي العاده

ماطوول عليكم يقول خوينا جانا لنا شايب وحنا قبل سقطت

الشمس بشوين يوم اقبل علينا هو يسفط بجنب الدوريه

وهو ينزل فراشه ويجلس له شوين وهو يقوم يصلي المشكله

بالصلاة كنها صلاة تراويح قرب العشا يدخل

المهم ضابطنا قفلت معه قال هذا وش عنده له ساعتين وهو يصلي

رح اسعله يقول خوينا رحت له وسعلته

ياعم وشعندك بهذاراعالي وخذا له شوين قال وين مديركم
مهو معبرن عشان اني عريف خذيته لمديرنا على قولته
يوم جا للظابط
قاله ماتقولي الحين لك ساعتين واقف بجنب الدوريه انت وش عندك

رد الشايب


والله ياوليدي هالصلاه اللي اصليه من اليوم هي صلاة الخايف

تخبر لارخصه ولااستماره ولاروحات شوفة عينك وانا رجالن كبير

الظابط مااااااااات من الضحك وقال توكل على الله0


تحياتي

الجبهان

[فجر المطيري]

ياحلو سوالف الشيبان :D



الله لايخلينا منهم


والله لايخلينا من لغتك يابو مقرن:D:p:D




فعلا لغه عجيبه



تبيلها معجم:p



بس الحين ماعندى سالفه اسمحولى:o



بس تجينى السوالف راح اقولكمياها



فجر المطيرى:D



|5|

[ساري النهار]

وانا كذلك
اذا جتني سوالف بقولها لكم
لاني منقطع عن الشيبان اربع اشهر


الدكاتره نصحوني بالابتعاد عنهم خمسة اشهر
لانه بدات تضهر علي بوادر (الحش والقصيد في اخر اليل)

[شخاط]

الشيبان لاحقيننا حت هنيا :D هذا شايبن واصلن بوه الخرف يقول من اكا السنيوات رحنا يم البر على الحدود وتدورن من جانا صدام خطرنا وقهويناه انا وام العيال حنا ماعرفناوه اثريه مايبي يعلم الملعون ويوم تغدى وقعد عندنا تقريب الثلاث ايام ويوم جاء يمشي قال اكرمكم الله وانا ترونن صدام ومشى ذهين الملعون ماعلم الا يوم جاء يروح :D شوفوا كذب بعض الشيبان حتى بالخرف يطلع لهم صدام

[الداهية]

أهلا بالجميع وأعتذر عن تأخيري بالرد ...

و أشكر كل من أمتعنا بما روى من قصة ... وأشكر من شجع أيضا ...


ولا أنسى شكر المشرف محارش على التثبيت ومني له هذه الكلمات :

لا يعفيك التثبيت عن ردك وتتويج موضوعي بتوقيعك ,,,


ومازال الموضوع مفتوحا للجميع لرواية أي قصة تخطر على بال أحد..


لي عودة قريبه بأذن الله ...