يالطيف على الأبواب

[شموخ]

السلام عليكم ورحمة الله وبركاته

اخواني واخواتي


لكل واحد منا طريقته الخاصه في كل شي في حياته ،حتىطريقة مذاكرته
للدروس ،وبما ان الامتحانات على الابواب حبينا نعرف طريقة كل واحد منا في المذاكره لعل وعسى ان تعم الفائده لجميع الطلاب وان يعدل البعض من طريقة مذاكرته ان وجد الافضل منها .


بعض الطلاب ينام من اول مايجي الين صلاة العشاء وبعدها يبدا المذاكره الى الفجر ،والبعض العكس يبدا مذاكره من اول مايجي ماينام الين يخلص المادة وماشاء الله على هذولا يختمون الماده مع صلاه العشاء : D:D:D: بالنسبه لطريقتي انا في المذاكره اكيد ماراح تعجب البعض لاني انا من النوع اللي احب اعد الصفحات اشوف كم باقي لي صفحه واختم الماده طبعا ابدا بعد صلاة المغرب مباشره واحاول اختم الماده قبل الساعه 2 لجل انام قبل الفجر لان اهم شي عندي النوم مستحيل اروح مواصله ،لكن فيني خوف اذا اهل البيت ناموا وانا مانمت يالطيف وبقيت انا لوحدي اذاكر لجل كذا احب اني اسمع اصوات في البيت وانا اذاكر حتى احس ان فيه احد صاحي مثلي والله يخلي لي الوالده ماتقصر تسهر معي احيانا واذا مالقيت من يسهر معي اشغل الراديو هاه اهم شي نسمع صوت لكن الهدوء يخوفني :D:D:D:D

اتمنى من كل واحد يقول طريقته في المذاكره يمكن نستفيد من بعض ونعدل من طرق مذاكرتنا .

مع تمنياتي للجميع بالتوفيق .
اختكم
شموخ

[ابو خليف]

اختي شموخ الله يعطيك العافيه على هذااااا

الموضوع بالفعل موضوع بوقته


انا يوم كنت طالب كنت اذاكر من بعد العصر الين صلاة العشاااااا

وبعده اتعشاااا واحط راسي وانام

واركب الساعه قبل صلاة الفجر بساعه تقريبناااااا

واقوم ما استرجع ما ذاكرته بشكل سريع

الى الصلاه طبعنا يكون الماده الثانيه
وبعد الصلاه اذاكر الماده الاولى الى وقت الافطار وافطر واروح المدرسه

وصقوني ان الوقت الي قبل صلاة الصبح وبعدها وقت يكون الاستيعاب فيه اكثر
لانه يوكون الواحد مفلل نوم ومريح اعصابه

ويكون في هذه الحاله

مرتاح الاعصاب واستيعابه اكثر


واخيرااااا اتمنى التوفيق لجميع الطلاب والطالبات والله يوفقهم جميعنااا
واكرر شكري اختي على هذااا الموضوع الي بوقته

تحياتي

[عبدالعزيز]

^
^
^
(المشكلة لوماني ادري من انت ياذيب شراف:D)

..............

الله ياهكا الحين .....كنت نموذج للطالب النجيب الفاهم المواظب

طريقتي هكا الحين
طبعاً مستحيل أفهم بدون مدرس خصوصي ...ونفس الشي هذا لمجموعة من الزقرت بالمدرسة
كنا سلمتس الله عقب مانطلع من اول اختبار ...لبيوتنا على طول ... كل واحد يظربه نومة ولايقوم الاحول صلاة العشاء ... عقب مانقوم كل واحد يعطي الثاني ألو ونتجمع بالبيت الشعر (بمشار) ... عاد واحد منا عليه المدرس الخصوصي (الضحية) يروح يجيبه ويوهمه بالاتفاق اننا ثلاثة بس وحنا ثمانية

لاجاء وهديناه ووريناه طرف الدراهم يقعد يدرسنا وطبعاً الاتفاق يكون ثلاث ساعات لنا دايم لكن اخو مدحت لالقا الشيشة والعشاء والشاهي رايح جاي مايقول (أنا عاوز امشي) ...المهم انه يدرسنا وحنا اما نلعب بلوت او نشوي ابوفروة
ولاجاء الصبح وديناوه لبيته ولااختبرنا نتصل عليه ...هااااه ياأستاذ حلمي وش لون الدعوا ؟؟
يقول لالالا دنتو نقحتو ياولاد ...وعلى هالموال الين تقضي الاختبارات

والنتيجة :(
اشطرهم انا ...اطلع بخمس الى سبع مواد اقل شي
لكن بالدور الثاني نشد حيلنا شوي ..كل مدرس نغثه غث ببيته الين يطلع لنا طرف الاسئلى ونعدي ولله الحمد
هاذي طريقتنا النموذجية البسيطة للمذاكرة
(حقوق الطريقة محفوظة)

[فتى الحفير]

وأنا يوم كنت طالب ماكنت أذاكر !!!!!!!!
ومع ذلك المدرس كان مبسوط مني .. مدري ليش .. بس يمكن عشان أنا كنت تيس مانا طول آذاني !!

[الشمـــااااالي]

مشكورة

والله يعطيك العافيه على هذا الموضوع

لا تعليق.......؟؟؟


تحيـــاتى

.

[الغثه]

الحمدلله انا موظف بشركة الاتصالات

اللي يبي رقم مميز يبشر

تحياتي للكل

الغثه:p

[عاشق السراب]

شموخ

الله ذكرتيناااااا الدراســــه وغثتها

على الله المذكره

مجرد قراءه بـــــس

والنهار للعب كورة والليل على التلفزيون ونوم

[موج البحر]

شموووووووووخ


كيفك انشالله بالف خير


ذكرتينااااااا بحلاااااااا الايام الدراسه (اكذب) اكره الايام

ابشرح لك كيف اذاكر

اطلع من المدرسه وعلى طول على الفراش انام الى الليل طبعاً مع القيام

لاداء الصلوات ...وبعد العشاء اسوي لي بريق شاي مع حليب وادي فاطمه

وكوب حجم كبير ويالله .....

ابداء اقراء المجلااااات .....هههههه امزح

ابداء بالمذاكره طبعاً قرائه عابره اول شي وبعدها ابدا بالحفظ وكتابة الي احفظه

علشان منسه ...هذي طريقه حلوه للحفظ نيوتن يوم انا ويه ندرس سوء..

وعلى الحاااااااال الى اخر يوم من الاختبارات واخرتها

راسب بوحده او ثنتين بعد التعب


تحياااااااااااااااااااااااااتي شموخ

[نجمه السماء]

موضوع جاء بوقته ..

ولكني وللأسف من زماااان تركت كراسي الدراسه ..

ومع ذلك حلو الموضوع للطلاب ..

تحياتي لكِ غاليتي ..

[شموخ]

اهلين اخوي ذيب شراف

اشكرك اخوي على مشاركتك معنا في بيان طريقة مذاكرتك

صراحه طريقتك حلوه في المذاكره وخاصة المذاكره قبل الفجر .

تقبل تحياتي اختك
شموخ

[شموخ]

االاخ عبدالعزيز
فتى الحفير
الشمالي
الغثه
عاشق السراب
موج البحر
نجمة السماء

شكرا لكم من القلب على مشاركاتكم

تقبلو تحياتي اختكم
شموخ

[أماني]

..........................................................................
مــــــوضــــــوع جــاء بــوقتــه تشكــريــن عليــه أختــي شمــوخ

كنــت لمــن ارد مــن الأختبــار أنــام ليمن العصــر

ونبــدأ مــن الســاعــه خمــس ليمن الســاعــه ثــلاث

الفجـــر وأنـــام ليمــن ست الصبــح ولمن أصحى أراجــع

مــراجعــه ســريــعه
وصــلى الله وبــارك0
صــج كان تعــب بــس الحمــدلله طلعنــا بنتيجــه

تقبلــي تحــيـاتــي
*******

[قصر خراش]

الله ...............يا حلوها ايام .......


الأبتدائي ....الدراسه كانت كلام فاضي ...لا اتذكر كيف نجحت ....قرأ ,,, درس ...جدول ضرب وجدول قسمه ....بالنهار بمدرسة الطين ...ندقها كعابيه ..برد وصرد ....واذا سال الشعيب اللي يفصل الديره عن المدرسه ...الجميع غياب ...فقط في سادس كنا نعرف معنى المذاكره وكانت وقت العصر ...حفظ من الغلاف للغلاف ...طبعا ماهو بالبيت نمشي رجليه ...!!
وكانت النتيجه رسوب " اكمال "" في ايش بالحساب ....ليش ...ما ندري ...
اعادة السنه كاملة على شان مادة الحساب ...وطول السنه حفظ ...كل شىء عن ظهر قلب ...اشوا نسمع اسامينا بالرادو واثنين من مدرستنا من العشره الأوائل ...
المذاكره في المتوسط ..سيم سيم ...
الثانوي ...الدراسه بالليل والعصر نوم .....

الجامعه ....الدراسه مثل الثانوي ...العصر نوم والليل دراسه ...بس كانت ماهي مثل الثانوي ....غير يعني غير..........................................الوجيه غير الوجيه ... ..الذهاب في البدايه كان على السيكل ...قبل الحصول على سياره واستخراج رخصه قياده ....في ايام الويكند ...fun في fun ...... و والأيام العاديه ...دراسه ...

وكانت حلوه .....




قصر خراش .....

[شموخ]

اهلين اماني

مشكوره حبيبتي على المرور وصراحه طريقتك حلوه في المذاكره وخصوصا المراجعه في الصباح مره مهمه .

الاخ قصر خراش

الله يعينك على هذه المذاكره واخرتها رسوب هههههه

مشكور اخوي على ردك الطريف .

تقبلو تحياتي اختكم
شموخ

[عبدالعزيز]

وجدت هذه في أحد الحوارات للأستاذ محمد حسين وكان العنوان حول سبل التفوق في الإختبارات .... لعلها تنفعكم اختي شموخ

الحفظ لا بد أن يسبقه الفهم، فقد وصل العلماء إلى أن هناك مراتب في الاستذكار والتعلم، فهي تقوم على الحفظ في المرتبة الأولى، ثم الفهم، ثم التطبيق، ثم التحليل، ثم التركيب، ثم التقويم، فلا بد أن يفهم الطالب في أول الأمر؛ فإذا فهم استطاع أن يحفظ بسهولة.

ولن يظل الحفظ في عقله إلا إذا قام بالتطبيق، والتطبيق نعني به هنا استخدام ما حفظه وما فهمه في حل مشكلات أو في حل تمارين على نفس المادة الدراسية، ففي كل تدريب وتمرين يقابله تفعيل للعقل، فيستخدم ما سبق أن فهمه وحفظه في حل المشكلات أو التدريبات، كمثال حفظ القاعدة بأن الفاعل اسم مرفوع يدل على الذي فعل الفعل، هنا يحل تدريبات في النحو على الفاعل، ويستخرج الفاعل من جمل مختلفة، فهذا يؤدي إلى تركيز القاعدة في نفس المتعلم، كما أنه يستطيع أن يحلل المادة الدراسية إلى أجزاء ويكون منها شيئا جديدا، بجانب هذا يحكي الطالب لوالده الذي يشكي ما فهمه، وما حفظه، وممكن هنا عندما يبدأ في الفهم والحفظ بأن يستعين بأكثر من حاسة، فيكرر بفمه، ويدون بيده، ويسمع بأذنه، ويحاول بعقله، فعند استخدام هذه الحواس كلها يتذكر المتعلم كل ما قدم له من مواد دراسية.

من الممكن أيضًا الاستعانة بـ"سيديهات" تعرض الدرس، ويحكي ما فهمه منها بعد الرؤية. يجب تجنب المذاكرة في الأماكن التي فيها ضجيج أيضًا، وملهيات، وكثرة المارة وما في حكم ذلك. من الممكن أن يحكي مع زملائه الأوفياء له بعض الدروس التي ذاكرها؛ فيزداد ثقة بنفسه.

وآخر شيء أن يختار وقت مذاكرته ما بعد الفجر؛ فهو أنسب وقت للمذاكرة، فكما قال صلى الله عليه وسلم: "بورك لأمتي في بكورها"، أما أثناء النهار فلا بد أن يستريح وقت الظهر، ويبدأ مذاكرته في الخامسة أو السادسة، ففي هذا الوقت يحدث الإحماء الذي يعطيه النشاط مع إفرازات الغدة الكدرية الموجودة فوق الكلية التي تعطيه أعلى درجات الاستعداد.


بالتوفيق ان شاء الله