المعجم الشمري

[رضا الزميلي]

السلام عليكم ورحمة الله وبركاته،،،

وبعد......

أرجو من الإخوان المشرفين أن ينظروا إلى هذا الموضوع بعين الأهمية وإن شاء الله نراه مثبت.

هذا الموضوع يعرف الزائر باللهجة الشمرية وكل عضو يضع عدة مفردات مع معانيهن بالعربية الفصحى.

* ملاحظة / نرجو عدم التكرار .
* ملاحظة / يمكن لأي عضو أن يصحح المعنى إذا كان خاطئاً.


ولكم تحياتي.......

[رضا الزميلي]

أنا أول من يبدأ


بوه / فيه.

وشولوه / لماذا.

وشنوحك ، وشبلاك / ماذا بك.

انصلق / انزل بشدة.

دبه / ضربه.

حلولات / ليت.

اتسفت / ادخل.

والباقين فيهم الخير والبركة،،،،،،،

[رضا الزميلي]

بوه / فيه.

وشولوه / لماذا.

وشنوحك ، وشبلاك / ماذا بك.

انصلق / انزل بشدة.

دبه / ضربه.

حلولات / ليت.

اتسفت / ادخل.


والباقين فيهم الخير والبركة،،،،،،،

[شموخ]

الاخ المجهول

بالفعل ياليت فيه على قولتك معجم يوضح بعض لهجة شمر احنا مانقول انها

ماهي مفهومه بس فيه كلمات تحتاج لتوضيح لان بالفعل فيه

ناس مايعرفون لهجة بعض القبايل مثل" وغدان "عند شمر يقصدون بها الاطفال

او العيال الصغار .

تحياتي لك
شموخ

[روعه]

يتلوولح... يتدلى

اذا قلت ما ادري يردون عليك... درداااره تدردر حنووكك

انجضع...انسدح او تمدد

مسودن...مجنوون

والخييير واجد بس الذاكره مو ضابطه معاي
لان هالكلمات ما تستخدمها الحين بس مراح
اسمع جدي يقطله كم وحده (دره)

[هايس الشمري]

يعطيكم العافيه

الشفايه=هههه هذا يعني انك تبي تعرف شي و تبلش لك واحدن كود تعرفه

ويقال الشفايه تكبر(......) هههههههههههههه

[رضا الزميلي]

مايصير يا أخوان 59 اللي قروا الموضوع ولا أحد كتب شي إلا 3 باقي 56 وين راحوا ،،،،،،


مايصير ... صحيح أهم شي الفائدة ولكن لابد أن يكون هناك على الأقل ناس تكتب

أتمنى أن يكون لكلامي وقعا على أسماعكم....



والسلام ختام،،،،،،،،

[الحربي]

الاخ العزيز

المجهول

موضوع ممتع وان كانت الردود قليلة فلا تغضب هناك العديد من المفردات في بعض مشاركات الاعضاء تستطيع الرجوع اليها مثل الاخوة ( الفاضي - مفتاح 14 - اليم - ابو مرزوق - عبدالعزيز ( ابو صياح ) .


الامر الثاني تخصيصك للعنوان بالمعجم الشمري قد يجانب الصواب احيانا خصوصا وان بعض المفردات تستخدمها معظم ابناء البادية والمدن في منطقة نجد وان كانت لا تنتمى الى قبيلة شمر.

استمر في موضوعك ولا تجعل للياس طريقا اليك وفي انتظار المزيد من المشاركات






اخوكم الحربي

[الكونكورد]

اما انا ابزت لي كم كلمتن غديهن ينفعن :
اقرط : زت : اجدع = ارم هالشيء
الوكاد معروفه = الاكيد او المهم
جايوه = هاته
جماهو = يعني صح والا لا
اجليك = (( توهقت به ماعرفت اشرحهه هههههه )) انت تبي تسوي كذا
توهق معروفة = بلش = تنقع
اجف ==> كان يقول اجف الباب = يعني سكر الباب شوي يعني خل طرفه
افطن = تذكر
غدي = عسا
ياملا = اداة تمني = مثل ياملا الثانكيو
زقرت = شباب وهذي واجد من الزقرت والزقرتات يسالون عنه

اتمنى اكون افدتكم بشين
ولكم تحيات
ابو فلان

[ابو خليف]

تسلمون على هذه المفردات

الله يعطيكم العافيه


النازيه / المكان المرتفع

الغف / المان النازل

[المحمود]

المجهول والاخوان

هذا اللي طلع من ذمتي اليوم
وبرجع للشيبان اتنقرش بهم شوين غديهم يمنون علينا ببعض المفردات الفريده (( الله يستر من مداعيهم ))

غاد = وراء

جاي= هنا وكذلك ((بهاه ))

يافيم ابوي = هذي للتدليل على وزن (( يابعد عمري )) ؟؟؟؟

الفيد = بديل لأسم شي تبيه ونسيت أسمه


وســــــــــــــــــامحونا

[المهاة]

جماهو = يعني صح والا لا ..!!!!!!!!:eek::eek::eek:

وربي اول مرة اسمع فيها .. مرة قريتها كاتبها واحد من المشرفين على باللي خطأ مطبعي بيكتب ماهو :rolleyes:


تسلمون واصلوا ترا فيه ناس متابعة ;) بس للاسف ماتعرف عشان تشارك .. :(

[المهاة]

الا كيف ينرد عليها الجماهو هذي ..


يعني وش اقول لما احد يقولي جماهو .. |13|


















-----------------

[ابو مشاري الشمري]

هلا والله
يالمجهول
قاموس على كيفك
بالخير يالربع
وشلونكم
جمعت اللي أعرفه كله
وبعضه لاطشه
ويمكن اللي أقوله انه مكتوب من قبلي
بس أعذروني

نبتدي
أهو = أدخل =تفضل

وشنوحك = وشبلاك=ماذا دهاك

قوه = مشينا= هيا بنا

أغديه = قد يكون

تهقى = تظن

يهوجس = يفكر بصمت

يتكرفت = يدخل بسرعة

طس = اذهب

غدى = ضاع

دريشه = نافذه

خاشوقه = ملعقه

طوفريه = صينيه

صلاعه = ترمس شاهي

حير = مزرعه صغيرة

كتره = طينه

ورس = (روج) حمرة شفايف

قمعه = مناكير

خضاب = حنا

خزاري = حلق

فتخه = خاتم

غوايش = اساور

ترثع = تجري وتركض

شليليه = اسفل الثوب ( يعض شليله )

يدنق = يحني رأسه

انجحر = دخل في مكان ساتر

يدوج = يدور بالشوارع

وش وقعك = كيف حالك (( ؟ How are you ))

حب حر = فلفل

ودتس = شحم

يمطخ = يرشف

يكرف = يعمل بقوة

بين = أين

وشتبي = ماذا تريد

كشنة = بداية طبخ الاكل

مريس = كوكتيل بلدي ( بقل + ماء + سكر )

وغد = شاب صغير

ينود = ينعس

يرطرط = يلعب بالماء

يمرش = يفلت

الفيد = الشيء

سفارة = موكب فرح العرس

رزفة = حفلة غنائية

يع=حاجه خايسه

اروج=اسرع

القنة=العصا

الربادي=الشخص الكذاب

جنيني=تطلق على الولد والبنت

مصخن=مريض بارتفاع درجة حرارته

ارتبش=خاف

دونك=خذ

انزح=ابعد
المضّرب - اللحاف - او البطانية -

القطيفه - نوع من انواع الزل

مهوبه - خارج البيت

نيم - نايم - = حاط راسه =نويم= راقد = يشخر هالحين =بسابع نومة

غافي - اخذ له غطه

يطرقع - يشرب

يكمع - تعد الحد المسموح فيه بالشرب - او .... يعني بشراهة .

الفرة- الخشه - مقدمة الوجه

مقعي- قاعد - على رجليه و ثاني ركبه

مبوبز - جالس على روس اصابع رجليه

رقله - خفيف - ماعندك احد

داشر- ضايع

منعمس - سهران - مواصل

مقفي - وجهه للخف ويمشي

مقبل - وجهه لقدام وجاي

عصابه - عقال - او رابط راسه
يبحر = يشوف
اريت = وش عملت
يوجس = يحس
حروت = قريب
الكتلي 0000 البريق

الفضوه 000 النافذه

السوامه 0000 فتحه بالسقف لخروج الدخان

الميقعه 000 اناء يوضع به الايدام

المخشاقه 000 الملعقه الكبيره

القوطي 0000 علبة الحديد

الفاتيه 000 شنطة الحديد

الشخاط 000 الكبريت

البردقان 000 الطماط
يشظف = يقطع الجح
الشبه = عزيمه صغيره
طموح (طامح) = المرأه التى تزعل من زوجها
أنطن = أعطني
به (بوه) = فيه
موسده = مخده
داري = غرفتي
ياملا الغاضور=ياملا الوجع= ياملا الموت
أبلشتن=أوذيتن=دبلت تسبدي=(يبغى لها ترجمه )

هذا ماعندي
والله يعطيكم الف عافيه
هذا
القاموس شكله من قبل 500 سنة
الى هالحين
تحياتي

[هايس الشمري]

ما قصرت ابو مشاري


المطشي= الملوي<<<<<<والله ما ادري وشلون تنشرح

و من الادعيه الشهيره


يا ملا اللي

و

يا ملا الشربه اللي ترقع راسك
و يا ملال شربه العيال اللي مهم مثل طلعتك خخخخخخخخخخخ


و يا ملال الجدري

و يا ملا الماحي



<<<<<متاثر بالعجز لاتواخذونا يالربع




مبوبز - جالس على روس اصابع رجليه هههههههههههههههههههه

والله ضحكت على هذي

يعطيكم العافيه

[ابو مشاري الشمري]

هلابك ذيب
ياملا اللي
الظاهر انه ياملا اللي يأخذ (مختصرة)
والفال ماهو لك
ياملا الي يأخذك

ياملا الشربة
الشربة
هذي طاله عمرك
عسى الله يحمانا وياكم منها
وهي مرض يصيب الريه
التهاب
يقولون ان الرية تلصق بالضلوع من شدة تورمها
وتسبب قحة قويه مع كل نفس
وبعض الناس يسمية (جنبة)
لانها تلصق بالجنب
يعني بالضلوع
والله أعلم
أنتبه لاتروش بماء دافي وتطلع لجوا بارد
حتى المكيف هو المصيبه
ويقولون قبل ماتطلع
من المكان البارد أشرب ماء بارد
ليتآقلم جسمك عليه
(((صاير دختور)))
تحايتي

[هايس الشمري]

يعطيك العافيه ابو ميشووووو


مشكووووور على هالشرح


اتريهم حاقدين علينا هالشيبان

<<<<مهو من قلبهم والله بس خل نحط عليهم شوي

تسلم ابو ميشوووو

[ابو مشاري الشمري]

طارق) و روّح وتصبر يا جبل (طارق)=لو رزت القوم في راسك بيارقها

صح السانك خيوه
هذي مداعي للعتاب وليس من القلب
ولو يصاب المدعوا عليه بمرض الله لايقدر الا كل خير
لم يذوق أبوه طعم النوم
وتشكراتي خيوه
والله يعطيك الف عافيه
تحياتي
نبي أخوي تدور لنا من هالكلمات
أنخش لنا وأنشد الشيبان
تشكراتي

[شموخ]

عيني عليك باااارده يابو مشمش

وش هالمعجم شي بس اشوفك في النهايه كنك خرفت

ورس "روج "

قمعه "مناكير "معقوله يابو مشاري والا تمزح .

بوه مير نيم :D:Dذكرتني بكلام القصمان الاصليين دايما يقولونها .


تقبلو تحياتي اختكم
شموخ

[الشقاوي]

شقا

شقا

شقاوي يجرح ويداوي


اقول ياابومشاري


وشنوحك ضفضفت الحتسي كله مالخيت لنا شين:D


هه ....وشنوحك ماترد ...والا تبني القطك بلي عين

والله ماتنام الا عند التفيهي والا الصحين


لا له عاده


ايه ياريت وشسالفتنا


من الحتسي اللي يفطن علي هلحين


..... مزليحه <<<<يعني مرجيحه


....خاشوقه <<<<<يعني ملعقه


تروا عندي حتسي واجد بس مابي اقول لكم

على شان ماتنطلونن بلي فشقه من عيونكم الله يتسيفنا شرها|513||510|


شقا شقا

شاوي يجرح ويداوي

[السنيورا]

هههههههههههههههههههههههه:D:D:D


الله يقطع سوالفكم والله اني ضحكت ضحك على كلام ابو مشاري


خاصةعلى::

يطرقع = يشرب
يتكرفت=يدخل بسرعه
مريس= كوكتيل بلدي(بقل + ماي+سكر):D


(ينطييييييييييييييك العافيه):D:D:D

والله الظاهر انك متربي بين شياب ( حشى موكلي مو ابو مشاري)

[رضا الزميلي]

إيه يبعد حيي


هذا الحتسي الزين وينكم من مبطي خليتونن أقاطع المضياف>>>>مصدق نفسه

مشكورين الأخوان وعلى رأسهم الأخ المبدع والمبدع جداً أبو مشاري وما قصرتوا ويعطيكم العافية،،،،

[ثامر]

تسلمووون لا يامنين العافيه والله بس لا تنسون

1 - تبحر : يعني شف
2 - خشه : يعني الوجه
3 - الفره : من الخشم والافم والدقن كله تسمى فرره

[أبو شقيه]

مشاء الله عليك يابو مشاري

سردت كل شئ

مابقيت لنا شئ يا افم ابوي هالأفم

[الكونكورد]

نكسنا
معليش شباب بس ترونن جمعت كم كليمة من مصدر موثوق وانا اسف على التاخير بس حبيت اقول لابو مشاري ترك ناطلن (( ساردزن )) هالكليمات والا اول ترن كاتبهن وبس دبلت هالتسبد اخرونا (( الاختبارات ))
الوكاد نعود الى كتابة كم كلمة وعندي رد على شموخ ولا يهون ابو مشاري لو نقزت متسانه ابقول ايه تري الورس هو الروج اما انا مادريت انه الورس هو الروج الا يوم قريته من ابو مشاري والا اول اسمع بالروج ولا ادري وشهو
نبدا

وش موزيك = وش اللي خلاك تسوي كذا
هاك , دوك = خذ
بهذا = هنا
هاتس = كذا = هكذا
اص , اسكت , انثبر , تلايص = اسكت
قوه = تعال نروح
تحه = تحت
انهج = رح = اذهب
الحزة = الوقت
اتحراك = انتظرك
اجدعه = زته = ارمه
امحشه = امسحه
اراعيه = اطالعه = اناظر فيه
نصل = سقط الشيء
ينسل = يذهب بهدوء وبدون علم احد
ينس = يدخل بخوف
يتدرباء = يدخل بدون استئذان
يتبربك = يجلس جلسة قوية ويحتل مكان كبير
ينقز = ينط
يتشلباء = يتسلق الجبل او جدار
يتدحرج = ينزلق من اعلى الشيء
يتجرف = يحك اي موقع في جسده
يهذري = يتكلم نع نفسه
يحتلم = يتكلم وهو نائم
ينوني = يروح وياتي في مكان واحد
انجضع = انسدح
الدبش = الولد اللي يضحك عليه
يزجر = يفتخر
فت = اقلط = ادخل
المايع = الخكري
متمدن = انيق ونظيف
مقيض = مصيف
اصلقه = صبه
صلقعه = صلعه
اسحنه = اسحقه
الهف = اشرب الشيء الحار
احقروه = طنشوه
نشه , هفه = ابعده
مكشر (( بفتح الشاء )) = اي غير مغلف
لاو = لا
ياه = يمه (( ماما ))
ازرط = تناول الطعام من دون نفس
ازغد = تناول اليييييييين تمتلي تشبع
ابلع = تناوله بقوة مثل التمبرا
اجغم = تناول منه رشفه يعني للذوق ماهو شبعه
يلهم = ياكل بسرعة
طعمه = بسكون العين = طعام يوزع على الجيران وقت المناسبات
طب = نزل
يزفن = يرقص
ياملي = يااملي
ياحيي = ياحبعد حياتي
يرهي = يصب الماء بغزارة من الخزان
عكس = صورة
ملبخ = مصاب بالانفلونزا
يهذق = ثيابه مبلله بالماء
ماهو بالحيل = مريض
ضلع = جبل
مطيور = مطفوق
مسودن = مجنون
اجود = امسك
رضمه = حجره
متهري = مشقوق
مقطع = ثوب
غدقه = غتره
موتر = سيارة
خشره = قطبه
الكتلي = البريق
قرنبعه = عدمان
رداء = شرشف
دوشق = فراش
هقوتي = اعتقد
بلكي = يمكن
بشكيره = فوطه
حطني لقيتني = اذا جلس الشخص بمكان ولا يتحرك منه
نيده , نيدهم = هم لوحدهم
قبه = شبه صالة
روشن = غرفة بالدور الثاني
ليوان = مساحة للمجلس الخارجي
قهوة ( ديوانيه ) = مجلس للرجال
ماقد = مطبخ
مراغه = حظيره
ميتسع = الله يعزكم دورة المياة
كمار = دولاب ذو رفوف يوضع فيه معاميل القهوة والشاهي
كانون = موقد للحطب والنار
ماصه = طاوله
نمليه = دولاب للاواني المنزليه
صلاعة = ترمس للشاهي
منخاله سفره من خوص
مخشاقه = ملاس
حاسون = سكين
خرمس = ظلام
ريده = جاهز

هذا اللي عندي واتمنى اكون افدتكم بشيء

وتحياتي لكم

[ابو مشاري الشمري]

ماقصرت والله
الله يعطيك الف عافيه
بس تصدق بعضه لو الترجمة ماعرفتها

[ابو خليف]

الله يعطيك الف عافيه بس بعضها يبي ترجمه مره ثانيه

[الكونكورد]

هلا ابو مشاري والله يعافيك بعد حيي
الحال عند بعضه طال عمرك انا ترن بلشت وانا اقرا مكتوبتن لي بورقة
واراعي يمار كلماتن اول مره تمر علي بس قلت وكاد يبون يعرفون يقرونه

هلا ذيب شراف
الله يعافيك بعد حيي
والعذر والسموحة تسان ماقدرت اوضح ترونن بالكتابة نص ونص
وغير اني يالله اشرح يعني لا تشرهون على واحدن ماعرف النت الا بهالتالي

ومعليش اسمحولي ان تسان ماقدرت اوضح اكثر

لكم تحياتي

[المريشال2003]

بصراحة يابو مشاري بذلت مجهود جبار بهالقاموس الله يعطيك العافيه {يابعد حيي وميتي}



وتقبل تحيات أخوك/ المريشال2003

[السنعوسه]

سؤال ..

الحين كل الكلمات حقتنا ؟؟؟؟؟ يعني اقصد منطقة حايل ؟

ولا فيه منها مأخوذه من مناطق ثانيه ..

لان فيه بعض الكلمات اللي ما عمري سمعتها ..


تعرفون وش يعني ( خدامه ==== السكين ) :D

[فتى الحفير]

مرحومين ....
مرحبا شباب
ودي أشارك معاك
الموضوع حلو
طريف
سكاكا

!!!!!!!!!!

أقصد

أنا سبق وأن كتبت عنه الإسبوع الماضي
ومادري مين اللي لطش الفكرة

عموماً اللي تبون موجود عند أحد الزملاء والذي أشرت إليه في مضيف فلة حجاج محارش .. عندي صديق أعد كتيب فيه كل الكلمات اللي انتوا ذكرتوها .. اللي يبي نسخه منه يرسل عنوانه على الفاكس التالي : 033488578 وسوف تصله نسخه بالبريد .. وبالتوفيق للجميع .

[ساس جنيه]

يالبيـــــــــــــه يالبداوه


المجهول الف شكر لك على هالفكره رووووووووعه وبصراحه فكره حلو تحفظ

لبعض اللي ينسون لهجة ابائهم واجدادهم حتى ولو كانت مصطلحات قديمه

المهم ما تندثر مع الزمن يضل لها طعم ونكهه خاصه اذا احنا ناسين معظمها الله

يستر على الاجيال القادمه حتى كيف الحال ما هم قادرين يردون عليها:(

عشان كذا شباب انا اتمنى لو بعد تسوون خطوه ثانيه ان توضحون للبعض

شلون يتحفى او يرد على المتحفي :confused:<<<<تعرفون قصدي اكيد

لان واجد من شباب وبنات تهالايام يبتلشون عند تحفى الشياب لهم:o

<<<احراج شرايكم
حلو ان نستخدم التكنولوجيا لخدمة تراثنا

على فكره ابو مشاري ترا واجد من مصطلحاتكم تشابهنا تشابه 90% منها

وبالذات شخاط=مشخاط عندنا احسب ما يقولها غيرنا:o


سوري عالاطاله


مريــــــــــــــــــــــــــــة شمر


ســـــــــــــاس جنيه